Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  april 2014

Yu ben sabi a sani disi?

Yu ben sabi a sani disi?

Na ini Bijbel ten sma ben abi a gwenti fu priti den krosi fu espresi. Fu san ede den ben e du dati?

BIJBEL e taki fu wan tu okasi pe sma ben priti den krosi. Te sma e leisi fu a tori disi, dan den e fruwondru kande fu di den no gwenti a sani disi. Ma den Dyu ben e du disi fu sori fa den ben e firi. Den ben gwenti priti den krosi te den no ben sabi san fu du, te den ben e sari, te den ben e syen, te den ati ben e bron noso te den ben e row.

Fu eksempre, di Ruben si taki den tra brada fu en seri Yosef leki srafu, a „priti en krosi” fu di a no ben man yepi Yosef. Den papa Yakob „priti den krosi fu en” fu di a ben denki taki wan ogri meti nyan Yosef (Gen. 37:18-35). Yob „priti en dyakti” di sma kon taigi en taki ala den pikin fu en dede (Yob 1:18-20). Wan boskopuman „en krosi ben priti” na a ten di a go na Granpriester Eli fu taigi en taki den Israelsma lasi a feti, taki den tu manpikin fu Eli lasi libi èn taki sma teki a santa kisi fu a frubontu tyari gowe (1 Sam. 4:12-17). Di sma ben e leisi a wètbuku gi Yosia, a kon si sortu sondu en pipel du. Fa a yere san skrifi na ini a wètbuku, „a priti en krosi”.2 Kow. 22:8-13.

Di Yesus ben de na fesi krutu èn Granpriester Kayafas yere san a taki, Kayafas „priti en dyakti” fu di a ben feni taki Yesus afrontu Gado, aladi Yesus no du dati (Mat. 26:59-66). Na ini owruten den Dyu leriman ben gwenti leri sma taki efu den yere trawan afrontu a nen fu Gado, dan den ben musu priti den krosi. Ma baka di a tempel fu Yerusalem kisi pori, den Dyu leriman kon nanga wan tra sani. Den ben feni taki ’efu wan sma yere taki wan trawan afrontu a nen fu Gado, a no ben abi fu priti en krosi, noso dan na waka a ben o waka lontu nanga pritipriti krosi’.

A no de fu taki dati efu wan sma no ben e sari trutru, dan gi Gado a ben de noti taki a sma priti en krosi. Dati meki Yehovah taigi en pipel taki den ’no ben musu priti den krosi, ma na den ati den ben musu priti, dan den ben kan drai kon baka na en’.Yoèl 2:13.