Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2014

Du bun gi sma na ini a preikiwroko

Du bun gi sma na ini a preikiwroko

„Ala sani di unu wani meki sma du gi unu, na dati un musu du gi den tu.”MAT. 7:12.

1. A prenspari fu du bun gi sma na ini a preikiwroko? Gi wan eksempre. (Luku a prenki na a bigin fu na artikel.)

WAN TU yari pasa, wan Kresten trowpaar na Fidyi ben e gi sma wan kari gi a Memrefesa. Di den ben e taki nanga wan uma na dorosei fu en oso, alen bigin fadon. Dan a brada nanga wefi gi na uma wan fu den prasoro fu den èn den ben e tanapu na ondro a tra prasoro. A trowpaar ben breiti di den si taki na uma kon na a Memrefesa. Na uma taki dati a no sabi moro san den Kotoigi taigi en a dei dati, ma a bun di den du gi en naki en ati so te taki a ben musu fu go na a Memrefesa. A trowpaar disi teki a rai di Yesus gi wi fu du gi sma san wi wani taki den du gi wi.

2. Sortu rai Yesus gi wi èn fa wi kan teki a rai disi?

2 Sortu rai Yesus gi wi? A taki: „Ala sani di unu wani meki sma du gi unu, na dati un musu du gi den tu” (Mat. 7:12). Fa wi kan teki a rai disi? Wi musu du tu sani. Na a fosi presi wi musu aksi wisrefi: ’Efu mi ben de a sma, dan san mi ben sa wani taki a du gi mi?’ Baka dati wi musu du ala san wi man fu du a srefi gi a sma.1 Kor. 10:24.

3, 4. (a) Fruteri fu san ede wi no musu du bun gi wi Kresten brada nanga sisa wawan. (b) San wi o taki na ini na artikel disi?

 3 Nofo tron wi e du gi wi Kresten brada nanga sisa san wi wani den du gi wi. Ma Yesus no ben taki dati na gi Kresten wawan wi musu du bun. Fu taki en leti, a gi wi a rai fu du bun gi ala sma, srefi gi den feanti fu wi. (Leisi Lukas 6:27, 28, 31, 35.) Efu wi musu du bun gi den feanti fu wi, dan wi musu du bun tu gi sma di wi e miti na ini a preikiwroko. Furu fu den kan de sma ’di abi a yoisti denki fu man kisi têgo libi’.Tori 13:48.

4 Now wi o taki fu fo aksi di wi kan hori na prakseri te wi e taki nanga sma na ini a preikiwroko: Suma na den sma di mi e miti? Pe mi e taki nanga den? O ten na a moro bun ten fu taki nanga den? Fa mi musu taki nanga den? Wi o si taki den aksi disi kan yepi wi fu hori den firi fu den sma di wi e miti na prakseri èn fu fiti wisrefi na den.1 Kor. 9:19-23.

SUMA NA DEN SMA DI MI E MITI?

5. Sortu aksi wi musu hori na prakseri?

5 Ala sma di wi e miti na ini a preikiwroko de tra fasi, den alamala kweki tra fasi èn den abi den eigi problema (2 Kron. 6:29). Te yu e pruberi fu taki fu a bun nyunsu nanga wan sma, dan aksi yusrefi: ’Efu a ben de mi, dan fa mi ben o wani a sma disi denki fu mi? Mi ben o feni en bun taki a bigin krutu mi, noso denki takru fu mi sondro fu sabi mi? Noso mi ben o wani taki a kon sabi fosi suma na mi?’ Den aksi disi kan yepi wi fu hori na prakseri taki nowan sma de a srefi.

6, 7. San wi musu du te wan sma di wi e miti na ini a preikiwroko kisi atibron?

