Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  september 2013

A pionierwroko e meki wi kisi wan moro bun matifasi nanga Gado

A pionierwroko e meki wi kisi wan moro bun matifasi nanga Gado

„A bun fu singi prèisesingi gi wi Gado.”PS. 147:1.

1, 2. (a) San kan pasa te wi e prakseri fu wan sma di wi lobi èn te wi e taki fu en? (Luku a prenki na a bigin fu na artikel.) (b) Sortu aksi wi o go luku now?

TE WI e prakseri fu wan sma di wi lobi èn te wi e taki fu en, dan dati kan meki wi tron wan moro bun mati fu a sma dati. Na so a de tu nanga a matifasi di wi abi nanga Yehovah Gado. Di David ben de wan skapuman, a ben lobi luku den stari na hemel te neti èn a ben e denki dipi fu a Bigi Mekiman fu den stari disi. A ben skrifi: „Te mi e luku yu hemel, den sani di yu meki, a mun nanga den stari di yu meki, dan mi e aksi misrefi: ’San na wan libisma taki yu e prakseri en? San na a pikin fu wan libisma taki yu e sorgu en?’” (Ps. 8:3, 4) Di na apostel Paulus skrifi fu a moi fasi fa Yehovah ben du san a pramisi den salfu Kresten, a taki: „Ai, den blesi, a koni nanga a sabi fu Gado, furu trutru!”Rom. 11:17-26, 33.

2 Te wi e go na ini a preikiwroko, dan wi e prakseri fu Yehovah èn wi e taki fu en. Dati e meki wi kisi wan moro bun matifasi nanga en. Furu sma di man go na ini a pionierwroko kon si taki wan fu den blesi di den kisi na taki den kon lobi Gado moro fu di den e du moro na ini a diniwroko. Awansi yu de wan pionier now, noso yu e du muiti fu tron wan, toku a bun fu poti prakseri na a aksi disi: Fa a pionierwroko kan meki yu kisi wan moro bun matifasi nanga Yehovah? Efu yu e pionier kaba, dan aksi yusrefi: ’San o yepi mi fu tan du a spesrutu wroko disi?’ Efu yu no e pionier ete, dan aksi yusrefi: ’Sortu sani mi kan kenki na ini mi libi fu bigin pionier?’ Meki wi go luku na sortu fasi a pionierwroko kan meki wi kisi wan moro bun matifasi nanga Gado.

 FA A PIONIERWROKO KAN MEKI WI KISI WAN MORO BUN MATIFASI NANGA GADO

3. Te wi e taki nanga trawan fu den blesi di a Kownukondre o tyari kon, dan fa dati e yepi wi?

3 Wi e kon moro krosibei na Yehovah te wi e taki nanga trawan fu den blesi di a Kownukondre o tyari kon. Sortu Bijbeltekst yu lobi gebroiki te yu e preiki oso fu oso? Kande yu lobi leisi Psalm 37:10, 11; Danièl 2:44; Yohanes 5:28, 29; noso Openbaring 21:3, 4. Ibri tron te wi e taki nanga trawan fu den pramisi disi, dan dati e memre wi taki „ibri bun presenti nanga ibri kado di bun dorodoro” e kon fu wi Gado Yehovah di lobi fu gi sma sani. Disi e meki taki wi e kon moro krosibei na en.Yak. 1:17.

4. Fu san ede wi e kisi moro warderi gi a bun-ati fu Gado te wi e preiki gi trawan?

4 Te wi e si taki furu sma no de koloku èn taki den no man yepi densrefi, dan wi o abi moro warderi gi a tru anbegi. Grontapusma no e kisi a yepi di den abi fanowdu fu meki taki den libi waka bun èn taki den de koloku. Furu fu den e broko den ede nanga san o pasa na ini a ten di e kon èn den no abi howpu. Den e suku fu kon sabi fu san ede wi de na libi. Srefi sma di de na ini wan kerki, no sabi furu fu Bijbel. Den de leki den sma fu na owruten foto Ninefei. (Leisi Yona 4:11.) O moro wi e gebroiki wi ten fu taki nanga sma na ini a preikiwroko, o moro wi e kon frustan taki Yehovah e sorgu bun gi wi (Yes. 65:13). Ma Yehovah e du moro leki fu sorgu wawan gi den sani di en pipel abi fanowdu. A e gi ala sma na okasi fu kisi trowstu èn fu abi wan trutru howpu. Disi e memre wi taki Yehovah na wan bun Gado trutru.Openb. 22:17.

