Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  april 2014

Yu de nanga tangi taki Yehovah e luku yu?

Yu de nanga tangi taki Yehovah e luku yu?

„Den ai fu Yehovah e si ala sani. A e si den wan di e du ogri èn den wan di e du bun.”ODO 15:3.

1, 2. Fa a fasi fa Yehovah e luku wi no de a srefi leki den kamera di sma e poti fu luku trawan?

NA INI furu kondre, sma e poti kamera na ini den wenkri fu luku san klanti e du èn efu sma e fufuru. Disi e yepi skowtu fu feni den fufuruman di ben kon fufuru na ini a wenkri. Den kamera disi e meki en moro muilek gi fufuruman fu fufuru sani sondro taki sma kisi den.

2 Ma a de so taki den kamera di sma e poti na ala sei fu luku efu trawan e du wan ogri, na a srefi leki fa wi lobi-ati Tata Yehovah e luku wi? A tru taki Bijbel e taki dati „den ai fu Yehovah e si ala sani” (Odo 15:3). Ma disi wani taki dati a e luku wi doronomo fu si efu wi e trangayesi den wèt fu en? A de so taki Gado e luku wi soso fu di a wani strafu wi te wi no e hori en wèt? (Yer. 16:17; Hebr. 4:13) Kwetikweti! Yehovah e luku wi soso fu di a lobi ibriwan fu wi èn a wani taki sani e go bun nanga wi.1 Petr. 3:12.

3. Na sortu feifi fasi Gado e sori taki a lobi wi?

3 San o yepi wi fu de nanga tangi taki Gado e luku wi èn taki a lobi wi? Meki wi go luku fa a e sori taki a lobi wi. A e du dati (1) fu di a e warskow wi te wi abi prakseri di no bun,  (2) fu di a e piri-ai gi wi te wi du wan sani di no bun, (3) fu di a e tiri wi nanga Bijbel rai, (4) fu di a e yepi wi te wi e kisi tesi èn (5) fu di a e blesi wi te a e si den bun sani di wi e du.

YEHOVAH E WARSKOW WI

4. Fu san ede Yehovah warskow Kain taki ’sondu de leti na en doro e luru en’?

4 Meki wi go luku fa Gado e warskow wi, fosi wi du wan sani di no bun (1 Kron. 28:9). Luku na eksempre fu Kain. A „kisi bigi atibron” di Yehovah sori taki a no breiti nanga en. (Leisi Genesis 4:3-7.) Yehovah taigi Kain fu „bigin du bun”. A warskow en taki efu a no ben o du dati, dan sondu ben o ’de leti na en doro e luru en’. Gado aksi en: „Yu denki taki yu o man basi en?” A ben wani meki Kain arki a warskow fu en so taki A ben o ’prisiri nanga en baka’. Efu Kain ben o arki a warskow fu Gado, dan a ben o tan abi wan bun matifasi nanga En.

5. Fa Yehovah e warskow wi te wi e kisi prakseri nanga firi di no bun?

5 Fa a de nanga wi na ini a ten disi? Den ai fu Yehovah e luku go te na ini wi ati. A sabi san wi e denki èn san wi e firi. Sobun, wi no man kibri noti gi en. Wi lobi-ati Tata wani taki wi du san reti. Ma a no e dwengi wi fu kenki a fasi fa wi e du sani. Nanga yepi fu Bijbel a e warskow wi te wi de fu du wan sani di no bun. Fa a e du dati? Te wi e leisi Bijbel ibri dei, dan nofo tron wi e si wan pisi di kan yepi wi fu feti nanga prakseri èn nanga firi di no bun. Boiti dati, son leisi den buku nanga tijdschrift fu wi e taki fu a problema fu wi èn den kan yepi wi fu feni wan lusu gi a problema. Na den gemeente konmakandra wi alamala e kisi rai tu di e kon na a yoisti ten.

6, 7. (a) San e sori taki Yehovah lobi ibriwan fu den futuboi fu en? (b) Fa yu kan kisi wini fu a lobi di Yehovah e sori yu spesrutu?

6 Ala den warskow di Yehovah e gi wi na ini Bijbel e sori wi taki a lobi ibriwan fu wi trutru. A tru taki den sani na ini Bijbel skrifi omeni hondrohondro yari kaba, taki den buku di na organisâsi fu Gado e meki de gi milyunmilyun sma èn taki a rai di wi e kisi na den konmakandra na gi a heri gemeente. Ma toku Yehovah e aksi yu fu poti prakseri na den warskow di a gi wi na ini Bijbel, so taki yu kan du san bun. Sobun, disi e sori taki yu na a sma di Yehovah lobi.

