Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  maart 2014

Fa wi kan tan de koloku te wi e dini Yehovah?

Fa wi kan tan de koloku te wi e dini Yehovah?

„Efu wan sma libi langa, dan meki a prisiri nanga ibri dei fu en libi.”PREIK. 11:8.

1. Sortu blesi fu Yehovah kan yepi wi fu de koloku?

YEHOVAH wani taki wi musu de koloku èn a e blesi wi nanga furu sani di musu meki wi de nanga prisiri. Wan fu den blesi dati na taki wi de na libi. Dati meki wi kan gebroiki wi libi fu prèise Gado fu di a hari wi kon na ini a tru anbegi (Ps. 144:15; Yoh. 6:44). Yehovah e gi wi a dyaranti taki a lobi wi èn a e yepi fu horidoro te wi e du a diniwroko fu en (Yer. 31:3; 2 Kor. 4:16). Wi e kisi furu moi leri fu Bijbel èn na heri grontapu wi abi brada nanga sisa di lobi wi. Na wan agersi fasi wi de na ini wan paradijs kaba. Boiti dati, wi abi wan moi howpu gi a ten di e kon.

2. Fu san ede son futuboi fu Gado no de nanga prisiri trutru?

2 Aladi den sani disi kan meki wi de koloku, toku son futuboi fu Gado di e dini en someni yari kaba no de nanga prisiri trutru, fu di den e feti nanga a firi taki den no bun nofo. Kande den e denki taki den no warti na ini Gado ai noso taki a no e si a diniwroko fu den leki wan warti sani. Te wan sma tan abi wan fowtu denki fu ensrefi, dan a kan prakseri taki a no o man prisiri „ibri dei fu en libi”. Gi en, a libi de leki „dungru dei” di no e kaba.Preik. 11:8.

3. San kan meki taki son Kresten e kisi wan fowtu denki fu densrefi?

3 Kande den sortu brada nanga sisa disi e kisi wan fowtu denki  fu densrefi te sani no e pasa soleki fa den fruwakti, te den kon siki noso te den no man du son sani moro fu di den kon owru (Ps. 71:9; Odo 13:12; Preik. 7:7). Boiti dati, ala Kresten sabi taki na ati na a moro bedrigi sani di de èn taki a kan krutu wi aladi Gado e prisiri nanga wi (Yer. 17:9; 1 Yoh. 3:20). Didibri e fruteri ala sortu lei fu den futuboi fu Gado. Neleki fa Elifas ben du na ini a ten fu Yob, na so sma di abi a denki fu Satan na ini a ten disi kan gi wi a firi taki wi no warti noti na ini Gado ai. Na ini a ten fu Yob a sani dati ben de wan lei èn te now ete a de wan lei.Yob 4:18, 19.

4. San wi o luku na ini na artikel disi?

4 Yehovah e sori krin na ini Bijbel taki a o de nanga den sma di „e waka na ini a lagipresi di dungru pikapika” (Ps. 23:4). Wan fasi fa Gado e yepi wi na taki a gi wi a Wortu fu en. Bijbel abi so furu krakti ’taki a man broko iniwan sani di tanapu steifi leki wan fortresi’. Disi wani taki dati Bijbel kan yepi wi fu kenki wi denki te wi no e si sani na wan yoisti fasi (2 Kor. 10:4, 5). Sobun, meki wi go luku fa wi kan gebroiki Bijbel fu tan abi wan bun denki fu wisrefi. Disi o de wan yepi gi yu èn a o sori yu fa yu kan gi trawan deki-ati.

BIJBEL KAN YEPI YU FU ABI WAN BUN DENKI FU YUSREFI

5. San kan yepi wi fu abi wan bun denki fu wisrefi?

5 Na apostel Paulus e kari wan tu sani di kan yepi wi fu abi wan bun denki fu wisrefi. A ben taigi a gemeente na Korente: „Tan ondrosuku efu unu de na bribi” (2 Kor. 13:5). Dyaso a wortu „bribi” abi fu du nanga ala den prenspari leri fu a Kresten bribi di skrifi na ini Bijbel. Efu den sani di wi e taki èn e du e kruderi nanga san skrifi na ini Bijbel, dan Gado o feni wi bun èn wi o sori taki wi „de na bribi” trutru. A no de fu taki dati wi musu luku efu den sani di wi e du na ini wi libi e kruderi nanga ala den sani di wi e leri leki Kresten. Wi no kan gi yesi na son leri, dan wi e libi trawan na wan sei fu di wi no lobi den.Yak. 2:10, 11.

