Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2014

 ONDROFENITORI

Yehovah yepi mi trutru

Yehovah yepi mi trutru

Syatu baka di mi nanga Evelyn trow, wi saka fu wan loko na Hornepayne, wan pikin foto na wan farawe presi na noordsei fu Ontario, na ini Kanada. A ben de frukufruku mamanten èn a ben kowru srefisrefi. Wan brada fu a foto disi kon teki wi èn baka di wi nyan wan steifi nyanyan makandra nanga en, en wefi nanga a boi fu en, wi waka na ini a snew fu go preiki oso fu oso. A bakadina dati mi hori mi fosi lezing leki kring-opziener. Wi ben de na a konmakandra nanga wi feifi. Nowan tra sma kon.

FU TAKI en leti, mi no ben firi wan fasi taki wan tu sma nomo ben de na a lezing dati di mi hori na ini 1957. Sensi di mi ben yongu mi ben e syensyen. Mi ben syen so te taki mi ben abi a gwenti fu go kibri te sma ben kon na wi oso, srefi te mi ben sabi den.

Sobun, a sa fruwondru yu kande taki mi ben kisi furu grani na ini Yehovah en organisâsi pe mi ben abi fu taki nanga furu sma, awinsi den ben de mati noso sma di mi no sabi. Fa a kan taki wan sma di e syensyen so, ben man du den sani disi? We, mi no du en nanga mi eigi krakti, ma ala ten Yehovah yepi mi fu tyari mi frantwortu. A du leki fa a taki: „Mi o meki yu kon tranga. Mi o yepi yu trutru. Iya, mi o hori yu nanga mi reti-anu fu retidu” (Yes. 41:10). Wan fu den moro prenspari fasi fa Yehovah yepi mi, na taki a meki Kresten brada nanga sisa horibaka gi mi. Kon meki mi fruteri yu fu wan tu fu den. Mi o bigin na a ten di mi ben de wan boi.

A BEN GEBROIKI WAN BIJBEL NANGA WAN PIKIN BLAKA BUKU

Na a presi pe mi famiri ben e libi na zuid-westsei fu Ontario

Wi famiri ben e libi na zuid-westsei fu Ontario na wan presi pe wi ben e kweki meti èn prani sani. Na wan moi sonde mamanten na ini 1940, Elsie Huntingford kon preiki na wi oso. Di a sisa naki na wi doro, dan mi mama go luku suma na en, fu di mi papa ben e syensyen leki mi. Mi nanga mi papa ben e sidon na inisei e arki. Fu di mi papa ben denki taki Sisa Huntingford  kon seri sani èn taki mi mama ben wani bai sani di wi no ben abi fanowdu, meki mi papa opo go na a doro fu taigi a sisa taki wi no wani noti. Sisa Huntingford aksi en: „Un no wani studeri Bijbel?” Mi papa piki en: „Efu na dati, dan wi wani iya.”

Sisa Huntingford no ben kan kon na wan moro bun ten. Mi papa nanga mama ben de fayafaya na ini wan kerki di nen United Church of Canada. Syatu bifo dati den ben bosroiti fu gowe libi a kerki. Fu san ede? We, a domri ben anga wan lijst na ini kerki nanga a nen fu ala den sma di ben e gi moni. Na tapusei fu a lijst yu ben abi a nen fu den sma di ben e gi furu moni èn baka dati yu ben kisi a nen fu den wan di no ben e gi so furu. Fu di mi papa nanga mama ben pôti, meki a nen fu den ben de te na ondrosei fu a lijst. Wan tra domri fu a kerki taigi den taki a no ben bribi den sani di a ben e leri sma. Ma na fu di a no ben wani lasi en wroko, meki a ben leri sma den sani dati. Sobun, aladi wi gowe libi a kerki, toku wi ben e suku wan fasi fu leri moro fu Gado.

