Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  oktober 2013

Du san Yesus taki na ini a begi fu en

Du san Yesus taki na ini a begi fu en

„Mi Tata, . . . gi yu manpikin glori, so taki yu manpikin kan gi yu glori.”YOH. 17:1.

1, 2. Fruteri san Yesus du, baka di a hori a Paskafesa nanga den apostel fu en na ini a yari 33.

A DE 14 Nisan fu a yari 33. Neti tapu kaba. Didyonsro Yesus nanga den mati fu en kaba nanga a Paskafesa di memre den fa Gado frulusu den afo fu den puru na Egepte. Ma den disipel disi di tan gi yesi na Yesus o kisi wan moro bigi frulusu leki den afo fu den. Den o kisi „têgo frulusu”. A tra dei, * den feanti o kiri a Leriman fu den di no abi sondu. Ma na ogri-ati sani disi o tron wan blesi gi sma. A brudu fu Yesus o meki taki libisma kan kisi frulusu fu sondu nanga dede.Hebr. 9:12-14.

2 Fu sorgu taki wi no frigiti a lobi-ati sani dati, Yesus seti wan nyun fesa di ben musu hori ala yari na presi fu a Paskafesa. Yesus teki wan brede sondro srudeki, a broko en, dan a gi den 11 apostel fu en di tan horibaka gi en. A taki: „Disi wani taki mi skin di mi o gi, so taki unu kan feni bun. Tan du disi fu memre mi.” A teki wan kan nanga redi win tu, dan a gi den fu den dringi. A taki: „A kan disi wani taki a nyun frubontu di o seti te mi brudu o kanti trowe, so taki unu kan feni bun.”Luk. 22:19, 20.

3. (a) Sortu bigi kenki kon, baka di Yesus dede? (b) Sortu aksi wi musu prakseri te wi e luku a begi fu Yesus di skrifi na Yohanes kapitel 17?

3 Heri esi wan kaba ben o kon na a owru Wètfrubontu di Gado ben meki nanga den Israelsma. Na presi fu na owru frubontu, wan nyunwan ben o kon di Yehovah ben meki nanga den salfu bakaman fu Yesus. Yesus no ben wani taki den bakaman fu en kon de leki a pipel fu Israel. Den Israelsma no ben e anbegi Gado leki wán man èn a sani dati ben e pori  Gado nen (Yoh. 7:45-49; Tori 23:6-9). Yesus ben wani taki den bakaman fu en wroko makandra leki wán man fu gi Gado nen glori. Sobun, san Yesus e du? A begi a moro moi begi di de. A de wan grani gi iniwan libisma fu leisi a begi dati (Yoh. 17:1-26; luku a prenki na a bigin). Te wi e luku a begi disi wi musu aksi wisrefi: ’Gado piki a begi fu Yesus trutru? Mi e du san Yesus taki na ini a begi dati?’

SAN BEN DE A MORO PRENSPARI SANI GI YESUS?

4, 5. (a) San wi e leri fu a bigin fu a begi fu Yesus? (b) Fa Yehovah piki a begi fu Yesus?

4 Te lati neti Yesus e taki nanga den disipel fu en èn a e leri den prenspari sani fu Gado. Dan a e opo en ede go na loktu èn a e begi: „Mi Tata, a yuru doro. Gi yu manpikin glori, so taki yu manpikin kan gi yu glori, fu di yu gi en makti tapu ala libisma. Na so fasi a kan gi têgo libi na ala den sma di yu gi en. . . . Mi gi yu glori na grontapu, fu di mi klari a wroko di yu gi mi fu du. We, mi Tata, gi mi a srefi glori na yu sei di mi ben abi, fosi grontapu ben de.”Yoh. 17:1-5.

5 Efu yu luku a bigin fu a begi fu Yesus, dan yu o si san ben de den moro prenspari sani gi en. Na a fosi presi a ben wani taki en Tata na hemel kisi glori. Disi e kruderi nanga a fosi sani di a aksi na ini a begi di a leri den disipel fu en. A taki: „Tata, meki yu nen kon santa” (Luk. 11:2). Na a di fu tu presi Yesus e broko en ede nanga san den disipel fu en abi fanowdu. Dati meki a aksi en Tata fu ’gi den têgo libi’. Baka dati Yesus e aksi wan sani gi ensrefi. A e taki: „Mi Tata, gi mi a srefi glori na yu sei di mi ben abi, fosi grontapu ben de.” Yehovah gi en Manpikin moro leki san a aksi en. A gi en „wan nen di bigi moro a nen fu den” engel.Hebr. 1:4.

