Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yanuari 2014

Anbegi Yehovah, a têgo Kownu

Anbegi Yehovah, a têgo Kownu

„Meki a têgo Kownu . . . kisi grani nanga glori fu têgo.”1 TIM. 1:17.

1, 2. (a) Suma na „a têgo Kownu” èn fu san ede wi kan taki dati? (Luku a prenki na a bigin fu na artikel.) (b) Fu san ede wi wani taki Yehovah tiri wi?

KOWNU SOBHUZA II tiri Swasikondre sowan 61 yari langa. Na wan bigi sani te wan sma na ini a ten disi e tiri so langa. Toku wan kownu de di e tiri moro langa fu di a no e libi fu wan syatu pisi ten nomo leki fa a de nanga libisma. Fu taki en leti, Bijbel e kari a sma disi „a têgo Kownu” (1 Tim. 1:17). A psalm skrifiman e taki san na a nen fu a Tiriman disi. A e taki: „Yehovah na Kownu fu ala ten, iya, fu têgo.”Ps. 10:16.

2 Fu di Gado e tiri fu têgo, meki a tiri fu en de heri tra fasi leki di fu libisma. Toku na a fasi fa Yehovah e tiri, meki taki wi e si en leki wan bun tiriman. Wan kownu di ben tiri owruten Israel 40 yari langa, prèise Gado na a fasi disi: „Yehovah na wan Gado di abi sari-ati nanga switifasi. En ati no e bron esi èn a abi bun-ati pasa marki. Yehovah seti en kownusturu steifi na ini hemel fu ala ten. A de kownu fu ala sani di de” (Ps. 103:8, 19). Yehovah a no wi Kownu nomo, ma a de wi lobi-ati Papa tu di de na hemel. San Yehovah du fu sori taki en na wan trutru Papa? Fa Yehovah sori taki en na Kownu ete èn taki a no lasi en makti di libisma opo densrefi teige en na ini Eden? A piki na tapu den tu aksi disi o meki taki wi wani kon moro krosibei na Yehovah èn taki wi wani anbegi en nanga wi heri ati.

 A TÊGO KOWNU MEKI ENGEL NANGA LIBISMA

3. Suma na a fosi memre fu Yehovah en bigi famiri èn suma moro a meki leki en „manpikin”?

3 A musu de taki Yehovah firi prisiri trutru di a meki en fosi Manpikin. Gado no ben si en nomo leki wan sma di ben de na en ondro, ma a ben lobi en leki wan Manpikin èn a aksi en fu yepi en nanga wan wroko di ben o gi en furu prisiri. A Manpikin disi ben o yepi en Tata fu meki milyunmilyun engel di bun dorodoro (Kol. 1:15-17). Bijbel e taki dati den engel disi e dini Yehovah nanga prisiri èn taki ’den e du a wani fu en’. Yehovah e gi den engel grani fu di a e kari den en „manpikin”. Den de na ini a bigi famiri fu Yehovah tu.Ps. 103:20-22; Yob 38:7.

4. O ten libisma tron memre fu Gado en bigi osofamiri?

4 Baka di Yehovah meki hemel nanga grontapu, a meki en osofamiri kon moro bigi. Fa a du dati? A sreka grontapu, so taki a ben kan de wan moi tanpresi. Baka dati a meki a fosi man Adam di ben de leki en (Gen. 1:26-28). Fu di Yehovah na a Mekiman, meki a ben abi a reti fu aksi Adam fu gi yesi na en. Yehovah di de leki wan Papa, taigi libisma na wan lobi-ati fasi èn na wan switi fasi san a ben wani fu den. A no gi Adam ala sortu wèt di no ben de fanowdu, ma a gi en na okasi fu teki en eigi bosroiti.Leisi Genesis 2:15-17.

5. San Gado seti fu furu grontapu nanga libisma?

5 Furu libisma kownu no lobi fu gi den futuboi fu den bigi frantwortu. Ma nanga Yehovah dati no de so. Fu di a e frutrow den futuboi fu en, meki a e prisiri fu gi den furu frantwortu. Fu eksempre, a meki Adam basi den tra libisani èn a gi en a wroko srefi fu gi den meti wan nen (Gen. 1:26; 2:19, 20). Aladi a wroko disi no ben makriki, toku a gi Adam furu prisiri. Gado no meki milyunmilyun libisma fu libi na grontapu. Na presi fu dati a bosroiti fu meki wan wefi gi Adam, so taki den tu sma disi ben kan meki pikin. Na uma disi ben nen Eva èn a ben bun dorodoro (Gen. 2:21, 22). Na so Adam nanga Eva kisi a moi okasi fu furu grontapu nanga libisma. Ala sani ben de heri bun èn baka wan pisi ten libisma ben kan meki heri grontapu tron wan paradijs. Makandra nanga den engel na hemel, den ben o man dini Yehovah fu têgo leki wan bigi famiri. Dati ben o de wan moi sani. Na so Yehovah sori taki en na wan lobi-ati Papa.

