Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  oktober 2013

„Dini Yehovah leki srafu”

„Dini Yehovah leki srafu”

„Un musu wroko tranga, un no musu lesi. . . . Dini Yehovah leki srafu.”ROM. 12:11.

1. San furu sma e denki fu wan srafu, ma fa dati de heri tra fasi leki san skrifi na Romesma 12:11?

FURU sma e taki dati wan srafu na wan sma di en basi e dwengi fu du sani di a no wani èn a e du ogri-ati sani nanga en. Ma fu de wan srafu fu Gado de heri tra fasi. Gado Wortu e taki dati wan Kresten kan bosroiti efu a wani tron wan srafu di e dini wan lobi-ati Masra. Fu taki en leti, di na apostel Paulus taigi den Kresten fu a fosi yarihondro fu „dini Yehovah leki srafu”, a gi den deki-ati fu du santa wroko gi Gado fu di den lobi en (Rom. 12:11). San a wani taki fu dini Gado leki srafu? Fa wi kan sorgu taki wi no e tron srafu fu Satan nanga a grontapu fu en? Sortu blesi wi o kisi te wi e tan dini Yehovah leki srafu?

’MI LOBI MI BASI TRUTRU’

2. (a) Fu san ede wan Israelsma ben kan bosroiti fu tan wroko leki wan srafu? (b) Fu san ede wan srafu ben o wani taki en basi boro en yesi?

2 A Wèt di Yehovah gi Israel e sori san a wani taki fu de wan srafu fu en. Wan Hebrew srafu ben kan kon fri baka seibi yari (Eks. 21:2). Ma Yehovah ben seti wan moi sani gi wan srafu di ben lobi en basi trutru èn di ben wani tan wroko gi en. A basi ben musu tyari a srafu fu en go na wan doro noso wan doropostu pe a ben e boro a yesi fu a srafu nanga wan prin (Eks. 21:5, 6). Fu san ede a ben e du disi? Na ini Hebrewtongo, a wortu di vertaal nanga „gi yesi” abi fu du nanga yere èn nanga arki. Sobun, te wan srafu ben meki a basi fu en boro en yesi, dan na so a srafu ben sori taki a de klariklari fu tan gi yesi na en basi. Disi e yepi wi fu frustan san a wani taki fu gi wisrefi abra na Yehovah. A wani taki dati wi de klariklari fu gi yesi na Gado fu di wi lobi en.

3. Fu san ede wi gi wisrefi abra na Gado?

3 Fosi wi teki dopu leki Kresten, wi ben bosroiti kaba taki wi wani dini Yehovah èn taki wi de klariklari fu de srafu fu en. Di wi gi wisrefi abra na en, wi pramisi en taki wi wani gi yesi na en èn taki wi wani du san a aksi  fu wi. Nowan sma dwengi wi fu du dati. Srefi yonguwan e teki dopu fu di densrefi teki a bosroiti fu gi den libi abra na Yehovah èn den no du dati fu plisi den papa nanga mama. Te wi leki Kresten e gi wisrefi abra na wi hemel Tata Yehovah, dan wi e du dati fu di wi lobi en. Na apostel Yohanes skrifi: „Te wi lobi Gado, dan wi o hori den komando fu en.”1 Yoh. 5:3.

WI FRI, MA TOKU WI NA SRAFU

4. San wan sma musu du fu tron wan „srafu fu retidu”?

4 Wi breiti taki Yehovah gi wi na okasi fu tron srafu fu en. Fu di wi e bribi na ini a frulusu-ofrandi fu Krestes, meki wi no de srafu fu sondu moro. Sobun, wi kan taki dati sondu no e basi wi dorodoro. Aladi wi na sondu sma ete, toku wi bosroiti fu gi yesi na Yehovah nanga Yesus èn fu dini den leki srafu. Paulus ben taki krin fu a tori disi na ini wan fu den brifi fu en. A ben skrifi: „Un musu si unsrefi leki dede sma te a abi fu du nanga sondu. Ma un musu si unsrefi leki sma di e libi gi Gado nanga yepi fu Krestes Yesus.” Baka dati a warskow den Kresten: „Unu sabi taki efu unu e gi yesi na wan sma ala ten, dan unu na srafu fu a sma. Sobun, efu unu na srafu fu sondu, unu o dede. Ma efu unu na srafu fu Gado èn unu e gi yesi na en, dan unu o de reti-ati sma. Ma mi e taki Gado tangi, bika unu ben de srafu fu sondu, ma now unu e gi yesi na Gado nanga un heri ati èn unu e du san a leri unu. Iya, now di unu kon fri fu sondu, unu tron srafu fu retidu” (Rom. 6:11, 16-18). Dyaso na apostel e taki dati wi musu ’gi yesi na Gado nanga wi heri ati’. Sobun, te wi gi wisrefi abra na Yehovah, dan wi e tron „srafu fu retidu”.

