Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  augustus 2013

Sortu sma yu musu de?

Sortu sma yu musu de?

„Un musu luku sortu sma un musu de. Tyari unsrefi na wan santa fasi èn du sani di e sori taki unu e dini Gado fayafaya.”2 PETR. 3:11.

1, 2. San wi musu du efu wi wani taki Gado feni wi bun?

FURU sma e broko den ede nanga san trawan e denki fu den. Ma leki Kresten wi musu broko wi ede moro nanga san Yehovah e denki fu wi. En na a moro prenspari sma fu hemel nanga grontapu, èn en „na a sma di e gi libi”.Ps. 36:9.

2 Na apostel Petrus ben sori san wi musu du efu wi wani taki Yehovah feni wi bun. A taki: „Tyari unsrefi na wan santa fasi èn du sani di e sori taki unu e dini Gado fayafaya.” (Leisi 2 Petrus 3:11.) A wan-enkri fasi fa wi kan ’tyari wisrefi na wan santa fasi’, na te wi e libi wan krin libi. Disi wani taki dati a fasi fa wi e denki, den sani di wi e du, èn a fasi fa wi e anbegi Gado musu kruderi nanga a wani fu en. Boiti dati, wi musu „dini Gado fayafaya” fu di wi lobi en èn fu di wi abi bigi lespeki gi en. Sobun, Gado no e luku wawan san wi e du, ma a e luku tu fu san ede wi e du den sani dati. Yehovah „e ondrosuku sma ati”. Dati meki a sabi efu wi e tyari wisrefi na wan santa fasi èn efu wi e anbegi en wawan.1 Kron. 29:17.

3. San wi musu aksi wisrefi efu wi wani tan mati fu Yehovah?

3 Satan Didibri no wani taki Gado feni wi bun. Fu taki en leti, a e du ala san a man fu pori wi matifasi nanga Yehovah. Doronomo Satan e gebroiki lei fu kori wi, so taki wi tapu fu anbegi Yehovah (Yoh. 8:44; 2 Kor. 11:13-15). Fu dati ede a bun fu aksi wisrefi: ’Fa Satan e kori sma? San mi kan du fu tan wan mati fu Yehovah?’

FA SATAN E KORI SMA?

4. San Satan wani du fu pori wi matifasi nanga Gado èn fu san ede?

4 A disipel Yakobus ben skrifi: „Ibri sma e kisi tesi fu di en eigi lostu e hari en èn e kori en. Te a kweki  a lostu, a e tyari sondu kon te fu kaba. Te a sondu du kaba, dan dati e tyari dede kon” (Yak. 1:14, 15). Satan sabi taki efu a abi krakti na tapu wi ati noso den firi fu wi, a man pori wi matifasi nanga Gado.

5, 6. (a) San Satan e du fu abi krakti na tapu wi ati? (b) San Satan e gebroiki fu meki wi kweki takru lostu na ini wi ati? (c) Fu san ede wi kan taki dati Satan sabi fa fu kori sma nanga den sani disi?

5 San Satan e du fu abi krakti na tapu wi ati? Bijbel e taki: „Heri grontapu de na ini a makti fu na ogriwan” (1 Yoh. 5:19). Satan e gebroiki „den sani fu grontapu” fu kori wi. (Leisi 1 Yohanes 2:15, 16.) Na ini den dusundusun yari di pasa, Didibri seti bun furu sani na ini a grontapu disi fu kori sma. Fu di wi e libi na ini a grontapu disi, meki wi musu luku bun nanga den triki fu en.Yoh. 17:15.

6 Satan e du son sani fu meki wi kweki takru lostu na ini wi ati. Na apostel Yohanes taki fu dri sani di Satan e gebroiki fu kori wi: (1) „A lostu fu a skin”, (2) „a lostu fu den ai”, nanga (3) „a prodo di wan sma e prodo nanga den gudu di a abi”. Satan gebroiki den sani disi fu tesi Yesus na ini a sabana. Fu di Satan gebroiki den triki disi someni yari kaba, meki a sabi heri bun fa a kan kori sma nanga den sani disi. A sabi tu sortuwan a musu gebroiki fu kori iniwan sma. Meki wi luku fosi fa Didibri ben man kori Eva èn fu san ede a no ben man kori a Manpikin fu Gado. Baka dati wi o luku san wi kan du fu no meki a kori wi.