6 Fu eksempre, wi leki Kresten e meki muiti fu ’taki na wan switi fasi ala ten’ soleki fa Bijbel e leri wi (Kol. 4:6). Ma fu di wi na sondusma, meki a e pasa son leisi taki wi e taki sani di wi no ben musu taki (Yak. 3:2). Efu wi taigi wan sma wan hati sani, kande fu di wi no e firi bun, dan wi no ben o wani taki a sma denki taki wi grofu noso taki wi no e hori en firi na prakseri. Wi ben o wani taki a sma frustan fu san ede wi du so. A no de so dan, taki wi musu hori den firi fu trawan na prakseri tu?

7 Efu yu e miti wan sma di ati e bron noso di e taki grofu nanga yu, dan kande yu kan pruberi fu frustan fu san ede a e du so. Kande a abi problema na wroko noso na skoro. Noso kande a abi wan seryusu siki. A pasa furu leisi taki wan sma di kisi atibron, kon kenki fu di den Kotoigi sori en switifasi èn den lespeki en.Odo 15:1; 1 Petr. 3:15.

8. Fu san ede wi musu preiki a Kownukondre boskopu gi „ala sortu sma”?

8 Na ini a preikiwroko wi e miti ala sortu sma. Fu eksempre, na ini den yari di pasa, moro leki 60 ondrofenitori kon na ini den Waktitoren-artikel di nen „Bijbel e kenki sma libi”. Sonwan fu den sma di kari na ini den ondrofenitori disi ben de fufuruman fosi, noso sopiman, ogriman, nanga sma di ben e gebroiki drugs. Trawan ben de politiekman, kerki fesiman, noso sma di ben e prakseri den wroko nomo. Sonwan fu den ben libi wan morsu libi. Ma den alamala yere a bun nyunsu, den bigin studeri Bijbel, den kenki den libi èn den kon na ini a tru anbegi. Dati meki noiti wi musu  denki taki son sma no o arki a Kownukondre boskopu. (Leisi 1 Korentesma 6:9-11.) Na presi fu dati, wi e hori na prakseri taki „ala sortu sma” kan kon na ini a tru anbegi.1 Kor. 9:22.

PE MI E TAKI NANGA SMA?

9. Fu san ede wi musu sori lespeki te wi de na sma oso?

9 Pe wi e taki nanga sma te wi e preiki? Nofo tron wi e miti den na den oso (Mat. 10:11-13). Ala sma lobi den oso. Dati meki wi wani taki trawan sori lespeki te den e kon na wi oso noso te den de na wi dyari. Wi e si wi oso leki wan presi pe wi kan du wi eigi sani èn pe ogri no o man miti wi so makriki. Sobun, na ini a preikiwroko wi musu sori lespeki tu te wi de na sma oso.Tori 5:42.

10. San wi kan du fu no meki den ososma kisi atibron?

10 Na ini a ten disi wan lo sma e du ogri nanga trawan. Dati meki furu ososma no e frutrow trawan di den no sabi (2 Tim. 3:1-5). Wi musu luku bun fu no tyari wisrefi na wan fasi di kan meki sma denki taki wi wani du den ogri. Fu eksempre, kon meki wi taki dati wi e naki na a doro fu wan oso. Efu nowan sma e piki, dan kande wi e kisi a firi fu luku go na ini den fensre noso fu waka lontu fu suku a sma. Fa sma na ini yu kontren ben o si a sani dati? Den ben o lobi en? San den birtisma ben o denki? A tru taki wi musu preiki a bun nyunsu finifini (Tori 10:42). Nanga wi heri ati wi wani yepi sma fu kon sabi den tru tori fu Gado (Rom. 1:14, 15). Ma a de wan koni sani fu no du noti di kan meki den ososma kisi atibron. Na apostel Paulus ben skrifi: „Na nowan fasi wi e du sani di e meki trawan fadon, so taki sma no sa taki takru fu a diniwroko fu wi” (2 Kor. 6:3). Kande sma o wani kon sabi moro fu Bijbel te den e si taki wi e sori lespeki. Fu dati ede a prenspari fu tyari wisrefi bun te wi de na sma oso noso na den dyari.Leisi 1 Petrus 2:12.