’LERI SABI A WAN-ENKRI TRU GADO’

6. San den apostel ben musu du fu kan kisi têgo libi èn fa wi sabi taki den ben man du den sani dati?

6 Na ini a begi fu Yesus, a taki tu san wi leki sondusma musu du fu kan kisi têgo libi. (Leisi Yohanes 17:3.) A taki dati wi musu tan meki muiti fu „leri sabi” Gado nanga Krestes. Wan fasi fa wi kan du disi na te wi e du ala san wi man fu leri moro fu Yehovah nanga en Manpikin. Wan tra prenspari fasi fa wi kan leri sabi Gado na te wi e ondrofeni a prisiri di a e gi wi fu du san wi leri fu en. Den apostel ben du den tu sani disi, soleki fa a begi fu Yesus e sori moro fara. A taki: „Mi taigi den san yu taigi mi èn den bribi den sani dati” (Yoh. 17:8). Ma efu den ben wani kisi têgo libi, dan den ben musu denki dipi fu den sani di skrifi na ini Gado Wortu èn den ben musu du san den leri na ini den aladei libi. Den apostel ben man tan du den sani disi te na a dede fu den? Iya, den ben man du dati. Wi sabi dati fu di Bijbel e taki dati a nen fu ibriwan fu den skrifi fu ala ten na tapu den 12 ston di de a fondamenti fu a Nyun Yerusalem.Openb. 21:14.

7. San a wani taki fu „leri sabi” Gado èn fu san ede dati prenspari?

7 Efu wi wani libi fu têgo, dan wi musu tan „leri sabi” Gado. San disi wani taki? A Griki wortu di den gebroiki gi „leri sabi”, kan vertaal tu nanga „musu tan sabi” noso „musu go doro fu sabi”. Sobun, tan „leri sabi” Gado, wani taki fu tan leri moro fu Gado. Ma fu kon sabi a Moro Heiwan fu hemel nanga grontapu no wani taki nomo dati wi musu sabi san na den fasi fu en èn san a abi na prakseri. Fu sabi Yehovah wani taki tu dati wi de  bun mati fu en èn taki wi lobi en. Boiti dati, wi musu lobi den brada nanga sisa fu wi. Bijbel e taki: „A sma di no lobi trawan, no kon sabi Gado” (1 Yoh. 4:8). Sobun, efu wi sabi Gado, dan wi o gi yesi na en tu. (Leisi 1 Yohanes 2:3-5.) A de wan bigi grani fu de na mindri den sma di sabi Yehovah. Ma wi musu luku bun taki wi no kon de leki Yudas Iskariot di pori a matifasi di a ben abi nanga Gado. Meki wi du ala san wi man fu tan wan mati fu en. Dan te fu kaba wi o man kisi têgo libi leki kado.Mat. 24:13.

„FU YU EIGI NEN EDE”

8, 9. San ben de a moro prenspari sani gi Yesus di a ben e du en diniwroko na grontapu èn na sortu kerkigwenti a no ben wani hori ensrefi?

8 Te wi e leisi a begi fu Yesus di skrifi na Yohanes kapitel 17, dan a de krin taki a no ben lobi den apostel fu en na a ten dati wawan, ma taki a ben lobi den sma tu di ben o tron disipel fu en bakaten (Yoh. 17:20). Toku wi no musu frigiti taki a frulusu fu wi a no a moro prenspari sani gi Yesus. Sensi di a bigin a diniwroko fu en na grontapu, a meki a nen fu en Tata kon santa èn a gi en glori. Disi ben de a moro prenspari sani gi en. Fu eksempre, di Yesus fruteri sma na ini a snoga na Nasaret san na a wroko di a ben kisi fu du, a leisi wan pisi na ini a bukulolo fu Yesaya pe skrifi: „A yeye fu Yehovah de na mi tapu, fu di a salfu mi fu fruteri den pôti sma bun nyunsu.” A no de fu taki dati Yesus kari a nen fu Gado di a leisi a tekst disi.Luk. 4:16-21.