6. Fu san ede wi musu ondrosuku efu wi ’de na bribi’? (Luku a prenki na a bigin fu na artikel.)

6 Kande yu e draidrai fu ondrosuku yusrefi fu di yu frede san yu o si. Ma a fasi fa Yehovah e si wi, moro prenspari leki a fasi fa wi e si wisrefi, èn den prakseri fu en hei moro den prakseri fu wi (Yes. 55:8, 9). Te a e ondrosuku en anbegiman, dan a no e du dati fu kan krutu den, ma fu kan si den moi fasi fu den èn fu yepi den. Te yu e gebroiki Gado Wortu fu ondrosuku efu yu ’de na bribi’, dan yu o kon si yusrefi leki fa Gado e si yu. Disi kan yepi yu fu no denki moro taki yu no warti na ini Gado ai fu di Bijbel e gi wi a dyaranti taki disi no de so. Te yu frustan dati, dan a o de neleki te yu e opo den garden na ini wan dungru kamra fu meki son skèin kon na inisei.

7. Sortu wini wi o kisi te wi e luku na eksempre fu sma na ini Bijbel di tan gi yesi na Gado?

7 Wan bun fasi fu ondrosuku yusrefi na te yu e denki dipi fu na eksempre fu sma na ini Bijbel di tan gi yesi na Gado. Teki a situwâsi fu den noso den firi fu den gersi nanga di fu yu èn luku san yu ben o du efu na yu ben de na ini a situwâsi dati. Meki wi go luku dri eksempre di e sori fa yu kan gebroiki Bijbel fu luku efu yu „de na bribi”. Dati o yepi yu fu abi wan bun denki fu yusrefi.

A PÔTI UMA DI EN MASRA DEDE

8, 9. (a) San ben de a situwâsi fu a pôti uma? (b) Fa na uma disi ben firi kande?

8 Di Yesus ben de na ini a tempel na Yerusalem a sidon luku wan pôti uma di en masra ben dede kaba. Na eksempre fu na uma disi kan yepi wi fu kisi wan yoisti denki fu wisrefi awinsi wi na sondu sma. (Leisi Lukas 21:1-4.) Luku a situwâsi fu a pôti uma. A ben sari taki a lasi en masra na ini dede. Ma boiti dati, a ben kisi fu du tu nanga kerki  fesiman di ben e pina „den uma di den masra dede” kaba. Den kerki fesiman ben abi a gwenti fu „fufuru den gudu” fu den mofina uma disi na presi fu yepi den (Luk. 20:47). Na uma ben pôti so te taki di a go na a tempel, a ben man gi soso tu pikin sensi. Na a moni dati wan wrokoman ben e kisi te a ben e wroko wan tu miniti nomo.

9 Pruberi fu frustan fa na uma ben e firi di a go na ini a tempel-dyari nanga den tu sensi fu en. Kande a ben e denki taki na wan pikin moni nomo a ben e gi èn taki a ben o man gi moro efu en masra ben de na libi. A kan taki a ben e syen di a si a bigi moni di den sma na en fesi ben poti na ini a monikisi. Kande a ben e prakseri taki a moni fu en no warti noti. Toku a no meki dati tapu en fu du san a ben man fu horibaka gi a tru anbegi.

10. Fa Yesus sori taki a pôti uma ben warti gi Yehovah?

10 Yesus sori taki na uma nanga a moni di a poti na ini a monikisi ben warti gi Yehovah. A taki dati na uma gi moro moni leki ala den gudusma. Aladi a moni fu na uma ben o moksi nanga a moni di den tra sma ben gi, toku Yesus prèise na uma dati wawan. A kan taki den sma di ben abi a wroko fu puru a moni na ini a kisi bakaten, no ben sabi srefi omeni na uma nanga den tu pikin sensi fu en ben warti gi Yehovah. Ma a fasi fa Gado ben e si sani, ben de moro prenspari leki fa tra sma ben e si sani noso leki fa na uma ben e si ensrefi. Yu kan gebroiki a tori fu a pôti uma disi fu ondrosuku efu yu de na bribi?

San yu kan leri fu na eksempre fu a pôti uma? (Luku paragraaf 8-10)

11. San yu kan leri fu a tori fu a pôti uma?

11 A situwâsi fu yu kan meki taki yu no man du ala san yu wani du gi Yehovah. Son Kresten no man preiki so furu moro, fu di den kon owru noso fu di den siki. Den sma disi musu prakseri taki na fu soso den e skrifi o langa den preiki? Srefi te yu no de na ini den sortu situwâsi dati, yu kan abi a firi taki a muiti di yu e du fu preiki, na noti te yu e teki en gersi nanga ala den yuru di a pipel fu Gado e preiki ibri yari. Ma a tori fu a pôti uma e leri wi taki Yehovah e si iniwan  sani di wan sma e du gi en èn ala den sani dati warti gi en, spesrutu te a sma de na ini muilek situwâsi. Prakseri san yu ben man du gi Yehovah a yari di pasa. Wan leisi a pasa kaba taki yu ben musu meki furu muiti srefi fu wroko wán yuru na ini a preikiwroko? Efu dati de so, dan yu kan de seiker taki Gado e warderi san yu du gi en na ini a wán yuru dati. Te yu e du ala san yu man gi Yehovah neleki a pôti uma, dan yu kan de seiker taki yu „de na bribi”.

