Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  oktober 2013

Den sani di a libilibi Gado meki e sori wi suma na en

Den sani di a libilibi Gado meki e sori wi suma na en

„Na yu, Yehovah wi Gado, warti fu sma prèise yu gi a glori . . . di yu abi, bika na yu meki ala sani.”OPENB. 4:11.

1. San wi musu du fu sorgu taki a bribi fu wi tan tranga?

FURU sma gwenti taki dati den e bribi soso na ini sani di den man si. Fa wi kan yepi den sma disi fu bribi na ini Yehovah, aladi Bijbel e taki dati „noiti wan sma si Gado”? (Yoh. 1:18) Fa wi kan sorgu taki a bribi di wi abi na ini Yehovah tan tranga, aladi a de wan „Gado di sma no man si”? (Kol. 1:15) A fosi sani na taki wi musu luku sortu leri e tapu sma fu kon sabi den tru tori fu Yehovah. Baka dati wi musu gebroiki Bijbel na wan koni fasi fu sori taki den fowtu denki dati „de teige a sabi fu Gado”.2 Kor. 10:4, 5.

2, 3. San na tu leri di e tapu sma fu kon sabi den tru tori fu Gado?

2 Wan fu den falsi leri di e tapu furu sma fu kon sabi den tru tori fu Gado na a evolutie-leri. A leri disi no e kruderi nanga Bijbel èn a e meki taki sma no abi howpu fu abi wan moro betre libi. Na evolutie-leri e taki dati ala libi kon fu ensrefi. Efu dati ben de so, dan nowan sma ben o man fruklari fu san ede wi de na libi.

3 Na a tra sei, yu abi kerkisma di e leri trawan taki na soso wan tu dusun yari pasa, Gado meki den planeiti, grontapu nanga den libisani de na en tapu. Kande den sma di e leri trawan a sani disi abi furu lespeki gi Bijbel, ma toku den e bribi taki Gado meki ala sani na ini siksi dei fu 24 yuru èn taki a du dati soso wan tu dusun yari pasa. Den sma disi feni taki efu den buweisi di sabiman e tyari kon na fesi no e kruderi nanga san den e bribi, dan den buweisi dati no tru. Sobun, yu kan taki dati a falsi leri disi e meki a gersi leki san Bijbel e taki no kan èn taki a no e sori sma fa sani de trutru. Den sma di e kon nanga  den sortu denki dati e meki wi prakseri son sma fu a fosi yarihondro di ben de fayafaya fu dini Gado ’ma di no ben abi soifri sabi’ (Rom. 10:2). Fa wi kan gebroiki Gado Wortu fu yepi sma fu kon si taki na evolutie-leri nanga den sortu leri dati, no tru kwetikweti? Wi kan du disi soso te wi e meki muiti fu kon sabi san Bijbel e leri trutru.

MEKI DEN BUWEISI OVERTOIGI YU

4. Fu san ede wi kan bribi na ini Gado?

4 Bijbel e leri wi taki wi musu kibri sabi leki wan gudu (Odo 10:14). Yehovah wani taki wi musu bribi na ini en fu di wi e luku san den buweisi e sori. Gado no wani taki kerkigwenti noso libisma denki musu meki wi bribi na ini en. (Leisi Hebrewsma 11:1.) Fu kan abi wan tranga bribi na ini Gado, wi musu de seiker taki Yehovah de. (Leisi Hebrewsma 11:6.) A no fu di wi wani bribi na ini wan sani, meki wi e bribi taki Gado de, ma na fu di wi ondrosuku a tori èn fu di wi gebroiki wi „frustan”.Rom. 12:1.

5. San na wán sani di e meki taki wi kan bribi taki Gado de?

5 Na apostel Paulus e sori wi wán sani di e meki taki wi kan bribi taki Gado de, awinsi wi no man si en. Paulus ben skrifi fu Yehovah: „Sensi grontapu meki, sma man si krin sortu fasi Gado abi, aladi den no man si en. Te den e luku den sani di a meki, den kan frustan taki a abi têgo krakti èn taki en na Gado trutru” (Rom. 1:20). Te wan sma e tweifri taki Gado de, dan fa yu kan yepi en fu bribi a sani di Paulus taki dyaso? Leki buweisi yu kan gebroiki den sani di Gado meki. Den buweisi disi e sori wi taki a Mekiman abi makti nanga koni.