9 Langa ten bifo Yesus kon na grontapu den Dyu kerki fesiman ben abi a gwenti kaba fu taigi sma taki den no musu kari Gado nen. A de krin taki Yesus ben weigri fu hori ensrefi na a gwenti dati di no e kruderi nanga Bijbel. A taigi den gensman fu en: „Mi kon na ini a nen fu mi Tata, ma unu no bribi mi. Efu wan tra sma ben o kon na ini en eigi nen, dan unu ben o bribi a sma dati” (Yoh. 5:43). Di Yesus ben e begi wan tu dei fosi a dede, a taki san ben de a moro prenspari sani gi en: „Mi Tata, gi yu nen glori” (Yoh. 12:28). A begi di wi  e luku na ini na artikel disi e sori krin taki a moro prenspari sani na ini Yesus en libi ben de fu gi a nen fu en Tata glori.

10, 11. (a) Fa Yesus meki sma kon sabi a nen fu en Tata? (b) Fu san ede den disipel fu Yesus e meki sma kon sabi a nen fu Yehovah?

10 Yesus begi: „Mi meki den sma di yu puru na ini grontapu èn di yu gi mi, kon sabi yu nen. Den ben de fu yu, yu gi mi den, èn den du san yu taki. Sosrefi, mi no o de na grontapu moro, ma den de na grontapu ete èn mi o kon na yu. Santa Tata, kibri den fu yu eigi nen ede, a nen di yu gi mi, so taki den kan de wán neleki fa wi de wán.”Yoh. 17:6, 11.

11 Yesus ben e meki den disipel fu en kon sabi a nen fu en Tata, fu di a ben kari a nen gi den èn a ben yepi den tu fu kon frustan suma na Yehovah. A leri den san na den moi fasi fu Gado èn san na den lobi-ati sani di a e du gi wi (Eks. 34:5-7). Nownow Yesus na Kownu na ini hemel èn a e tan yepi den disipel fu en fu meki sma kon sabi a nen fu Yehovah na ala sei fu grontapu. Fu san ede den e du a wroko disi? Fu di moro sma musu tron disipel fosi a kaba fu na ogri grontapu disi kon. Na a ten dati Yehovah o meki wan bigi nen gi ensrefi te a o frulusu en kotoigi di tan gi yesi na en.Esek. 36:23.

NA SO „GRONTAPU KAN BRIBI TAKI NA YU SENI MI KON”

12. San na dri sani di wi musu du fu kan du wi wroko bun?

12 Di Yesus ben de na grontapu a du furu muiti fu yepi den disipel fu en fu basi den swakifasi fu den. Den ben musu du dati efu den ben wani klari a wroko di Yesus ben bigin. Na ini a begi fu en a e taki: „Neleki fa yu seni mi go na den sma fu grontapu, na so mi seni den go tu na den sma fu grontapu.” Yesus sori den taki dri prenspari sani ben de fanowdu efu den disipel fu en ben wani tan du a wroko disi bun. A fosi sani, na taki Yesus begi taki den disipel fu en no musu de wan pisi fu na ogri grontapu fu Satan. A di fu tu sani na taki Yesus begi Gado fu yepi den disipel fu en fu gi yesi na en Wortu èn fu tan de santa. A di fu dri sani, na taki Yesus e begi taki den disipel fu en kan de wán neleki fa en nanga en Tata de wán. Disi e sori taki wi musu ondrosuku wisrefi. Ibriwan fu wi musu aksi ensrefi: ’Mi e du den dri sani disi di Yesus aksi na ini a begi fu en?’ Yesus ben de seiker taki efu den disipel fu en ben o du den sani dati, dan grontapu ben o bribi taki na Yehovah seni en kon.Leisi Yohanes 17:15-21.

