Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  maart 2014

Yu e taki ’Iya fosi èn Nôno baka dati’?

Yu e taki ’Iya fosi èn Nôno baka dati’?

Luku a tori disi: Wan owruman, di de wan memre fu na Ati-oso Kontakti Komte, meki mofo nanga wan yongu brada fu go nanga en na ini a preikiwroko sonde mamanten. A mamanten dati wan brada e bèl na owruman taki en frow kisi mankeri di a wagi fu en naki èn taki den tyari en go na ati-oso esi-esi. A brada wani taki na owruman yepi en fu feni wan datra di wani koti a sisa sondro brudu. Fu di na owruman wani sori lobi èn a wani horibaka gi a famiri disi di de na nowtu, meki a e taigi a yongu brada taki a no o man wroko moro nanga en na ini a preikiwroko.

Luku wan tra tori: Wan trowpaar na ini wan gemeente e gi wan mama di no abi masra, wan kari fu kon na den oso makandra nanga den tu pikin fu en. Te a mama e taigi den pikin, den breiti srefisrefi. Den no man wakti fu go na a trowpaar disi. Ma a dei fosi den go, a trowpaar e taigi a mama taki wan sani pasa di den no ben fruwakti èn taki den no man moro. Bakaten a sisa yere taki na a srefi dei di a trowpaar gi en wan kari, wan tu mati aksi den fu kon na den oso. Na fu dati ede den taigi en taki den no man moro.

A no de fu taki dati wi leki Kresten musu du ala ten san wi pramisi. Noiti wi musu taki „Iya fosi, èn Nôno baka dati” (2 Kor. 1:18). Ma soleki fa den tu eksempre e sori, dan a no ala situwâsi na a srefi. A e pasa son leisi taki wi meki wan mofo nanga wan sma, ma dan wan sani e opo kon di kan meki a gersi leki wi no man du san wi pramisi. Na apostel Paulus ben de na ini so wan situwâsi wan leisi.

SMA BEN FENI TAKI PAULUS NO BEN DE FU FRUTROW

Na ini a yari 55, di Paulus teki waka leki zendeling wan di fu dri leisi, a go na Efeise. A ben wani abra Egeus Se fu go na Korente èn baka dati a ben o go na Masedonia. Di a drai go baka na Yerusalem, a ben wani go na a gemeente Korente ete wan leisi. Soleki fa a sori, dan a ben o go drape fu teki a moni di a gemeente ben wani seni gi den brada fu Yerusalem (1 Kor. 16:3). Na ini 2 Korentesma 1:15, 16 wi e leisi: „Fu di mi de seiker fu a sani disi, meki mi ben wani kon na unu ete wan leisi, so taki unu ben o prisiri ete wan leisi. Mi ben o pasa na unu te mi ben o go na Masedonia, èn baka Masedonia, mi ben o kon baka na unu. Dan unu ben kan tyari mi afupasi go na Yudea.”

Soleki fa a sori, dan Paulus ben skrifi den brada na Korente kaba san a ben wani du (1 Kor. 5:9). Ma syatu baka di Paulus  skrifi a brifi dati, son sma na ini na oso fu Klowe fruteri en taki bigi trobi ben de na ini a gemeente (1 Kor. 1:10, 11). Fu dati ede Paulus no go na a gemeente Korente moro. Baka dati a skrifi a brifi di wi sabi now leki 1 Korentesma. Na ini a brifi dati Paulus gi den brada lobi-ati rai, ma a piri-ai gi den tu. Boiti dati, a taigi den taki a no ben o kon na den moro, ma taki a ben o go na Masedonia, fosi a kon na Korente.1 Kor. 16:5, 6. *

Soleki fa a sori, dan di den brada fu Korente kisi a brifi fu Paulus, sonwan fu den taki dati a no du san a pramisi. Den ben feni taki den ben bun moro en. Dati meki a kari den brada disi „kefalek bun apostel”. Paulus taigi den: „We, mi no teki a bosroiti disi sondro fu prakseri bun fosi. Te mi e teki bosroiti, mi no e prakseri misrefi nomo. Mi no o taki ’Iya, Iya’ fosi, èn baka dati ’Nôno, Nôno.’”2 Kor. 1:17; 11:5.

A ben de so trutru taki na apostel Paulus teki wan bosroiti „sondro fu prakseri bun fosi”? Kwetikweti! Den wortu di vertaal nanga „sondro fu prakseri bun fosi” wani taki „no de fu frutrow”. Wan sma di no de fu frutrow no e hori ensrefi na a mofo di a meki nanga trawan. Den Kresten na Korente ben kan denki taki Paulus no ben de fu frutrow fu di a kenki prakseri di a taki dati a no ben o kon na den ete. Ma den no ben abi fu denki so, fu di Paulus srefi taki: „Mi no e prakseri misrefi nomo.”

