Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  augustus 2013

Noiti yu ati musu bron nanga Yehovah

Noiti yu ati musu bron nanga Yehovah

„Na a don fu libisma meki taki den e pori den libi, ma toku den ati e bron srefisrefi nanga Yehovah.”ODO 19:3.

1, 2. Fu san ede wi no musu taki dati na Yehovah meki so furu problema de na grontapu? Fruteri wan agersitori fu tyari disi kon na krin.

KON meki wi taki dati yu na wan man di abi wan koloku trowlibi furu yari kaba. Ma te yu kon na oso wan dei, yu e si taki ala sani na ini na oso drai tapu. Den sturu nanga den tafra broko, den grasi sani naki panya, èn ala den garden priti. Sobun, ala den moi sani fu yu pori. A no de fu taki dati yu ben o skreki. Wantewante yu ben o aksi: „Suma du a sani disi?” Noiti yu ben o taki: „Fu san ede mi wefi du a sani disi?”, fu di yu sabi taki yu lobi wefi no ben o du so wan ogri-ati sani noiti.

2 Na ini a ten disi wi e si ala sortu ogri sani e pasa na grontapu. Sma e doti a grontapu, den e du ala sortu ogri èn hurudu lai. Fu di wi e studeri Bijbel, meki wi sabi taki a no Yehovah e meki den sani disi pasa. Di a meki grontapu a ben wani taki a ben musu de wan moi paradijs (Gen. 2:8, 15). Yehovah na wan Gado fu lobi (1 Yoh. 4:8). Fu di wi e studeri Bijbel, meki wi sabi suma na a sma di e meki taki furu problema de na grontapu. A sma dati na Satan Didibri, „a tiriman fu grontapu”.Yoh. 14:30; 2 Kor. 4:4.

3. Sortu fowtu denki wi kan abi fu den problema fu wi?

3 Ma wi no kan taki dati Satan e tyari ala problema kon. Fu san ede? Fu di son leisi na wi srefi e du sani di e tyari problema kon. (Leisi Deuteronomium 32:4-6.) Aladi wi sabi taki disi de so, toku wi kan bigin denki tra fasi fu den problema fu wi èn dati kan tyari takru bakapisi kon (Odo 14:12). Fa so? Na presi fu denki taki na Satan noso wi srefi tyari a problema kon, wi kan bigin denki taki na Yehovah du dati. A kan pasa srefi taki wi ’ati bigin bron srefisrefi nanga Yehovah’.Odo 19:3.

4, 5. A de so trutru taki wan sma ’ati kan bron srefisrefi nanga Yehovah’?

 4 A de so trutru taki wan sma ’ati kan bron srefisrefi nanga Yehovah’? Iya, ma na fu soso a ben o du dati (Yes. 41:11). A no ben o tyari nowan wini kon gi en. Wan puwema skrifiman taki: „Yu anu syatu tumusi fu naki kofu nanga Gado.” Odo 19:3 e taki: „Na a don fu libisma meki taki den e pori den libi, ma toku den ati e bron srefisrefi nanga Yehovah.” A kan taki wan sma no e taki nanga mofo taki en ati e bron nanga Yehovah, ma kande na ini en ati a e denki so. Iya, a kan pasa srefi taki a hori Yehovah na ati. Nofo tron disi de fu si na ini den sani di a e du. Fu eksempre, so wan sma no o dini Yehovah so fayafaya moro, noso a no o horibaka gi a gemeente moro.

5 San kan meki taki wan sma ’ati bron srefisrefi nanga Yehovah’? San wi kan du so taki disi no pasa nanga wi? A prenspari fu sabi den piki na tapu den aksi disi, fu di dati o yepi wi fu tan mati fu Yehovah!

SAN KAN MEKI TAKI WAN SMA ’ATI BRON SREFISREFI NANGA YEHOVAH’?

6, 7. Fu san ede den Israelsma na ini a ten fu Moses bigin taki ogri fu Yehovah?

6 San kan meki taki wan fayafaya anbegiman fu Yehovah bigin krutu en? Meki wi luku feifi sani di kan meki taki disi pasa. Wi o luku wan tu Bijbel eksempre tu di e sori fa a sani disi pasa nanga son sma.1 Kor. 10:11, 12.

