Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  december 2013

„Du disi fu memre mi”

„Du disi fu memre mi”

„Baka di a taki Gado tangi, a broko a brede èn a taki: ’Disi wani taki mi skin di mi o gi, so taki unu kan feni bun. Tan du disi fu memre mi.’”1 KOR. 11:24.

1, 2. San den apostel ben denki kande a lasti leisi di Yesus ben o go na Yerusalem?

WAKTIMAN na Yerusalem si taki wolku no de na loktu moro. A mun de fu si, ma na wan pikin pisi fu en nomo. A neti di pasa den si dati tu. Di a Grankrutu fu den Dyu kon sabi disi, den meki bekènti taki a nyun mun Nisan bigin. Sma leti faya fu sori taki wan nyun mun bigin noso den seni boskopuman fu panya a nyunsu. Den apostel sabi taki a ten fu a Paskafesa de krosibei. A musu de taki den sabi taki Yesus wani go na Yerusalem fosi a Paskafesa bigin.

2 Na a ten dati Yesus nanga den apostel fu en ben de na Perea di de abrasei fu Yordan-liba. Disi na a lasti leisi taki Yesus o go na Yerusalem (Mat. 19:1; 20:17, 29; Mark. 10:1, 32, 46). Now di sma meki bekènti san na a fosi dei fu a Dyu mun Nisan, den sabi taki a Paskafesa o hori 13 dei baka dati, tapu 14 Nisan, baka te son dongo.

3. Fu san ede tru Kresten wani sabi o ten a Paskafesa ben hori?

3 Na ini 2014 na Avondmaal fu Masra o de na a srefi dei di a Paskafesa ben hori èn a e fadon tapu 14 april, baka te son dongo. A o de wan spesrutu dei gi tru Kresten èn gi sma di wani sabi moro fu Bijbel. Fu san ede? Fu di 1 Korentesma 11:23-25 e taki: „Na a neti di den ben o tori Masra Yesus, a teki wan brede, èn baka di a taki Gado tangi, a broko a brede èn a taki: ’Disi wani taki mi skin di mi o gi, so taki unu kan feni bun. Tan du disi fu memre mi.’ Baka di a nyan a neti-nyanyan, a teki a kan tu” èn a du a srefi sani.

4. (a) Sortu sani wi kan aksi wisrefi fu a Memrefesa? (b) Fa wi sabi na sortu dei a Memrefesa musu hori ibri yari? (Luku a faki di nen  „A Memrefesa fu 2014”.)

4 A Memrefesa na a wan-enkri fesa di Yesus ben taigi den bakaman fu en fu hori èn a no de fu taki dati yu o de drape tu. Fosi a dei dati doro, aksi yusrefi: ’Fa mi musu sreka misrefi gi a Memrefesa? Sortu spesrutu sani den o gebroiki a neti dati? Fa a konmakandra dati  o de? Fu san ede den sani di den o gebroiki na a Memrefesa musu prenspari gi mi?’

A BREDE NANGA A WIN

5. San Yesus taigi den apostel fu sreka gi a Paskafesa?

5 Di Yesus taigi den apostel fu en fu sreka a kamra gi a Paska nyanyan, a no taigi den fu seti a kamra nanga wan lo pranpran. Na presi fu dati a ben wani den suku wan bun kamra di krin èn di bigi nofo gi den alamala. (Leisi Markus 14:12-16.) Den ben musu suku sani soleki brede sondro srudeki nanga redi win di ben o de fanowdu gi a fesa. Baka di den kaba nyan a Paska nyanyan, Yesus poti prakseri na a brede nanga a win.

6. (a) San Yesus taki fu a brede, baka di den nyan a Paska nyanyan? (b) Sortu brede den e gebroiki na a Memrefesa?

6 Na apostel Mateyus ben de na a fesa tu èn bakaten a skrifi: „Yesus teki wan brede, èn baka di a taki Gado tangi, a broko a brede, dan a gi den disipel. A taki: ’Un teki a brede, nyan’” (Mat. 26:26). Neleki fa a ben de nanga a brede fu a Paskafesa, na so „a brede” disi no ben abi srudeki tu (Eks. 12:8; Deut. 16:3). A ben meki fu blon nanga watra. Den no ben moksi en nanga srudeki noso nanga spesrei soleki sowtu. Fu di a no ben abi srudeki, meki a no ben sweri. A ben drei leki wan plata pisi buskutu di den ben kan broko makriki. Na ini a ten disi den owruman kan aksi wan sma fu meki a brede disi wan dei fosi a Memrefesa. A brede musu meki fu blon nanga watra èn a musu baka na ini wan onfu noso na ini wan pan di abi pikinso oli nomo. (Efu gewoon blon no de, dan blon di meki fu iniwan aleisi, karu, noso kasaba bun tu.) Noso den kan gebroiki wan plata brede di den Dyu e kari „matse”. A brede disi no meki nanga sani soleki eksi noso ayun.