Den Kresten fu a fosi yarihondro ben e wroko makandra nanga a santa yeye so taki wánfasi ben kan de (Luku paragraaf 13)

13. Fa Yehovah piki a begi fu Yesus na ini a fosi yarihondro?

13 Te wi e studeri Tori fu den apostel, a Bijbel buku di e kon baka den fo Evangelie, wi e si taki Gado piki a begi fu Yesus. Prakseri o makriki pratifasi ben kan kon na mindri den fosi Kresten, di ben de Dyu nanga sma fu tra kondre, gudusma nanga pôtisma, srafu nanga srafubasi. Toku den alamala ben kon de wán èn na apostel Paulus ben kan agersi den nanga den difrenti pisi fu wan libisma skin di abi Yesus leki ede (Ef. 4:15, 16). A wánfasi di den Kresten ben abi ben de wan kefalek sani na ini a grontapu fu Satan pe soso pratifasi de. A no de fu taki dati na Yehovah wawan ben kan meki a sani disi pasa nanga yepi fu en santa yeye.1 Kor. 3:5-7.

Na heri grontapu a pipel fu Yehovah e wroko makandra leki wán man (Luku paragraaf 14)

14. Fa Yehovah gi piki na tapu a begi fu Yesus na ini a ten fu wi?

14 A de wan sari sani taki den Kresten na a ten dati no ben de wán moro, baka di den apostel dede. Soleki fa Bijbel taki na fesi, dan sma ben o fadon komoto na bribi. Na so falsi leri kon na ini a gemeente  èn disi meki taki pratifasi kon (Tori 20:29, 30). Ma na ini a yari 1919, Yesus puru den salfu bakaman fu en na ini a makti fu falsi bribi èn a tyari den kon na wán fu di „lobi e meki sma kon de wán trutru” (Kol. 3:14). San pasa di den du a preikiwroko na heri grontapu? Moro leki seibi milyun „tra skapu” di komoto na „ala kondre, lo, pipel, nanga tongo” e anbegi Yehovah leki wán man makandra nanga den salfuwan (Yoh. 10:16; Openb. 7:9). Na wan moi fasi Yehovah gi piki na tapu a begi fu Yesus. Na so grontapu ben kan kon sabi taki na Yehovah seni en kon èn taki a lobi den neleki fa a lobi Yesus.Yoh. 17:23.

YESUS KABA A BEGI FU EN NA WAN MOI FASI

15. San Yesus aksi en Tata gi den salfu disipel fu en?

15 Moro fruku na a neti fu 14 Nisan, Yesus meki wan frubontu nanga den apostel fu en fu tiri makandra nanga en na ini en Kownukondre. Na so Yesus gi den glori noso grani (Luk. 22:28-30; Yoh. 17:22). Dati meki Yesus e begi now gi ala den sma di ben o tron salfu bakaman fu en: „Mi Tata, mi wani taki den sma di yu gi mi, kan de nanga mi pe mi de. Na so den kan si a glori di yu gi mi fu di yu ben lobi mi fosi grontapu ben seti” (Yoh. 17:24). Disi no e meki taki den tra skapu fu Yesus e dyarusu, ma den e prisiri. A sani disi na ete wan buweisi taki pratifasi no de na mindri tru Kresten.

16, 17. (a) San Yesus ben o tan du soleki fa a taki na a kaba fu a begi fu en? (b) San wi musu tan du awinsi san pasa?

16 Furu sma na grontapu no wani bribi taki Yehovah abi wan pipel di de wán èn di sabi en trutru. Na so a ben de tu na ini a ten fu Yesus. Sobun, Yesus e kaba a begi fu en nanga den moi wortu disi: „Reti-ati Tata, fu tru, den sma na grontapu no kon sabi yu. Ma mi kon sabi yu èn den kon sabi taki na yu seni mi kon. Mi meki den kon sabi yu nen èn mi o tan fruteri den fu yu nen, so taki den kan abi a srefi lobi di yu abi gi mi èn mi kan de wán nanga den.”Yoh. 17:25, 26.

17 Yesus du ala san a man fu meki sma kon sabi a nen fu en Tata. Leki Ede fu a gemeente, a e tan yepi wi fu kon sabi a nen fu en Tata èn den sani di Gado abi na prakseri fu du. Meki wi tan saka wisrefi na en ondro fu di wi e gi yesi na a komando fu en fu preiki èn fu meki disipel (Mat. 28:19, 20; Tori 10:42). Meki wi tan wroko tranga tu fu sorgu taki wánfasi de na wi mindri. Te wi e du den sani disi, dan wi o du san Yesus taki na ini a begi fu en. Iya, wi o gi glori na Yehovah nen èn dati o meki taki wi de koloku fu têgo.

^ paragraaf 1 A ben de 14 Nisan ete.