TRANGAYESI PIKIN NO WANI GADO LEKI KOWNU MORO

6. (a) Fa a du kon taki sma opo densrefi teige Gado? (b) Fu san ede disi no wani taki dati Yehovah lasi makti?

6 Ma na wan sari sani taki Adam nanga Eva no ben wani Yehovah leki Tiriman moro. Na presi fu dati, den bosroiti fu arki Satan, wan trangayesi engel manpikin fu Gado (Gen. 3:1-6). Now Gado no ben de a Tiriman fu Adam nanga Eva moro. A bakapisi fu dati ben de sari, pina nanga dede gi den nanga den bakapikin fu den (Gen. 3:16-19; Rom. 5:12). Sma na grontapu no ben gi yesi na Gado moro. Ma disi wani taki dati Gado lasi makti èn taki a no ben wani de Tiriman fu grontapu nanga libisma moro? Kwetikweti! Di Gado yagi Adam nanga Eva puru na ini a dyari fu Eden, a sori taki a abi makti ete. Fu sorgu taki den no drai go baka na ini a dyari, a poti kerub-engel fu hori wakti drape (Gen. 3:23, 24). Toku Gado sori taki a lobi wi leki wan Papa. A pramisi taki sani no ben o tapu en fu abi wan osofamiri fu engel nanga libisma di ben o gi yesi na en. A pramisi tu taki wan bakapikin fu Adam ben o pori Satan. A bakapikin dati ben o puru den bakapisi fu a sondu fu Adam.Leisi Genesis 3:15.

7, 8. (a) O takru a situwâsi na grontapu ben kon de na ini a ten fu Noa? (b) San Yehovah ben seti fu krin grontapu èn fu kibri libisma?

 7 Na ini den hondrohondro yari baka dati, son libisma teki a bosroiti fu gi yesi na Yehovah. Tu fu den ben de Abel nanga Heinok. Ma furu libisma no ben wani Yehovah leki Papa noso leki Kownu. Na ini a ten fu Noa, „grontapu ben kon lai ogridu” (Gen. 6:11). Disi wani taki dati Yehovah no ben man taki moro san musu pasa na grontapu? San Bijbel e taki fu a tori?

8 Luku a tori fu Noa. Bijbel e sori taki Yehovah taigi en finifini fa a ben musu bow a bigi ark di ben musu kibri en nanga en osofamiri. Yehovah sori lobi gi libisma di a poti Noa leki „wan preikiman fu retidu” (2 Petr. 2:5). A no de fu taki dati Noa ben taigi den sma fu drai den libi èn a ben warskow den gi a pori di ben o kon. Ma den sma no ben wani arki en. Someni tenti yari langa Noa nanga en osofamiri libi na mindri sma di ben e du ogri-ati sani nanga trawan èn di ben e libi wan yayolibi. Fu di Yehovah na wan Papa di e broko en ede nanga en pikin, meki a kibri den aiti sma dati di gi yesi na en èn a blesi den. Di Yehovah tyari a Frudu kon, a kiri ala den trangayesi libisma èn a puru den ogri engel. Na a fasi dati a ben de krin taki Yehovah ben abi makti ete.Gen. 7:17-24.

Ala ten Yehovah sori taki en na Kownu (Luku paragraaf 6, 8, 10, 12, 17)

A FASI FA YEHOVAH TIRI GRONTAPU BAKA A FRUDU

9. Sortu okasi Yehovah gi libisma baka a Frudu?

9 A musu de taki di Noa nanga en osofamiri komoto na ini na ark, den ben de nanga tangi taki Yehovah sorgu den èn taki a kibri den. Wantewante Noa bow wan altari èn a tyari ofrandi fu anbegi Yehovah. Gado blesi Noa nanga en osofamiri èn a taigi den: „Meki pikin èn kon furu, teleki unu kon lai na grontapu” (Gen. 8:20–9:1). Na so libisma kisi na okasi ete wan leisi fu anbegi Yehovah leki wán bigi famiri èn fu meki pikin furu grontapu.

10. (a) Pe èn o ten sma bigin opo densrefi teige Yehovah baka a Frudu? (b) San Yehovah du fu sorgu taki en wani pasa?

