Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yanuari 2014

Teki koni bosroiti te yu yongu

Teki koni bosroiti te yu yongu

„Un yonkuman nanga ala un yonguwenke . . . prèise a nen fu Yehovah.”PS. 148:12, 13.

1. Sortu moi okasi furu yongu Kresten abi?

WI E libi na ini span ten. Milyunmilyun sma fu ala kondre e kon na ini a tru anbegi. Noiti ete so wan sani pasa (Openb. 7:9, 10). Furu yongusma e ondrofeni moi sani te den e yepi trawan fu kon frustan den tru tori fu Bijbel di e gi sma libi (Openb. 22:17). Son yonguwan e hori Bijbelstudie fu yepi sma so taki den kan abi wan moro betre libi. Trawan e preiki fayafaya na ini kontren pe sma e taki wan tra tongo (Ps. 110:3; Yes. 52:7). San yu musu du fu teki prati na a wroko disi di e meki wi de koloku?

2. Fa na eksempre fu Timoteyus e sori taki Yehovah wani gi yongusma frantwortu? (Luku a prenki na a bigin fu na artikel.)

2 Yu leki yonguwan kan teki bosroiti di o gi yu moi okasi bakaten fu du moro na ini a diniwroko fu Yehovah. Fu eksempre, Timoteyus fu Listra ben teki koni bosroiti di ben abi leki bakapisi taki a kisi a grani fu tron wan zendeling di a ben abi sowan 20 yari (Tori 16:1-3). A kan taki disi pasa soso wan tu mun baka di Paulus aksi Timoteyus fu go na wan nyun gemeente na Tesalonika pe den brada ben kisi hebi frufolgu. Paulus ben abi fu gowe drape, ma a ben sabi taki Timoteyus ben o man gi den brada deki-ati (Tori 17:5-15; 1 Tes. 3:1, 2, 6). Yu kan frustan fa Timoteyus ben firi di a kisi a frantwortu dati?

 A MORO PRENSPARI BOSROITI DI YU TEKI

3. San na a moro prenspari bosroiti di yu musu teki na ini yu libi èn o ten yu kan teki en?

3 Te yu yongu, yu musu teki prenspari bosroiti. Ma a moro prenspari bosroiti di yu musu teki na fu dini Yehovah. O ten na a moro bun ten fu teki a bosroiti dati? Yehovah e taki: „Memre yu Gran Mekiman na ini yu yongu yari” (Preik. 12:1). A wan-enkri bun fasi fa yu kan „memre” Yehovah na te yu e dini en nanga yu heri ati (Deut. 10:12). Te yu e teki a bosroiti fu dini Gado nanga yu heri ati, dan dati na a moro prenspari bosroiti na ini yu libi. A o abi krakti na tapu yu heri libi.Ps. 71:5.

4. Boiti taki yu musu bosroiti fu dini Yehovah, dan sortu tra prenspari bosroiti o abi krakti na tapu a fasi fa yu dini en?

4 A no de fu taki dati a bosroiti di yu e teki fu dini Yehovah, a no a wan-enkri bosroiti di yu o teki na ini yu libi. Fu eksempre, kande yu e aksi yusrefi tu efu yu o trow, nanga suma yu o trow èn sortu wroko yu o du. Den sani disi na prenspari bosroiti. Ma a bun fu luku fosi efu yu wani dini Yehovah nanga yu heri ati (Deut. 30:19, 20). Fu san ede? Den bosroiti dati abi fu du nanga makandra. Te yu bosroiti efu yu o trow, nanga suma yu o trow èn sortu wroko yu o du, dan dati abi krakti na tapu a fasi fa yu o dini Gado. (Luku Lukas 14:16-20.) Na a tra sei a de so tu taki te yu wani dini Gado, dan dati abi krakti na tapu den bosroiti di abi fu du nanga a trowlibi èn nanga a wroko di yu o du. Sobun, luku fosi san na a moro prenspari sani na ini yu libi.Fil. 1:10.

SAN YU O DU TE YU YONGU?

5, 6. Sori fa wan Kresten kan ondrofeni moi sani te a e teki den yoisti bosroiti. (Luku sosrefi na artikel di nen „A bosroiti di mi teki di mi ben pikin”, na ini a Waktitoren disi.)

