Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  oktober 2013

 ONDROFENITORI

Wi kisi wini fu di wi frutrow na tapu Yehovah

Wi kisi wini fu di wi frutrow na tapu Yehovah

Wi no sabi na fesi san o pasa na ini wi libi èn son leisi a hebi. Yehovah no e blesi den wan di e frutrow na tapu den eigi frustan, ma a e blesi den wan di e frutrow na tapu en. Na dati mi nanga mi wefi kon si na ini a libi fu wi pe wi kisi furu blesi. Kon meki wi fruteri pikinso san miti wi na ini a libi.

MI PAPA NANGA MAMA miti makandra na ini 1919 na wan kongres fu den Internationaal Bijbel Ondrosukuman, na Cedar Point, Ohio, Amerkankondre. A srefi yari dati den trow. Mi gebore na ini 1922 èn tu yari baka dati mi brada Paul gebore. Mi wefi Grace gebore na ini 1930. Grace papa nanga mama, Roy nanga Ruth Howell, kweki leki Bijbel Ondrosukuman èn en owpa nanga owma fu en papa nanga mama sei ben de Bijbel Ondrosukuman tu èn mati fu Brada Charles Taze Russell.

Mi miti Grace na ini 1947 èn tapu 16 yuli 1949 wi trow. Fosi wi trow, wi taki krin nanga makandra san wi ben wani du nanga wi libi. Wi teki a bosroiti fu go na ini a furuten diniwroko èn fu no kisi pikin. Tapu 1 oktober 1950 wi bigin pionier. Na ini 1952 den aksi wi fu du a kringwroko.

A KRINGWROKO NANGA A GILEADSKORO

Wi ala tu ben feni taki wi ben abi furu yepi fanowdu fu du a nyun wroko di wi ben kisi fu du. Mi ben leri furu fu den brada di abi ondrofeni, ma mi ben suku yepi tu gi Grace. Mi go na Marvin Holien, wan brada di a famiri fu mi ben sabi bun langa kaba èn di ben abi furu ondrofeni nanga a kringwroko, dan mi aksi en: „Grace yongu ete èn a no abi ondrofeni. Yu kan suku wan sma di kan wroko nanga en èn di kan yepi en fu du a wroko disi?” A piki: „Iya, Edna Winkle na wan pionier di abi furu ondrofeni èn a kan yepi en bun.” Bakaten Grace taki fu Edna: „Te wi ben de na den doro, Edna no ben meki mi firi syen, ma a ben meki en makriki gi mi fu taki nanga den sma. A ben sabi san fu taki te sma no ben wani arki èn a ben leri mi fu poti prakseri na a ososma so taki mi ben kan piki en na wan yoisti fasi. Na dati mi ben abi fanowdu!”

Fu a kruktu-anusei go na a reti-anusei: Nathan Knorr, Malcolm Allen, Fred Rusk, Lyle Reusch, Andrew Wagner

Mi nanga Grace dini na ini tu kring fu a distrikt Iowa èn wi wroko tu na son presi na ini den distrikt Minnesota nanga South Dakota. Baka dati den seni wi go na Kring 1 fu New York. Na ini a kring disi yu ben abi den kontren fu  Brooklyn nanga Queens. Noiti wi o frigiti fa wi ben firi di wi du a kringwroko na ini den kontren disi. Na ini a kring yu ben abi Gemeente Brooklyn Heights tu, di ben hori konmakandra na ini a Kownukondre zaal fu Betel. A gemeente disi ben abi furu memre fu a Betelfamiri di ben abi furu ondrofeni. Baka di mi hori mi fosi dienstlezing na ini a gemeente drape, Brada Nathan Knorr kon na mi èn a taki: „Malcolm, yu gi wi wan tu moi rai èn a ben fiti. No frigiti taki efu yu no e gi wi rai fu yepi wi, dan na organisâsi no man gebroiki yu. Tan du a bun wroko disi.” Baka a konmakandra mi fruteri Grace san a brada taigi mi. Wan heri pisi ten kaba wi ben broko wi ede tumusi nanga fa sani ben o waka drape. Sobun, di wi doro na wi kamra na Betel, wi bigin krei fu di wi ben breiti di wi kon si taki sani go bun.