Te sma e krutu fu son sani, dan dati kan abi krakti na yu tapu (Luku paragraaf 7)

7 Te sma e krutukrutu fu son sani, dan dati kan abi krakti na yu tapu. (Leisi Deuteronomium 1:26-28.) Prakseri san Yehovah du fu puru den Israelsma na ini katibo na Egepte. A tyari tin rampu kon na tapu Egepte èn a kiri Farao nanga en legre na ini a Redi Se. Na so den Israelsma ben kon fri (Eks. 12:29-32, 51; 14:29-31; Ps. 136:15). Ma di a pipel fu Gado ben de fu go na ini a Pramisi Kondre, den bigin taki wan lo ogri fu Yehovah. Fu san ede den no ben abi bribi moro? Tin fu den man di ben go luku a kondre, ben taki wan lo takru sani fu a kondre èn disi meki a pipel frede èn lasi-ati (Num. 14:1-4). San ben de a bakapisi? Bun furu fu den Israelsma no go na ini a „moi kondre” dati (Deut. 1:34, 35). San wi kan leri? Te sma e krutukrutu fu son sani, dan dati kan swaki a bribi fu wi èn a kan meki taki wi srefi bigin krutukrutu fu a fasi fa Yehovah e tiri en pipel.

8. Fu san ede den sma fu Yuda bigin fluku Yehovah?

8 Problema nanga broko-ede kan meki wi lasi-ati. (Leisi Yesaya 8:21, 22.) Na ini a ten fu Yesaya, a pipel fu Yuda ben abi bigi problema. Feanti ben lontu den. Den no ben abi nyanyan èn furu sma ben de nanga angri. San ben moro ogri, na taki den no ben de mati fu Yehovah moro fu di den ben e trangayesi en (Amos 8:11). Na presi fu suku yepi na Yehovah, den bigin „fluku a kownu nanga a Gado fu den”. Iya, den ben feni taki na Yehovah meki den kisi problema. Efu problema e meki wi lasi-ati, dan a kan taki wi srefi bigin denki: ’Pe Yehovah ben de di mi ben abi en fanowdu?’

9. Fu san ede den Israelsma na ini a ten fu Esekièl ben feni taki Yehovah no e du sani na wan reti fasi?

9 Son leisi wi no sabi a fini fu wan tori. Fu di den Israelsma na ini a ten fu Esekièl no ben sabi krin fu san ede son sani ben e pasa, meki den ben feni taki „Yehovah no e du sani na wan reti fasi” (Esek. 18:29). Den ben e du neleki den ben abi a reti fu krutu Gado. Den ben feni taki Yehovah no e du bun, aladi den no ben sabi krin fu san ede a ben e du son sani. Disi kan pasa nanga wi tu. Efu wi no e frustan  wan Bijbel tori krin noso efu wi no sabi fu san ede son sani e pasa nanga wi, dan wi srefi kan bigin denki na ini wi ati taki „Yehovah no e du sani na wan reti fasi”.Yob 35:2.

10. Fa wan sma kan bigin denki leki Adam?

10 Te wi sondu noso te wi meki wan fowtu, dan wi kan feni taki na Gado meki wi du en. A fosi man Adam ben feni taki na Gado meki taki a sondu (Gen. 3:12). Adam ben sabi heri bun taki a pasa a wèt fu Gado èn a ben sabi taki a ben o kisi strafu efu a ben sondu. Toku a ben feni taki na Yehovah meki taki a sondu fu di a ben gi en wan wefi di no bun. Sensi a ten dati tra sma bigin du a srefi sani tu. Te den e meki fowtu, dan den feni taki na Gado meki den du dati. Dati meki a bun fu aksi wisrefi: ’Te mi meki wan fowtu, mi e sari noso bruya so te, taki mi e bigin denki taki na Yehovah meki mi du dati?’

11. San wi kan leri fu a tori fu Yona?

11 Wi e bigin denki wisrefi nomo. Yona ati bron di Yehovah ben sori sari-ati gi den sma fu Ninefei (Yona 4:1-3). Fu san ede? Di Yehovah no pori a foto moro soleki fa a ben taki, dan Yona bigin denki taki sma ben o si en leki wan falsi profeiti. A sori leki Yona ben e broko en ede moro nanga san sma ben o denki fu en. A no ben e prakseri den sma fu Ninefei di ben sori berow. A sani disi kan pasa nanga wi tu. Efu wi e prakseri nomo san sma o denki fu wi, dan wi ’ati kan bron nanga Yehovah’ fu di a no tyari a kaba kon ete. Kande wi e preiki someni yari langa kaba taki a dei fu Yehovah de krosibei. Ma te wi e fruteri sma san Bijbel e taki èn den e spotu wi, dan kande wi ati o bron nanga Yehovah èn wi no o abi pasensi nanga den moro.2 Petr. 3:3, 4, 9.