„A LOSTU FU A SKIN”

Eva sondu fu di a poti prakseri na den „lostu fu a skin” (Luku paragraaf 7)

7. Fa Satan gebroiki „a lostu fu a skin” fu kori Eva?

7 Ala libisma musu nyan fu kan tan na libi. A Mekiman meki grontapu na so wan fasi taki a man gi furu nyanyan. Satan kan gebroiki a lostu gi nyanyan fu meki wi du sani di Gado no feni bun. Meki wi luku fa a du disi nanga Eva. (Leisi Genesis 3:1-6.) Satan taigi Eva taki a no ben o dede efu a ben o nyan fu a „bon di nen ’Sabi san bun èn san ogri’”. A taigi Eva taki a ben o kon de leki Gado efu a nyan a froktu (Gen. 2:9). Na so Didibri ben wani sori Eva taki a no abi fu gi yesi na Gado fu kan tan na libi. Dati ben de wan bigi lei! Eva ben kan du tu sani nanga a denki di Didibri ben poti na ini en ede: A ben kan kakafutu gi a denki disi, noso a ben kan tan prakseri en teleki a lostu fu nyan a froktu kon moro tranga. Aladi Eva ben kan nyan fu ala den tra bon na ini a dyari, toku a tan prakseri a sani di Satan taigi en fu a bon di ben de na mindrisei fu a dyari. Na so Satan meki taki Eva bigin lostu wan sani di a Mekiman fu en taigi en fu no nyan. „Ne a piki wan froktu fu a bon, dan a nyan fu en.”

A matifasi di Yesus ben abi nanga Gado ben de a moro prenspari sani gi en (Luku paragraaf 8)

8. (a) Fa Satan ben wani gebroiki „a lostu fu a skin” fu kori Yesus? (b) Fu san ede Satan no ben man kori Yesus?

 8 Satan pruberi fu kori Yesus nanga a srefi triki disi. Di Yesus ben de na ini a sabana, a no ben nyan 40 dei nanga 40 neti. Sobun, angri ben musu fu kiri en. Dati meki Satan ben wani kori en nanga a lostu gi nyanyan. A taki: „Efu yu na wan manpikin fu Gado, dan taigi a ston disi fu tron brede” (Luk. 4:1-3). Yesus ben kan du tu sani: A ben kan du wan wondru fu meki den ston tron brede èn nyan den, noso a ben kan bosroiti fu no du dati. Yesus ben sabi taki a no ben musu gebroiki en krakti fu plisi ensrefi. Aladi angri ben e kiri en, toku a matifasi di a abi nanga Gado ben de moro prenspari gi en leki nyanyan. Dati meki Yesus piki Satan: „Gado Buku taki: ’Sma no musu libi fu brede wawan, ma fu ibri wortu di Yehovah mofo taki.’”Mat. 4:4.

„A LOSTU FU DEN AI”

9. (a) San den wortu „a lostu fu den ai” e sori? (b) Fa Satan gebroiki a lostu disi fu kori Eva?

9 Yohanes ben taki dati „a lostu fu den ai” na ete wan sani di Satan e gebroiki fu kori sma. Disi e sori taki na luku wan sma musu luku wan sani nomo, fu kweki lostu gi en. Satan kori Eva nanga a lostu disi. A taigi en: „Un ai o opo.” O moro Eva ben e luku a froktu, o moro a ben lostu en. Ne Eva kon si taki a bon „ben moi fu si”.

10. (a) Fa Satan ben wani gebroiki „a lostu fu den ai” fu kori Yesus? (b) San Yesus piki Satan?