„Efu yu no e gi wi rai fu yepi wi, dan na organisâsi no man gebroiki yu. Tan du a bun wroko disi”

Baka wan tu mun wi kisi wan brifi pe den aksi wi fu go na a di fu 24 klas fu a Gileadskoro di ben o kaba na ini februari 1955. Fosi wi go na a skoro, den taigi wi taki kande wi no ben o tron zendeling. Ma a ben de fanowdu fu go na a skoro fu di dati ben o yepi wi fu du a kringwroko moro bun. A skoro ben bun srefisrefi èn a yepi wi tu fu kisi sakafasi.

Fern nanga George Couch makandra nanga mi nanga Grace na a Gileadskoro na ini 1954

Di wi klari a skoro, den aksi wi fu du a distriktwroko. Wi ben musu go na den distrikt Indiana, Michigan nanga Ohio. Wi ben fruwondru di wi kisi wan brifi fu Brada Knorr na ini december 1955. A brifi ben taki: „No frede fu taigi mi krin fa yu e denki fu a tori. Efu yu taki dati yu wani kon na Betel èn tan dya . . . noso efu yu wani go na wan tra kondre baka te yu kon na Betel fu wan pisi ten, dan taigi mi. Efu yu wani tan wroko leki distrikt-opziener noso kring-opziener, mi wani sabi dati tu.” Wi taigi en taki wi wani du iniwan sani di den ben o aksi wi fu du. Wantewante den kari wi kon na Betel.

WAN SPAN TEN NA BETEL

A pisi ten di mi ben de na Betel mi ben e hori lezing na den gemeente, na den kongres èn na tra bigi konmakandra na ini heri Amerkankondre. Boiti dati, mi yepi furu yongu brada di ben kisi bigi frantwortu na ini Yehovah en organisâsi te fu kaba. Bakaten mi wroko leki sekretarsi gi Brada Knorr na a kantoro di ben orga a preikiwroko na heri grontapu.

Mi e wroko na a Dienst Afdeling na ini 1956

Na ini den yari di mi wroko na a Dienst Afdeling, mi ben prisiri srefisrefi. Drape mi ben abi na okasi fu wroko nanga T. J. (Bud) Sullivan. Furu yari langa a ben de opziener fu na afdeling  dati. Ma trawan ben de drape tu di ben e leri mi furu sani. Wan fu den ben de Fred Rusk, di ben kisi a frantwortu fu leri mi a wroko. A e gi mi fu lafu te mi e prakseri a wan leisi di mi aksi en: „Fred, fu san ede yu e kenki so furu sani na ini den brifi fu mi?” A ben lafu, ma a taki tu: „Malcolm, te yu e taki wan sani, yu kan fruklari san yu ben wani taki. Ma te yu e skrifi wan sani, spesrutu te a e komoto fu dya, dan yu musu du ala san yu man fu taki en krin so taki sma no kan go kisi tra prakseri.” Baka dati a taki na wan switi fasi: „No lasi-ati. Yu e du en bun èn baka wan pisi ten yu o du en moro bun.”

Na ini ala den yari di wi ben de na Betel, Grace du difrenti sortu wroko, soleki a krin fu den kamra. A ben lobi a wroko dati. Te na a dei fu tide, wi e miti brada di ben yongu ete na a pisi ten dati èn den e taigi Grace lafulafu: „Yu leri mi fa fu meki mi bedi èn mi kan taigi yu taki mi mama ben lobi san yu du.” Grace ben lobi fu wroko tu na a Tijdschrift Afdeling, na a afdeling di e piki den aksi di sma abi fu Bijbel èn na a afdeling pe den e meki cassette-lolo. Den difrenti wroko di Grace du drape leri en taki awinsi san wi e du noso awinsi pe wi de, a de wan grani èn wan blesi fu dini na ini Yehovah en organisâsi. Te now ete a e denki so fu a tori.

WI TYARI KENKI KON

Baka 1975 wi kon si taki wi owru papa nanga mama ben abi yepi fanowdu. Te fu kaba wi ben musu teki wan muilek bosroiti. Wi no ben wani gowe libi Betel nanga den brada nanga sisa drape di wi ben lobi srefisrefi. Ma mi ben feni taki na mi frantwortu fu sorgu gi wi papa nanga mama. Dati meki wi gowe libi Betel, ma wi ben howpu taki te a situwâsi fu wi ben o kenki, wi ben o man drai kon baka.