Fu di a wroko fu Yehovah Kotoigi ben tapu na ini Kanada, meki Sisa Huntingford gebroiki Bijbel nomo te a ben e studeri nanga wi osofamiri èn son leisi a ben gebroiki wan tu sani tu di a ben skrifi na ini wan pikin blaka buku. Bakaten di a kon si taki wi no ben o taigi skowtu taki a ben e kon na wi, a bigin tyari buku kon fu leri wi moro fu Bijbel. Ibri leisi te wi ben kaba studeri, wi ben e kibri den buku bun. *

Di wan sma kon na wi oso fu preiki, mi papa nanga mama arki èn den teki dopu na ini 1948

Aladi sma ben e gens a wroko èn furu problema ben de, toku Sisa Huntingford tan preiki a bun nyunsu fayafaya. A ben naki mi ati trutru fu si taki a ben tan wroko fayafaya èn dati yepi mi fu teki wan bosroiti fu go na ini a tru anbegi. Wán yari baka di mi papa nanga mama tron Kotoigi fu Yehovah, mi teki dopu fu sori taki mi gi misrefi abra na Gado. Dati ben de tapu 27 februari 1949 di mi ben abi 17 yari. Den dopu mi na ini wan bigi isri baki pe meti gwenti dringi watra. Baka dati mi ben wani go na ini a furuten diniwroko.

YEHOVAH YEPI MI FU ABI DEKI-ATI

Mi fruwondru di mi kisi wan kari fu go na Betel na ini 1952

Na a bigin, mi ben e tweifri fu pionier. Wan pisi ten mi ben abi tu wroko. Mi ben e wroko na  wan bangi èn na wan kantoro, fu di mi ben feni taki mi ben musu abi moni fosi fu kan sorgu misrefi te mi ben o pionier. Ma leki yonguwan mi no ben abi furu ondrofeni èn dati meki a ben e pasa taki fa mi kisi mi moni, na so a ben klari. Dati meki wan brada di nen Ted Sargent taigi mi fu abi deki-ati èn fu frutrow na tapu Yehovah (1 Kron. 28:10). Na a deki-ati dati meki taki mi bigin pionier na ini november 1951. Mi ben abi 40 Amerkan dala nomo, wan owru baisigri nanga wan nyun tas. Ma Yehovah sorgu ala ten gi den sani di mi ben abi fanowdu. Mi breiti taki Ted gi mi deki-ati fu bigin nanga a pionierwroko. Baka dati mi kisi moro blesi.

Wan neti na a kaba fu augustus 1952, den brada fu Toronto bel mi. A bijkantoro fu Yehovah Kotoigi na Kanada aksi mi fu bigin wroko na Betel na ini september. Aladi mi ben e syen èn mi no ben go na a bijkantoro noiti ete, toku mi ben breiti fu di tra pionier ben fruteri mi moi sani fu Betel. Di mi doro drape, wantewante mi ben lobi a presi.

„SORI DEN BRADA NANGA SISA TAKI YU LOBI DEN”

Tu yari baka di mi doro na Betel, mi teki a presi fu Bill Yacos èn mi tron grupu-dinari (now den e kari en fesiman fu den owruman) fu wan fu den gemeente na Toronto. Fu di mi ben abi 23 yari nomo, meki mi ben firi leki wan pranasi boi di no sabi noti. Ma fu di Brada Yacos ben abi sakafasi, meki a sori mi na wan lobi-ati fasi fa mi ben musu du a wroko. Mi kan taigi yu taki Yehovah yepi mi trutru.

Brada Yacos ben de wan stampu brada di ben lobi lafu èn a ben e broko en ede nanga sma. A ben lobi den brada nanga sisa èn den ben lobi en tu. A ben abi a gwenti fu go luku den, ma a no ben e du dati nomo te den ben abi problema. Bill Yacos gi mi deki-ati fu du a srefi èn fu wroko makandra nanga den brada nanga sisa na ini a preikiwroko. A taigi mi: „Ken, sori den brada nanga sisa taki yu lobi den.” A taki tu dati te wi du dati, dan wi brada nanga sisa o man gi wi pardon moro makriki.