Ma Paulus ben taigi den krin: „San wi e taigi unu de tru, unu kan frutrow Gado. Wi no e taigi unu Iya fosi, èn Nôno baka dati” (2 Kor. 1:18). Iya, di Paulus kenki prakseri, a ben du dati fu di a ben suku a bun fu den brada nanga sisa na Korente. Na ini 2 Korentesma 1:23 skrifi taki Paulus bosroiti fu no go na Korente ete fu di a no ben wani ’meki den firi moro sari’. Fu di a no du moro san a ben abi na prakseri, meki a gi den na okasi fu du san a taigi den fosi a go na den. Na dati den du tu. Di Paulus ben de na Masedonia, Titus taigi en taki a brifi fu en ben meki den firi sari fu san den du èn den ben abi berow. Di Paulus yere dati, a ben breiti trutru.2 Kor. 6:11; 7:5-7.

YESUS NA A DYARANTI

Di den brada di Paulus ben kari „kefalek bun apostel” taki dati a no du san a pramisi, dan den ben abi na prakseri kande taki den no man frutrow a boskopu di Paulus ben e preiki. Ma Paulus memre den Korentesma taki na a boskopu fu Yesus a ben preiki gi den. A taki: „Mi nanga Selfanus nanga Timoteyus ben preiki gi unu fu a Manpikin fu Gado, Krestes Yesus. A no ben tron Iya fosi, èn Nôno baka dati, ma a meki Iya tan Iya” (2 Kor. 1:19). Wi kan taki dati Yesus Krestes, a sma di Paulus ben teki leki eksempre no ben de fu frutrow? Kwetikweti! En heri libi langa Yesus taki san tru ala ten (Yoh. 14:6; 18:37). Efu a boskopu fu Yesus ben tru èn a ben de fu frutrow, dan a boskopu fu na apostel Paulus ben de fu frutrow tu fu di a ben e preiki a srefi boskopu.

A no de fu taki dati Yehovah na „a Gado di no e fruteri lei” (Ps. 31:5). A sani di Paulus skrifi bakaten e sori taki disi de so. A skrifi: „Awinsi o furu den pramisi fu Gado de, den tron Iya nanga yepi fu en”, dati wani taki nanga yepi fu Krestes. Fu di Yesus tan du san reti di a ben de na grontapu, meki wi no abi fu tweifri na den pramisi fu Yehovah fu di wi sabi taki den o kon tru. Paulus e taki moro fara: „Fu dati ede wi e taki ’Amen’ nanga yepi fu [Yesus] tu, so taki wi kan gi Gado glori” (2 Kor. 1:20). Yesus na a dyaranti noso na „Amen”. Disi wani taki dati Yesus e gi wi a dyaranti taki ala sani di Yehovah pramisi o kon tru.

Neleki fa Yehovah nanga Yesus e taki ala ten san tru, na so Paulus taki ala ten san tru (2 Kor. 1:19). Sma ben kan frutrow en. Te a  ben pramisi wan sani, dan a no ben e ’prakseri ensrefi nomo’ (2 Kor. 1:17). Na presi fu dati a tan du san a yeye fu Gado wani (Gal. 5:16). A fasi fa Paulus ben de nanga sma e sori taki a ben e suku a bun fu den. Te a ben taki „iya”, dan dati ben de „iya” trutru.

TE YU TAKI IYA, DAN DATI E TAN IYA?

Na ini a ten disi a de so taki furu sma di no e du san Bijbel e taki, abi a gwenti fu pramisi sani, ma dan te wan pikin sani opo kon den no e hori densrefi na san den pramisi. Te sma di e du bisnis e taki „iya”, dan a no ala ten dati e tan „iya”, srefi te den meki wan kontrakti kaba. Furu sma no e si a trowlibi moro leki wan pramisi di tu sma musu hori den heri libi langa. Dei fu dei moro nanga moro sma e broko trow èn dati e sori taki den e si a trow fu den leki wan sani di den kan broko o ten den wani.2 Tim. 3:1, 2.

Fa a de nanga yu? A de so taki te yu e taki iya, dati e tan iya? Soleki fa wi si na a bigin fu na artikel, dan a kan pasa taki yu no man hori yusrefi na wan mofo di yu ben meki fu di wan sani pasa di yu no man kenki. Disi no wani taki dati yu no de fu frutrow. Ma efu yu leki Kresten pramisi wan trawan wan sani noso yu meki wan mofo, dan yu musu du ala san yu man fu hori yusrefi na a mofo dati (Ps. 15:4; Mat. 5:37). Te yu e du dati, dan trawan o sabi yu leki wan sma di de fu frutrow, di e du ala ten san a pramisi èn di e taki ala ten san tru (Ef. 4:15, 25; Yak. 5:12). Te sma si taki den kan frutrow yu ala ten, dan den o wani arki yu te yu e preiki gi den fu Gado Kownukondre. Sobun, te wi e taki Iya, dan meki a tan Iya.

^ paragraaf 7 Syatu baka di Paulus skrifi 1 Korentesma, a go na Trowas èn baka dati a go na Masedonia pe a skrifi 2 Korentesma (2 Kor. 2:12; 7:5). Bakaten a go na Korente.