Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  november 2013

Gi yesi na den wan di Yehovah poti leki skapuman

Gi yesi na den wan di Yehovah poti leki skapuman

„Gi yesi na den wan di e teki fesi na un mindri èn saka unsrefi na den ondro, bika na den e luku unu.”HEBR. 13:17.

1, 2. Fu san ede a moi taki Yehovah e teki ensrefi gersi nanga wan skapuman?

YEHOVAH e teki ensrefi gersi nanga wan skapuman (Esek. 34:11-14). Dati moi fu di a e yepi wi fu frustan moro bun fa Yehovah de. Wan skapuman di lobi en skapu e sorgu taki den e tan na libi èn taki ala sani e go bun nanga den. A e tyari den go na wei pe den kan nyan grasi èn dringi watra (Ps. 23:1, 2). A e hori wakti gi den dei nanga neti (Luk. 2:8). A e sorgu taki ogri busimeti no nyan den (1 Sam. 17:34, 35). A e syow den pikinwan (Yes. 40:11). A e go suku den wan di lasi pasi noso di kisi mankeri.Esek. 34:16.

2 Furu sma fu Gado pipel na ini owruten ben de skapuman noso gronman. Dati meki den ben man frustan fu san ede Yehovah ben e teki ensrefi gersi nanga wan skapuman. Den ben sabi taki skapu na meti di abi sorgu nanga lobi fanowdu so taki den tan gosontu èn den tan na libi. Na so a de tu taki libisma musu kisi tiri fu Yehovah èn taki a musu sorgu den (Mark. 6:34). Te Yehovah no e sorgu den èn te a no e tiri den, dan den e pina. Den no sabi moro san bun èn san no bun, èn nowan sma de di e yepi den. Den de leki „skapu di no abi skapuman” (1 Kow. 22:17). Ma na wan lobi-ati fasi Yehovah e gi en pipel san den abi fanowdu.

3. San wi o luku na ini na artikel disi?

3 Na ini a ten disi wi srefi e frustan tu na sortu fasi Yehovah de leki wan skapuman. Te now ete a e sorgu gi a pipel fu en di de leki skapu. Meki wi go luku fa a e tiri den skapu fu en èn fa a e gi den san den abi fanowdu na ini a ten disi. Wi o luku tu fa den skapu musu tyari densrefi te Yehovah e sori na wan lobi-ati fasi taki a e broko en ede nanga den.

 A BUN SKAPUMAN E POTI TRA SKAPUMAN FU YEPI EN

4. Fa Yesus e sorgu den skapu fu Yehovah?

4 Yehovah poti Yesus leki Edeman fu a Kresten gemeente (Ef. 1:22, 23). Yesus di de a „bun skapuman”, de leki en Tata. Yesus lobi den skapu èn a e sorgu den. A go so fara srefi taki a „gi en libi gi den skapu fu en” (Yoh. 10:11, 15). A lusu-paiman fu Krestes na wan bigi blesi gi libisma (Mat. 20:28). Yehovah wani taki „ala sma di e bribi na ini [Yesus] no sa dede, ma sa kisi têgo libi”.Yoh. 3:16.

5, 6. (a) Suma Yesus poti fu sorgu den skapu fu en èn san den skapu musu du fu kisi wini fu a seti disi? (b) San na a moro prenspari sani di e meki taki wi wani gi yesi na den gemeente owruman?

5 Fa den skapu e sori taki Yesus Krestes na a Skapuman fu den? Yesus taki: „Mi skapu e arki mi sten. Mi sabi den èn den e waka na mi baka” (Yoh. 10:27). Fu arki a sten fu a Bun Skapuman wani taki dati wi musu meki a tiri wi na ini ala sani. Disi wani taki tu dati wi musu wroko makandra nanga den skapuman di a poti fu yepi en. Yesus sori taki den apostel nanga den disipel fu en ben musu du a wroko di a ben bigin. Den ben musu gi „leri” èn den ben musu ’gi den pikin skapu fu Yesus nyanyan’. (Mat. 28:20; leisi Yohanes 21:15-17.) O moro a bun nyunsu ben e panya na grontapu, o moro sma ben e tron disipel fu Yesus. Dati meki a poti lepi Kresten leki skapuman fu sorgu gi den gemeente.Ef. 4:11, 12.