5. Te wi e leri trawan den tru tori fu Bijbel, dan fa wi o si wi eigi problema?

5 Te wi e leri trawan den tru tori fu Bijbel, dan wi e leri fu no broko wi ede tumusi nanga wi eigi problema. Trisha, wan gewoon pionier sisa, kon si taki disi de so trutru di en papa nanga mama broko trow. A e fruteri: „A ben de wan fu den moro hati sani di pasa na ini mi libi.” Wan dei di a ben e sari trutru, a ben wani tan na oso. Ma toku a go studeri Bijbel nanga dri pikin di ben abi moro bigi problema. A papa fu den ben gowe libi den èn a bigi brada fu den ben du ogri nanga den. Trisha e taki: „Aladi mi ben abi problema èn mi ben e sari, toku dati ben gersi noti te yu luku san ben miti den pikin disi. Di wi ben e studeri, yu ben kan si na den taki den ben lobi a studie èn den ben lafu fu di den ben e prisiri. Den pikin dati ben de wan kado fu Yehovah trutru, spesrutu na a dei dati.”

6, 7. (a) Te wi e leri trawan den tru tori fu Bijbel, dan fa dati e meki wi bribi kon moro tranga? (b) Te wi e si fa den Bijbelstudie fu wi e gebroiki Bijbel gronprakseri fu meki sani go moro bun na ini den libi, dan fa dati e yepi wi fu kisi moro warderi gi a koni fu Gado?

6 Wi bribi e kon moro tranga te wi e leri trawan den tru tori fu Bijbel. Na apostel Paulus ben skrifi wan tu Dyu na ini a ten fu en, taki den no ben du den sani di den ben e leri trawan. A ben skrifi: „Yu e gi trawan leri, ma yu no e leri yusrefi?” (Rom. 2:21) A de heri tra fasi nanga pionier na ini a ten disi. Furu leisi den abi na okasi fu leri trawan den tru tori fu Bijbel èn fu hori Bijbelstudie. Fu man du dati bun den musu sreka densrefi gi ibri Bijbelstudie èn kande den musu go ondrosuku sani moro fini fu man gi piki na tapu aksi. Wan pionier sisa di nen Janeen, e taki: „Ibri leisi te mi abi na okasi fu leri trawan den tru tori fu Bijbel, mi e firi taki den tru tori disi abi moro krakti na mi tapu. Disi e meki mi bribi kon moro tranga.”

7 Te wi e si fa den Bijbelstudie fu wi e gebroiki Bijbel gronprakseri fu meki sani go moro bun na ini den libi, dan wi e kisi moro warderi gi a koni fu Gado (Yes. 48:17, 18). Disi e yepi wi fu tan gebroiki Bijbel gronprakseri moro bun na ini wi eigi libi. Adrianna, wan tra pionier sisa, e taki: „Sma  libi kan bruya srefisrefi te den e frutrow na tapu den eigi koni. Ma te den e bigin frutrow na tapu a koni fu Yehovah, dan wantewante den e bigin si den wini fu dati.” Na dati Phil kon si tu. A e taki: „Yu e si fa Yehovah man kenki sma di no ben man yepi densrefi fu kenki den eigi libi.”

8. Te wi e wroko nanga wi brada nanga sisa na ini a preikiwroko, dan fa dati e yepi wi?

8 Wi e kisi deki-ati te wi e wroko nanga wi brada nanga sisa na ini a preikiwroko (Odo 13:20). Pionier e wroko furu nanga den brada nanga sisa fu den te den de na ini a preikiwroko. Na so den e kisi moro okasi fu „gi makandra deki-ati”. (Rom. 1:12; leisi Odo 27:17.) Wan pionier di nen Lisa, e taki: „Na wrokope sma lobi fu strei nanga makandra èn den e dyarusu na tapu makandra. Ibri dei yu de nanga sma di e taki sma tori èn di e taki dotitaki. Den wani kisi wini gi densrefi awansi san den musu du. Son leisi sma e spotu yu noso den e lafu yu fu di yu e tyari yusrefi leki wan Kresten. Ma mi e kisi furu deki-ati te mi e wroko makandra nanga tra brada nanga sisa na ini a preikiwroko. Te mi doro oso te neti, mi e firi bun awansi fa mi weri.”

9. Te masra nanga wefi e pionier nanga makandra, dan fa dati e yepi den na ini a trowlibi?

9 Te yu e pionier nanga yu trowpatna, dan dati e meki yu trowlibi kon moro tranga èn a e kon de leki dri titei di frekti kon na wán (Preik. 4:12). Madeline, di e pionier nanga en masra, e taki: „Mi nanga mi masra man taki nanga makandra fa wi dei waka na ini a preikiwroko noso fu wan moi sani di wi si di wi leisi Bijbel èn di bun fu gebroiki na ini a preikiwroko. O moro wi e wroko makandra leki pionier, o moro wi e kon lobi makandra.” Trisha e taki wan srefi sortu sani: „Wi e luku bun taki wi no kon na ini paiman èn fu dati ede wi no e meki trobi  nanga makandra fu moni ede. Wi e go na ini a preikiwroko na den srefi yuru. Disi e gi wi na okasi fu go nanga makandra na den Bijbelstudie nanga den gobaka fu wi. Disi e meki wi kisi moro lobi gi makandra èn gi Yehovah.”