„MEKI MI DEDE”

12-14. (a) San Elia du di a ben e si ensrefi na wan fowtu fasi? (b) Fu san ede Elia ben e firi so?

12 A profeiti Elia ben tan dini Yehovah èn a ben abi wan tranga bribi. Ma wan leisi a ben firi so brokosaka taki a aksi Yehovah fu meki a dede. A taki: „A nofo! Ke Yehovah, meki mi dede” (1 Kow. 19:4). Den sma di no sabi san a wani taki fu lasi-ati, o denki kande taki Elia ben e „taki dondon sani” na ini a begi fu en (Yob 6:3). A sani di Elia taki e sori fa a ben e firi trutru. Ma luku taki Yehovah no krutu Elia di a aksi En fu dede. Na presi fu dati a yepi en.

13 Fa a du kon taki Elia ben e firi so? Syatu na fesi, Elia ben taigi sma fu sreka densrefi fu di wan sani ben o pasa na ini Israel di ben o sori krin taki Yehovah na a tru Gado. Baka di a sani disi pasa, Elia tyari 450 profeiti fu Bâal go kiri (1 Kow. 18:37-40). Kande Elia ben e denki taki a pipel fu Gado ben o kon baka na ini a tru anbegi, ma dati no pasa. Na ogri Umakownu Iseibel seni wan boskopu gi Elia fu taigi en taki a ben e seti sani fu kiri en. Fu di Elia ben frede taki a ben o dede, meki a lowe go na zuidsei, dan a pasa a kondre Yuda go na ini a drei sabana.1 Kow. 19:2-4.

14 Di Elia ben de en wawan, a go sidon prakseri a wroko fu en leki profeiti èn a ben denki taki a wroko dati ben de fu soso. A taigi Yehovah: „Mi no betre moro den afo fu mi.” A ben firi leki a no warti noti èn taki a ben de leki den dedebonyo fu den afo fu en di ben tron doti. Te yu luku en bun, dan a krutu ensrefi. A ben feni taki a no man du noti bun èn taki a no warti noti gi Yehovah noso gi tra sma.

15. Fa Gado gi Elia a dyaranti taki a ben warti ete gi en?

15 Ma na Almaktiwan no ben e si Elia so. Elia ben warti ete na ini Gado ai. Fu di Yehovah ben wani gi Elia a dyaranti taki a ben e denki so fu en ete, meki a seni wan engel go na Elia fu gi en deki-ati. Yehovah sorgu tu taki Elia feni nyanyan nanga dringi so taki a ben kan tan na libi na ini den 40 dei di a ben de na pasi fu go na Horeb-bergi, na zuidsei. Boiti dati, na wan switifasi Yehovah sori Elia taki a no ben de a wan-enkri sma na ini Israel di tan gi yesi na Yehovah. A moi fu si taki Gado gi Elia wan tu tra wroko fu du èn Elia du den tu. Elia kisi furu wini fu a yepi di Yehovah gi en èn nanga deki-ati a go du en wroko leki profeiti baka.1 Kow. 19:5-8, 15-19.

16. San na wan tu fasi fa Gado horibaka gi yu?

16 Na eksempre fu Elia kan yepi yu fu luku efu yu de na bribi èn a kan yepi yu tu fu kisi wan bun denki fu yusrefi. A fosi sani di yu kan du na fu luku na sortu fasi Yehovah horibaka gi yu. Kande wan futuboi fu Gado, soleki wan owruman noso wan tra lepi Kresten, yepi yu wan leisi kaba di yu ben de na nowtu (Gal. 6:2). A kan taki yu kisi deki-ati di yu leisi Bijbel, noso den buku nanga den tijdschrift fu wi, noso taki yu kisi deki-ati di yu ben de na wan fu den Kresten konmakandra. Wan tra leisi te yu o kisi yepi na wan fu den fasi disi, dan hori na prakseri taki Gado na a sma di yepi yu trutru. Taki en tangi fu disi tu.Ps. 121:1, 2.

