Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2014

Yu e go na fesi makandra nanga Yehovah en organisâsi?

Yu e go na fesi makandra nanga Yehovah en organisâsi?

„Den ai fu Yehovah e si den reti-ati sma.”1 PETR. 3:12.

1. Sortu organisâsi Yehovah teki na presi fu a pipel Israel? (Luku a prenki na a bigin fu na artikel.)

YEHOVAH na a sma di seti a Kresten gemeente na ini a fosi yarihondro èn na en seti a tru anbegi baka na ini a ten disi. Soleki fa wi ben si kaba na ini a tra artikel, dan na ini a fosi yarihondro Gado teki den bakaman fu Krestes fu tron wan pipel gi en nen. Na so a seti wan nyun organisâsi di teki a presi fu a pipel Israel di ben drai baka gi Yehovah. Gado blesi den sma fu a nyun organisâsi disi èn den no lasi libi di Yerusalem kisi pori na ini a yari 70 (Luk. 21:20, 21). Den sani di pasa na ini a fosi yarihondro e sori san o pasa nanga den futuboi fu Yehovah na ini a ten disi. Dyonsro a grontapu fu Satan o kon na wan kaba, ma Gado en organisâsi no o kisi pori. A pipel fu Gado o pasa den lasti dei libilibi (2 Tim. 3:1). Fa wi kan de seiker taki disi o pasa?

2. San Yesus taki fu a „bigi banawtu” èn fa disi o bigin?

2 Yesus fruteri san ben o pasa na ini den lasti dei. A taki: „Wan bigi banawtu o de. Noiti ete so wan ten ben de sensi a  bigin fu grontapu teleki now èn noiti moro so wan ten o kon baka” (Mat. 24:3, 21). A bigi banawtu disi o bigin te Yehovah o pori „Babilon a Bigiwan”, dati na ala den falsi bribi na heri grontapu. A o gebroiki libisma tirimakti fu du dati (Openb. 17:3-5, 16). San o pasa baka dati?

ARMAGEDON O BIGIN TE SATAN KON FETI NANGA GADO PIPEL

3. Baka te falsi bribi kisi pori, dan san o pasa nanga a pipel fu Yehovah?

3 Baka te falsi bribi kisi pori, Satan nanga en grontapu o hari kon feti nanga den futuboi fu Yehovah. Fu eksempre, disi na san Bijbel e taki fu „Gok fu a kondre Magok”: „Sondro misi yu o hari kon feti nanga den. Leki wan bigi winti yu o kon na ini a kondre. Yu nanga ala den legre fu yu, sosrefi den furu pipel di de nanga yu, o kon de leki wolku di e tapu a kondre.” Fu di Yehovah Kotoigi no abi legre èn den na wan pipel di no lobi feti, meki a o gersi leki yepi no de gi den. Ma a o de wan bigi fowtu fu hari kon feti nanga den!Esek. 38:1, 2, 9-12.

4, 5. San Yehovah o du te Satan o pruberi fu pori den futuboi fu En?

4 Te Satan nanga den bakaman fu en o hari kon feti nanga a pipel fu Yehovah, dan a o de leki nanga Yehovah srefi den kon feti. (Leisi Sakaria 2:8.) Ma san Yehovah o du? A no o gi pasi taki sma pori a pipel fu en. Wantewante a Moro Heiwan fu hemel nanga grontapu o frulusu en pipel. A moro bigi sani di a o du te a frulusu den na taki a o pori Satan grontapu na ini Armagedon. Dati na ’a feti di o feti na a bigi dei fu Gado na Almaktiwan’.Openb. 16:14, 16.

5 Luku san Bijbel profeititori e taki fu Armagedon: „’Mi, Yehovah, o tyari den pipel go na fesi krutu. Na mi o krutu ala sma èn mi o meki feti-owru kiri den ogri sma.’ Yehovah di e tiri den legre taki: ’Luku! Wan rampu o miti a wan pipel baka a trawan. Fu den moro farawe presi fu grontapu wan bigi winti o wai kon. Den dedeskin fu den sma di Yehovah kiri na a dei dati o panya fu a wan sei fu grontapu te na a tra sei. Sma no o krei gi den, èn den no o tyari den go beri, ma den o libi den fu tron mèst na tapu a gron’” (Yer. 25:31-33). Armagedon o tyari wan kaba kon na a ogri grontapu disi. Satan grontapu no o de moro, ma a pisi fu Yehovah en organisâsi na grontapu o tan.