10 Ma a Frudu no wasi sondu puru èn libisma ben e kisi fu du ete nanga Satan èn nanga den ogri yeye. Fosi yu denki, libisma bigin opo densrefi baka teige a bun tiri fu Yehovah. Wan fu den na Nimrod, wan bakapikin fu Noa. Bijbel e taki dati Nimrod ben de „wan kefalek ontiman di ben opo ensrefi teige Yehovah”. A bow bigi foto soleki Babel èn a poti ensrefi leki kownu „na ini a kondre Sineyar” (Gen. 10:8-12). San a têgo Kownu ben o du nanga a kownu disi di ben opo ensrefi teige en èn di ben e du ala san a man fu no meki sma „kon lai na grontapu”? Gado bruya a tongo fu a pipel fu Nimrod èn a meki taki den no ben man taki moro nanga makandra. Na so Gado „panya den go na ala sei fu grontapu”. Awinsi pe den ben e go, den ben tyari den gwenti fu den go nanga den. Dati meki falsi anbegi nanga a fasi fa libisma ben e tiri panya go na ala sei tu.Gen. 11:1-9.

11. Fa Yehovah sori taki a tan horibaka gi en mati Abraham?

11 Baka a Frudu furu sma ben e anbegi falsi gado. Toku yu ben abi wan tu man di tan anbegi Yehovah. Wan fu den man dati na Abraham di tan gi yesi na Yehovah. A gowe libi a switi libi fu en na ini a foto Ur èn a go libi na ini tenti someni yari langa, soleki fa Yehovah taigi en (Gen. 11:31; Hebr. 11:8, 9). Abraham no go suku kibri na den libisma kownu noso na den foto nanga bigi skotu. Na presi fu dati a frutrow na tapu Yehovah di kibri en nanga en osofamiri. Luku san a psalm skrifiman taki fu a fasi fa Yehovah e kibri sma neleki wan Papa: „[Gado] no meki nowan libisma du ogri nanga den. Ma fu den ede, meki  a piri-ai gi kownu” (Ps. 105:13, 14). Yehovah tan horibaka gi en mati Abraham. Dati meki a pramisi Abraham: „Den bakapikin fu yu o tiri leki kownu.”Gen. 17:6; Yak. 2:23.

12. Fa Yehovah sori na ini Egepte taki en na a Moro Hei Tiriman èn fa disi yepi a pipel fu en?

12 Bakaten Gado pramisi Abraham en manpikin Isak nanga en granpikin Yakob a srefi sani di a ben pramisi Abraham. A taigi den taki den bakapikin fu den ben o tiri leki kownu (Gen. 26:3-5; 35:11). Ma fosi dati pasa, den bakapikin Yakob tron srafu na ini Egepte. Disi wani taki dati Yehovah no ben o du moro san a pramisi? A wani taki dati a no ben o de a Moro Hei Tiriman fu grontapu moro? Kwetikweti! Di a ten fu en doro, Yehovah gebroiki a krakti fu en èn a sori taki a abi moro makti leki a tranga-ede kownu fu Egepte. Den Israelsma di ben de na katibo poti den frutrow na ini Yehovah, di frulusu den na wan wondru fasi di a meki den pasa na ini a Redi Se. A de krin taki Yehovah ben de a Moro Hei Tiriman ete èn leki wan lobi-ati Papa a gebroiki a bigi makti fu en fu kibri en pipel.Leisi Eksodes 14:13, 14.

YEHOVAH TRON KOWNU FU DEN ISRAELSMA

13, 14. (a) San den Israelsma taki fu Yehovah na ini a singi di den singi? (b) San Gado ben pramisi David?

13 Wantewante baka di Gado puru den Israelsma na katibo na wan wondru fasi, den singi wan singi fu prèise Yehovah fu di a frulusu den. A singi dati skrifi na Eksodes kapitel 15. Vers 18 e taki: „Yehovah sa tiri leki kownu fu ala ten, iya, fu têgo.” Iya, Yehovah ben tron Kownu fu wan nyun pipel (Deut. 33:5). Ma den no ben breiti taki Yehovah ben de a Tiriman fu den fu di den no ben man si en. Sowan 400 yari baka di den komoto na ini Egepte den aksi Gado fu poti wan libisma kownu neleki den tra kondre na den lontu di ben e anbegi falsi gado (1 Sam. 8:5). Ma Yehovah ben de Kownu ete. Disi ben de krin fu si na a ten di David ben e tiri leki a di fu tu libisma kownu fu Israel.