17. Fa Yehovah e si den futuboi fu en?

17 Wan di fu tu sani di yu kan du na taki yu musu hori na prakseri taki yu kan kori yusrefi te yu denki taki yu no bun nofo. A  sani di prenspari, na a fasi fa Gado e si wi. (Leisi Romesma 14:4.) Yehovah no e luku nomo omeni wi e du gi en, ma a e warderi en te wi e du en diniwroko nanga wi heri ati èn te wi e tan gi yesi na en. A kan taki yu du moro gi Yehovah leki yu denki, neleki fa a ben de nanga Elia. Kande sma de na ini yu gemeente di yu ben man gi furu deki-ati. Noso a kan taki sma na ini a preikiwroko kon sabi a tru anbegi fu di yu ben du muiti fu preiki gi den.

18. Te Yehovah gi yu wan grani, dan san dati e sori?

18 Wan di fu dri sani na taki yu musu si ibri grani di Yehovah e gi yu leki wan fasi fa a e sori taki a de nanga yu (Yer. 20:11). Yu kan lasi-ati neleki Elia, fu di yu abi a firi taki a diniwroko fu yu no warti noti noso fu di a gersi leki yu no o man du san yu abi na prakseri fu du gi Gado. Ma hori na prakseri taki yu abi na okasi ete fu du a moro bigi wroko di wi leki futuboi fu Gado kan du na ini a ten disi. Dati na a wroko fu preiki a bun nyunsu èn fu tyari Gado nen. Sobun, tan gi yesi na Gado. Dan a o de leki Yesus e taigi yu a srefi sani di a ben taki na ini na agersitori fu en: „Prisiri [makandra] nanga yu masra.”Mat. 25:23.

A „BEGI FU A MOFINAWAN”

19. Na ini sortu situwâsi a skrifiman fu Psalm 102 ben de?

19 A skrifiman fu Psalm 102 ben lasi-ati. A ben de leki wan „mofinawan”, fu di a ben e pina noso a ben e firi brokosaka trutru. A no ben abi a krakti fu lusu den problema fu en (Ps. 102, na edesei fu a kapitel). Den sani di a taki e sori taki a ben e poti prakseri nomo na den broko-ede fu en èn na a fasi fa a ben e firi. Boiti dati, a ben denki taki a ben de en wawan (Ps. 102:3, 4, 6, 11). A ben prakseri taki Yehovah ben wani trowe en gowe.Ps. 102:10.

20. Fa begi kan yepi wan sma fu feti nanga a firi di a abi taki a no bun nofo?

20 Ma a psalm skrifiman ben man gebroiki en libi ete fu prèise Yehovah. (Leisi Psalm 102:19-21.) Soleki fa wi si na ini Psalm 102, dan srefi den wan di de na bribi kan firi brokosaka èn dati kan meki taki a muilek gi den fu poti prakseri na tra sani. A psalm skrifiman ben e firi „leki wan fowru di sidon en wawan na tapu wan daki”. A ben gersi leki a no ben abi noti moro leki soso den problema fu en (Ps. 102:7). Efu oiti yu kisi a firi disi tu, dan neleki a psalm skrifiman, yu kan fruteri Yehovah san de na tapu yu ati. A begi fu a mofinawan, dati wani taki a begi fu yu, kan yepi yu fu feti nanga a firi di yu abi taki yu no bun nofo. Yehovah e pramisi taki a o arki a begi fu den sortu sma disi èn „a no o si den begi fu den leki lawlaw sani” (Ps. 102:17). Yu kan de seiker fu dati.

21. Fa wan sma di feni taki a no bun nofo, kan kisi wan bun denki fu ensrefi?

21 Psalm 102 e sori san na wan tra sani di yu kan du fu kisi wan bun denki fu yusrefi. Fu man du disi, a psalm skrifiman poti prakseri na a matifasi di a ben abi nanga Yehovah (Ps. 102:12, 27). A no ben sari moro fu di a ben sabi taki te a pipel fu Yehovah kisi tesi, dan Gado e horibaka gi den ala ten. Sobun, efu yu denki taki yu no bun nofo èn dati e tapu yu fu du den sani di yu wani du gi Gado, dan begi fu a tori disi. Aksi Gado fu arki den begi fu yu so taki yu no firi brokosaka so furu moro. Ma boiti dati, yu kan begi tu taki sma kon sabi a nen fu Yehovah.Ps. 102:20, 21.

22. Fa ibriwan fu wi kan plisi Yehovah?

22 Iya, wi kan gebroiki Bijbel fu luku efu wi de na bribi èn efu wi warti na ini Yehovah ai. A tru taki na ini a grontapu disi wi kan firi wawan leisi taki wi no bun nofo noso taki sani de di e meki wi lasi-ati. Toku ibriwan fu wi kan plisi Yehovah èn wi kan kisi frulusu fu di wi e horidoro na ini a diniwroko fu en.Mat. 24:13.