Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2014

Yehovah—Wi moro bun Mati

Yehovah—Wi moro bun Mati

„Den ben kari [Abraham] ’Yehovah mati.’”YAK. 2:23.

1. San wi man du fu di Gado meki libisma na so wan fasi, taki den gersi en?

„EFU yu si a boi, yu si a papa.” Furu sma e taki a sani disi te wan pikin gersi en papa. Iya, ala pikin abi fasi noso maniri fu en papa nanga mama. Yehovah, wi hemel Tata, na a sma di gi wi libi (Ps. 36:9). Wi leki pikin fu en, abi son fasi fu en tu. Gado meki libisma na so wan fasi, taki den ’gersi en’. Dati meki wi man denki fu sani so taki wi man teki bosroiti, èn wi man tron bun mati fu trawan.Gen. 1:26.

2. Fu san ede Yehovah kan de wi moro bun Mati?

2 Yehovah kan de wi moro bun Mati. A sani disi kan fu di Gado lobi wi èn fu di wi e bribi na ini en nanga en Manpikin. Yesus taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yoh. 3:16). Furu eksempre de fu sma di tron bun mati fu Yehovah. Meki wi poti prakseri na tu fu den sma disi.

„MI MATI ABRAHAM”

3, 4. Fu san ede Abraham tan wan mati fu Yehovah èn fu san ede dati no ben de so nanga den Israelsma?

3 Yehovah ben taki dati Abraham, na afo fu den Israelsma,  na en „mati” (Yes. 41:8). Fa a du kon taki Abraham ben de so wan bun mati fu a Mekiman? Na fu di Abraham ben abi bribi.Gen. 15:6; leisi Yakobus 2:21-23.

4 Na a bigin Yehovah ben de wan Papa èn Mati fu den Israelsma di ben de bakapikin fu Abraham. Ma a sari taki bakaten den no ben de Gado mati moro. Fu san ede? Fu di den no ben bribi moro na ini den pramisi fu Yehovah.

5, 6. (a) Fa Yehovah tron yu Mati? (b) San wi musu aksi wisrefi?

5 O moro yu e kon sabi Yehovah, o moro yu o bribi na ini en èn o moro yu o lobi en. Prakseri a ten di yu kon sabi taki Gado na wan trutru Sma. Yu kon sabi taki yu man de wan bun mati fu en. Yu leri tu taki wi alamala abi sondu fu di Adam trangayesi Gado. Yu kon frustan taki furu libisma no sabi Gado (Kol. 1:21). Yu kon sabi taki wi lobi-ati hemel Tata no de fara fu wi èn a e broko en ede nanga wi. Di wi frustan taki Yehovah gi Yesus leki wan frulusu-ofrandi, wi bigin bribi na ini na ofrandi dati. Na so wi bigin tron mati fu Gado.

6 Te yu e prakseri ala den sani disi, a bun fu aksi yusrefi: ’Mi de wan moro bun mati fu Gado now? A de so taki ibri dei mi e frutrow Yehovah moro nanga moro? Mi e kon lobi mi Mati Yehovah moro dei fu dei?’ Wan tra sma na ini owruten di ben de wan bun mati fu Yehovah, ben de Gideon. Meki wi luku san wi kan leri fu en.

YEHOVAH NA FREIDE

7-9. (a) Sortu aparti sani Gideon ondrofeni èn san ben de a bakapisi? (Luku a prenki na a bigin fu na artikel.) (b) Fa wi kan tron wan mati fu Yehovah?

7 Krutuman Gideon ben e dini Yehovah na ini wan muilek ten baka di den Israelsma ben go na ini a Pramisi Kondre. Kapitel 6 fu a Bijbel buku Krutuman e taki dati wan engel fu Yehovah ben kon na Gideon di a ben de na Ofra. Na a ten dati den Midiansma di ben e tan na ini a birti fu Israel, ben kwinsi den Israelsma. Dati meki Gideon no ben e masi aleisi na den aleisigron soleki fa den ben gwenti du. Na presi fu dati a ben e masi en na ini wan baki pe sma ben gwenti masi droifi, so taki a ben kan kibri na aleisi esi-esi efu dati ben de fanowdu. Gideon skreki di na engel kon na en wantronso. A fruwondru di na engel kari en wan „tranga, deki-ati man”. Gideon ben sabi taki Yehovah ben frulusu den Israelsma na Egepte, ma toku a ben aksi ensrefi efu Yehovah ben o yepi den now. Ne na engel di ben e tyari boskopu fu Yehovah, taigi Gideon taki Yehovah ben o yepi en seiker.