MI WEFI TAN SORI LOBI GI YEHOVAH ÈN GI MI

Sensi yanuari 1957, Yehovah yepi mi na wan spesrutu fasi. A mun dati mi trow nanga Evelyn, wan sisa fu a di fu 14 klas fu a Gileadskoro. Fosi wi trow, a ben e pionier na ini a distrikt Quebec pe sma e taki Fransitongo. Na a ten dati Lomsu Kerki ben abi furu makti na ini Quebec. Sobun, a no ben makriki gi Evelyn fu preiki drape, ma fu di a ben lobi Yehovah, meki a no tapu nanga a preikiwroko.

Mi nanga Evelyn trow na ini 1957

Evelyn tan horibaka gi mi tu (Ef. 5:31). Son leisi disi no ben makriki. Fu eksempre, baka di wi trow, wi ben abi na prakseri fu go wan tu dei nanga fakansi na Florida na ini Amerkankondre. Ma wi ben trow wán dei nomo di a bijkantoro aksi mi fu go na Kanada Betel gi wan konmakandra di ben o teki wán wiki. A no de fu taki dati a konmakandra disi bruya a fakansi fu wi, ma mi nanga Evelyn ben wani du ala san Yehovah aksi wi fu du. Dati meki wi no go moro na Florida. A wiki dati Evelyn go na ini a preikiwroko krosibei fu a bijkantoro.  Aladi a kontren drape ben de tra fasi leki Quebec, toku a horidoro.

Na a kaba fu a wiki dati, wan sani pasa di meki mi fruwondru. Den aksi mi fu go na noordsei fu Ontario leki kring-opziener. Mi no ben trow so langa ete, mi ben abi 25 yari nomo èn mi no ben abi furu ondrofeni. Ma fu di wi ben frutrow na tapu Yehovah, meki wi go. Na wan fu den moro kowru dei na ini Kanada, wi go na ini wan loko, makandra nanga wan tu kring-opziener di ben e drai go baka na a kontren pe den ben e dini. Den gi wi furu deki-ati. Wan fu den brada taigi wi srefi fu go sribi na ini a pikin kamra di a ben yuru na ini a loko. Na so fasi wi no ben o abi sidon na tapu wan bangi na ini a loko heri neti. A tra mamanten, sowan 15 dei baka di wi trow, wi fisiti wan pikin grupu na Hornepayne, soleki fa mi ben fruteri kaba.

Ma ete wan tu sani ben o kenki gi mi nanga Evelyn. Di mi ben e wroko leki distrikt-opziener na a kaba fu 1960, mi kisi a kari fu go na a di fu 36 klas fu a Gileadskoro di ben o hori 10 mun langa. A ben o bigin na a fosi pisi fu februari 1961 na Brooklyn, New York. A no de fu taki dati mi ben breiti, ma mi ben lasi-ati pikinso di mi kon si taki Evelyn no kisi a kari fu kon nanga mi. Ma neleki den wefi fu den tra brada di ben kisi wan kari tu, na so Evelyn ben musu skrifi wan brifi fu sori taki a ben de klariklari fu tan sondro mi sowan tin mun langa. Aladi Evelyn krei fu a tori disi, toku a ben feni en bun taki mi go na a skoro èn a ben breiti taki mi ben o kisi na okasi fu leri wan tu prenspari sani na a Gileadskoro.

Na ini a pisi ten dati, Evelyn ben e wroko na a bijkantoro na Kanada. A ben kisi a grani fu libi na ini wan kamra nanga wi lobi sisa Margaret Lovell. A no de fu taki dati mi nanga Evelyn ben e misi makandra trutru. Ma Yehovah yepi wi fu du a wroko di wi ben kisi fu du na a ten dati. Evelyn no ben de nomonomo taki wi tan makandra, ma a ben de klariklari fu meki Yehovah nanga en organisâsi gebroiki mi. A sani disi naki mi ati trutru.

Baka di mi ben de na a Gileadskoro sowan dri mun, Brada Nathan Knorr gi mi wan spesrutu kari. Na a ten dati a ben e teki fesi na ini a wroko di ben e du na heri grontapu. A aksi mi efu mi ben wani gowe libi a Gileadskoro èn drai go baka na a bijkantoro fu Kanada fu dini wan pisi ten leki leriman fu a Kownukondre Diniwroko-skoro. Brada Knorr taigi mi taki mi no ben abi fu go. Efu mi ben wani, mi ben kan klari a Gileadskoro èn baka dati mi ben o man du a zendelingwroko kande. A taigi mi tu taki efu mi ben o bosroiti fu drai go baka na Kanada, dan kande noiti moro mi ben o man go baka na a Gileadskoro èn mi no ben o de seiker tu san den brada ben o meki mi du. A taigi mi fu taki a tori nanga mi wefi fosi mi teki wan bosroiti.

