Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  maart 2014

Abi lespeki gi den owruwan na un mindri

Abi lespeki gi den owruwan na un mindri

„Un musu abi lespeki gi den graniwan.”LEF. 19:32.

1. Na ini sortu sari situwâsi libisma de na ini a ten disi?

NOITI Yehovah ben wani taki libisma pina, taki den kon swaki noso taki den kon owru. A ben wani taki man nanga uma ben musu libi na ini wan paradijs èn taki den ben musu de gosontu. Ma na ini a ten disi „ala den sani di Gado meki, e geme doronomo èn den alamala abi pen” (Rom. 8:22). Fa yu denki taki Gado e firi te a e si fa libisma e pina fu di den na sondusma? A sari fu si taki furu sma no e poti prakseri na den owruwan na wan ten te den abi moro yepi fanowdu.Ps. 39:5; 2 Tim. 3:3.

2. Fu san ede Kresten brada nanga sisa breiti nanga den owruwan na ini a gemeente?

2 A pipel fu Yehovah breiti nanga den owruwan na ini a gemeente. Wi e kisi wini fu a koni fu den èn wi kan leri furu fu a bribi fu den. Furu fu wi na famiri fu den owru brada nanga sisa disi di wi lobi. Ma awinsi den a no wi famiri, toku wi e broko wi ede nanga den èn wi wani taki sani go bun nanga den (Gal. 6:10; 1 Petr. 1:22). Wi o kisi wini te wi o luku a fasi fa Gado e si owrusma. Wi o luku tu san na a frantwortu fu a famiri nanga a gemeente te a abi fu du nanga den lobiwan fu wi di kon owru.

„NO TROWE MI GOWE”

3, 4. (a) Sortu prenspari sani a skrifiman fu Psalm 71 aksi Yehovah? (b) San den owru brada nanga sisa na ini a gemeente kan aksi Gado?

3 A skrifiman fu Psalm 71:9 ben begi Gado: „No trowe mi  gowe te mi kon owru. No gowe libi mi te mi e kon swaki.” Soleki fa a sori, dan a psalm disi abi fu du nanga san skrifi na ini Psalm 70. Na a edesei fu Psalm 70 skrifi: „Wan psalm fu David.” Sobun, kande a ben de David di ben begi a sani di wi e leisi na ini Psalm 71:9. David dini Gado sensi en yongu yari teleki a kon owru, èn Yehovah gebroiki en fu du furu bigi sani (1 Sam. 17:33-37, 50; 1 Kow. 2:1-3, 10). Awinsi fa a no fa, David ben feni en fanowdu fu aksi Yehovah fu tan sorgu en.Leisi Psalm 71:17, 18.

4 Furu brada nanga sisa na ini a ten disi de leki David. Aladi den owru kaba èn den e kisi fu du nanga ’dei di lai nanga sari’, toku den e du ala san den man fu prèise Gado (Preik. 12:1-7). Kande furu fu den no man du ala sani moro di den ben gwenti du fosi, srefi sani di abi fu du nanga a diniwroko. Ma den srefi kan begi Yehovah tu fu a tan blesi den èn fu a sorgu den. Den owru brada nanga sisa disi di tan dini Yehovah, kan de seiker taki Gado o piki a begi fu den. Wi sabi disi fu di nanga yepi fu santa yeye David begi fu den srefi sortu broko-ede di owru brada nanga sisa abi na ini a ten disi.

5. Fa Yehovah e si owru brada nanga sisa di tan dini en?

5 Bijbel e sori krin taki owru brada nanga sisa di tan dini Yehovah warti gi en trutru èn a wani taki den futuboi fu en abi lespeki gi den brada nanga sisa disi (Ps. 22:24-26; Odo 16:31; 20:29). Lefitikus 19:32 e taki: „Un musu abi lespeki gi den graniwan, èn un musu hori wan owru sma na prakseri. Un musu abi lespeki gi un Gado. Mi na Yehovah.” Iya, na a ten di a tekst disi skrifi, a ben prenspari fu sori lespeki gi den owruwan na mindri a pipel fu Gado èn te na a dei fu tide disi de so. Ma suma abi a frantwortu fu sorgu gi den?

A FRANTWORTU FU FAMIRIMAN

6. Sortu eksempre Yesus gi wi di a seti sani taki sma sorgu gi en mama?

6 Gado Wortu e taki: „Lespeki un papa nanga un mama” (Eks. 20:12; Ef. 6:2). Yesus sori o prenspari disi de di a krutu den Fariseiman nanga den leriman fu Wèt fu di den ben weigri fu sorgu gi den papa nanga mama (Mark. 7:5, 10-13). Yesus srefi ben gi wan moi eksempre na ini a tori disi. Srefi di a ben e anga na a pinapostu, a ben e broko en ede nanga en mama. A kan taki a masra fu en mama ben dede kaba. Dati meki Yesus gi en lobi mati Yohanes, di ben de wan bakaman fu en, a frantwortu fu sorgu gi a mama fu en.Yoh. 19:26, 27.