Fu feni moni gi wi osofamiri, mi bigin wroko gi wan bedrijf pe sma kan sroto verzekering. Mi kan memre taki di mi ben leri du a wroko, wan fu den basi drape taigi mi: „Na ini a bisnis disi yu musu wroko na neti. Na den yuru dati yu kan miti sma. A moro prenspari sani na taki yu musu go na den sma ibri neti.” Mi piki en: „Mi sabi taki na dati yu ondrofeni èn mi e lespeki a denki fu yu. Ma mi abi a frantwortu tu fu poti na anbegi fu Gado na a fosi presi na ini mi libi. Son leisi mi o wroko na neti, ma tudewroko nanga fodewroko mi musu go na wan tumusi prenspari konmakandra.” Yehovah blesi mi trutru taki mi no misi nowan konmakandra fu go du grontapuwroko.

Wi ben de nanga mi mama di a dede na ini yuli 1987 na ini wan oso pe den e sorgu owrusma. A zuster di ben abi a frantwortu drape, kon na Grace èn a taigi en: „Mevrouw Allen, go na oso èn rostu pikinso. Ala sma sabi taki yu ben de dya ala ten gi a mama fu yu masra. No broko yu ede. Yu du ala san yu man.”

 Na ini december 1987 wi aksi fu go dini na Betel baka, a presi di wi lobi trutru. Ma wan tu dei baka dati, datra kon si taki Grace ben abi kanker na ini en bere. Baka di den du wan oparâsi, Grace kon betre èn den taigi en taki a no abi kanker moro. Ma na a ten dati wi kisi wan brifi fu Betel èn den taigi wi taki a ben o moro bun fu tan dini na ini a gemeente pe wi ben de kaba. Wi no ben meki noti tapu wi fu tan wroko tranga gi Yehovah.

Baka wan pisi ten mi ben man feni wan wroko na Texas. Wi ben feni taki a ben o moro bun gi wi fu go libi na wan presi di moro waran èn na so a ben de tu. Wi de dyaso na ini Texas 25 yari kaba nanga wi lobi brada nanga sisa di tron bunbun mati fu wi.

PRENSPARI SANI DI WI LERI

Grace kisi kanker na ini en bere, na en gorogoro èn no so langa pasa na en bobi. Ma noiti a kragi. Ala ten a horibaka gi mi èn a lespeki mi leki edeman fu na osofamiri. Nofo tron sma e aksi en: „San meki taki un trowlibi e waka so bun èn taki unu de so koloku?” Grace e taki dati den fo sani disi yepi wi: „Wi de bunbun mati fu makandra. Wi e taki nanga makandra ala dei. Wi lobi fu de nanga makandra. Te wi ati e bron nanga makandra, dan noiti wi e go sribi sondro fu meki en bun baka.” A no de fu taki dati wanwan leisi wi e mandi nanga makandra, ma ala ten wi e gi makandra pardon èn wi e frigiti den fowtu di wi ben meki. A sani disi yepi wi furu.

„Frutrow ala ten na tapu Yehovah. No drai baka gi en te a e gi pasi taki problema miti yu”

Ala den tesi di miti wi leri wi wan tu bun sani:

  1.  Frutrow ala ten na tapu Yehovah. No drai baka gi en te a e gi pasi taki problema miti yu. Noiti no frutrow na tapu yu eigi frustan.Odo 3:5, 6; Yer. 17:7.

  2.  Suku rai na ini Yehovah en Wortu ala ten, awinsi san e pasa. A de tumusi prenspari fu gi yesi na Yehovah nanga den wèt fu en. Wi kan gi yesi na Gado noso wi kan trangayesi en, ma wi no kan du ala tu.Rom. 6:16; Hebr. 4:12.

  3.  A moro prenspari sani na ini a libi na fu abi wan bun nen na Yehovah. Poti den sani fu en na a fosi presi èn no suku fu kon gudu.Odo 28:20; Preik. 7:1; Mat. 6:33, 34.

  4.  Begi fu abi bun bakapisi èn fu de fayafaya na ini a diniwroko fu Yehovah. Poti prakseri na san yu kan du èn no luku san yu no man du.Mat. 22:37; 2 Tim. 4:2.

  5.  Sabi taki nowan tra organisâsi de di Yehovah e blesi èn di a feni bun.Yoh. 6:68.

Mi nanga Grace dini Yehovah moro leki 75 yari èn leki trowpaar wi e dini en pikinmoro 65 yari kaba. Na ini ala den yari wi ben prisiri srefisrefi fu dini Yehovah. Wi howpu èn e begi taki ala wi brada nanga sisa kan ondrofeni tu taki a de wan bigi blesi fu frutrow na tapu Yehovah.