6 Di na apostel Paulus taki nanga den owruman fu a gemeente na Efeise na ini a fosi yarihondro, a taigi den taki santa yeye poti den leki skapuman „fu teki fesi na ini a gemeente fu Gado” (Tori 20:28). Na so a de tu nanga Kresten brada na ini a ten disi di tron owruman fu di den doro den markitiki fu Bijbel di skrifi nanga yepi fu santa yeye. Sobun, te wi e gi yesi na den Kresten owruman, dan wi e sori lespeki gi Yehovah nanga Yesus, den tu moro bigi Skapuman (Luk. 10:16). A no de fu taki dati disi musu de a moro prenspari sani di e meki taki wi wani gi yesi na den owruman. Ma toku tra sani de tu di e meki taki a bun fu du dati.

7. Fa den owruman e yepi yu fu tan wan bun mati fu Yehovah?

7 Te owruman e gi den brada nanga sisa fu den rai noso deki-ati, dan den e gebroiki tori di den teki puru langalanga fu Bijbel noso gronprakseri di de fu feni na ini Bijbel. Den no wani taigi den brada nanga sisa fa den musu libi (2 Kor. 1:24). Ma den wani sori den san Bijbel e taki so taki den sabi fa fu teki bun bosroiti. Na so wánfasi nanga freide kan de na ini a gemeente (1 Kor. 14:33, 40). Den owruman abi a frantwortu fu ’luku wi’. Dati wani taki dati den wani yepi ibri sma na ini a gemeente fu tan wan bun mati fu Yehovah. Dati meki den o de gaw fu du wan sani te den si taki wan brada noso sisa o „meki wan fowtu” noso te a meki wan fowtu kaba (Gal. 6:1, 2; Yud. 22). Yu no feni taki a de wan bun sani fu ’gi yesi na den wan di e teki fesi na wi mindri’?Leisi Hebrewsma 13:17.

8. Fa owruman e kibri na ipi fu Gado?

8 Na apostel Paulus, wan lobi-ati owruman, ben skrifi den brada fu en na Kolose: „Sorgu taki nowan sma kisi unu nanga a koni fu grontapu èn nanga soso takitaki di e bedrigi sma. Den sani disi no abi noti fu du nanga den leri fu Krestes, ma nanga den gwenti fu libisma èn nanga den sani di e tiri grontapu” (Kol. 2:8). A warskow disi e sori wi ete wan sani fu san ede wi  musu poti prakseri na rai di owruman e gi nanga yepi fu Bijbel. Den e kibri brada nanga sisa gi sma di wani puru den na a sei fu Yehovah. Na apostel Petrus ben warskow Kresten na ini a ten dati gi „falsi profeiti” nanga „falsi leriman” di ben o pruberi fu „kori den sma di swaki” fu go du sani di no bun (2 Petr. 2:1, 14). Na ini a ten disi owruman musu warskow den skapu tu te dati de fanowdu. Den na lepi Kresten man di abi ondrofeni na ini a libi èn fosi den tron owruman den sori kaba taki den frustan krin san skrifi na ini Bijbel èn taki den man leri sma den tru tori dati (1 Tim. 3:2; Tit. 1:9). Fu di den lepi, fu di den e si sani na a yoisti fasi èn fu di den kisi a koni fu Bijbel, meki den man tiri den skapu fu Gado nanga koni.