5 Te yu teki a bosroiti kaba fu dini Gado, dan yu kan prakseri now san Gado wani taki yu du èn baka dati yu kan bosroiti fa yu o dini en. Wan brada fu Yapan skrifi: „Di mi ben abi 14 yari, mi ben e preiki makandra nanga wan owruman fu a gemeente. A ben si taki mi no ben prisiri nanga a preikiwroko. Na wan switifasi a taigi mi: ’Yuichiro, go na oso. Go sidon prakseri bun san Yehovah du gi yu.’ Na dati mi du. Wan tu dei langa mi sidon prakseri a sani disi èn mi begi fu a tori tu. Te fu kaba mi bigin denki tra fasi fu a preikiwroko. Syatu baka dati mi kon si taki mi ben e prisiri fu dini Yehovah. Mi ben lobi leisi ondrofenitori fu zendeling èn mi bigin denki fa mi ben kan du moro na ini a diniwroko.”

6 Yuichiro e taki moro fara: „Wan dei mi taki na misrefi taki mi ben o bigin teki bosroiti di ben o gi mi na okasi fu dini Yehovah na wan tra kondre. Fu eksempre, mi bosroiti fu leri Ingrisitongo. Di mi klari nanga skoro, mi go wroko wan tu yuru na ini a wiki fu leri sma Ingrisitongo so taki mi ben kan pionier. Di mi ben abi 20 yari, mi bigin leri Mongoliatongo èn mi ben kisi na okasi fu go na wan grupu preikiman di e taki Mongoliatongo. Tu yari baka dati, na ini 2007, mi go na Mongolia. Di mi go preiki nanga wan tu pionier drape, mi si taki furu sma ben wani leri a tru anbegi èn fu dati ede mi ben wani froisi go drape fu yepi den. Mi drai go baka na Yapan fu sreka sani. Sensi april 2008, mi e pionier na ini Mongolia. A libi dyaso no makriki. Ma sma e arki a bun nyunsu èn mi man yepi den fu kon moro krosibei na Yehovah. Mi feni taki den bosroiti di mi teki, meki taki mi e libi na a moro bun fasi now.”

7. Sortu bosroiti wi musu teki gi wisrefi èn san wi kan leri fu Moses?

7 Ibri sma musu teki en eigi bosroiti te a abi fu du nanga a fasi fa a o libi leki wan Kotoigi fu Yehovah (Yos. 24:15). Wi no man  taigi yu efu yu musu trow, nanga suma yu musu trow noso sortu wroko yu musu du. Yu o teki a bosroiti fu du wan wroko pe yu no abi furu skoro fanowdu? Yonguwan, sonwan fu unu e libi na ini pôti birti. Trawan e libi na ini gudu foto. Na heri grontapu unu yonguwan e difrenti furu fu makandra te a abi fu du nanga den fasi di unu abi, den sani di unu man du bun, na ondrofeni di unu abi, den sani di unu lobi èn den sani di unu wani du na ini a tru anbegi. Kande unu e difrenti fu makandra neleki fa den Hebrew yonguwan na ini owruten Egepte ben difrenti fu Moses. A ben kweki leki a manpikin fu na umapikin fu a kownu èn a ben gudu, ma den tra Hebrew yonguwan ben de srafu (Eks. 1:13, 14; Tori 7:21, 22). Neleki yu, den ben libi na ini wan ten pe den ben musu teki prenspari bosroiti (Eks. 19:4-6). Ibriwan fu den ben musu luku san a ben o du nanga en libi. Moses ben teki a yoisti bosroiti.Leisi Hebrewsma 11:24-27.

8. Sortu yepi de gi yonguwan di e luku sortu bosroiti den o teki na ini den libi?

8 Yehovah e yepi yu fu teki koni bosroiti te yu yongu. Gado e gebroiki Bijbel fu gi yu rai di kan yepi yu, awansi na ini sortu situwâsi yu de (Ps. 32:8). Boiti dati, yu Kresten papa nanga mama nanga den owruman na ini yu gemeente kan yepi yu fu si fa yu kan gebroiki den rai disi (Odo 1:8, 9). Meki wi go luku dri prenspari Bijbel rai di kan yepi yu fu teki koni bosroiti so taki yu libi waka bun.

DRI BIJBEL RAI DI KAN YEPI YU

9. (a) Fa Yehovah e sori taki a abi lespeki gi wi te a e gi wi na okasi fu teki wi eigi bosroiti? (b) Sortu okasi yu abi te yu e ’suku a Kownukondre fosi’?