FU SAN EDE NA ORGANISÂSI FU YEHOVAH E TAN GRO NA INI A TEN DISI?

6, 7. (a) Pe a „bigi ipi” sma komoto? (b) Fa a wroko go na fesi na ini den yari di pasa?

6 Na ini a ten disi, Gado en organisâsi e tan go na fesi na grontapu fu di Gado feni den sma bun di de na ini. Bijbel e gi wi a dyaranti: „Den ai fu Yehovah e si den reti-ati sma èn den yesi fu en e yere den fayafaya begi fu den” (1 Petr. 3:12). Den reti-ati sma di o „komoto na ini a bigi banawtu” o de „wan bigi ipi”, iya, den o de wan bun bigi grupu (Openb. 7:9, 14). Yu e si yusrefi kaba leki wan fu den sma di o pasa „a bigi banawtu” libilibi?

7 Pe a bigi ipi sma disi komoto? Yesus ben taki dati wan sani ben o pasa na ini den lasti dei di ben o meki taki den sma disi kon na wán. A ben taki: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mat. 24:14). Na ini den lasti dei disi, dati na a moro prenspari wroko di Gado en organisâsi e du. Fu di Yehovah Kotoigi e preiki na heri grontapu  èn den e gi sma leri, meki milyunmilyun sma leri fu anbegi Gado „nanga yepi fu a santa yeye èn nanga yepi fu san tru” (Yoh. 4:23, 24). Fu eksempre, na ini tin yari ten, na ini den dienstyari 2003 te go miti 2012, moro leki 2.707.000 sma teki dopu fu sori taki den gi densrefi abra na Gado. Na heri grontapu yu abi now moro leki 7.900.000 Kotoigi èn ibri yari milyunmilyun sma e kon na a Memrefesa. Wi no e meki bigi taki wi de nanga furu sma. Ma a de krin taki dei fu dei a bigi ipi e kon moro bigi èn ibri yari moro nanga moro sma e kon na ini, fu di na ’Gado e meki sani gro’.1 Kor. 3:5-7.

8. Fu san ede Yehovah en organisâsi na ini a ten disi e gro so esi?

8 Moro nanga moro sma e tron futuboi fu Gado fu di na Yehovah srefi e horibaka gi den Kotoigi fu en. (Leisi Yesaya 43:10-12.) A profeititori fu Yesaya ben taki fu den lasti dei: „A pikin grupu o tron wan grupu fu dusun èn a pikin pipel o tron wan makti pipel. Mi, Yehovah, o meki disi pasa esi-esi te a ten doro” (Yes. 60:22). Wan ten ben de taki den salfu Kresten ben de leki wan „pikin grupu”, ma a grupu fu den kon moro bigi di tra salfuwan kon na ini na organisâsi fu Gado (Gal. 6:16). Fu di Yehovah blesi a preikiwroko na ini den yari di pasa, meki milyunmilyun sma di abi a howpu fu libi na grontapu tron memre fu a grupu disi tu.

SAN YEHOVAH E AKSI FU WI

9. San wi musu du efu wi wani abi a bun tamara di Gado Wortu e pramisi wi?

9 Awinsi wi na salfu Kresten, noso memre fu a bigi ipi, wi kan abi wan bun tamara na ini a grontapu di Gado Wortu e pramisi wi. Ma efu wi wani de drape, dan wi musu du san Yehovah e aksi fu wi (Yes. 48:17, 18). Luku fa sani ben de nanga den Israelsma di ben abi a Wet fu Moses. Gado ben gi a pipel a Wet fu kibri den èn fu sori den fa fu tyari densrefi te a abi fu du nanga sani soleki seks, bisnis, a kweki fu pikin èn a fasi fa den ben e libi nanga tra sma (Eks. 20:14; Lef. 19:18, 35-37; Deut. 6:6-9). Te wi e du san Gado e aksi fu wi, dan wi o kisi wini tu. Boiti dati, wi no feni taki a de wan hebi fu du en wani. (Leisi 1 Yohanes 5:3.) Fu taki en leti, neleki fa a Wet ben e kibri den Israelsma, na so wi e kisi kibri tu te wi e hori den wet fu Yehovah Gado èn te wi e teki a rai fu en. Boiti dati, a e yepi wi tu fu „abi wan tranga bribi”.Tit. 1:13.