Meki wi sori lespeki ala ten te wi de na sma oso èn te wi de na den dyari (Luku paragraaf 10)

O TEN NA A MORO BUN TEN FU TAKI NANGA SMA?

11. Fu san ede wi breiti te sma e sori lespeki te a abi fu du nanga wi ten?

11 Wi leki Kresten abi furu fu du. Fu man tyari den frantwortu fu wi, wi e luku san na den moro prenspari sani èn o ten wi kan du den (Ef. 5:16; Fil. 1:10). Efu wi no man du wan fu den sani disi, dan wi feni en fruferi. Dati meki wi breiti te trawan e sori lespeki te a abi fu du nanga wi ten èn te den no e teki tumusi furu fu wi ten. Te wi e hori na prakseri taki wi musu du gi sma san wi wani den du gi wi, dan fa wi kan sori lespeki gi den sma di wi e miti na ini a preikiwroko?

12. Fa wi kan kon sabi san na a moro bun ten fu preiki gi sma na ini wi kontren?

12 Wi musu pruberi fu kon sabi san na a moro bun ten fu go preiki gi sma. O ten den sma na ini wi kontren de na oso? O ten den abi ten fu arki? A bun te wi e meki muiti fu seti sani so, taki wi kan go na den te den abi ten. Na son presi, a moro bun fu preiki lati bakadina noso na mofoneti. Efu dati de so na ini a kontren fu yu, dan san yu kan du fu preiki tu na den yuru dati? (Leisi 1 Korentesma 10:24.) Wi kan de seiker taki Yehovah o blesi a muiti di wi e du fu preiki gi sma na wan ten di bun gi den.

13. Fa wi kan sori lespeki gi ososma?

13 San moro wi kan du fu sori lespeki  gi ososma? Te wi e miti wan sma di wani arki, dan wi musu preiki bun gi en, ma wi no musu tan tumusi langa. Kande a sma poti ten na wan sei fu du wan tra sani di prenspari gi en. Efu a taki dati a abi sani fu du, dan wi kan taigi en taki wi no o tan langa, èn wi musu du san wi taki (Mat. 5:37). Te wi kaba taki nanga a sma, dan a bun fu aksi en o ten na a moro bun ten fu kon baka na en. Son preikiman e taki: „Mi ben sa wani kon baka na yu. Mi kan bel yu noso seni yu wan sms fosi mi kon?” Te wi e go na sma na wan ten di bun gi den, dan wi e teki na eksempre fu Paulus, di ’no ben e suku en eigi bun, ma a ben e suku a bun fu furu sma, so taki den ben kan kisi frulusu’.1 Kor. 10:33.

FA MI MUSU TAKI NANGA SMA?

14-16. (a) Fu san ede wi musu taigi na ososma krin san wi kon du? Gi wan eksempre. (b) San wan kring-opziener du fu kan abi bun bakapisi?

14 Kon meki wi taki dati wan sma e bel yu wan dei èn yu no sabi suma na a sma. Ma a e aksi yu sortu nyanyan yu lobi. Yu e aksi yusrefi suma na a sma èn san a wani. Kande yu e taki syatu nanga en fu di yu no wani de grofu. Ma te fu kaba yu e taigi en taki yu wani tapu a takimakandra. Na a tra sei, kon meki wi taki dati a sma e taigi yu suma na en èn a e fruteri yu taki en wroko na fu gi sma rai fa den musu nyan gosontu. Na wan switifasi a e taigi yu taki a wani fruteri yu wan tu sani di kan yepi yu. Kande disi o meki taki yu o wani arki en. Iya, wi lobi  te sma e taigi wi wantewante san den wani, ma den no musu taki grofu nanga wi. Fa wi kan sori lespeki na a srefi fasi tu gi sma di wi e miti na ini a preikiwroko?