Ma fu di Evelyn ben taigi mi kaba fa a e denki fu den grani di wi kisi, meki mi taigi Brada Knorr: „Ala sani di na organisâsi fu Yehovah wani taki wi du, wi breiti fu du.” Wi no ben de nomonomo fu  du san wi srefi wani, ma ala ten wi feni taki wi musu go awinsi pe na organisâsi fu Yehovah seni wi go.

Sobun, na ini april 1961 mi gowe libi Brooklyn èn mi drai go baka na Kanada fu gi leri na a Kownukondre Diniwroko-skoro. Bakaten wi tron memre fu a Betelfamiri. Ma mi fruwondru di mi kisi wan kari fu go na a di fu 40 klas fu a Gileadskoro di ben o bigin na ini 1965. Ete wan leisi Evelyn ben musu skrifi wan brifi fu sori taki a ben agri taki wi no ben o de makandra. Ma wi ben breiti taki wan tu wiki baka dati a kisi a kari tu fu go na a skoro makandra nanga mi.

Baka di wi doro na a Gileadskoro, Brada Knorr taigi wi taki den ben o seni wi go na Afrika makandra nanga den tra studenti di ben de na ini a klas pe den ben e taki Fransitongo. Ma baka di wi klari a skoro, den seni wi go baka na Kanada. Drape mi kisi a grani fu tron bijkantoro-opziener (now den e taki fesiman fu a Bijkantoro Komte). Fu di mi ben abi 34 yari nomo, meki mi taigi Brada Knorr: „Mi yongu ete.” Ma a sori mi taki mi no ben abi fu broko mi ede. Di mi bigin nanga a wroko dati, mi pruberi wantewante fu suku rai na brada na Betel di ben moro owru èn di ben abi moro ondrofeni. Mi ben e du dati ala ten, fosi mi teki prenspari bosroiti.

BETEL NA WAN PRESI FU LERI SANI FU TRAWAN ÈN FU GI LERI

Betel gi mi moi okasi fu leri sani fu trawan. Mi e lespeki den tra memre fu a Bijkantoro Komte èn mi abi furu warderi gi den. Mi leri furu tu fu den hondrohondro Kresten brada nanga sisa di mi miti dyaso na Betel èn na ini den difrenti gemeente pe wi ben e dini, awinsi den yongu noso owru.

Mi e teki fesi na a deitekst takimakandra fu a Betelfamiri fu Kanada

Betel gi mi na okasi fu gi trawan leri èn fu tranga a bribi fu den. Na apostel Paulus ben taigi Timoteyus: „Yu musu tan du den sani di yu leri.” A ben taki tu: „Fruteri den man di e gi yesi na Gado ala ten, den sani di mi taigi yu èn di furu sma e taki fu dati. Dan den man disi srefi o kon koni nofo fu gi tra sma leri” (2 Tim. 2:2; 3:14). Son leisi tra Kresten brada nanga sisa aksi mi san mi leri na ini den 57 yari di mi de na Betel. Mi e taigi den nomo: „De klariklari fu du san Yehovah en organisâsi wani yu fu du, no draidrai èn frutrow na tapu Yehovah fu a yepi yu.”

A gersi leki na esde mi doro na Betel leki wan yonguman di ben e syensyen èn di no ben abi ondrofeni. Ma na ini ala den yari, Yehovah ’grabu mi reti-anu hori’. Nofo tron a meki lobi-ati brada nanga sisa yepi mi te dati ben de tranga fanowdu. Na so a taigi mi: „No frede. Misrefi o yepi yu.”Yes. 41:13.

^ paragraaf 10 Tapu 22 mei 1945, lanti fu Kanada gi wi primisi fu preiki baka.