7. (a) Sortu win ben de na ini a kan di Yesus gebroiki na a Avondmaal fu Masra? (b) Sortu win wi kan gebroiki gi a Memrefesa na ini a ten disi?

7 Mateyus e go doro: „[Yesus] teki wan kan tu, èn baka di a taki Gado tangi, a gi den disipel. A taki: ’Un alamala musu dringi en’” (Mat. 26:27, 28). A sani di Yesus hori na ini en anu ben de wan kan nanga redi win. (A no ben kan de droifi sap fu di a pisi ten di sma ben e koti droifi ben pasa  someni langa kaba.) Di den Israelsma hori a fosi Paskafesa na Egepte den no dringi win. Ma gi Yesus a no ben de wan problema fu gebroiki win na a Paskafesa. A gebroiki pikinso fu a win srefi gi na Avondmaal fu Masra. Sobun, Kresten e gebroiki win na a Memrefesa. Sortu win na dati? A win fu a Memrefesa no mag abi tra sani na ini soleki cognac noso spesrei, so taki a kan de soifri neleki fa a brudu fu Yesus ben de soifri. Dati meki wi musu gebroiki redi win. A kan de wan win di wan sma srefi meki noso a kan de wan win di den e seri na wenkri, soleki beaujolais, bordeaux, bourgogne noso chianti.

SAN A BREDE NANGA A WIN WANI TAKI?

8. Fu san ede Kresten wani sabi san a brede nanga a win wani taki?

8 Na apostel Paulus ben taki krin taki boiti den apostel, tra Kresten musu hori na Avondmaal fu Masra tu. A ben skrifi den Kresten fu Korente: „A sani di mi kisi fu Masra, na dati mi e leri unu tu . . . [Masra Yesus] teki wan brede, èn baka di a taki Gado tangi, a broko a brede èn a taki: ’Disi wani taki mi skin di mi o gi, so taki unu kan feni bun. Tan du disi fu memre mi’” (1 Kor. 11:23, 24). Dati meki Kresten na ini a ten disi e hori a spesrutu fesa disi ibri yari. Gi den a prenspari fu sabi san a brede nanga a win wani taki.

9. Sortu fowtu denki di abi fu du nanga a brede di Yesus gebroiki, son sma abi?

9 Fu di son Bijbel e taki: ’Disi na mi skin’, meki son kerkisma e bribi taki wan wondru pasa di meki a brede tron Yesus skin. Ma disi no de so kwetikweti. * Yesus skin nanga a brede sondro srudeki ben de leti na fesi den apostel di ben tan gi yesi na en. A de krin taki Yesus ben taki dati a brede wani taki en skin. Furu tron Yesus ben e taki sani na wan agersi fasi fu gi sma leri.Yoh. 2:19-21; 4:13, 14; 10:7; 15:1.

10. San a brede di den e gebroiki na a Avondmaal fu Masra e prenki?

 10 A brede di den apostel ben man si èn di den ben o nyan ben wani taki Yesus skin. Sortu skin? Fu di nowan bonyo fu Yesus ben broko, meki wan ten ben de taki tru Kresten ben bribi taki a brede di Yesus broko, ben de a gemeente fu den salfuwan di Bijbel e kari „a skin fu Krestes” (Ef. 4:12; Rom. 12:4, 5; 1 Kor. 10:16, 17; 12:27). Ma baka di den ondrosuku a tori disi moro fini, den kon si taki a brede wani taki a skin di Yesus ben abi di a ben de wan libisma. Nofo tron Bijbel e taki fa Yesus „pina di a ben de wan libisma” èn taki a dede srefi na wan pinapostu. Sobun, a brede di den gebroiki na a Avondmaal fu Masra e prenki a libisma skin fu Yesus. Nanga a skin dati a „teki den sondu fu wi na en tapu”.1 Petr. 2:21-24; 4:1; Yoh. 19:33-36; Hebr. 10:5-7.