DEN SANI DI GADO MEKI E SORI TAKI A ABI MAKTI

6, 7. San na tu sani di Yehovah e gebroiki fu kibri grontapu èn di e sori a makti fu en?

6 Wi man si a makti fu Yehovah na ini tu sani di a e gebroiki fu kibri grontapu so taki noti no pasa nanga en. A fosi sani na a loktu di de lontu grontapu. A loktu disi no e meki nomo taki wi man hari bro, ma a e kibri wi tu. Fa so? Dorosei fu grontapu pe wi ai no man si, bigi ston e frei pasa di kan tyari rampu kon efu den tuka nanga grontapu. Ma nofo tron disi no e pasa, fu di den ston e bron gowe te den doro na ini a loktu lontu grontapu. A moi faya di e kon de fu si na hemel na neti te den bigi ston disi e bron gowe, e meki a gersi leki na stari e fadon.

7 A di fu tu sani di e kibri grontapu na wan krakti di de te na ini na ati fu grontapu. Drape furu isri de di smèlter èn di e meki wan krakti kon de di e doro te na dorosei fu grontapu èn di e wroko leki wan prasoro. A e kibri wi gi a hebi faya fu a son di e kon de te sani e sutu panya na ini a son. A krakti dati e sorgu taki a faya fu a son no e bron grontapu. Ala den sani disi e sori krin taki Yehovah „abi furu makti”.Leisi Yesaya 40:26.

DEN SANI DI GADO MEKI E SORI TAKI A ABI KONI

8, 9. Fa den sani di Yehovah seti fu meki wi tan na libi e sori taki a abi koni?

8 A koni fu Yehovah de fu si na ini den sani di a seti fu meki taki wi man libi na grontapu. Kon meki wi taki dati yu e libi na ini wan foto pe furu sma de èn di tapu lontu nanga wan hei skotu. Ma now den sma fu a foto no man tyari krin watra fu dringi kon na ini a foto èn den no man tyari doti go trowe na dorosei tu.  Baka wan syatu pisi ten a foto disi o kon doti srefisrefi èn sma no o man libi drape moro. Yu kan taki dati a grontapu fu wi de leki a foto disi. A no abi furu watra di bun fu dringi èn wi no man puru a doti di de na grontapu go poti na wan tra presi. Ma tra fasi leki a foto, grontapu e tan gi milyardmilyard libisani san den abi fanowdu fu tan na libi. Fa dati kan? Fu di grontapu man du wan moi sani: Ala sani di a gebroiki wan leisi kaba, a man kenki so taki libisani na grontapu man gebroiki den baka fu tan na libi.

9 Meki wi go luku now fa grontapu e meki zuurstof so taki libisma nanga meti man bro. Te den milyardmilyard libisma nanga meti e bro, dan den e hari zuurstof go na ini den skin èn den e bro koolzuurgas puru. Aladi disi e pasa ibri tron baka, toku a zuurstof na ini a loktu noiti no e kaba. Fa dati kan? We, den bon e teki koolzuurgas, watra, a leti fu a son nanga tra sani di den abi fanowdu fu gro, dan den e meki zuurstof nanga koolhydraat (wan sortu sukru). Te wi e bro, wi e hari zuurstof kon na ini wi skin èn wi e bro koolzuurgas puru, dan den bon e gebroiki dati baka. Yehovah e gebroiki bon nanga grasi fu sorgu taki ala sma man tan na libi èn taki den man bro (Tori 17:25). Ai, Gado koni trutru!

10, 11. Fa a monarch-vlinder nanga a grasbarki e sori taki Yehovah abi bigi koni?