Wi o de koloku te wi e pionier (Luku paragraaf 9)

10. Te wi e poti Kownukondre afersi na a fosi presi na ini wi libi èn wi e si fa Yehovah e yepi wi, dan fa dati kan yepi wi fu frutrow na en tapu?

10 Wi e leri fu frutrow moro na tapu Yehovah te wi e poti Kownukondre afersi na a fosi presi na ini wi libi, te wi e si fa Yehovah e yepi wi èn te wi e si fa a e piki den begi fu wi. A tru taki disi de so nanga ala reti-ati Kresten. Ma pionier kon si taki te den e frutrow na tapu Yehovah, dati e yepi den fu tan dini leki pionier. (Leisi Mateyus 6:30-34.) Curt na wan brada di e pionier èn di e teki presi gi wan kring-opziener te a no de. Di den aksi en fu go fisiti wan gemeente di de fara, a agri fu du dati. A ben musu rèi tu nanga afu yuru fu doro a gemeente dati. En nanga en wefi, di e pionier tu, ben abi nofo oli na ini den wagi fu go na a gemeente, ma a no ben sari fu drai kon baka. Boiti dati, na a tra wiki fosi en basi ben o pai en. Curt e taki: „Mi ben aksi misrefi efu mi teki a yoisti bosroiti fu go na a gemeente dati.” Baka di den begi fu a tori, den bosroiti fu go drape èn den ben abi a frutrow taki Gado ben o sorgu gi ala san den abi fanowdu. Di den ben de fu gowe, wan sisa bel den fu taigi den taki a abi wan sani gi den. Na soifri a moni di den ben abi fanowdu fu pai na oli. Curt taki: „Te yu e ondrofeni den sortu sani disi ibri tron baka, dan yu e si wantewante taki na Yehovah e yepi yu.”

11. San na wan tu blesi di pionier e kisi?

11 Furu leisi a pasa taki pionier di e du moro na ini a diniwroko fu Yehovah èn di e meki muiti fu kon abi wan moro bun matifasi nanga en, e kisi furu blesi (Deut. 28:2). Ma toku a no makriki ala ten fu pionier. Ala den futuboi fu Gado e kisi problema fu di wi na sondu sma èn wi e libi na ini wan ogri grontapu. Son leisi pionier e tapu fu wan pisi ten nanga a pionierwroko fu di den abi problema. Ma nofo tron a de so taki wan lusu de gi den problema disi noso taki den kan wai pasi gi den sani dati srefi. San kan yepi pionier fu tan du a spesrutu wroko disi?

TAN DU A PIONIERWROKO

12, 13. (a) San wan pionier musu du efu a no man doro en yuru? (b) Fu san ede a prenspari fu meki ten fu leisi Bijbel ibri dei, fu studeri èn fu denki dipi fu sani?

12 Furu pionier abi furu fu du. Son leisi a muilek fu du ala san yu musu du èn dati meki a prenspari fu orga sani bun (1 Kor. 14:33, 40). Efu wan pionier no man doro en yuru, dan kande a musu go luku baka fa a e gebroiki en ten (Ef. 5:15, 16). A kan aksi ensrefi: ’Mi e gebroiki tumusi furu ten fu du prisiri sani? Mi kan wroko na tra yuru so taki mi abi moro ten gi a preikiwroko? Mi e gebroiki tumusi furu ten fu du sani di no prenspari?’ Ala Kresten o agri taki a makriki fu go du omeni sani di kan nyan yu ten. Ma a bun te pionier e go luku den schema ibri leisi baka èn tyari kenki kon efu dati de fanowdu.

13 Wan pionier musu meki ten fu leisi Bijbel ibri dei, fu studeri èn fu denki dipi fu den sani di a leisi. Fu dati ede wan pionier musu luku bun taki pikinpikin sani no e nyan en ten so taki a no abi ten gi den moro prenspari sani (Fil. 1:10). Fu eksempre, kon meki wi taki dati wan pionier e kon na oso, baka di a wroko heri dei na ini a preikiwroko. A abi na prakseri fu sreka ensrefi a neti dati gi a konmakandra. Ma fosi a e bigin nanga dati, a e leti en computer fu leisi èn fu piki den e-mail di a kisi. Fu di a de tapu Internet kaba, meki a e go na wan website fu si efu a prijs fu wan sani di a wani bai saka. Fosi a kisi ensrefi, tu yuru pasa èn a no bigin studeri ete san a ben wani studeri a neti dati. Fu san ede dati na wan problema?  We, efu wan sportman wani tan du sport, a musu sorgu en skin bun. Na so a de tu taki efu wan pionier wani tan du a pionierwroko, a musu abi a gwenti fu studeri.1 Tim. 4:16.