9 Suku fosi a Kownukondre nanga Gado en retidu. (Leisi Mateyus 6:19-21, 24-26, 31-34.) Yehovah e lespeki yu èn dati meki a e gi yu na okasi fu bosroiti gi yusrefi san yu wani du nanga yu ten. A no e taigi yu omeni ten yu musu gebroiki fu preiki fu a Kownukondre. Ma Yesus ben gi wi a bun rai fu suku a Kownukondre fosi. Te yu e teki a rai disi fu Yesus, dan yu o abi na okasi fu sori Gado fa yu lobi en, fa yu e broko yu ede nanga tra sma èn fa yu e warderi a howpu di wi abi fu kisi têgo libi. A de so taki den bosroiti di yu o teki na ini a tori fu trow nanga wroko o sori taki yu broko yu ede moro nanga gudu? Noso den bosroiti dati o sori taki yu e „suku fosi a Kownukondre nanga Gado en retidu”?

10. San meki taki Yesus ben de koloku èn sortu bosroiti o meki yu de koloku?

10 Yu o de koloku te yu e du sani gi trawan. (Leisi Tori fu den apostel 20:20, 21, 24, 35.) Na wan switifasi Yesus ben gi wi a prenspari rai disi. A ben de koloku trutru fu di a no ben e du san en wani, ma a ben e du san en Papa wani. Yesus ben e prisiri te safri-ati sma ben e arki a bun nyunsu (Luk. 10:21; Yoh. 4:34). Kande yu ondrofeni kaba fa a e gi prisiri te yu e yepi trawan. Efu yu gebroiki a rai disi fu Yesus te yu e teki prenspari bosroiti na ini yu libi, dan yu kan de seiker taki yu o de koloku èn taki yu o meki Yehovah ati prisiri.Odo 27:11.

11. Fu san ede Baruk no ben e prisiri moro èn sortu rai Yehovah gi en?

11 A moro bun fasi fa wi kan de koloku na te wi e dini Yehovah (Odo 16:20). A kan taki Baruk, a sekretarsi fu Yeremia, ben frigiti dati. Wan ten ben de taki a no ben prisiri moro nanga a wroko di a ben e du gi Yehovah. Yehovah taigi en: „Yu e tan suku bigi sani gi yusrefi. No suku den moro. . . . Mi o tyari rampu kon na tapu ala libisma, ma mi o meki yu tan na libi na ala den presi pe yu o go” (Yer. 45:3, 5). San yu denki taki Baruk ben musu du efu a ben wani de koloku trutru? A ben musu suku bigi sani gi ensrefi noso a ben musu meki  muiti fu pasa a pori fu Yerusalem libilibi?Yak. 1:12.

12. Sortu bosroiti Ramiro teki fu kan kisi wan koloku libi?

12 Wan brada di ben kon de koloku fu di a yepi trawan, na Ramiro. A e taki: „Mi gro kon bigi na ini wan pôti osofamiri di ben e libi na ini wan dorpu na Andes-bergi. Sobun, di mi bigi brada ben wani pai gi mi fu go na universiteit, dan dati ben de wan moi okasi gi mi. Ma no so langa pasa mi ben teki dopu leki wan Kotoigi èn mi ben kisi wan tra kari tu. Wan pionier ben aksi mi fu go preiki nanga en na ini wan pikin foto. Di mi go drape, mi leri fa fu koti wiwiri èn mi opo wan barbershop fu sorgu misrefi. Furu sma ben e arki te wi ben e leri den sani fu Bijbel. Bakaten mi go na wan nyun gemeente pe sma e taki wan Ingitongo. Now mi e pionier tin yari kaba. Nowan wroko ben kan gi mi so furu prisiri leki a wroko di mi e du now fu leri sma a bun nyunsu na ini den eigi tongo.”

Ramiro e prisiri nanga a wroko di a bigin du gi Yehovah na ini en yongu yari (Luku paragraaf 12)

13. Fu san ede den yongu yari fu yu na a moro bun ten fu dini Yehovah nanga yu heri ati?

13 Prisiri fu dini Yehovah te yu yongu. (Leisi Preikiman 12:1.) No denki taki yu musu feni wan bun wroko fosi, fu kan dini Yehovah bakaten. Te yu yongu, dan dati na wan bun ten fu bigin dini Yehovah nanga yu heri ati. Furu yonguwan no abi furu frantwortu na ini den osofamiri. Boiti dati, den gosontu èn den abi a krakti fu du muilek sani di abi fu du nanga a diniwroko. San yu ben sa wani du gi Yehovah na ini yu yongu yari? Kande yu wani tron wan pionier. A kan taki yu wani go wroko na ini wan kontren pe sma e taki wan tra tongo. Noso kande yu wani du moro na ini a gemeente pe yu e dini now. Awinsi san yu wani du na ini a diniwroko fu Gado, yu o abi fu du wan sani fu sorgu yusrefi. Na sortu  skoro yu o abi fu go? Sortu bosroiti yu o teki?