15 Na ini furu kontren, wi musu taigi sma krin fu san ede wi kon na den. A tru taki wi sabi wan tu prenspari sani di den no sabi. Ma kon meki wi taki dati wi no e taigi wan sma suma na wi èn wi e bigin a takimakandra nanga wan aksi. Kande wi e taki wantewante: „Efu yu ben kan lusu iniwan problema na grontapu, dan sortu problema dati ben o de?” Wi sabi taki wi e poti na aksi fu di wi wani kon sabi san a sma e denki èn wi wani sori en san Bijbel e taki. Ma kande na ososma e aksi ensrefi: ’Suma na a sma disi? Fu san ede a e aksi mi a sani disi? San a wani?’ Dati meki wi musu pruberi fu meki a sma firi korostu (Fil. 2:3, 4). Fa wi kan du dati?

16 Luku san wan kring-opziener e du: Baka te a taki a sma odi, a e gi en a traktaat di nen Yu wani sabi a piki tapu den aksi disi? Baka dati a e taki: „Tide wi e gi ala sma na ini a birti a traktaat disi. A e taki fu siksi aksi di furu sma e poti. A wan disi na fu yu.” A brada disi e taki dati furu sma e firi korostu te den kon sabi fu san ede wi e kon na den. Na a fasi disi, a moro makriki nofo tron fu bigin wan takimakandra. Baka dati a kring-opziener e aksi a sma: „Oiti yu prakseri fu wan fu den aksi disi?” Efu na ososma wani taki fu wan fu den aksi, dan a brada e opo a traktaat èn a e sori en san Bijbel e taki fu a tori. Noso son leisi a brada srefi e teki wan aksi fu no meki a sma firi syen èn a e go doro nanga a takimakandra. A no de fu taki, dati furu tra fasi de fa wi kan bigin wan takimakandra. Na son presi, den ososma wani taki yu musu taki den odi fosi soleki fa a gwenti de èn baka dati yu kan taigi den fu san ede yu kon na den. A moro prenspari sani na taki wi musu fiti a takimakandra fu wi na den sma fu wi kontren so taki den wani arki san wi abi fu taki.

TAN DU BUN GI SMA TE YU DE NA INI A PREIKIWROKO

17. Soleki fa wi si na ini na artikel disi, dan san na wan tu fasi fa wi kan du bun gi sma?

17 San na wan tu fasi fa wi kan du bun gi sma te wi de na ini a preikiwroko? Wi musu hori na prakseri taki nowan ososma de a srefi. Wi e sori lespeki te wi de na den oso èn na tapu den dyari. Wi e meki muiti fu go na den sma te den de na oso èn te den abi ten fu arki wi. Wi e bigin a takimakandra fu wi na wan fasi di o meki taki sma wani arki.

18. Fu san ede a bun fu du gi sma san wi wani den du gi wi?

18 Wi e kisi furu wini te wi e du bun gi sma leki fa wi wani taki den du gi wi. Te wi e hori den na prakseri èn wi e sori switifasi, dan wi e meki wi leti skèin, wi e sori sma o prenspari a de fu du san Bijbel taki èn wi e gi grani na wi hemel Tata (Mat. 5:16). A fasi fa wi e taki nanga trawan, kan meki taki moro sma o wani kon na ini a tru anbegi (1 Tim. 4:16). Awinsi sma wani arki a Kownukondre boskopu noso den no wani arki, toku wi e firi bun fu di wi sabi taki wi e du ala san wi man fu du wi diniwroko bun (2 Tim. 4:5). Meki wi alamala du leki na apostel Paulus di ben skrifi: „Mi e du ala sani fu a bun nyunsu ede, so taki mi kan prati en nanga trawan” (1 Kor. 9:23). Fu kan du dati wi musu tan meki muiti fu du bun gi sma na ini a preikiwroko.