14, 15. (a) Fu san ede pionier musu sorgu taki den abi soso den sani di de fanowdu na ini a libi? (b) Efu wan pionier de na ini wan muilek situwâsi, dan san a musu du?

14 Pionier di wani tan du a pionierwroko musu sorgu taki den abi soso den sani di de fanowdu trutru na ini a libi. Yesus ben gi den disipel fu en deki-ati fu hori den ai krin (Mat. 6:22). A no ben abi tumusi furu sani na ini en libi èn dati meki a ben man du en diniwroko sondro fu wan sani puru en prakseri. A ben taki: „Krabudagu abi olo pe den e tan èn den fowru di e frei na loktu abi nesi, ma a Manpikin fu libisma no abi nowan presi fu sribi” (Mat. 8:20). Pionier di e teki na eksempre fu Yesus, e hori na prakseri taki o moro gudu den abi, o moro ten den o abi fanowdu fu sorgu gi den sani dati, fu meki den te den broko, noso fu bai nyunwan te den no wani den moro.

15 Pionier e frustan taki den e du wan spesrutu wroko, ma den no feni taki den bun moro trawan. Na presi fu dati, ala grani di wi e kisi na fu a bun-ati fu Gado ede. Sobun, fu man tan dini leki pionier, ibriwan fu den musu frutrow na tapu Yehovah (Fil. 4:13). Problema nanga muilek situwâsi o opo kon (Ps. 34:19). Te dati pasa, dan pionier musu suku a tiri fu Yehovah èn den musu gi en na okasi fu yepi den, na presi fu de gaw fu tapu nanga a spesrutu wroko di den e du. (Leisi Psalm 37:5.) Te den e si fa Gado e sorgu gi den na wan lobi-ati fasi, dan den o kon moro krosibei na den hemel Tata.Yes. 41:10.

YU KAN TRON WAN PIONIER TU?

16. Efu yu wani tron wan pionier, dan san yu musu du?

16 Efu yu wani kisi den blesi di den pionier e kisi, dan begi Yehovah fu a tori disi (1 Yoh. 5:14, 15). Taki nanga sma di e pionier kaba. Luku sortu sani yu musu du fu man tron wan pionier. Na dati Keith nanga Erika du. A trowpaar disi ben e wroko ibri dei na ini a wiki èn syatu baka di den trow den bai wan oso nanga wan nyun wagi. Den taki: „Wi ben denki taki den sani dati ben o meki wi firi koloku, ma dati no ben de so.” Di Keith lasi en wroko, a tron wan yepipionier. A e fruteri: „Di mi bigin pionier mi si o furu prisiri a preikiwroko kan gi wan sma.” En nanga en wefi tron mati fu wan tra trowpaar di ben e pionier tu. A trowpaar disi ben yepi den fu si taki a e gi furu prisiri te yu e pionier èn te yu abi soso den sani di de fanowdu na ini a libi. San Keith nanga Erika du? „Wi meki wan lijst fu sani di wi ben wani du na ini a diniwroko èn wi fasi en na a ijskasi fu wi. Ibri leisi te wi ben du wan fu den sani dati, wi ben poti wan marki drape.” Baka wan pisi ten Keith nanga Erika ben man pionier.

17. Fu san ede a de wan koni sani fu go luku san yu kan kenki na ini yu libi fu man pionier?

17 Yu kan tron wan pionier tu? Efu yu denki taki yu no man pionier now, dan du muiti fu kon moro krosibei na Yehovah fu di yu e du ala san yu man na ini a preikiwroko. Efu yu e begi Yehovah fu a tori èn yu e go luku yu situwâsi baka, dan kande yu o si taki yu kan kenki wan tu sani na ini yu libi so taki yu kan pionier. Efu yu man pionier, dan dati o gi yu moro prisiri, aladi yu tyari bigi kenki kon na ini yu libi. Yu o de moro koloku fu di yu e poti Kownukondre afersi na a fosi presi na ini yu libi (Mat. 6:33). Yu o de koloku tu fu di yu e gi yu ten nanga yu krakti fu yepi tra sma. Boiti dati, yu o abi moro okasi fu prakseri fu Yehovah èn fu taki fu en. Disi o meki yu kisi moro lobi gi en èn yu o prisiri en ati.