Neleki fa wan skapuman e kibri den skapu fu en, na so owruman e kibri den skapu di Gado gi den fu sorgu (Luku paragraaf 8)

A BUN SKAPUMAN E GI DEN SKAPU NYANYAN ÈN A E KIBRI DEN

9. Fa Yesus e tiri a Kresten gemeente na ini a ten disi èn fa a e gi den nyanyan?

9 Yehovah e gebroiki en organisâsi fu gi ala brada nanga sisa na heri grontapu furu leri fu Bijbel. Furu rai fu Bijbel de fu feni na ini den buku fu wi. Ma son leisi na organisâsi e seni brifi langalanga go gi den owruman fu gi den rai noso den e meki kring-opziener sori den san den musu du. Na so den skapu e kisi rai di e sori den krin fa fu tyari densrefi.

10. Sortu frantwortu owruman e tyari te a abi fu du nanga den wan di gowe libi a gemeente?

10 Lobi-ati skapuman abi a frantwortu fu kibri den skapu èn fu sorgu den.  Kresten owruman e broko den ede spesrutu nanga den wan di bribi kon swaki noso den wan di du wan seryusu sondu. (Leisi Yakobus 5:14, 15.) Kande sonwan fu den sma disi gowe libi a gemeente èn den no e du den sani moro di wan Kresten musu du. Te dati de so, dan wan lobi-ati owruman o du ala san a man fu feni ibriwan fu den lasi skapu èn a o pruberi fu yepi den fu drai kon baka na a gemeente. Yesus ben taki: „Mi Tata na hemel no wani kwetikweti taki wan fu den pikinwan disi musu lasi libi.”Mat. 18:12-14.

FA WI MUSU SI DEN FOWTU DI OWRUMAN E MEKI?

11. Fu san ede son sma e feni en muilek fu gi yesi na den owruman?

11 Yehovah nanga Yesus na Skapuman di no abi sondu. Ma den skapuman di den poti fu sorgu den gemeente na sondusma. Son leisi a sani disi e meki taki a muilek gi trawan fu du san den owruman taki. Kande den e denki: ’Den na sondusma neleki wi. Fu san ede wi musu teki a rai fu den?’ A tru taki owruman na sondusma. Ma wi no musu poti prakseri na den sondu fu den èn na den fowtu di den e meki.

12, 13. (a) San wi kan taki fu den fowtu di son man meki di Yehovah ben poti fu tiri en pipel? (b) Fu san ede Gado meki sma skrifi na ini Bijbel fu den fowtu fu son man di ben kisi frantwortu?

12 Na ini Bijbel wi kan leisi krin sortu fowtu den man, di ben e tiri Yehovah en pipel na ini owruten, ben meki. Fu eksempre, David ben tron kownu nanga tiriman fu Israel. Ma toku a sribi nanga wan uma di trow èn baka dati a kiri a masra fu na uma disi (2 Sam. 12:7-9). Luku na eksempre fu na apostel Petrus tu. Aladi a ben kisi bigi frantwortu na ini a gemeente fu a fosi yarihondro, toku a meki wan tu bigi fowtu (Mat. 16:18, 19; Yoh. 13:38; 18:27; Gal. 2:11-14). Sensi a ten fu Adam nanga Eva te kon miti now, Yesus ben de a wan-enkri sma di no ben abi sondu.

13 Wi e leisi na ini Bijbel taki man di ben kisi frantwortu na ini owruten meki fowtu tu. Ma fu san ede Yehovah meki sma skrifi fu den fowtu dati? Wán sani na taki Gado ben wani sori taki a kan gebroiki sondu man fu tiri a pipel fu en. A e du dati dusundusun yari kaba. Sobun, den fowtu fu owruman na ini a ten disi no musu meki taki wi e krutukrutu nanga den noso taki wi no e sori lespeki gi den. Yehovah wani taki wi lespeki den brada disi èn taki wi e gi yesi na den.Leisi Eksodes 16:2, 8.

14, 15. San wi kan leri fu a fasi fa Yehovah taki nanga a pipel fu en na ini owruten?