8 Gideon ben aksi ensrefi fa a ben o man „frulusu den Israelsma fu na anu fu den Midiansma”. Yehovah taigi en krin: „Mi o de nanga yu èn yu o wini den Midiansma. A o de neleki na wán man nomo e feti nanga yu” (Krut. 6:11-16). Ma fu di Gideon no ben de seiker ete, meki a aksi Gado fu du wan sani fu sori en taki a ben o yepi en. A takimakandra disi e sori krin taki Gideon ben si Yehovah leki wan trutru Sma.

9 Den sani di pasa baka dati tranga a bribi fu Gideon èn a tron wan moro bun mati fu Gado. Gideon sreka wan nyanyan, dan a gi na engel fu a nyan. Di na engel fasi a nyanyan nanga a tiki fu en, a heri nyanyan bron. Na so Gideon kon frustan taki na engel ben de wan boskopuman fu Yehovah trutru èn a bigin frede. A taki: „Ke, Moro Hei Masra Yehovah. Mi si na engel fu Yehovah!” (Krut. 6:17-22) Ma a de so taki a sani disi meki taki Gideon ben kon frede fu de Gado mati?  Kwetikweti! Na presi fu dati Gideon ben firi korostu èn a tron wan moro bun mati fu Gado. Disi de krin fu si te yu e luku fa Gideon kari na altari di a meki na a presi dati. A kari en „Yehovah-Syalom”. Na ini Hebrewtongo disi wani taki „Yehovah na freide”. (Leisi Krutuman 6:23, 24.) Te wi e prakseri ala den sani di Yehovah e du gi wi ibri dei, wi o si taki a de wan trutru Mati gi wi. Te wi e taki ala ten nanga Gado na ini begi, dan wi o firi moro korostu èn wi o tron moro bun mati fu en.

’SUMA KAN KON TAN NANGA YEHOVAH NA INI EN TENTI?’

10. Soleki fa Psalm 15:3, 5 e sori, dan san Yehovah e fruwakti fu wi efu wi wani de en mati?

10 Ma a no ala sma Yehovah e teki leki mati. Na ini Psalm 15 David e taki suma ’kan tan nanga Yehovah na ini en tenti’ noso suma kan de en mati (Ps. 15:1). Meki wi luku tu sani di den sma disi no e du: Den no e taki ogri-ati lei fu trawan èn den no e bedrigi sma. David ben taki dati wan mati fu Yehovah ’no e taki ogri-ati lei nanga en mofo’ èn „a no e teki tyuku fu lei gi trawan di no du ogri”.Ps. 15:3, 5.

11. Fu san ede wi no musu taki ogri-ati lei fu trawan?

11 Na ini wan tra psalm, David ben gi a warskow disi: „Kibri yu tongo fu no taki ogri” (Ps. 34:13). Efu wi no e gi yesi na a rai disi, dan wi kan pori wi matifasi nanga wi hemel Tata. Hori na prakseri taki Satan, a bigi feanti fu Yehovah, lobi fu taki ogri-ati lei fu trawan. A wortu „Didibri” kon fu wan Griki wortu di wani taki „ogri-ati leiman”. Te wi e luku bun san wi e taki fu tra sma, dan wi o tan bun mati fu Yehovah. Wi musu luku bun spesrutu fa wi e taki fu den wan di Gado poti fu teki fesi na ini a gemeente.Leisi Hebrewsma 13:17; Yudas 8.

12, 13. (a) Fu san ede wi musu du ala sani nanga wan krin ati? (b) San o de a bakapisi te wi e no e lei noso bedrigi trawan?