10 A koni fu Yehovah de fu si tu na ini a fasi fa a meki den milyunmilyun libisani na tapu a planeiti fu wi. Na mindri 2 milyun nanga 100 milyun sortu libisani de fu feni na grontapu. (Leisi Psalm 104:24.) Te wi o luku a fasi fa Gado meki sonwan fu den libisani disi, dan wi o si taki a koni srefisrefi.

A fasi fa Gado meki den ai fu wan grasbarki e sori taki a abi koni. Na a prenki wi kan si wan pisi fu na ai fu a grasbarki omeni tron moro bigi (Luku paragraaf 11)

11 Teki a monarch-vlinder fu eksempre. Na edetonton fu a vlinder disi pikin moro na ede fu wan pina. Ma toku a vlinder disi man frei pikinmoro 3000 kilometer fu Kanada go na wan spesrutu busi na ini Meksikow. A son e yepi en fu sabi pe a musu go. Ma fa a sabi pe a musu go te a son e skoifi fu a wan sei go na a tra sei? Yehovah meki a pikin edetonton fu a vlinder disi na so wan fasi taki a sabi soifri pe a musu frei go awinsi a son e skoifi. Luku sosrefi wan grasbarki. Wan grasbarki abi tu bigi ai. Ibriwan fu den ai disi abi 30.000 pikinpikin ai. Ala nanga ala a grasbarki abi 60.000 pikinpikin ai. Den dusundusun ai disi e seni boskopu go na en edetonton. Aladi na edetonton fu a grasbarki pikin, toku a man frustan ala den boskopu dati so taki a man si iniwan sani di e buweigi na en lontu.

12, 13. San yu feni moi na a fasi fa Yehovah meki den cel fu wi skin?

 12 Wan tra sani di moi kefalek na a fasi fa Yehovah meki den cel fu ala libisani. Fu eksempre, wi skin abi sowan 100 bilyun cel. Na ini ibriwan fu den pikin cel disi wan sani de di sma e kari DNA èn a de leki wan buku pe skrifi fa a skin fu wan sma o kon de.

13 Omeni a DNA fu wan libisma man hori? Wi kan agersi wán gran DNA nanga wan CD. Wan CD kan abi wan heri wortubuku na en tapu. A sani disi na wan kefalek sani fu di wan CD na wan plata pisi plastik nomo. Ma wán gran DNA kan hori moro leki san wán bilyun CD man hori! Noso fu taki en na wan tra fasi, wan pikin spun nanga drei DNA nofo fu meki 2,5 bilyun libisma!

14. San yu e denki fu Yehovah te yu e luku den sani di sabiman kon si?

14 Soleki fa wi si kaba, dan yu kan agersi DNA nanga wan buku. Na so wan sortu sani Kownu David ben taki. A ben taki fu Yehovah Gado: „Yu ai ben si mi di mi ben de na ini mi mama bere. Srefi di nowan pisi fu mi skin ben de ete, yu ben skrifi kaba na ini a buku fu yu taki ala den difrenti pisi fu mi skin ben o kon de” (Ps. 139:16). Wi kan frustan fu san ede David ben wani prèise Yehovah di a prakseri a fasi fa en skin meki. Den sani di sabiman kon si na ini den yari di pasa meki taki wi kisi moro lespeki gi Yehovah, spesrutu te wi e prakseri a fasi fa a meki wi. Den sani disi e meki taki wi srefi e agri nanga a psalm skrifiman di ben taki fu Yehovah: „Mi o prèise yu, fu di yu meki mi na wan tumusi wondru fasi di e meki mi kisi bigi lespeki gi yu. Den sani di yu du, bigi srefisrefi. Dati mi sabi heri bun” (Ps. 139:14). We, dan fa sma no man si taki den sani di a libilibi Gado meki, e sori wi taki a de trutru?

YEPI TRAWAN FU GI GLORI NA A LIBILIBI GADO

15, 16. (a) Fa den buku fu wi yepi sma fu kisi moro warderi gi a fasi fa Yehovah meki sani? (b) Sortu artikel di e taki fu den sani di Gado meki yu ben feni moi?