10 Fa Satan pruberi fu kori Yesus nanga „a lostu fu den ai”? „Na ini wan syatu pisi ten [Didibri] sori Yesus ala den kownukondre fu heri grontapu. Dan Didibri taigi en: ’Mi o gi yu ala a makti nanga a glori fu den kownukondre disi’” (Luk. 4:5, 6). A no de fu taki dati Yesus no ben o man si ala den kownukondre fu heri grontapu wantronso. Ma Satan meki a si den na ini wan fisyun. A musu de so taki Satan ben e denki taki a ben o man kori Yesus nanga a moi fu den kownukondre disi. Sondro fu syen, a taigi Yesus: „Efu yu anbegi mi wán leisi nomo, dan ala den sani disi sa de fu yu” (Luk. 4:7). Yesus no ben wani arki Satan kwetikweti. Wantewante a piki Satan: „Gado Buku taki: ’Na Yehovah yu Gado, yu musu anbegi èn na en wawan yu musu dini.’”Luk. 4:8.

„A PRODO DI WAN SMA E PRODO NANGA DEN GUDU DI A ABI”

11. Fa Satan kori Eva?

11 Yohanes ben taki tu fu „a prodo di wan sma e prodo nanga den gudu di a abi”. Wi kan frustan taki di Adam nanga  Eva ben de den wan-enkri libisma na grontapu, den no ben e meki bigi nanga den gudu fu den, fu di tra sma no ben de. Ma toku den kisi heimemre. Satan meki Eva bribi taki a ben abi a reti fu kisi wan kefalek moi sani, ma Gado no ben wani gi en dati. Didibri taigi en taki efu a ben o nyan fu „a bon di nen ’Sabi san bun èn san ogri’”, a ben „o de leki Gado”. A „ben o sabi san bun èn san ogri” (Gen. 2:17; 3:5). Satan ben wani meki Eva bribi taki a no abi Yehovah fanowdu. A kan tu taki heimemre meki taki Eva bribi a lei disi. A nyan fu a bon nanga a denki taki a no ben o dede. Dati ben de wan bigi fowtu!

12. (a) San na wan fasi fa Satan ben wani kori Yesus? (b) San Yesus pikin en?

12 Tra fasi leki Eva, Yesus ben abi sakafasi èn dati na wan moi eksempre gi wi. Satan ben wani taki Yesus ben musu du wan sani fu sori o kefalek a de. Ma Yesus no du dati kwetikweti fu di disi ben o sori taki a abi heimemre èn taki a ben e tesi Gado. A piki Satan krin: „Gado Buku taki: ’Yu no musu tesi Yehovah yu Gado.’”Leisi Lukas 4:9-12.

SAN WI MUSU DU FU TAN WAN MATI FU YEHOVAH?

13, 14. Fa Satan e pruberi fu kori wi na ini a ten disi?

13 Na ini a ten disi Satan e kori sma nanga den srefi triki di a gebroiki fu tesi Eva nanga Yesus. A e gebroiki „a lostu fu a skin” fu kori sma fu meki den du sani di no fiti, èn fu meki den nyan èn dringi tumusi furu. A e gebroiki „a lostu fu den ai” fu meki sma luku porno noso fisti seks tori, spesrutu tapu Internet. Boiti dati, a e gebroiki a lostu di sma abi fu ’prodo nanga den gudu di den abi’. Na so a e meki sma kisi heimemre èn a e meki den du ala sani fu kisi makti, biginen nanga gudu.

Sortu Bijbeltekst musu kon na yu prakseri te yu de na ini den situwâsi disi? (Luku paragraaf 13, 14)

14 Satan e gebroiki „den sani fu grontapu” leki beti di wan fisiman e gebroiki fu hari fisi kon. A beti e hari den fisi, ma na inisei fu a beti wan aka de. Na so Satan e du tu nanga libisma. Satan e gebroiki aladei sani fu kori sma fu meki den trangayesi den wèt fu Gado. A e meki den bribi taki son sani no fowtu, noso a e meki den bribi taki den abi son sani fanowdu. Nanga den sani disi, Satan wani meki wi kisi takru lostu èn a wani pori wi ati. A  wani meki wi bribi taki wi eigi afersi èn wan switi libi prenspari moro leki a wani fu Gado. Yu o meki Satan kori yu nanga den sani disi?