12 Futuboi fu Yehovah no e bedrigi trawan. Na apostel Paulus skrifi: „Tan begi gi wi, bika wi sabi taki wi abi wan krin konsensi, fu di wi wani du ala sani nanga wan krin ati” (Hebr. 13:18). Fu di wi wani „du ala sani nanga wan krin ati”, meki wi no e bedrigi wi Kresten brada nanga sisa. A no fu di den na wi Kresten brada noso sisa, meki wi musu denki taki wi kan du nanga den san wi wani te den e wroko gi wi. Boiti dati, efu den du wan wroko gi wi, dan wi musu pai den soleki fa wi ben taki. Leki Kresten, wi no e bedrigi nowan sma, awansi den na wrokoman fu wi. Èn efu wi e wroko gi wan brada noso sisa, dan wi no musu fruwakti taki den e du moro gi wi leki san den e du gi den tra wrokoman.

13 Furu tron sma na grontapu e taki bun fu Yehovah Kotoigi fu di den no e lei noso bedrigi trawan. Fu eksempre, wan basi fu wan bigi bow bedrijf ben si taki Yehovah Kotoigi e du san den pramisi. A taki: „Ala ten te unu e taki wan sani, mi kan de seiker taki unu o du en” (Ps. 15:4). Te wi e tyari wisrefi na so wan fasi, dan wi e tan mati fu Yehovah èn sma o prèise wi lobi-ati hemel Tata.

YEPI TRA SMA FU TRON MATI FU YEHOVAH

Wi e yepi trawan fu tron mati fu Yehovah (Luku paragraaf 14, 15)

14, 15. Fa wi kan yepi den sma di wi e miti na ini a preikiwroko fu tron mati fu Yehovah?

14 Furu sma di wi e miti na ini a preikiwroko e bribi taki wan Gado de, ma den no e si en leki den moro bun Mati. Fa wi kan yepi den? Luku sortu rai Yesus gi den 70 disipel fu en di a seni den go preiki: „Efu unu e go na ini wan oso, taki fosi: ’Meki ala sani waka bun na ini na  oso disi.’ Efu wan sma di lobi freide de drape, dan a freide fu unu o kon na en tapu. Ma efu nowan sma di lobi freide de drape, dan a freide fu unu o drai kon baka na unu tapu” (Luk. 10:5, 6). Te wi e sori switifasi, dan a kan taki sma o wani sabi moro fu Bijbel. Te wi e sori switifasi gi sma di e gens wi, dan disi kan meki taki den ati no bron moro, èn kande tra leisi den o wani arki wi te wi e preiki gi den.

15 Awinsi wi e miti sma di de fayafaya na ini a kerki fu den noso di e hori densrefi na son gwenti di no e kruderi nanga Bijbel, toku wi e sori switifasi gi den èn wi no e meki trobi nanga den. Son sma e bruya fu den sani di e pasa na grontapu now èn den wani sabi moro fu a Gado di wi e dini. Te den sma disi e kon na den konmakandra fu wi, dan wi e gi den wan switikon. Na ini den artikel di nen „Bijbel e kenki sma libi” wi kan leisi furu ondrofenitori fu den sortu sma disi.

WI E WROKO MAKANDRA NANGA WI MORO BUN MATI

16. Fa wi kan tron moro bun mati fu Yehovah te wi e wroko makandra nanga en?

16 Nofo tron te sma e wroko nanga makandra, den e tron bun mati. Ala sma di gi densrefi abra na Yehovah abi a grani fu de mati fu en èn fu „wroko makandra nanga [en]”. (Leisi 1 Korentesma 3:9.) Te wi e preiki èn yepi sma fu tron disipel fu Krestes, dan wi o leri sabi wi hemel Tata moro bun èn wi o si sortu moi fasi a abi. Wi o si fa a santa yeye e yepi wi fu preiki a bun nyunsu.