FA WI KAN SORGU TAKI WI ’ATI NO BRON NANGA YEHOVAH’

12, 13. San wi musu du te wi bigin denki takru fu son sani di Yehovah e du?

12 San wi kan du te wi sondu ati e bigin denki takru fu son sani di Yehovah e du? No frigiti taki na wan don sani fu denki  so. Hori na prakseri taki Odo 19:3 e taki: „Na a don fu libisma meki taki den e pori den libi, ma toku den ati e bron srefisrefi nanga Yehovah.” Sobun, meki wi poti prakseri na feifi sani di kan yepi wi, so taki wi ati no bron nanga Yehovah.

13 Du muiti fu tan wan bun mati fu Yehovah. Wan sani di wi kan du fu no ati bron nanga Gado, na te wi e tan wan bun mati fu en. (Leisi Odo 3:5, 6.) Wi musu frutrow na tapu Yehovah. Wi musu luku bun tu taki wi no bigin denki taki wi sabi ala sani noso taki wi prenspari moro tra sma (Odo 3:7; Preik. 7:16). Te wi e hori den sani disi na prakseri, dan dati o yepi wi fu no denki taki Yehovah e meki wi kisi problema.

14, 15. San wi kan du fu no meki sma di lobi krutu fu son sani, abi krakti na wi tapu?

14 No meki sma di lobi krutu fu son sani abi krakti na yu tapu. Den Israelsma na ini a ten fu Moses ben abi nofo buweisi taki Yehovah ben o man yepi den fu teki a Pramisi Kondre abra (Ps. 78:43-53). Ma di den tin man fruteri takru sani fu a kondre dati, den Israelsma ’no ben memre a fasi fa Yehovah yepi den’ (Ps. 78:42). Te wi e memre ala den bun sani di Yehovah du gi wi, dan wi o wani tan bun mati fu en. Te wi na mati fu en, dan wi no o arki te sma e taki takru sani fu Yehovah.Ps. 77:11, 12.

15 Ma fa a de te wi e taki takru fu wi Kresten brada nanga sisa? We, disi srefi kan pori a matifasi di wi abi nanga Yehovah (1 Yoh. 4:20). Di Aron tron granpriester, den Israelsma bigin krutu fu dati. Ma gi Yehovah, a ben de neleki den ben e krutu nanga en (Num. 17:10). Na so a de tu na ini a ten disi. Efu wi ben o bigin taki takru fu den sma di Yehovah e gebroiki fu tiri a wroko fu en dyaso na grontapu, dan a ben o de neleki na krutu wi e krutu nanga Yehovah.Hebr. 13:7, 17.

16, 17. San wi no musu frigiti te wi abi problema?

16 Hori na prakseri taki a no Yehovah e meki wi kisi problema. Den Israelsma na ini a ten fu Yesaya ben drai baka gi Yehovah, ma toku Yehovah ben wani yepi den (Yes. 1:16-19). Awinsi sortu problema wi abi, wi kan kisi trowstu te wi e hori na prakseri taki Yehovah lobi wi èn a wani yepi wi (1 Petr. 5:7). Yehovah pramisi wi srefi taki a o gi wi krakti fu man horidoro.1 Kor. 10:13.

17 Ogri ben miti Yob aladi a ben e dini Yehovah nanga en heri ati. Te wan ogri miti wi, wi no musu frigiti taki a no Yehovah du dati. Yehovah no lobi kruktudu, a lobi retidu (Ps. 33:5). Meki wi de leki Elihu di ben taki: „A no tru kwetikweti taki Gado e du ogri! Noiti na Almaktiwan e du kruktu sani!” (Yob 34:10) Yehovah e gi wi „ibri bun presenti nanga ibri kado di bun dorodoro”. Noiti a e gi wi problema.Yak. 1:13, 17.

18, 19. Fu san ede wi no musu denki ogri fu Yehovah noiti? Fruteri wan agersitori fu tyari disi kon na krin.