11, 12. (a) San Yesus ben taki fu a win? (b) San a win di den e gebroiki na a Avondmaal fu Masra e prenki?

11 Now di wi sabi san a brede wani taki, dan dati e yepi wi fu frustan san Yesus ben abi na prakseri di a taki fu a win. Na ini Bijbel wi e leisi: „Baka di a nyan a neti-nyanyan, a teki a kan tu èn a taki: ’A kan disi wani taki a nyun frubontu di o seti te mi gi mi brudu’” (1 Kor. 11:25). Furu Bijbel e taki wan srefi sortu sani leki san skrifi na ini a Bijbel fu Robert Young: „A kan disi na a nyun frubontu di meki nanga mi brudu.” (Na wi skrifi en nanga fatu letter.) A de so taki a kan di Yesus ben hori, ben de a nyun frubontu trutru? Nôno. A wortu „kan” ben abi fu du nanga a win di ben de na ini a kan. San a win ben wani taki, soleki fa Yesus sori? A win ben wani taki en brudu di a ben o gi leki wan ofrandi.

12 Na ini na Evangelietori fu Markus wi e leisi san Yesus taki: „Disi wani taki mi ’brudu fu a frubontu’ di o kanti trowe, so taki furu sma kan feni bun” (Mark. 14:24). Yesus brudu ben „o kanti trowe, so taki furu sma kan feni bun. Na so den kan kisi pardon fu sondu” (Mat. 26:28). Dati meki a fiti taki a redi win e prenki Yesus eigi brudu. Nanga a brudu fu en, a pai a lusu-paiman so taki wi „kisi pardon fu wi sondu”.Leisi Efeisesma 1:7.

Den apostel ben dringi fu a win di ben prenki Yesus brudu fu a frubontu (Luku paragraaf 11, 12)

FA WI E MEMRE A DEDE FU KRESTES?

13. Fruteri fa wi e hori na alayari fesa fu memre a dede fu Krestes.

13 Efu a yari disi o de a fosi leisi taki yu e go na a Memrefesa makandra nanga Yehovah Kotoigi, dan san yu o si drape? A Memrefesa o hori na wan presi di krin èn di bigi nofo fu meki ala sma sidon bun, so taki den kan arki a konmakandra sondro taki sani puru den prakseri. Kande den moi a presi nanga wan tu bromki, ma yu no o si wan lo pranpran èn a no o gersi leki na wan bigi fesa e hori drape. Wan lepi owruman o hori wan lezing pe a o sori krin èn na wan lespeki fasi san Bijbel e taki fu a fesa disi. A brada o yepi ala sma fu kon frustan san Krestes du gi wi. Iya, Krestes dede gi wi leki wan lusu-paiman so taki wi kan kisi libi.Leisi Romesma 5:8-10.

14. Fu sortu tu howpu a lezing fu a Memrefesa o taki?

14 Na ini a lezing a o kon na krin taki Bijbel e sori taki Kresten kan abi tu sortu howpu. Wan fu den howpu abi fu du nanga sma di o tiri na ini hemel makandra nanga Krestes. Soso wan pikin grupu Kresten abi a howpu disi èn den apostel de na ini tu (Luk. 12:32; 22:19, 20; Openb. 14:1). Ma gi moro furu Kresten di e dini Gado na ini a ten disi wan tra howpu de. Den o libi fu têgo na ini wan paradijs na grontapu. Na a ten dati Gado wani o pasa na grontapu soleki fa a e pasa na hemel, wan sani di Kresten e begi fu en someni langa kaba (Mat. 6:10). Bijbel e sori sortu moi libi den sma disi o abi fu têgo.Yes. 11:6-9; 35:5, 6; 65:21-23.

15, 16. San den e du nanga a brede sondro srudeki na a Memrefesa?

 15 Na a kaba fu a lezing a takiman o sori taki a ten doro fu du san Yesus taigi den apostel fu du. Soleki fa wi ben taki kaba, dan den o gebroiki brede sondro srudeki nanga redi win. Kande den sani disi de na tapu wan tafra krosibei fu a takiman. A brada o leisi a pisi na ini Bijbel pe skrifi san Yesus taki èn du di a seti a fesa disi. Fu eksempre, na ini a tori fu Mateyus wi e leisi: „Yesus teki wan brede, èn baka di a taki Gado tangi, a broko a brede, dan a gi den disipel. A taki: ’Un teki a brede, nyan. Disi wani taki mi skin’” (Mat. 26:26). Yesus broko a brede sondro srudeki, so taki a ben kan gi den apostel di ben de na en sei. Na a konmakandra di o hori tapu 14 april yu o si preti nanga wan tu pisi brede sondro srudeki.