15 Someni yari langa den buku fu Yehovah Kotoigi yepi milyunmilyun sma fu kon si fa den sani na wi lontu e leri wi moro fu a libilibi Gado. Fu eksempre, son buku fu wi meki spesrutu fu yepi sma di e bribi na ini na evolutie-leri noso tra falsi leri. Wan leisi di den ben prati wan spesrutu Ontwaakt! di ben taki fu den tori dati, wan sisa skrifi a bijkantoro na Amerkankondre: „A spesrutu wroko di wi du fu prati a tijdschrift ben waka heri bun. Wan uma di e gi biologie na skoro ben wani 20 fu den tijdschrift disi fu gi den pikin na ini en klas.” Wan brada skrifi: „Mi bigin preiki fosi 1950 èn now mi e doro 75 yari. Ma noiti mi prisiri so nanga a preikiwroko leki na ini a mun disi.”

16 Na ini den yari di pasa, moro artikel ben kon na ini den tijdschrift fu wi di e taki fu den sani di Gado meki. * Den artikel disi e sori krin na sortu moi fasi den sani dati meki èn fa libisma pruberi fu meki sani leki fa wi Bigi Mekiman meki den. Den skrifi spesrutu fu yepi wi fu kisi moro warderi gi a fasi fa Yehovah meki sani. Den aksi na ini den artikel disi e yepi a leisiman fu prakseri fu den sani di a leisi. Yu ben man gebroiki wan tu moi sani fu den artikel dati di yu ben preiki oso fu oso noso na tra okasi?

17, 18. (a) Sortu frantwortu papa nanga mama abi? (b) Di yu hori na osofamiri anbegi, dan fa yu gebroiki den artikel di e taki fu den sani di Gado meki?

17 Papa nanga mama, yu luku den artikel  disi nanga den pikin fu yu na a osofamiri anbegi? Te yu e du dati, dan yu kan yepi den fu kisi moro warderi gi a libilibi Gado fu wi. Kande yu abi wan tini di e go na middelbaar skoro. A e kisi fu du nanga sma di e leri trawan na evolutie-leri. Sabiman nanga sma di e gi lès na skoro, sosrefi programa na telefisi nanga felem, e leri sma taki na evolutie na wan sani di pasa trutru.

Papa nanga mama, yepi yu pikin so taki den kan sori fu san ede den e bribi na ini wan Mekiman (Luku paragraaf 17)

18 Son leisi studenti e yere na nyunsu taki sabiman feni bonyo noso tra sani di de na ini a gron dusundusun yari kaba. Den sabiman e taki dati den sani disi e sori taki na evolutie pasa trutru. Yepi den pikin fu yu fu kon si efu a nyunsu di den e yere e buweisi trutru taki libisma kon fu meti. Leri den tu san den musu piki te sma e taki dati sabiman feni buweisi di e sori taki a libi kon fu ensrefi. Papa nanga mama, te yu gebroiki den artikel disi, dan yu kan yepi yu pikin trutru so taki den no o frede sori fu san ede den e bribi na ini wan Mekiman.Leisi 1 Petrus 3:15.

19. Sortu bigi grani wi alamala abi?

19 Te wi e leisi den buku di na organisâsi fu Yehovah tyari kon na doro èn di e taki fu den sani di Yehovah meki, dan wi kan leri furu fu den moi fasi fu en. Ala den buweisi disi e meki taki wi wani prèise wi Gado (Ps. 19:1, 2). A de wan bigi grani fu gi Yehovah, a sma di meki ala sani, a grani nanga a glori di a musu kisi.1 Tim. 1:17.

^ paragraaf 16 Yu kan feni wan tu fu den artikel disi na ini A Waktitoren fu 15 yuni 2007, bladzijde 21-25 nanga a di fu 15 februari 2011, bladzijde 6-10.

Kon sabi moro

San Bijbel e leri wi trutru?

Suma na Gado trutru?