14 A de prenspari fu gi yesi na den sma di e teki fesi na ini a ten disi. Luku fa Yehovah ben taki nanga en pipel na ini muilek ten. Di a pipel fu Israel gowe libi Egepte, Gado gebroiki Moses nanga Aron fu taigi den san den musu du. Efu den Israelsma no ben wani meki a di fu tin strafu kiri den, dan den ben du san Gado taigi den. Den ben musu nyan wan spesrutu nyanyan èn den ben musu srakti wan skapu. Den ben musu teki pikinso fu a brudu fu a skapu fu natinati den doropostu nanga a tapusei fu den doro. Gado no taki komoto na hemel fu taigi den san den musu du. Ma den ben abi fu du san den owru man fu Israel taki. Den owru man srefi ben yere den sani disi fu Moses (Eks. 12:1-7, 21-23, 29). Na ini a ten dati, Gado ben gi Moses nanga den owru man a frantwortu fu taigi a pipel san den musu du. Na ini a ten disi Yehovah e gebroiki Kresten owruman na wan srefi sortu fasi.

15 Kande yu sabi furu okasi na ini Bijbel pe Yehovah gebroiki libisma noso engel fu taigi en pipel san den musu du fu tan na  libi. Na ala den okasi disi Gado ben feni en fanowdu fu gi sma a frantwortu fu taki gi en. Na den sma disi ben taigi a pipel fu Gado san den musu du fu pasa muilek situwâsi. Yu no denki taki Gado kan du wan srefi sortu sani na ini Armagedon? A no de fu taki dati owruman na ini a ten disi di e teki presi gi Yehovah noso gi en organisâsi, musu luku bun fu no du sani di den no kisi a frantwortu fu du.

„WÁN IPI DI ABI WÁN SKAPUMAN”

16. San na a „sten” di wi musu arki?

16 A pipel fu Yehovah na „wán ipi di abi wán skapuman”, Yesus Krestes (Yoh. 10:16). Yesus ben taki dati a ben o de nanga den disipel fu en „ala dei te na a kaba fu grontapu” (Mat. 28:20). Leki Kownu na hemel, a abi a makti fu sorgu taki sani e waka na so wan fasi taki a grontapu fu Satan kisi pori. Fa wi kan tan de wán nanga na organisâsi fu Gado èn kisi kibri? Bijbel e taki: „Nanga un eigi yesi unu o yere wan sten na un baka e taki: ’Disi na a pasi. Waka na tapu, un pipel.’” A „sten” disi abi fu du nanga den sani di a santa yeye fu Gado e taki soleki fa dati skrifi na ini Bijbel. Boiti dati, a abi fu du tu nanga den sani di Yehovah nanga Yesus e taigi den owruman fu taki.Leisi Yesaya 30:21; Openbaring 3:22.

Owruman e pruberi fu kibri osofamiri di abi a papa noso a mama nomo, gi takru kompe (Luku paragraaf 17, 18)

17, 18. (a) San kan miti den skapu fu Gado, ma san wi sabi seiker? (b) San wi o luku na ini a tra artikel?

17 Bijbel e taki dati Satan e waka lontu „leki wan lew di e bari, fu di a e suku fu swari wan sma” (1 Petr. 5:8). Leki wan ogri meti di e suku nyanyan, na so a e luru den skapu èn a e suku wan okasi fu kan grabu den wan di no de na ai noso di no de nanga na ipi moro. Dati meki wi musu tan krosibei na a ipi èn na a sma di de wi ’skapuman di e luku taki sani waka bun nanga’ wi (1 Petr. 2:25). Openbaring 7:17 e taki fu den sma di ben o pasa a bigi banawtu libilibi: „A Pikin Skapu [Yesus] . . . o tiri den èn a o tyari den go na den peti di abi watra di e gi libi. Gado o figi ala watra puru na den ai.” Nowan tra sma kan pramisi wi den sortu moi sani disi.

18 Baka di wi luku a tumusi prenspari frantwortu di Kresten owruman abi leki skapuman di Gado poti fu yepi en nanga a wroko fu en, a bun fu aksi wisrefi: ’Fa den owruman disi kan sorgu den skapu fu Yesus na wan fasi di fiti?’ Na ini a tra artikel wi o luku a piki na tapu na aksi disi.