5. Nanga san wi musu feti èn fu san ede?

5 Leki srafu fu Gado di gi densrefi abra na en, wi musu feti tu sortu feti. Na a fosi presi wi musu feti nanga wi eigi sondu firi. Paulus ben musu feti a feti disi tu. A ben skrifi: „Na ini mi ati mi e prisiri trutru nanga a wèt fu Gado, ma mi e si taki wan tra wèt de na ini mi skin, èn a e feti nanga a wèt fu mi frustan. A wèt dati na a sondu di de na ini mi skin, èn a e basi mi” (Rom. 7:22, 23). Fu di wi na sondu sma, meki wi musu tan feti nanga a firi di wi abi fu du sani di Gado no feni bun. Na apostel Petrus gi wi a deki-ati: „Unu na sma di fri, ma no teki a fri fu unu fu kibri takrudu. Teki en fu dini Gado leki srafu.”1 Petr. 2:16.

6, 7. San Satan e du fu meki wi denki taki a grontapu fu en moi?

6 Na a di fu tu presi wi musu feti nanga a grontapu disi di de na ini a makti fu den ogri yeye. Satan di de a tiriman fu grontapu, e pruberi fu feti nanga wi so taki wi drai baka gi Yehovah nanga Yesus. A wani taki wi tron srafu fu en. Dati meki a e suku fu kori wi so taki wi tron wan pisi fu a grontapu fu en. (Leisi Efeisesma 6:11, 12.) Wan fasi fa a e du disi na taki a e meki a grontapu fu en gersi so moi taki wi o wani de wan pisi fu en. Na apostel Yohanes e warskow wi: „Efu wan sma lobi grontapu, dan a no lobi a Tata, bika ala den sani di de fu grontapu, sobun a lostu fu a skin, a lostu fu den ai èn a prodo di wan sma e prodo nanga den gudu di a abi, no e kon fu a Tata, ma den sani disi e kon fu grontapu.”1 Yoh. 2:15, 16.

7 Na heri grontapu, sma wani abi moro nanga moro sani. Satan wani taki sma musu prakseri taki moni e tyari koloku kon. Bigi wenkri de na ala sei. Den reklame di den e meki e gi sma deki-ati fu bai sani èn fu meki prisiri. Bedrijf e seti sani, so taki sma kan go nanga fakansi na kefalek moi presi èn nofo tron den e go na ini grupu. Ma den sma na ini den grupu disi e denki soleki fa grontapu e denki. Iya, na ala sei wi e kisi deki-ati fu libi leki fa grontapusma e libi.

8, 9. San kan pasa makriki nanga wan sma èn fu san ede?

8 Na ini a fosi yarihondro Petrus ben warskow Kresten gi sma na ini a gemeente di  ben bigin denki leki grontapu. A e taki: „A wan-enkri sani di den wani na fu kowru den lostu fu den, srefi na deiten. Na dati e gi den prisiri. Te den de na wan fesa makandra nanga unu, den de nomonomo fu kori trawan nanga den falsi leri fu den. Na so den de leki flaka èn leki takru marki gi unu. Bika den e taki wan lo kefalek sani, ma den sani dati no wani taki noti. Fu di den abi tranga lostu èn den e du ogri sondro fu syen, meki den e kori den sma di no so langa ete lowe komoto na mindri den wan di e du ogri. Den e pramisi den sma disi taki den o kon fri, ma densrefi na srafu fu sondu, bika iniwan sma di e meki wan trawan basi en, na wan srafu fu a sma dati.”2 Petr. 2:13, 18, 19.

9 Efu wan sma e pruberi fu kowru „a lostu fu den ai”, dati wani taki fu kisi ala san a wani, dan a no o de fri trutru. Na presi fu dati a o de wan srafu fu wan sma di wi no man si. Dati na Satan Didibri, a basi fu a grontapu disi (1 Yoh. 5:19). A makriki fu tron wan srafu fu gudu. Ma a no makriki fu komoto na ini a katibo dati.

WAN WROKO DI O MEKI WI DE KOLOKU

10, 11. (a) Suma Satan lobi fu kori na ini a ten disi? (b) Sortu problema yonguwan kan kisi efu den ben o teki hei skoroleri?