GEBROIKI BIJBEL RAI FU TEKI KONI BOSROITI

14. Sortu warskow yonguwan musu hori na prakseri te den e suku wan wroko?

14 Wi luku dri Bijbel rai di kan yepi yu fu bosroiti sortu wroko yu o du. Kande wan sma na skoro sabi sortu wroko de fu du na ini yu birti. Yu kan luku tu na ini koranti sortu wroko yu kan feni noso yu kan aksi trawan fu yepi yu suku wan wroko. A kan de wan bun sani te grontapu sma e taigi yu sortu wroko de fu feni, ma luku bun nanga dati. Son sma di no lobi Yehovah e pruberi fu meki yu kon lobi grontapu (1 Yoh. 2:15-17). Te yu e luku den sani di yu kan du na ini grontapu, dan yu ati kan kori yu makriki.Leisi Odo 14:15; Yer. 17:9.

15, 16. Suma kan gi yu koni rai te yu musu luku sortu wroko yu o du?

15 Te yu sabi kaba sortu wroko yu kan du, dan yu abi bun rai fanowdu (Odo 1:5). San kan yepi yu fu feni wan wroko di e kruderi nanga Bijbel? Arki sma di lobi Yehovah, di lobi yu, di sabi yu èn di sabi yu situwâsi bun. Den o yepi yu fu luku nanga wan krin ati san yu kan du èn san yu no kan du. Kande den o taki wan sani di o yepi yu fu go luku baka san yu wani du nanga yu libi. A de wan bigi blesi te yu abi papa nanga mama di lobi Yehovah. Boiti dati, den owruman na ini yu gemeente na lepi brada di kan gi yu bun rai. Taki sosrefi nanga pionier èn nanga kring-opziener. Aksi den fu san ede den bosroiti fu go na ini a furuten diniwroko. Fa den bigin pionier èn fa den e sorgu gi densrefi? Sortu moi sani den ondrofeni na ini a diniwroko?Odo 15:22.

16 Den sma di sabi yu bun kan gi yu koni rai. Fu eksempre, kon meki wi taki dati yu wani tapu nanga skoro fu go pionier, soso fu di yu no lobi a tranga wroko di yu musu du na a skoro dati. Wan sma di lobi yu kan si krin fu san ede yu wani gowe libi a skoro. Sobun, a kan yepi yu fu si taki te yu e meki muiti fu klari a skoro, dan dati o yepi yu fu no meki ala sortu pikinpikin sani tapu yu fu go doro. Te yu e horidoro na a fasi disi, dan dati o yepi yu fu tan dini Yehovah nanga yu heri ati.Ps. 141:5; Odo 6:6-10.

17. Nanga sortu sani wi musu luku bun te wi e teki bosroiti?

17 Ala sma di e dini Yehovah o kisi fu du nanga sani di kan swaki den bribi èn sani di kan hari den puru fu Yehovah (1 Kor. 15:33; Kol. 2:8). Ma a matifasi di yu abi nanga Yehovah kan pori moro makriki te yu e du son wroko. Yu si taki son brada noso sisa lasi bribi, baka di den bigin du wan wroko? (1 Tim. 1:19) A no ben o de wan koni sani fu teki bosroiti di kan pori a matifasi di yu abi nanga Gado.Odo 22:3.

PRISIRI LEKI YONGU KRESTEN

18, 19. San wan sma musu du te a no abi a firi ete fu dini Yehovah?

18 Efu yu wani dini Yehovah nanga yu heri ati, teki den okasi di yu e kisi leki wan yongu futuboi fu Gado. Teki bosroiti di o meki yu dini Yehovah nanga prisiri na ini den span ten disi.Ps. 148:12, 13.

19 Ma san yu musu du te yu no abi a firi ete fu dini Yehovah? Tan meki muiti fu meki yu bribi kon moro tranga. Baka di na apostel Paulus fruteri sortu muiti a du fu libi na wan fasi di Gado feni bun, a skrifi: „Efu unu e denki pikinso tra fasi srefi, dan Gado o sori unu san na a yoisti denki di un musu abi. Ma awansi fa a no fa, efu a de so taki wi go na fesi kaba, dan meki wi tan go na fesi na a srefi fasi” (Fil. 3:15, 16). Memre taki Yehovah lobi yu. A rai fu en na a moro bun wan. Meki a yepi yu fu teki a moro bun bosroiti now di yu yongu ete.