16 Fosi den meki den preti pasa, wan brada o begi syatu. Nofo preti o de, so taki a brede kan pasa na fesi ala den sma drape na ini wan syatu pisi ten èn na wan fasi di fiti. Ibri gemeente e luku san na a moro bun fasi fu meki a brede pasa. Te den e du disi, den no o du wan lo spesrutu sani. Neleki fa a ben de na ini furu gemeente na a Memrefesa fu 2013, dan kande wan tu sma o nyan fu a brede noso kande nowan sma srefi o nyan.

17. San wi o du nanga a redi win na a Memrefesa, soleki fa Yesus taigi wi fu du?

17 Baka dati a brada o leisi san Yesus du nanga a win: „A teki wan kan tu, èn baka di a taki Gado tangi, a gi den disipel. A taki: ’Un alamala musu dringi en, bika disi wani taki mi „brudu fu a frubontu” di o kanti trowe, so taki furu sma kan feni bun. Na so den kan kisi pardon fu sondu’” (Mat. 26:27, 28). A brada o du a srefi sani di Yesus du èn den o begi ete wan leisi. Baka dati den e meki a „kan” noso a grasi nanga redi win pasa na fesi ala den sma drape.

18. Fu san ede a prenspari fu de na a Memrefesa, awinsi wan tu sma nomo noso nowan sma srefi nyan fu a brede èn dringi fu a win?

18 Soso den sma di o tiri makandra nanga Krestes na ini hemel o nyan fu a brede èn dringi fu a win. Dati meki furu fu den sma di de na a Memrefesa o gi a brede nanga a win na a sma na den sei (Leisi Lukas 22:28-30; 2 Tim. 4:18). Aladi furu Kresten no e nyan fu a brede noso dringi fu a win, toku a prenspari gi den fu de na a Memrefesa. Fu san ede? Te den de drape, den e sori taki den abi furu warderi gi na ofrandi fu Yesus. Na a ten fu a Memrefesa den kan prakseri den blesi di a frulusu-ofrandi fu Yesus kan tyari kon gi den. Den abi a howpu fu de na mindri a „bigi ipi sma” di o pasa „a bigi banawtu” libilibi. Den futuboi disi na den sma di „wasi den langa krosi fu den èn den meki den kon weti na ini a brudu fu a Pikin Skapu”.Openb. 7:9, 14-17.

19. San yu kan du fu sreka yusrefi gi na Avondmaal fu Masra èn sortu wini yu o kisi fu dati?

19 Yehovah Kotoigi na heri grontapu e sreka densrefi gi a spesrutu okasi disi. Wan tu wiki na fesi wi o kari so furu sma leki wi man fu kon na a Memrefesa. Wan tu dei na fesi, furu fu wi o leisi na ini Bijbel san Yesus du èn san pasa tapu den dei fosi na Avondmaal fu Masra fu a yari 33. Wi o seti sani na so wan fasi taki wi kan de drape. A bun fu doro wan moi pisi ten bifo a fosi singi nanga begi, so taki wi kan gi den sma di e kon na a Memrefesa wan switikon èn so taki wi no o misi noti fu a programa. Wi alamala di de drape o kisi furu wini te wi e leisi makandra nanga a brada san Bijbel e taki fu a tori disi. Ma a moro prenspari sani na taki te wi de na a Memrefesa, dan dati o sori taki wi e warderi Yesus ofrandi nanga wi heri ati èn taki wi e gi yesi na a komando fu en di e taki: „Tan du disi fu memre mi.”1 Kor. 11:24.

^ paragraaf 9 Wan Doisri sabiman di nen Heinrich Meyer ben taki dati den apostel no ben denki taki den ben e nyan Yesus skin trutru èn taki den ben e dringi en brudu trutru, fu di na a ten dati ’a skin fu Yesus ben de na libi ete’. A taki tu dati Yesus gebroiki „makriki wortu” fu sori san a brede nanga a win wani taki èn taki Yesus no ben o wani den apostel frustan a tori disi na wan fowtu fasi.