14 David tyari a santa kisi fu a frubontu go na Yerusalem. Na a prisiri okasi dati den Leifisma singi wan prèisesingi. Na ini a singi dati den taki wan prenspari sani di skrifi na 1 Kroniki 16:31: „Meki den taigi  den pipel fu ala kondre: ’Yehovah srefi tron kownu!’” Ma wan sma kan aksi ensrefi: ’Fa a kan taki Yehovah tron Kownu na a ten dati, aladi en na a têgo Kownu?’ Yehovah e tron Kownu te a e gebroiki a makti di a abi noso te a e poti wan sma fu teki presi gi en. A prenspari fu kon sabi fa Yehovah e tron Kownu. Fosi David dede, Yehovah pramisi en taki a tiri fu en ben o tan fu têgo. A taigi en: „Mi o poti wan bakapikin fu yu fu tiri leki kownu. Mi o meki taki a kownukondre fu en tan” (2 Sam. 7:12, 13). A pramisi disi kon tru di a „bakapikin” fu David kon moro leki 1000 yari baka dati. Suma ben de a bakapikin disi èn o ten a ben o tron Kownu?

YEHOVAH E POTI WAN NYUN KOWNU

15, 16. (a) O ten Gado salfu Yesus leki a sma di ben o tron Kownu? (b) Di Yesus ben de na grontapu, dan san a seti gi a tiri fu en?

15 Na ini a yari 29, Yohanes a Dopuman bigin preiki taki „a Kownukondre fu hemel kon krosibei” (Mat. 3:2). Di Yohanes dopu Yesus, Yehovah salfu Yesus leki a pramisi Mesias èn leki a Kownu di a ben o poti fu tiri en Kownukondre na ini a ten di ben o kon. Na a ten dati, Yehovah sori a lobi di en leki Papa abi gi Yesus di a taki: „Disi na mi Manpikin, a lobiwan di mi feni bun.”Mat. 3:17.

16 Na a ten di Yesus ben e du en wroko na grontapu a gi en Papa glori (Yoh. 17:4). A du disi fu di a preiki fu a Kownukondre fu Gado (Luk. 4:43). A leri den bakaman fu en srefi fu begi taki a Kownukondre kon (Mat. 6:10). Yesus, a sma di Gado ben o poti leki Kownu, taigi den sma di ben e gens en: „A Kownukondre fu Gado de na un mindri” (Luk. 17:21). Na a neti fosi Yesus dede a meki ’wan frubontu nanga den bakaman fu en gi wan kownukondre’. Na a fasi dati sonwan fu den disipel fu en di tan horibaka gi en ben kan abi a howpu fu tiri nanga Yesus leki kownu na ini a Kownukondre fu Gado.Leisi Lukas 22:28-30.

17. Na sortu fasi Yesus bigin tiri na ini a yari 33, ma san a ben musu wakti?

17 O ten Yesus ben o bigin tiri leki Kownu fu Gado Kownukondre? A no ben man du dati wantewante. A tra bakadina kaba, den kiri Yesus èn den bakaman fu en lowe (Yoh. 16:32). Ma now Yehovah ben o du san a e du ala ten. A ben o sori taki en na a sma di abi ala makti. Na a di fu dri dei, a gi en Manpikin wan opobaka èn na a dei fu a Pinksterfesa na ini a yari 33, Yesus bigin tiri a Kresten gemeente (Kol. 1:13). Toku a ben o abi fu wakti fosi a ben o man bigin tiri grontapu leki a bakapikin fu David di ben o tron kownu. Yehovah taigi en Manpikin: „Sidon na mi reti-anusei, teleki mi poti yu feanti leki wan bangi gi yu futu.”Ps. 110:1.

ANBEGI A TÊGO KOWNU

18, 19. (a) San wi o wani du te wi e prakseri fa Yehovah kibri en futuboi di tai hori na en èn fa a e sorgu den? (b) San wi o leri na ini a tra artikel?

18 Dusundusun yari langa engel nanga libisma opo densrefi teige a tiri fu Yehovah. Toku Yehovah noiti no lasi a makti di a abi leki Tiriman. Na ala den dusundusun yari dati a ben sori taki en na a sma di abi a makti fu taki san musu pasa. Leki wan lobi-ati Papa, a kibri den futuboi fu en èn a sorgu den. Wi e si disi te wi e luku a libi fu Noa, Abraham nanga David di ben tai hori na en. Disi o meki taki wi wani saka wisrefi na ondro wi Kownu èn taki wi wani kon moro krosibei na en.

19 Ma kande wi e aksi wisrefi: Fa Yehovah tron Kownu na ini a ten disi? Fa wi kan sori taki wi na futuboi fu Yehovah di e tai hori na en èn fa wi kan kon na ini a bigi famiri fu en leki pikin di no abi sondu? Te wi e begi taki Gado Kownukondre kon, dan san dati wani taki? Wi o piki den aksi disi na ini a tra artikel.