7. (a) Sortu rai na apostel Paulus gi osofamiri? (b) San moro Paulus taki fu a tori?

7 Na apostel Paulus ben skrifi Kresten brada nanga sisa taki den ben musu sorgu gi den eigi osofamiri. (Leisi 1 Timoteyus 5:4, 8, 16.) Luku sortu rai Paulus gi di a skrifi Timoteyus. A taki suma ben musu kisi yepi fu a gemeente èn suma no ben musu kisi dati. A ben sori krin taki pikin, granpikin nanga tra famiriman di de na bribi abi a frantwortu fu sorgu gi den owru uma na ini den famiri di lasi den masra na ini dede. Na so fasi a no ben o de wan hebi gi a gemeente fu pai gi ala den sani di den owruwan disi abi fanowdu. Na ini a ten disi a de so tu, taki wan fasi fa Kresten e sori taki den e „dini Gado fayafaya”, na te den e sorgu gi famiriman di de na nowtu.

8. Fu san ede Bijbel no e taki finifini fa sma musu sorgu gi den owru papa nanga mama?

8 Sobun, Kresten abi a frantwortu fu sorgu taki den papa nanga mama kisi den sani di den abi fanowdu. Paulus ben e taki fu famiriman di de na bribi. Ma wi no musu frigiti papa nanga mama di no de na bribi. A situwâsi fu ibri famiri e difrenti. Sobun ibri famiri musu teki den eigi bosroiti te a abi  fu du nanga a fasi fa den o sorgu den papa nanga mama. A no ala papa nanga mama abi den srefi sani fanowdu leki trawan. Boiti dati, a fasi fa den de noso a gosontu fu den e difrenti. Son owrusma abi furu pikin, ma trawan abi wán pikin nomo. Son owrusma kan kisi yepi fu lanti, ma trawan no man kisi dati. Srefi den owrusma di musu kisi yepi abi sani di den lobi. Dati meki a no ben o de wan koni sani fu krutu sma di e du muiti fu sorgu gi den owru famiriman fu den. Wi no ben o sori lobi tu efu wi ben o krutu den bosroiti di den sma disi teki. Te yu luku en bun, dan Yehovah kan blesi iniwan bosroiti di sma teki solanga a e kruderi nanga Bijbel. A kan meki taki den sani di wi bosroiti fu du waka bun, soleki fa a du dati sensi a ten fu Moses.Num. 11:23.

9-11. (a) Sortu hebi bosroiti son sma musu teki? (Luku a prenki na a bigin fu na artikel.) (b) Fu san ede pikin no musu de tumusi gaw fu tapu nanga a furuten diniwroko? Gi wan eksempre.

9 Te papa nanga mama no e libi krosibei fu den pikin, dan a hebi son leisi fu gi owru papa nanga mama a yepi di den abi fanowdu. Kande a papa noso mama e kon siki wantronso, fu di den fadon broko den anu noso den futu noso fu di wan tra sani pasa nanga den. Te den sortu sani disi e pasa, dan a kan de fanowdu fu go luku a papa nanga mama wantewante. A kan taki unu e kon si bakaten taki a papa nanga a mama abi yepi fanowdu fu wan pisi ten noso fu wan langa ten. *

10 Spesrutu den wan di de na ini a furuten diniwroko èn di e libi fara fu oso, musu teki hebi bosroiti son tron. Den wan di e wroko na Betel, di de zendeling, nanga den wan di de kring-opziener noso distrikt-opziener e si a grani fu den leki wan warti sani èn leki wan blesi fu Yehovah. Te den papa nanga mama e kon siki, dan a fosi sani di den e prakseri kande na taki den musu gowe libi a spesrutu wroko disi èn taki den musu drai go baka na oso fu sorgu gi den papa nanga mama. Ma a ben o bun fu begi fu a tori èn fu luku san papa nanga mama abi fanowdu trutru noso san den wani. Nowan sma musu gowe libi a grani fu en tumusi gaw èn kande a no de fanowdu srefi fu du dati. A kan taki a papa noso mama siki fu wan syatu pisi ten nomo èn taki a gemeente wani yepi den.Odo 21:5.