18 Noiti no denki ogri fu Yehovah. Gado no de wan sondusma leki wi èn en prakseri hei moro di fu wi (Yes. 55:8, 9). Efu wi abi sakafasi, dan wi o frustan taki wi no sabi ala sani (Rom. 9:20). Nofo tron wi no sabi wan tori finifini. A no de fu taki dati wi alamala ondrofeni san na odo disi e taki: „A fosi sma di e opo taki gi ensrefi te sma e koti krutu gi en o kisi leti. Ma dan wan trawan e kon na inisei èn a e bigin poti aksi gi en fu tyari kon na krin fa sani de trutru.”Odo 18:17.

19 Kon meki wi taki dati wan bun mati fu yu du wan sani di sma no gwenti du èn yu no e frustan fu san ede a du dati. Yu ben o taki wantewante dati a sani di a  du no bun? Nôno. Yu no ben o de gaw fu prakseri ogri fu yu mati, spesrutu efu yu sabi en furu yari kaba. Wi e frutrow wi mati aladi den na sondusma. We dan fa a de nanga wi hemel Tata Yehovah? A no de fu taki dati wi musu frutrow en, spesrutu fu di ’den pasi fu en hei moro den pasi fu wi èn den prakseri fu en hei moro den prakseri fu wi’.

20, 21. Fu san ede wi e kisi problema?

20 No frigiti fu san ede wi e kisi problema. Wi musu frustan taki son leisi na wi srefi e du sani di e tyari problema kon (Gal. 6:7). Wi no musu taki dati Yehovah du dati. Fu san ede? Luku wan eksempre: Wan wagi kan rèi tranga. Ma efu wan sma e rèi tumusi tranga na ini wan boktu, dan a wagi kan drai tapu. Efu dati pasa, yu ben o taki dati na den sma di meki a wagi fowtu, noso na a sma di e rèi? Na so a de nanga wi tu. Yehovah gi wi pasi fu teki wi eigi bosroiti èn a sori wi fa wi musu teki bun bosroiti. Sobun, efu wi abi problema, wi no kan taki dati na Yehovah e meki wi kisi problema, a no so?

21 Ma a no ala problema di wi e kisi e kon fu di wi teki don bosroiti. Son leisi ogri e miti wi fu di wi de na wan presi leti na a momenti te wan ogri e pasa (Preik. 9:11). Boiti dati wi no musu frigiti tu taki Satan Didibri na a sma di e meki ogri pasa na grontapu (1 Yoh. 5:19; Openb. 12:9). En na wi feanti, a no Yehovah!1 Petr. 5:8.

NO MEKI NOTI PORI A MATIFASI FU YU NANGA YEHOVAH

Yehovah blesi Yosua nanga Kaleb fu di den ben e frutrow na en tapu (Luku paragraaf 22)

22, 23. San wi musu hori na prakseri te wi e firi brokosaka fu di wi abi problema?

22 Te yu e kisi problema, dan memre na eksempre fu Yosua nanga Kaleb. Den tu man disi no ben de leki den tra tin man di ben taki takru fu a kondre (Num. 14:6-9). Yosua nanga Kaleb sori taki den ben e bribi na ini Yehovah. Ma toku den ben musu waka 40 yari langa na ini a sabana makandra nanga den tra Israelsma. Ma yu denki taki den ben e krutukrutu fu a sani disi ede, noso den ben mandi? Nôno. Den tan frutrow na tapu Yehovah èn Yehovah blesi den. Aladi furu fu den Israelsma dede na ini a sabana, toku Yehovah meki Yosua nanga Kaleb pasa go na ini a Pramisi Kondre (Num. 14:30). Yehovah o blesi wi tu te wi „no kon weri” fu du a wani fu en.Gal. 6:9; Hebr. 6:10.

23 Efu yu e firi brokosaka fu di yu abi problema, fu di tra sma du sani di no bun, noso fu di yu meki wan fowtu, dan san yu kan du? Memre taki Yehovah na wan Gado di bun srefisrefi. Prakseri den moi sani di Yehovah pramisi yu. Aksi yusrefi: ’Fa mi libi ben o de efu mi no ben sabi Yehovah?’ Du muiti fu tan Yehovah mati ala ten. Noiti yu ati musu bron nanga en!