Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  november 2013

Fa wi kan yepi den wan di de na nowtu?

Fa wi kan yepi den wan di de na nowtu?

„BAKA DI verkiezing hori, wan bigi feti broko fu di sma no ben agri nanga a fasi fa sani waka. Dati meki dusundusun Yehovah Kotoigi ben abi fu lowe,” na so François, wan owruman di e dini na ini wan pôti kondre, e fruteri. „A ben muilek fu feni nyanyan nanga dresi èn san ben de fu feni ben diri srefisrefi. Bangi ben tapu èn den masyin pe sma kan go teki moni ben leigi noso den no ben e wroko.”

Esi-esi den brada fu a bijkantoro tyari moni nanga tra sani di ben de fanowdu go na den Kotoigi di ben lowe go na den difrenti Kownukondre zaal na ini a kondre. Den grupu di ben e feti nanga makandra ben tapu den pasi, ma fu di sma sabi taki Kotoigi no e bumui nanga politiek, meki nofo tron den ben meki den wagi fu a bijkantoro pasa.

François e taki: „Di wi ben e rèi go na wan fu den Kownukondre zaal, srudati bigin sutu kon na tapu a wagi fu wi. Ma den kugru no kisi wi. Di wi si wan srudati e lon kon na wi tapu nanga wan gon, wi rèm a wagi, rèi en go nanga baka esi-esi, drai en, dan wi race go baka na a bijkantoro. Wi ben taki Yehovah tangi taki wi ben de na libi ete. A tra dei fu en, den 130 brada nanga sisa di ben de na ini a Kownukondre zaal dati ben man doro na wan presi pe den ben kan kibri. Sonwan fu den kon na a bijkantoro. Drape wi gi den deki-ati nanga yepi fu Bijbel èn wi gi den tra sani di den ben o abi fanowdu tu teleki a feti kaba.”

François e go doro: „Bakaten a bijkantoro kisi furu brifi fu Kotoigi na ini a heri kondre. Na ini den brifi den Kotoigi ben taki dati den de nanga tangi gi a yepi di den kisi. Den kisi moro frutrow na ini Yehovah di den si fa den Kotoigi fu tra presi yepi den.”

Te wan rampu noso wan bigi ogri pasa, dan wi no e taigi wi brada nanga sisa fu ’hori den skin waran èn fu sorgu taki den nyan den bere furu’ (Yak. 2:15, 16). Na presi fu dati wi e pruberi fu yepi den nanga san den abi fanowdu. Na so a ben de tu na ini a fosi yarihondro. Baka di sma warskow den disipel fu a ten dati taki wan angriten ben o de, den disipel „bosroiti taki ibriwan fu den ben o seni san den man gi, fu yepi den brada di ben tan na Yudea”.Tori 11:28-30.

Wi leki futuboi fu Yehovah de klariklari fu gi sma san den abi fanowdu te den de na nowtu. Ma wi sabi taki sma abi Gado fanowdu tu (Mat. 5:3). Fu yepi den sma disi fu kon sabi taki den abi Gado fanowdu, Yesus ben taigi den bakaman fu en fu meki disipel (Mat. 28:19, 20). Ibriwan fu wi e gi wi ten, wi krakti nanga wi moni fu du a wroko dati. Na organisâsi fu wi e gebroiki a moni di sma e gi leki bijdrage fu yepi trawan. Ma moro furu fu a moni disi den e gebroiki fu horibaka gi Kownukondre afersi èn fu preiki a bun nyunsu. Na so wi e sori lobi gi Gado èn gi tra sma.Mat. 22:37-39.

Den sma di e horibaka gi a wroko di Yehovah Kotoigi e du na heri grontapu, kan de seiker taki na organisâsi e gebroiki den bijdrage fu den bun. Yu man yepi yu brada nanga sisa di de na nowtu? Yu wani horibaka gi a preikiwroko? Efu dati de so, dan „tan du bun gi den wan di de na nowtu, te yu man du dati”.Odo 3:27.