10 Na ini a ten disi Satan e du spesrutu muiti fu kisi den wan di no abi ondrofeni, neleki fa a ben du dati na ini a dyari fu Eden. Satan lobi fu kori yongusma. A no e firi bun te a e si taki yongusma, noso iniwan tra sma, de klariklari fu tron wan srafu fu Yehovah. A feanti fu Gado no wani taki sma di gi den libi abra na Yehovah du san den pramisi Gado noso taki den tai hori na En.

11 Kon meki wi go luku na eksempre fu a srafu baka di ben meki en basi boro en yesi. A no de fu taki dati a pen di a srafu ben firi ben de fu wan syatu pisi ten nomo, ma a prin ben libi wan marki di no ben o gowe noiti moro èn di ben o sori taki a wani tan dini en basi. Na so a de tu taki a no makriki gi wan yonguwan fu de tra fasi leki den speri fu en èn kande a e hati ensrefi. Satan wani taki sma denki taki den o de koloku efu den meki en na ini a grontapu disi. Ma soso te wi e si Yehovah leki a moro prenspari sma na ini wi libi, wi o de koloku trutru. Yesus ben taki: „Koloku fu den sma di sabi taki den abi Gado fanowdu” (Mat. 5:3). Kresten di gi densrefi abra na Yehovah e libi fu du a wani fu Yehovah, den no wani du a wani fu Satan. Den lobi a wèt fu Yehovah èn dei nanga neti den e denki dipi fu en. (Leisi Psalm 1:1-3.) Ma na ini a ten disi yu abi heiskoro di e teki furu ten fu den futuboi fu  Yehovah so taki den no abi ten moro fu denki dipi fu Gado Wortu èn fu dini en.

12. Sortu bosroiti furu yonguwan na ini a ten disi musu teki?

12 Wan grontapu basi kan meki taki a libi hebi gi wan Kresten srafu. Na ini a fosi brifi di Paulus ben skrifi gi den Korentesma, a aksi: „Yu ben de wan srafu di Gado kari yu?” Baka dati a taigi den: „No broko yu ede nanga dati. Ma efu yu kan kon fri, dan yu musu teki na okasi dati” (1 Kor. 7:21). Efu a srafu ben abi wan grontapu basi di ben e pina en, dan a ben o moro bun gi en fu kon fri. Na ini a ten disi furu kondre abi wèt di e taki dati pikin musu go na skoro teleki den doro wan spesrutu yari. Baka dati densrefi musu bosroiti san den o du. Hei skoroleri kan yepi wan sma fu meki en na ini a grontapu disi, ma disi kan meki taki a no de fri fu dini Yehovah na ini a furuten diniwroko.Leisi 1 Korentesma 7:23.

Sortu masra yu o dini leki srafu?

YU WANI HEI SKOROLERI NOSO A MORO BUN LERI DI DE?

13. Sortu leri na a moro bun leri gi den futuboi fu Yehovah?

13 Paulus ben warskow den Kresten na Kolose: „Sorgu taki nowan sma kisi unu nanga a koni fu grontapu èn nanga soso takitaki di e bedrigi sma. Den sani disi no abi noti fu du nanga den leri fu Krestes, ma nanga den gwenti fu libisma èn nanga den sani di e tiri grontapu” (Kol. 2:8). Furu leriman e leri trawan a koni fu grontapu èn den soso sani di den e taki fu bedrigi sma. Te sma e kisi hei skoroleri, dan den e leri den sani disi tu. Ma nofo tron den studenti no e leri wan wroko èn den no e leri san den musu du te problema miti den na ini na aladei libi. Ma tru Kresten e teki skoroleri di o yepi den fu du wan spesrutu sani so taki den kan abi den moro prenspari sani fu man dini Gado. Den e du a sani disi di Paulus ben taigi Timoteyus: „A tru taki wan sma e kisi furu wini te a e dini Gado fayafaya, ma dati o pasa soso te a breiti nanga san a abi. Sobun, efu wi abi nyanyan, krosi nanga wan presi fu tan, dan wi musu breiti nanga den sani disi” (1 Tim. 6:6, 8). Na presi taki tru Kresten e meki muiti fu kisi biginen na ini grontapu, den e poti ala den prakseri na a preikiwroko so taki den kan yepi sma fu tron disipel fu Krestes.Leisi 2 Korentesma 3:1-3.