Te wi konsensi e kruderi nanga Bijbel, dan dati o yepi wi fu wai pasi gi den ogri di de na wi lontu (Luku paragraaf 6, 7)

7 Efu wi wani kisi wini fu den warskow fu Gado, dan wi musu frustan fosi taki a e broko en ede nanga wi trutru. Baka dati wi musu du san en Wortu e taki èn wi musu meki muiti fu puru iniwan prakseri di Gado no feni bun. (Leisi Yesaya 55:6, 7.) Te wi e arki den warskow fu Gado, dan wi o man wai pasi gi furu problema. Ma kon meki wi taki dati wi du wan sani di no bun. Sortu yepi wi lobi-ati Tata e gi wi dan?

WI LOBI-ATI TATA E PIRI-AI GI WI

8, 9. Te wan sma e gi wi Bijbel rai, dan fa disi e sori taki Yehovah lobi wi? Gi wan eksempre.

8 Spesrutu te Yehovah e piri-ai gi wi, wi e kon si taki a lobi wi. (Leisi Hebrewsma 12:5, 6.) A tru taki a no switi fu kisi rai noso piri-ai (Hebr. 12:11). Ma te wan sma e gi wi Bijbel rai, a prenspari fu luku fu san ede a e du disi. A no e du en fu di a wani hati wi firi, ma fu di a e si taki wi e du wan sani di kan pori a matifasi di wi abi nanga Yehovah. A de klariklari fu gebroiki en ten nanga muiti fu sori wi na ini Bijbel fa fu tyari kenki kon so taki Yehovah feni wi bun. Wi musu teki a rai disi fu di a e kon fu Yehovah.

 9 Meki wi go luku fa a rai di wi e kisi fu libisma, kan sori taki den e broko den ede nanga wi neleki Gado. Fu eksempre, yu ben abi wan brada di ben abi a gwenti fu luku porno, fosi a kon na ini a tru anbegi. Ma a tapu nanga a gwenti disi. Toku a ben abi a firi ete fu luku porno. A ben de neleki wan udufaya di dede, ma di e puru pikinso smoko ete. Di a bai wan nyun cèl, a takru lostu fu en opo kon baka (Yak. 1:14, 15). Nanga a cèl, a ben e go tapu Internet fu luku porno. Wan dei di a ben e preiki nanga yepi fu telefon, a leni a telefon fu en na wan owruman fu suku wan tu adres. Di na owruman bigin gebroiki a cèl, a si wan tu website di no bun. Soleki fa a sori, dan disi ben de wan blesi gi a brada di ben abi a takru gwenti. Na owruman gi en rai wantewante èn a brada teki a rai. Te fu kaba a ben man tapu nanga a takru gwenti disi. Wi kan de nanga tangi taki wi lobi-ati hemel Tata e si srefi den sondu di wi e du kibrikibri èn taki a e piri-ai gi wi, fosi wi go tumusi fara.

FA GADO E TIRI WI NANGA BIJBEL RAI

10, 11. (a) Na sortu fasi wi kan „poti prakseri na” a rai fu Gado? (b) Fa wan osofamiri kon si taki a de wan koni sani fu teki a rai fu Yehovah?

10 A psalm skrifiman ben singi gi Yehovah: „Yu o sori mi fa mi musu waka” (Ps. 73:24). Efu wi abi yepi fanowdu, wi kan „poti prakseri na” a rai fu Yehovah te wi e go luku na ini en Wortu fa a e denki fu sani. Te wi e fiti Bijbel rai, dan dati no e yepi wi nomo fu kisi wan bun matifasi nanga Yehovah, ma a e yepi wi son leisi tu fu kisi den sani di wi abi fanowdu na ini na aladei libi.Odo 3:6.