11 Fu eksempre, wan owru brada nanga sisa fu Yapan ben abi tu manpikin di ben e dini farawe. Wan fu den manpikin ben de wan zendeling na ini Paragwai èn a trawan ben e wroko na a edekantoro na Brooklyn, New York. Ma now na owru papa nanga mama ben abi yepi fanowdu. Den manpikin nanga den wefi fu den go na a papa nanga mama na Yapan fu luku sortu yepi ben de fanowdu èn fa den ben kan yepi den. Baka wan pisi ten a trowpaar fu Paragwai ben luku efu den ben o tapu nanga a zendeling wroko fu drai go baka na oso. Ne a fesiman fu den owruman na ini a gemeente pe a papa nanga mama ben e go, bèl den fu taigi den taki den owruman ben taki fu a tori èn den ben wani taki den zendeling tan go doro nanga a wroko fu den solanga dati man. Den owruman ben warderi a wroko di den zendeling disi ben e du èn den ben wani meki muiti fu sorgu gi a papa nanga mama fu den. Ala sma na ini a famiri dati ben breiti trutru nanga a lobi dati di den brada sori den.

12. San Kresten famiri musu hori na prakseri te den e teki a bosroiti fu sorgu gi den papa nanga mama?

12 Awinsi na sortu fasi wan Kresten osofamiri wani sorgu gi na owru papa nanga mama fu den, toku den alamala musu hori na prakseri taki den bosroiti fu den musu gi Gado nen glori. Noiti wi musu de leki den kerki fesiman na ini Yesus ten (Mat. 15:3-6). Wi wani taki den bosroiti fu wi meki taki Gado nanga a gemeente kisi glori.2 Kor. 6:3.

 A FRANTWORTU FU A GEMEENTE

13, 14. Fa Bijbel e sori taki a gemeente musu yepi sorgu owru brada nanga sisa?

13 A no ala sma kan yepi furuten dinari na a fasi fa wi si didyonsro. Ma wan sani di pasa na ini a fosi yarihondro, e sori wi taki a gemeente musu de klariklari fu yepi owru brada nanga sisa di de wan moi eksempre èn di de na nowtu. Bijbel e taki fu a gemeente na Yerusalem taki „nowan enkri sma na den mindri ben mankeri wan sani”. A no ben de so taki ala sma na ini a gemeente dati ben gudu. Soleki fa a sori, dan sonwan fu den ben pôti, ma „ala sma ben kisi san a ben abi fanowdu” (Tori 4:34, 35). Ma bakaten wan seryusu problema opo kon na ini a gemeente disi. Den apostel ben yere taki son „uma di den masra dede kaba, no ben e kisi a nyanyan di ben e prati ibri dei”. Sobun, den apostel gi lepi Kresten brada a frantwortu fu seti sani so taki den uma di no ben abi masra moro ben kan kisi den sani di den ben abi fanowdu (Tori 6:1-5). A tru taki a seti fu prati nyanyan ibri dei ben de fu wan syatu pisi ten nomo. A ben de spesrutu gi den sma di ben tron Kresten na a Pinksterfesa fu a yari 33 èn di ben kon na Yerusalem fu tranga a bribi fu den. A fasi fa den apostel seti sani gi a gemeente dati, kan yepi wi fu sorgu gi Kresten brada nanga sisa di abi yepi fanowdu.

14 Paulus ben taigi Timoteyus o ten a ben o fiti taki a gemeente yepi Kresten uma di lasi den masra na ini dede (1 Tim. 5:3-16). A Bijbel skrifiman Yakobus ben sori taki te pikin di no abi papa nanga mama moro èn uma di den masra dede kaba, de na nowtu, dan wi leki Kresten musu sorgu gi den sortu sma disi (Yak. 1:27; 2:15-17). Na apostel Yohanes ben taki tu: „Efu wan sma abi nofo gudu èn a e si taki en brada de na nowtu, ma a e weigri fu abi sari-ati gi en, dan fa wi kan taki dati a lobi Gado?” (1 Yoh. 3:17) Efu ibriwan fu wi leki Kresten abi a frantwortu fu sorgu gi den wan di de na nowtu, dan a no de fu taki dati leki gemeente wi abi a frantwortu dati tu.