14. Soleki fa Filipisma 3:8 e sori, dan fa Paulus ben e si a grani di a ben abi fu dini Gado nanga Krestes leki srafu?

14 Luku a tori fu na apostel Paulus. A ben kisi leri fu Gamaliyel, wan bigi leriman fu a ten dati di ben leri en den Wèt fu den  Dyu. Yu kan agersi a leri di Paulus ben kisi, nanga a leri di sma e kisi na universiteit na ini a ten disi. Ma fa Paulus ben e si a hei skoroleri disi te a ben e teki en gersi nanga a grani di a ben abi fu dini Gado nanga Krestes leki srafu? A skrifi: „Mi e si ala sani leki soso sani trutru, fu di den sani di mi kon sabi fu Krestes Yesus, mi Masra, warti moro ala sani.” Baka dati a taki: „Fu en ede mi drai baka gi ala den sani dati. Mi kon si den leki wan ipi doti, so taki Krestes kan feni mi bun” (Fil. 3:8). A fasi fa Paulus e denki fu a tori e yepi yongu Kresten nanga den papa nanga mama fu teki koni bosroiti te den musu luku sortu leri den o teki. (Luku den prenki.)

KISI WINI FU A MORO BUN LERI DI DE

15, 16. Sortu leri na organisâsi fu Yehovah e gi wi èn fu san ede wi e kisi a leri dati?

15 Fa sani de na den presi pe sma e kisi hei skoroleri? Furu tron a makriki gi den sma drape fu opo densrefi te den no e agri nanga tiriman noso nanga tra sma di e teki fesi na ini a libimakandra (Ef. 2:2). Ma na ini na organisâsi fu Yehovah sani de heri tra fasi fu di nowan dyugudyugu no de na ini a Kresten gemeente pe wi e kisi a moro bun leri di de. Ibriwan fu wi abi na okasi fu kisi wini fu a Theokrasia Diniwroko-skoro di e hori ala wiki. Boiti dati, yu abi a Bijbelskoro gi brada di no trow, di de spesrutu gi pionier brada èn yu abi a Bijbelskoro gi Kresten trowpaar, di de spesrutu gi trowpaar di e pionier. Ala den skoro disi e yepi wi fu gi yesi na Yehovah di de wi Masra na hemel.

16 Na Index van Wachttoren-publicaties, a Watchtower Library na tapu CD-ROM nanga a Waktitoren Library tapu Internet kan yepi wi fu ondrosuku furu sani di skrifi na ini Bijbel èn di warti trutru gi wi. Ala a muiti di wi e du fu teki leri fu Bijbel, na fu di wi wani anbegi Yehovah moro bun. A leri disi e sori wi fa wi kan yepi trawan fu kon bun baka nanga Gado (2 Kor. 5:20). Na a fasi disi den sma dati kan gi trawan leri tu.2 Tim. 2:2.

A PAI DI WAN SRAFU E KISI

17. Sortu blesi wi e kisi te wi e bosroiti fu teki a moro bun leri di de?

17 Na ini na agersitori di Yesus ben fruteri fu den talenti, wi e si taki a masra prèise den tu srafu gi a bun wroko di den du èn taki a gi den moro wroko fu di a ben e prisiri nanga den. Na so den srefi ben kon abi prisiri tu. (Leisi Mateyus 25:21, 23.) Wi kan kisi furu prisiri nanga blesi te wi bosroiti fu teki a moro bun leri di de. Luku na eksempre fu Michael. A ben e wroko so bun na skoro taki den leriman fu en kari en kon fu aksi en efu a no wani go na universiteit. Den fruwondru di Michael taigi den taki a no ben o du dati. A taigi den taki a ben o go na lès fu wan syatu pisi ten fu leri wan wroko di ben o yepi en fu sorgu ensrefi leki gewoon pionier. A ben abi a firi taki a misi wan sani? „Den sani di mi leri leki pionier na ini Yehovah organisâsi èn now leki owruman bun trutru”, na so a e taki. „Den blesi nanga den grani di mi kisi bun omeni tron moro a moni di mi ben kan wroko. Mi breiti srefisrefi taki mi bosroiti fu no teki hei skoroleri.”

18. San meki yu bosroiti fu teki a moro bun leri di de?

18 A moro bun leri di de e sori wi san na a wani fu Yehovah èn a e yepi wi fu dini en leki srafu. Disi e gi wi a howpu fu „kon fri fu wan skin di e dede” èn te fu kaba fu „kon fri na wan tumusi moi fasi leki pikin fu Gado” (Rom. 8:21). Boiti dati, wi e leri san na a moro bun fasi fa wi kan sori taki wi lobi Yehovah, wi Masra na hemel, trutru.Eks. 21:5.