11 Fu eksempre, luku fa a rai fu Yehovah yepi wan brada fu den Filippijnen di ben e libi na a bergikontren fu Masbate. A brada ben yuru wan gron fu prani sani èn en nanga en wefi ben de gewoon pionier di ben abi wan bigi osofamiri. Wan dei den skreki di a man fu a gron seni boskopu taki den musu komoto na a gron wantewante. Fu san ede a man du so wan sani? Wan sma ben fruteri a lei taki den ben e bedrigi trawan. Aladi a brada ben broko en ede taki a no ben o man feni wan presi fu tan nanga en osofamiri, toku a taki: „Yehovah o sorgu gi wi. Ala ten a e gi wi san wi abi fanowdu, awinsi  san e pasa.” Èn na dati pasa tu. Wan tu dei baka dati, a famiri disi ben breiti di den yere taki den no ben o abi fu froisi. San ben pasa? Fu di a famiri disi ben e du san Bijbel e taki, meki a man di ben abi a gron kon si taki den ben e tan tyari densrefi na wan lespeki fasi èn den no ben e suku trobi aladi sma ben e taki lei fu den. A man ben lobi a tori so te taki a no ben meki den tan nomo, ma a gi den moro gron srefi fu prani sani. (Leisi 1 Petrus 2:12.) Iya, Yehovah e gebroiki en Wortu fu yepi wi nanga den problema fu a libi.

WAN MATI DI E YEPI WI FU HORIDORO TE TESI MITI WI

12, 13. O ten a muilek fu bribi taki Gado e broko en ede nanga wi?

12 Ma son leisi wan tesi e tan moro wi. Kande wi e feti nanga wan seryusu siki, kande krosibei famiri e tan gens wi, noso kande sma e tan frufolgu wi. Noso son leisi wi e kisi trobi nanga wan sma na ini a gemeente fu di wi no e denki a srefi fu wan sani.

13 Fu eksempre, kande wan brada taki wan sani di hati yu. Kande yu e taki: ’A sani disi no kan pasa na ini Gado en organisâsi!’ Ma dan a brada di hati yu firi e kisi grani na ini a gemeente èn a gersi leki ala sma e taki bun fu en. Kande yu e aksi yusrefi fa dati kan. Yu e taki na yusrefi: ’Yehovah no e si san e pasa? A no o du noti?’Ps. 13:1, 2; Hab. 1:2, 3.

14. San na wan sani di kan meki taki Gado no e du noti fu lusu wan problema di wi abi nanga wan brada noso sisa?

14 Yehovah e si moro leki san wi e si èn kande wan prenspari sani de di meki taki a no e du noti. Fu eksempre, yu e denki kande taki a fowtu de na a tra sma, ma a kan taki Gado e si sani tra fasi. Kande a e si taki a fowtu de na yu, aladi yusrefi no e si en so. Yu feni taki a sma taigi yu wan hati sani, ma kande a gi yu bun rai di yu ben abi fanowdu. Na ini na ondrofenitori fu Brada Karl Klein, di ben de wan memre fu a Tiri Skin, wi e leisi taki wan dei Brada J. F. Rutherford gi en wan steifi piri-ai. Bakaten Brada Rutherford aksi Brada Klein na wan switi fasi: „Fa a e go, Karl?” Ma fu di Brada Klein ben mandi ete taki a ben kisi piri-ai, meki pikinmoro a no ben wani taki Brada Rutherford odi baka. Brada Rutherford frustan taki Brada Klein ben e hori en na ati ete èn dati meki a warskow en fu no gi Didibri okasi. Bakaten Brada Klein skrifi: „Te wi e tan mandi nanga wan brada, spesrutu efu a gi wi rai di wi ben abi fanowdu, dan wi e libi wisrefi fu Didibri kisi wi.” *

15. San wi musu hori na prakseri te wi e kisi tesi?

15 Ma toku wi kan lasi pasensi te a gersi leki wan tesi e go nanga langa. San wi kan du? Kon meki wi taki dati yu de na wan druk pasi nanga yu wagi èn yu de na ini wan rèi di no e waka srefisrefi. Yu no sabi o langa yu o abi fu wakti. Efu yu ati e bigin bron èn yu e pruberi fu feni wan boropasi, dan yu kan lasi pasi. Te fu kaba yu kan lasi moro ten leki te yu ben o wakti na ini a rèi nanga pasensi. Na so a de tu te wi e kisi tesi. Efu wi abi pasensi èn wi e gi yesi na den rai fu Bijbel, dan te fu kaba Yehovah o yepi wi fu feni wan lusu.