15. Fa wi kan kakafutu gi Satan neleki fa Yesus ben du dati?

15 Eva meki Satan kori en, ma Yesus kakafutu gi en. Ibri leisi te Satan ben tesi en, Yesus gebroiki Gado Wortu fu piki en. A ben e taki: „Gado Buku taki.” Efu wi e studeri Bijbel bun, dan wi o sabi en bun tu èn wi o man memre Bijbeltekst di kan yepi wi fu si sani krin te wi e kisi tesi (Ps. 1:1, 2). Te wi e prakseri den eksempre fu sma na ini Bijbel di tan gi yesi na Gado, dan dati sa yepi wi fu tan gi yesi na Gado tu (Rom. 15:4). Te wi abi bigi lespeki gi Yehovah, sobun te wi lobi san a lobi èn te wi no lobi san a no lobi, dan Satan no o man kori wi.Ps. 97:10.

16, 17. Fa wi „frustan” kan abi krakti na wi tapu?

16 Na apostel Paulus gi wi deki-ati fu gebroiki wi „frustan” so taki wi no tron sma di abi a denki fu grontapu. Na presi fu dati wi musu tron sma di e denki soleki fa Yehovah e denki (Rom. 12:1, 2). Paulus memre wi taki wi musu luku bun san wi e prakseri. A taki: „Den sani di wi e broko na den fowtu denki fu sma èn ala sortu kefalek denki fu sma di de teige a sabi fu Gado. Wi e wini ala den denki disi. Dan den de leki katiboman èn wi e meki den gi yesi na Krestes” (2 Kor. 10:5). Den prakseri fu wi kan abi furu krakti na wi tapu èn dati meki ala ten wi musu „tan prakseri” sani di e plisi Gado.Fil. 4:8.

17 Efu wi wani de santa sma, dan wi no kan sidon prakseri sani di no fiti èn wi no kan kweki takru lostu. Wi musu lobi Yehovah nanga „wan krin ati” (1 Tim. 1:5). Ma wi ati kan kori wi èn kande wi no sabi srefi o furu krakti „den sani fu grontapu” abi na wi tapu (Yer. 17:9). Fu dati ede a de prenspari taki wi teki a rai fu Paulus. A taki: „Tan ondrosuku efu unu de na bribi. Tan buweisi sortu sma unu de.” Te wi e studeri Bijbel, wi musu aksi wisrefi: ’Den sani di mi e prakseri èn den sani di mi wani, na sani di Gado feni bun?’2 Kor. 13:5.

18, 19. Fu san ede wi musu du tranga muiti fu de a sortu sma di Yehovah feni bun?

18 Wan tra sani di kan yepi wi fu kakafutu gi „den sani fu grontapu”, na fu hori na prakseri san Yohanes taki: „Grontapu e pasa gowe nanga den lostu fu en, ma a sma di e du a wani fu Gado o tan fu têgo” (1 Yoh. 2:17). A kan gersi leki a grontapu fu Satan o tan fu ala ten. Ma wan dei a o kon na wan kaba. Te wi e hori na prakseri taki ala sani na ini a grontapu disi o kon na wan kaba, dan Didibri no o man kori wi.

19 Na apostel Petrus e gi wi a rai fu du muiti fu de sma di Gado feni bun, aladi wi e ’tan fruwakti a dei fu Yehovah. Wi musu tan hori bun na prakseri taki a dei dati e kon. Na a ten dati den hemel o bron na ini faya. A bigi faya disi o smèlter den sani di de wan pisi fu hemel nanga grontapu!’ (2 Petr. 3:12) Heri esi a dei dati o doro èn Yehovah o pori a heri grontapu fu Satan. Solanga a ten dati no doro, Satan o tan pruberi fu gebroiki „den sani fu grontapu” fu tesi wi, neleki fa a tesi Eva nanga Yesus. Wi no musu de leki Eva di ben wani plisi ensrefi. Efu wi e du dati, dan wi e sori taki Satan na wi gado. Neleki Yesus, wi musu kakafutu gi den triki fu Satan awinsi o moi den de. Meki ibriwan fu wi du tranga muiti fu de a sortu sma di Yehovah feni bun.