10. Fu san ede wi musu poti ten na wan sei fu studeri Bijbel èn fu hori na Osofamiri Anbegi ibri wiki?

10 A pisi fu Yehovah en organisâsi na grontapu e go na fesi na difrenti fasi. Fu eksempre, ibri tron wi e kon frustan den tru tori fu Bijbel moro krin. Disi no musu fruwondru wi, fu di „a pasi fu den reti-ati sma de leki a leti di e bigin skèin na musudei. Safrisafri a e kon moro krin, teleki a de leki a brenki leti fu son na mindridei” (Odo 4:18). Ma a bun fu aksi wisrefi: ’Mi sabi san kenki na ini a fasi fa wi e frustan son tekst fu Bijbel now? Mi abi a gwenti fu leisi Bijbel ibri dei? Mi e leisi ala den nyun tijdschrift nanga buku di wi e kisi? Mi nanga mi osofamiri e hori na Osofamiri Anbegi ibri wiki?’ Furu fu wi o agri taki a no muilek fu du den sani disi. Nofo tron na ten nomo wi musu poti na wan sei fu du den. A prenspari trutru fu kisi soifri sabi fu Bijbel, fu du san Bijbel e taki èn fu go na fesi makandra nanga Yehovah en organisâsi, spesrutu now di a bigi banawtu e kon moro krosibei.

11. Fu san ede a pipel fu Yehovah e go na den alawiki konmakandra nanga den bigi konmakandra?

 11 Yehovah en organisâsi e gi wi deki-ati fu teki a rai fu Paulus: „Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko. Meki wi no misi konmakandra, soleki fa son sma gwenti du, ma gi makandra deki-ati o moro unu e si a dei e kon krosibei” (Hebr. 10:24, 25). Den fesa nanga den tra konmakandra di den Israelsma ben e hori ala yari ben tranga a bribi fu den. Den fesa disi soleki a spesrutu Kampufesa di ben hori na ini a ten fu Nehemia, ben de prisiri okasi tu (Eks. 23:15, 16; Neh. 8:9-18). Na so wi e kisi wini tu fu den alawiki konmakandra èn fu den bigi konmakandra. Wi musu pruberi fu de na ala den konmakandra disi fu di den e yepi wi fu tan krosibei na Yehovah èn fu de nanga prisiri te wi e du a diniwroko fu en.Tit. 2:2.

12. Fa wi musu si a Kownukondre preikiwroko?

12 Wi di de memre fu Gado en organisâsi, breiti taki wi man du „a santa wroko fu preiki a bun nyunsu fu Gado” (Rom. 15:16). Te wi e du „a santa wroko” disi, dan wi e tron sma di e „wroko makandra nanga” Yehovah, di de a Santawan (1 Kor. 3:9; 1 Petr. 1:15). Te wi e preiki a bun nyunsu, dan wi e gi grani na a santa nen fu Yehovah. A de wan bigi grani fu preiki „a tumusi moi bun nyunsu fu a koloku Gado”.1 Tim. 1:11.

13. San wi musu du efu wi wani tan na libi èn efu wi wani tan abi wan bun matifasi nanga Yehovah?

13 Yehovah wani taki sani go bun nanga wi. Dati meki a wani taki wi tan krosibei fu en èn fu en organisâsi. Moses ben taigi den Israelsma: „Meki ala sma na hemel nanga grontapu de mi kotoigi tide. Meki den sabi taki mi gi unu na okasi fu bosroiti efu unu wani libi noso dede, efu unu wani kisi blesi noso fluku. Ma grantangi, teki a libi, dan unu nanga un bakapikin o tan na libi. Unu o tan na libi efu unu lobi Yehovah un Gado, efu unu arki en sten, èn efu unu e tai hori na en. Bika na Yehovah gi unu libi èn na en o meki taki unu o libi langa na ini a kondre di a sweri fu gi un afo Abraham, Isak, nanga Yakob” (Deut. 30:19, 20). Efu wi wani tan na libi, dan wi musu du Yehovah wani, wi musu lobi en, wi musu gi yesi na en èn wi musu tai hori na en.