Efu wan owrusma kisi mankeri, dan fa a gemeente kan yepi en? (Luku paragraaf 15, 16)

15. San owruman nanga pikin kan du te owru brada nanga sisa abi yepi fanowdu?

15 Na ini son kondre, lanti seti sani taki owrusma kan kisi pensyun-moni, taki den kan kisi wan pikin moni te den pôti, noso taki sma kan go yepi den na oso (Rom. 13:6). Ma na tra kondre a sortu yepi disi no de. Sobun, a de na a situwâsi fu a famiri nanga a gemeente omeni den o man du gi den owru brada nanga sisa. Efu pikin di de na bribi e libi fara fu den papa nanga mama, dan den no man du so furu leki te den ben o libi krosibei. A bun te den pikin e taki fri nanga den owruman na ini a gemeente fu den papa  nanga mama, so taki den owruman kan frustan krin san na a situwâsi fu a famiri. Fu eksempre, kande den owruman kan yepi a papa nanga mama fu luku san lanti seti fu yepi sma na den owrudei. Den kan luku fa a situwâsi fu na owru brada nanga sisa de. Kande den e si taki wan tu prenspari brifi de di den no opo ete, noso taki den no e dringi den dresi. Te den pikin nanga den owruman e taki fri nanga makandra, dan den o man feni wan lusu gi problema di opo kon. Kon meki wi taki dati wan sma de di e libi krosibei fu a papa nanga a mama. Den famiri di e libi fara kan aksi so wan sma fu fringi wan ai luku a papa nanga a mama èn fu gi den wan pingi te wan sani no e go bun. Fu di den sma disi de krosibei, meki a situwâsi no abi fu kon moro ogri èn a famiri no o abi fu broko den ede tumusi.

16. San son Kresten e du fu yepi owru brada nanga sisa na ini a gemeente?

16 Fu di sma na ini a gemeente lobi den owru brada nanga sisa, meki a kan taki sonwan fu den wani du ala san den man fu gi den ten nanga den krakti fu yepi den owruwan disi nanga sani di den abi fanowdu. Den e du ala san den man fu poti prakseri na den owru brada nanga sisa na ini a gemeente. Kande sonwan fu den e meki mofo taki ibri leisi wan tra sma e go yepi den. Kande den sabi taki den no man go na ini a furuten diniwroko, ma den breiti fu yepi den pikin fu tan du a wroko disi solanga den man. Den brada nanga sisa disi na wan moi eksempre gi wi. Ma disi no wani taki dati den pikin no abi a frantwortu fu du san den man gi den papa nanga mama.

SORI LESPEKI GI OWRUSMA ÈN GI DEN DEKI-ATI

17, 18. San e meki en moro makriki fu yepi owrusma?

17 Te den owrusma nanga den wan di e sorgu den e si sani na a yoisti fasi, dan a situwâsi o kon de moro makriki. Son leisi brada nanga sisa e lasi-ati noso den e firi brokosaka srefi, fu di den e kon owru. Sobun, kande yu musu meki spesrutu muiti fu sori lespeki gi owru brada nanga sisa èn fu gi den deki-ati. Fa yu kan du disi? Te yu e taki nanga den, taki fu sani di kan meki den firi bun. Wi lobi den brada nanga sisa disi di tan dini Yehovah someni yari langa èn wi musu prèise den. Yehovah no e frigiti san den du fu dini en, èn den Kresten brada nanga sisa fu den no e frigiti dati tu.Leisi Maleaki 3:16; Hebrewsma 6:10.

18 Son leisi a hebi pikinso fu yepi owru brada nanga sisa ibri dei. Ma te den nanga den sma di e yepi den no e teki sani tumusi seryusu èn den e lafu son leisi fu sani di e pasa, dan dati kan meki sani moro makriki (Preik. 3:1, 4). Furu owrusma e pruberi fu no aksi tumusi furu fu trawan. Den e frustan taki te den sori switifasi, dan sma o poti moro prakseri na den èn moro sma o kon luku den. Furu sma di e go luku den owruwan, e taki: „Mi go na wan owru mati fu mi fu gi en deki-ati, ma di mi gowe, mi firi taki na en gi mi deki-ati.”Odo 15:13; 17:22.

19. Sortu howpu yonguwan nanga owruwan abi gi a ten di e kon?

19 Wi e angri fu libi na ini a ten te pina nanga den takru bakapisi fu sondu no de moro. Ma nownowde den futuboi fu Gado musu tan howpu na tapu a têgo libi. Wi sabi taki te wi e bribi na ini den pramisi fu Gado, dan dati o yepi wi na ini muilek ten noso te tesi e miti wi. Na a bribi dati meki taki „wi no e gi abra. Srefi efu a skin fu wi e kon swaki moro nanga moro, toku a sma di wi de fu inisei e kisi nyun krakti dei fu dei” (2 Kor. 4:16-18; Hebr. 6:18, 19). Ma boiti taki yu e bribi tranga na ini den pramisi fu Gado, san kan yepi yu tu fu sorgu moro bun gi owrusma? Na ini a tra artikel wi o luku wan tu moi rai di abi fu nanga a tori disi.

^ paragraaf 9 Na ini a tra artikel wi o luku wan tu sani di kan yepi owrusma nanga den pikin fu den.