16. Fu san ede Yehovah kan bosroiti fu no du noti te wi e kisi tesi?

16 Kande Yehovah no e du noti te wi e kisi tesi, fu di a wani taki wi leri wan sani fu dati. (Leisi 1 Petrus 5:6-10.) Noiti wi musu denki taki Gado e tesi wi (Yak.  1:13). Na „Didibri, a feanti fu unu”, e tyari furu tesi kon na wi tapu. Ma Gado kan gebroiki wan muilek situwâsi fu meki wi bribi kon moro tranga. A e si taki wi e pina èn fu di „a e broko en ede nanga” wi, meki a o sorgu taki wi e pina fu „wan syatu pisi ten” nomo. Te yu e kisi tesi, yu kan de seiker taki Yehovah o yepi yu fu feni wan lusu. Yu de nanga tangi taki a e luku yu?2 Kor. 4:7-9.

YEHOVAH E BLESI WI

17. Fu san ede Yehovah e ondrosuku na ati fu ala sma?

17 Yehovah e ondrosuku na ati fu ala sma fu si suma lobi en trutru. A profeiti Hanani ben taigi Kownu Asa: „Den ai fu Yehovah e luku heri grontapu fu si san e pasa, so taki a kan sori a krakti fu en fu yepi den wan di e dini en nanga den heri ati” (2 Kron. 16:9). Aladi Gado si taki Asa no ben e dini en nanga en heri ati, toku a o „sori [yu] a krakti fu en” efu yu e tan du san reti.

18. Te yu denki taki nowan sma e si den bun di yu e du, dan san yu no musu frigiti fu Yehovah? (Luku a prenki na a bigin fu na artikel.)

18 Gado wani taki wi „suku san bun”, taki wi „lobi san bun” èn taki wi „du san bun” so taki a feni wi bun (Amos 5:14, 15; 1 Petr. 3:11, 12). Yehovah e luku den reti-ati sma èn a e blesi den (Ps. 34:15). Fu eksempre, luku Sifra nanga Puwa, tu Hebrew uma di ben e yepi umasma te den ben de fu meki pikin. Di den Israelsma ben de srafu na ini Egepte, den tu uma disi ben e gi yesi na Gado na presi fu du san Farao taki. A kownu disi ben taigi den fu kiri ala den boi di den Hebrew uma ben e meki. Te fu kaba, a konsensi fu den tu uma disi meki taki den no ben wani kiri den beibi. Yehovah si san Sifra nanga Puwa du èn a blesi den bakaten fu di a gi den den eigi osofamiri (Eks. 1:15-17, 20, 21). Son leisi wi kan denki taki nowan sma e si den bun di wi e du. Ma Yehovah e si den sani dati. A e poti prakseri na ala bun sani di wi du èn a o blesi wi gi den sani dati.Mat. 6:4, 6; 1 Tim. 5:25; Hebr. 6:10.

19. Fa wan sisa kon frustan taki Yehovah si den bun di a ben e du?

19 Wan sisa na ini Oostenrijk ben kon frustan taki Yehovah si a tranga wroko fu en. Fu di a sisa disi na fu Hongaria, meki den brada gi en na adres fu wan sma di ben e taki Hongariatongo. Wantewante a go na a sma disi, ma di a doro drape nowan sma ben de na oso. Omeni leisi a go suku a sma disi. Son tron a ben e si taki wan sma ben de na ini na oso, ma a sma no ben opo a doro. A sisa libi tijdschrift gi en, a skrifi brifi gi en, a libi en nen gi en èn a du someni tra sani. Baka wán nanga afu yari fosi a sma opo a doro! Na uma di opo a doro taki a sisa odi na wan switi fasi èn a aksi en fu kon na inisei. A taigi en: „Mi leisi ala sani di yu tyari kon gi mi èn mi ben e wakti yu.” Na uma disi ben abi kanker èn a ben musu gebroiki hebi dresi di meki a kon swaki srefisrefi. Fu dati ede a no ben man taki nanga sma. Baka dati a sisa bigin studeri Bijbel nanga en. Iya, Gado blesi a sisa fu a tranga muiti di a meki.

20. Fa yu feni en taki Yehovah e luku yu?

20 Yehovah e si iniwan sani di yu e du èn te fu kaba a o blesi yu. Te yu e frustan taki Gado e luku yu, dan no si en leki a e suku fowtu na yu, noso taki a e hori ala den fowtu fu yu na prakseri. Na presi fu dati yu o wani kon moro krosibei na wi lobi-ati Gado di e broko en ede nanga yu trutru.

^ paragraaf 14 Yu kan leisi na ondrofenitori fu Brada Klein na ini De Wachttoren fu 15 yuli 1989.