14. San wan brada taki fu Gado en organisâsi?

14 Brada Pryce Hughes di kon na ini a tru anbegi fosi 1914, tai hori na Yehovah èn na en organisâsi en heri libi langa. Di a ben e fruteri en ondrofenitori, a taki dati a moro prenspari sani di a leri na taki a ben musu tan krosibei na Yehovah en organisâsi èn taki a no ben musu frutrow na tapu a denki fu libisma. Disi yepi en fu horidoro di a kisi tesi. Brada Hughes e taki: „Mi teki a bosroiti fu tan krosibei na Gado en organisâsi di noiti no drai baka gi en. Nowan tra fasi no de fa wan sma kan kisi blesi fu Yehovah.”

TAN GO NA FESI MAKANDRA NANGA GADO EN ORGANISÂSI

15. Gi wan eksempre fu Bijbel di e sori fa wi musu si en te wan kenki e kon na ini a fasi fa wi e frustan son sani fu Bijbel.

15 Efu wi wani taki Yehovah feni wi bun èn taki a blesi wi, dan wi musu horibaka gi en organisâsi. Te sani e kenki na ini a fasi fa wi e frustan son Bijbeltekst, dan wi musu de klariklari fu kenki wi denki tu. Fu eksempre: Baka di Yesus dede, yu ben abi dusundusun Dyu Kresten di ben hori a Wet fayafaya èn a ben muilek gi den fu kenki (Tori 21:17-20).  Den brifi di Paulus skrifi gi den Hebrewsma yepi den fu kon si taki a no den ’ofrandi di den ben e tyari soleki fa a Wet e taki’ ben meki den kon santa, ma na „fu di Yesus Krestes gi en skin leki wan ofrandi wán leisi nomo fu ala ten” (Hebr. 10:5-10). A no de fu taki dati furu Dyu Kresten teki a rai fu Paulus èn den kenki a denki fu den. Wi srefi musu studeri Bijbel fayafaya èn te kenki e kon na ini a fasi fa wi e frustan son sani fu Gado Wortu noso fu a preikiwroko, dan sakafasi o yepi wi fu si sani tra fasi.

16. (a) Sortu blesi o meki taki a libi na ini a nyun grontapu o switi? (b) San yu wani si na ini a nyun grontapu?

16 Yehovah o tan blesi ala sma di e tan gi yesi na en èn na en organisâsi. Den salfu Kresten di horidoro te na a kaba o kisi a moi grani fu tiri makandra nanga Krestes na ini hemel (Rom. 8:16, 17). Efu wi abi a howpu fu libi na grontapu, dan pruberi fu si fa a libi o de na ini Paradijs. Wi di de memre fu Yehovah en organisâsi e prisiri fu fruteri trawan fu a nyun grontapu di Gado pramisi wi (2 Petr. 3:13). Psalm 37:11 e taki: „Den safri-ati sma o kisi grontapu èn den o prisiri srefisrefi, fu di freide o de pasa marki.” Boiti dati, sma „o bow oso èn den srefi o tan na ini” èn den o prisiri „fu a wroko di den du” (Yes. 65:21, 22). Sma no o pina trawan moro èn nowan sma o pôti noso de nanga angri (Ps. 72:13-16). Babilon a Bigiwan no o kori sma moro fu di a no o de moro (Openb. 18:8, 21). Den dedesma o kon na libi baka èn den o kisi na okasi fu libi fu têgo (Yes. 25:8; Tori 24:15). Den milyunmilyun sma di gi densrefi abra na Yehovah abi wan moi howpu trutru. Te wi e sorgu taki wi tan abi wan bun matifasi nanga Yehovah èn wi e tan go na fesi makandra nanga en organisâsi, dan wi o si fa den moi pramisi disi o kon tru.

Yu e si yusrefi na ini Paradijs? (Luku paragraaf 16)

17. Fa wi musu si na anbegi fu Yehovah èn fa wi musu si na organisâsi fu en?

17 A kaba fu a grontapu disi de krosibei trutru. Sobun, meki wi tan abi wan tranga bribi èn sori taki wi e warderi ala den sani di Gado seti gi wi fu anbegi en. Na so a psalm skrifiman David ben denki di a singi: „Wán sani mi aksi Yehovah èn dati na san mi wani trutru: Fu mi kan tan na ini na oso fu Yehovah, solanga mi de na libi, fu mi kan si taki Yehovah e du bun èn fu mi kan luku a tempel fu en nanga prisiri” (Ps. 27:4). Meki wi alamala tai hori na Gado èn meki wi tan go na fesi makandra nanga Yehovah en organisâsi.