Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2014

Na uma fu Sarfat kisi blesi fu di a ben abi bribi

Na uma fu Sarfat kisi blesi fu di a ben abi bribi

WAN pôti uma e brasa en wan-enkri pikin hori. A no man bribi. Didyonsro a ben hori a dedeskin fu en boi na ini en anu. Now a e luku a boi fu en di kisi wan opobaka èn a breiti fu si fa a boi e lafu. A fisitiman di ben kon na en oso ben taigi en: „Luku, yu manpikin e libi baka.”

A moi tori disi pasa sowan 3000 yari kaba. Yu kan leisi en na ini 1 Kownu kapitel 17. A fisitiman ben de Elia, a profeiti fu Gado. Suma ben de na uma? Bijbel no e taki fa a nen, ma a ben e libi na ini a foto Sarfat èn a masra fu en ben dede. Na opobaka fu en manpikin ben de wan fu den moro prenspari sani di meki taki en bribi kon moro tranga. Meki wi luku sortu prenspari sani wi kan leri fu na uma disi.

ELIA GO NA WAN UMA DI BEN ABI BRIBI

Na a ten di na ogri kownu Akab ben e tiri Israel, Yehovah ben taki dati alen no ben o fadon wan heri pisi ten. Baka di Elia fruteri a nyunsu disi, Gado kibri en, so taki Akab no ben man feni en. Gado meki blaka fowru tyari brede nanga meti gi Elia. Bakaten Yehovah taigi Elia: „Go na Sarfat, wan foto fu den Sidonsma èn tan drape. Luku, wan uma de drape di en masra dede kaba. Mi o taigi en fu gi yu nyanyan.”1 Kow. 17:1-9.

Di Elia doro na Sarfat, a si wan pôti uma e piki udu. Na a uma disi ben o gi a profeiti nyanyan? Fa so wan pôti uma ben o man du dati? Kande Elia ben e aksi ensrefi den sani disi, ma toku a bigin taki nanga na uma. A taki: „Mi e begi yu fu go teki pikinso watra gi mi na ini wan kan, meki mi dringi.” Di na uma bigin waka go teki a watra, Elia taigi en: „Mi e begi yu fu tyari wan pisi brede kon gi mi” (1 Kow. 17:10, 11). A no  ben muilek gi na uma fu gi Elia watra, ma fu gi en brede ben de wan problema.

Na uma taki: „Mi e sweri na Yehovah yu Gado, taki mi no abi brede. Mi abi soso pikinso blon na ini wan bigi prapi, nanga pikinso oli na ini wan pikin batra. Luku, na piki mi e piki udu fu go bori wan sani gi mi nanga mi manpikin. Te wi nyan disi, dan wi no abi noti moro fu nyan. Na dede wi o dede” (1 Kow. 17:12). Meki wi luku san wi kan leri fu a pisi tori disi.

Na uma ben taki: „Mi e sweri na Yehovah yu Gado.” Disi e sori taki a ben si taki Elia ben de wan Israelsma di ben e dini Gado fayafaya. Soleki fa a sori, a ben sabi wan tu sani fu a Gado fu Israel, ma a no ben taki dati Yehovah na en Gado. A ben e libi na ini Sarfat, wan foto di ben de ondro a tiri fu Sidon di ben de fu den Fenisiasma. Soleki fa a sori, dan anbegiman fu Bâal ben e libi na ini Sarfat. Toku Yehovah ben si wan bun sani na ini na uma disi.

Aladi a pôti uma fu Sarfat ben e libi na mindri anbegiman fu falsi gado, toku a ben bribi na ini a Gado fu Israel. Yehovah seni Elia go na en fu yepi den ala tu. Wi kan leri wan prenspari sani fu disi.

A no ala sma fu Sarfat ben de ogrisma di ben e anbegi Bâal. A seni di Yehovah seni Elia go na a uma, e sori taki Yehovah e poti prakseri na sma di abi wan bun ati, ma di no e dini en ete. Iya, „awansi fu sortu kondre wan sma de, efu a e lespeki Gado èn a e du san reti, dan Gado feni en bun”.Tori 10:35.

Omeni sma di e libi na ini a kontren fu yu de leki na uma fu Sarfat? Kande den e libi na mindri sma di e horibaka gi falsi bribi, ma toku den wani kon sabi a tru Gado. Kande den no sabi noti fu Yehovah noso kande den no sabi furu fu en. Dati meki den abi yepi fanowdu fu kon sabi a tru bribi. Yu e suku den sma disi èn yu e yepi den?

’MEKI WAN PIKIN LONTU BREDE GI MI FOSI’

Poti prakseri na san Elia aksi na uma. Na uma ben taigi Elia kaba taki a nyanyan di a ben abi ben de soso fu en nanga en boi nyan wán leisi nomo. Baka dati, den ben o dede fu angri. Ma san Elia taki? A taki: „No frede. Go na inisei èn du san yu ben wani du. Ma fosi yu du dati, yu musu meki wan pikin lontu brede gi mi, dan yu musu tyari en kon gi mi. Baka dati yu kan meki wan sani gi yu nanga yu manpikin, bika Yehovah, a Gado fu Israel, taki: ’Solanga Yehovah no meki alen fadon, a blon na ini a bigi prapi èn na oli na ini a pikin batra no o kaba.’”1 Kow. 17:11-14.

Kande son sma ben o taki: ’Na wi lasti nyanyan yu wani? Yu e law noh?’ Ma na uma no taki dati. Aladi a no ben sabi furu fu Yehovah, toku a ben e bribi Elia èn a du san Elia aksi en. Disi ben de wan bigi tesi, ma a teki wan koni bosroiti!