17. Fa den sani di wi e leri na den bigi konmakandra e sori taki Yehovah na wi Mati?

17 O moro wi e preiki, o moro wi o kon krosibei na Yehovah. Wi e si fa Yehovah e sorgu taki nowan sma man tapu a preikiwroko. Prakseri den yari di pasa. Wi si krin fa Gado tiri wi, a no so? Wi e fruwondru fu si fa Yehovah e tan gi wi leri na den konmakandra èn nanga yepi fu den buku di wi e kisi. Den sani di wi e leri na den bigi konmakandra fu wi e sori krin taki Yehovah sabi sortu problema wi abi èn san wi abi fanowdu. Baka wan fu den kongres fu wi, wan famiri ben skrifi: „A programa naki wi ati trutru. Wi ben kan firi taki Yehovah lobi ibriwan fu wi èn taki a wani taki sani waka bun nanga wi.” Wan trowpaar fu Doisrikondre di ben go na wan spesrutu kongres na ini Ierland, ben lobi fa den brada nanga sisa drape sori switifasi gi den èn sorgu gi den. Den taki: „Ma den sma di wi wani taki tangi trutru, na Yehovah nanga en Kownu Yesus Krestes. Na den meki taki wi tron memre fu  a pipel disi di abi wánfasi. Wi no e taki nomo dati wi abi wánfasi, ma wi e ondrofeni dati ibri dei. Den sani di wi ondrofeni na a spesrutu kongres na ini Dublin o memre wi ala ten taki wi abi a spesrutu grani fu dini wi bigi Gado makandra nanga unu alamala.”

MATI E TAKI NANGA MAKANDRA

18. San wi musu aksi wisrefi te a abi fu du nanga a taki di wi e taki nanga Yehovah?

18 Sma e tron moro bun mati fu makandra te den e taki bun nanga makandra. Na ini a ten disi, sma lobi gebroiki Internet nanga cellulair fu taki nanga trawan. Ma fa a de nanga wi moro bun Mati Yehovah? En „na a sma di e arki begi” (Ps. 65:2). O furu wi e taki nanga en?

19. San kan yepi wi efu wi feni en muilek fu fruteri wi hemel Tata fa wi e firi?

19 Gi son futuboi fu Gado a no makriki fu taki san de na ini den ati èn fu taki fa den e firi. Ma na disi Yehovah wani wi fu du te wi e begi en (Ps. 119:145; Sari 3:41). Awinsi a muilek gi wi fu taki fa wi e firi, toku yepi de. Paulus ben skrifi den Kresten na ini Rome: „Son leisi a de fanowdu fu begi, ma wi no sabi fu san wi musu begi. We, na den ten dati a yeye srefi e taki gi wi te wi e geme èn te wi no sabi san fu taki. Gado e ondrosuku na ati èn a e frustan san a yeye wani taki, bika a yeye e taki gi den santawan, soleki fa Gado feni bun” (Rom. 8:26, 27). Te wi e denki dipi fu den sani di skrifi na ini Bijbel buku soleki Yob, Psalm, nanga Odo, dan dati o yepi wi fu fruteri Yehovah san de dipi na ini wi ati.

20, 21. Fa den sani di Paulus taki na Filipisma 4:6, 7 e trowstu wi?

20 Te wi de na ini muilek situwâsi, wi musu gi yesi na a rai di Paulus gi den Filipisma: „No broko un ede nanga nowan sani, ma begi Gado ala ten, begi en fayafaya èn taki en tangi tu. Na so a o kon sabi san unu wani aksi en, dan a freide fu Gado di bigi moro iniwan sani di libisma man frustan, o kibri un ati nanga un frustan nanga yepi fu Krestes Yesus” (Fil. 4:6, 7). Ala ten wi musu de nanga tangi taki wi abi „a freide fu Gado” di e kibri wi ati nanga wi frustan.

Fa begi e yepi wi fu tron moro bun mati fu Gado? (Luku paragraaf 21)

21 Begi e yepi wi fu tron moro bun mati fu Yehovah. Fu dati ede, „begi doronomo” (1 Tes. 5:17). Meki a de so taki na artikel disi yepi yu fu tron wan moro bun mati fu Gado èn fu gi yesi na en ala ten. Èn meki wi teki ten fu denki dipi fu den blesi di wi abi fu di Yehovah na wi Tata, wi Gado nanga wi Mati.