Fu di na uma ben bribi na ini Yehovah, a Gado fu Elia, meki en nanga en manpikin tan na libi

Gado yepi a pôti uma disi trutru. Soleki fa Elia ben taki, Yehovah meki a pikinso nyanyan di a ben abi kon moro furu, so taki Elia, na uma nanga a manpikin fu en ben abi nofo nyanyan teleki a dreiten pasa. Iya, „a blon na ini a bigi prapi èn na oli na ini a pikin batra no ben e kaba. Na dati Yehovah ben taigi Elia fu fruteri na uma” (1 Kow. 17:16; 18:1). Efu na uma no ben bribi Elia, dan  kande a brede di a ben meki fu a pikinso blon nanga oli di a ben abi, ben o de en lasti nyanyan trutru. Na presi fu dati, a sori bribi, a frutrow na tapu Yehovah, èn a gi Elia nyanyan fosi.

Wan sani di wi kan leri fu disi, na taki Gado e blesi den sma di e sori bribi. Te yu e sori bribi aladi yu e kisi tesi, dan Yehovah o yepi yu. A o sorgu gi yu, a o kibri yu, èn a o de yu mati di o yepi yu fu horidoro.Eks. 3:13-15.

Na ini 1898, Zion’s Watch Tower ben sori san wi kan leri fu a tori disi: „Efu na uma ben abi nofo bribi fu kan gi yesi na Gado, dan Masra ben o feni en warti fu yepi na uma nanga yepi fu a Profeiti. Ma efu a no ben abi bribi, dan kande wan tra uma ben o kisi a blesi disi. Na so a de nanga wi. Na tapu a pasi fu libi, Masra kan gi pasi taki wi e kisi tesi fu sori efu wi abi bribi. Efu wi sori bribi, wi o kisi blesi. Ma efu wi no e sori bribi, wi no o kisi blesi.”

Te wi e kisi son tesi, wi musu suku rai na Gado. Wi kan feni disi na ini Bijbel èn na ini tra buku fu na organisâsi fu wi. Baka dati wi musu du soleki fa Yehovah sori wi, awinsi o muilek dati de. Wi o kisi blesi trutru efu wi e du san na odo disi taki: „Frutrow na tapu Yehovah nanga yu heri ati. No frutrow na tapu yu eigi frustan. Poti prakseri na en, awinsi sortu pasi yu e waka, dan na en o meki yu pasi kon reti.”Odo 3:5, 6.

’YU KON DYASO FU KIRI MI MANPIKIN’?

Na uma ben o kisi ete wan tesi. Bijbel e taki: „Baka wan pisi ten a manpikin fu na uma fu na oso, kon siki. A siki so te, taki a dede te fu kaba.” A mama disi ben e sari trutru èn a no ben sabi fu san ede a sani disi ben miti en. Dati meki a taigi Elia: „Man fu a tru Gado, fu san ede yu du disi nanga mi? Yu kon dyaso fu meki mi memre den sondu fu mi èn fu kiri mi manpikin” (1 Kow. 17:17, 18). San na uma ben wani sori nanga den wortu disi?

A de so taki na uma ben abi konsensi fonfon fu wan sondu di a ben du? A de so taki a ben e denki taki Gado kiri en manpikin fu strafu en èn taki a seni Elia fu kon taigi en a sani disi? Aladi Bijbel no e taigi wi san na uma disi ben e denki, toku wan sani de krin: Na uma no taki dati Gado e du ogri.

A musu de so taki Elia skreki di a yere taki a manpikin fu na uma disi dede èn taki na uma ben e denki taki na en meki a boi dede. Elia tyari a dedeskin fu a boi go na ini a kamra na tapu a daki, èn a bari: „Ke Yehovah mi Gado, mi e tan dyaso leki wan trakondre sma na wan uma di no abi masra moro, fu di a masra dede kaba. Dan fu san ede a boi fu en musu dede, so taki na uma musu pina tu?” Na uma disi ben abi switifasi èn a ben meki Elia kon tan na en. A ben o hati Elia efu Gado ben o kisi porinen efu a ben o meki na uma disi pina na so wan fasi. Dati meki Elia begi: „Ke Yehovah mi Gado, meki a boi disi kon na libi baka.”1 Kow. 17:20, 21.

„LUKU, YU MANPIKIN E LIBI BAKA”

Yehovah arki a begi fu Elia. Na uma ben sorgu gi Elia èn a ben sori bribi. Soleki fa a sori, dan Gado gi pasi taki a boi siki teleki a dede, fu di a ben sabi taki a ben o gi a boi wan opobaka. Disi na a fosi opobaka di skrifi na ini Bijbel èn te now ete a tori disi e gi furu sma howpu. Di Elia begi Yehovah fu meki a boi kon na libi baka, dan Yehovah du dati. Prakseri fa na uma ben breiti di Elia taki: „Luku, yu manpikin e libi baka.” Baka dati na uma taigi Elia: „Now mi sabi trutru taki yu na wan man fu Gado. Mi kon sabi tu taki den sani di Yehovah e meki yu taki, na tru tori.”1 Kow. 17:22-24.

A tori na ini 1 Kownu kapitel 17 no e taki noti moro fu na uma disi. Ma te wi e luku san Yesus taki fu en, dan a sori leki a tron wan fayafaya anbegiman fu Yehovah (Luk. 4:25, 26). A tori fu en e leri wi taki Gado e blesi den sma di e du bun gi den futuboi fu en (Mat. 25:34-40). A e sori tu taki Gado e sorgu gi den futuboi fu en, srefi na ini muilek situwâsi (Mat. 6:25-34). A tori disi e sori tu taki Yehovah e angri fu gi sma wan opobaka èn taki a man du dati tu (Tori 24:15). A no de fu taki dati wi kan leri moi sani fu na uma fu Sarfat.