Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  augustus 2013

Poti prakseri na makandra èn gi makandra deki-ati

Poti prakseri na makandra èn gi makandra deki-ati

„Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko.”HEBR. 10:24.

1, 2. Fa 230 Yehovah Kotoigi ben man tan na libi na a kaba fu a Di Fu Tu Grontapufeti?

DI A legre fu Hitler si taki den ben o lasi a Di Fu Tu Grontapufeti, den bosroiti fu kiri den dusundusun sma di den ben e hori na ini den strafuman-kampu. Den ben o meki den strafuman fu a strafuman-kampu na ini Sachsenhausen waka wan langa pasi go na sesyoro pe den ben o poti den na ini sipi. Dan den ben o sungu den sipi nanga ala sma na ini. Bakaten sma kari a sani disi di den srudati fu Hitler ben wani du „a dedewaka”.

2 Dritenti na dri dusun strafuman fu a strafuman-kampu na ini Sachsenhausen ben musu waka sowan 250 kilometer go na Lübeck, wan foto fu Doisrikondre di ben abi wan lanpe. Na mindri den strafuman disi yu ben abi 230 Yehovah Kotoigi fu siksi difrenti kondre. Den srudati ben taigi den fu waka makandra. Ala den strafuman ben kon swaki fu di den ben e siki èn angri ben e kiri den. Ma toku ala den Kotoigi tan na libi. Fa dati kan? Wan fu den taki: „Doronomo wi ben e gi makandra deki-ati fu go doro.” Den ben man tan na libi fu di den ben e sori lobi gi makandra èn Gado ben gi den „krakti di bigi pasa marki”.2 Kor. 4:7.

3. Fu san ede wi musu gi makandra deki-ati?

3 Na ini a ten disi wi no abi fu waka wan „dedewaka”, ma wi e kisi furu tesi. Baka di Gado Kownukondre seti na ini 1914, den trowe Satan fu hemel kon na grontapu èn „a abi bigi atibron fu di a sabi taki en ten syatu” (Openb. 12:7-9, 12). O moro Armagedon e kon krosibei, o moro Satan e meki wi kisi tesi fu swaki a bribi fu wi. Boiti dati, wi abi den broko-ede fu na aladei libi tu (Yob 14:1; Preik. 2:23). Son leisi wi kan kon weri fu ala den problema èn disi kan meki  wi firi brokosaka awinsi san wi e du. Fu eksempre, wan brada ben gi furu sma deki-ati fu tan dini Yehovah. Ma di a kon owru, en nanga en wefi kon siki èn a bigin firi brokosaka srefisrefi. Neleki a brada disi, wi alamala musu suku yepi na Yehovah, a sma di e gi wi „krakti di bigi pasa marki”. Boiti dati wi musu gi makandra deki-ati tu.

4. Sortu rai fu na apostel Paulus wi musu teki efu wi wani gi makandra deki-ati?

4 Efu wi wani gi makandra deki-ati, dan wi musu teki a rai di na apostel Paulus ben gi den Hebrew Kresten. A ben taki: „Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko. Meki wi no misi konmakandra, soleki fa son sma gwenti du, ma gi makandra deki-ati o moro unu e si a dei e kon krosibei” (Hebr. 10:24, 25). Fa wi kan du san skrifi na ini a tekst disi?

„MEKI WI POTI PRAKSERI NA MAKANDRA”

5. Efu wi wani „poti prakseri” na trawan, dan san wi musu du?

5 Efu wi wani „poti prakseri” na trawan, dan wi musu sabi san den abi fanowdu. Ma efu wi e taki den odi nomo na ini a Kownukondre zaal noso efu wi e taki soso fu sani di no de so prenspari, dan wi no o sabi san den abi fanowdu. Na a tra sei, wi musu luku bun taki wi „no bumui nanga tra sma tori” (1 Tes. 4:11; 1 Tim. 5:13). Ma toku wi musu du muiti fu sabi den brada nanga sisa fu wi moro bun. Wi musu sabi a situwâsi fu den, wi musu sabi den maniri fu den, fa a bribi fu den de, sortu bun fasi den abi èn sortu swakifasi den abi. Den musu si wi leki den mati èn den musu sabi taki wi lobi den. Fu dati ede wi musu meki ten gi den. Wi no musu du dati soso te den abi problema noso te den e firi brokosaka. Wi musu du dati na tra okasi tu.Rom. 12:13.

6. San o yepi wan owruman fu „poti prakseri” na den sma na ini a gemeente?

6 Bijbel e taki dati owruman musu de klariklari fu sorgu gi „den skapu fu Gado” èn den musu du dati nanga prisiri (1 Petr. 5:1-3). Den no kan du disi na wan bun fasi efu den no sabi den sma na ini a gemeente. (Leisi Odo 27:23.) Te den owruman e sori taki den de klariklari fu yepi den brada nanga sisa èn te den e sori taki den lobi fu de nanga den, dan den brada nanga sisa no o frede fu suku yepi na den. A o moro makriki gi den fu fruteri den owruman fa den e firi èn sortu broko-ede den abi. Na so den owruman o man yepi ibriwan fu den di abi yepi fanowdu.

7. Te wan sma e firi brokosaka srefisrefi, a kan taki „dondon sani”. Fa wi musu si dati?

7 Paulus ben taigi a gemeente na ini Tesalonika: „Yepi den swakiwan.” (Leisi 1 Tesalonikasma 5:14.) Sma di lasi-ati èn di e firi brokosaka na „swakiwan” tu. Odo 24:10 e taki: „Yu e firi brokosaka te nowtu miti yu? Efu dati de so, dan yu no o abi furu krakti.” Te wan sma e firi brokosaka srefisrefi, dan a kan taki „dondon sani” (Yob 6:2, 3). Te wi e „poti prakseri” na den sortu sma disi, wi no musu frigiti taki son leisi den kan taki sani di no bun. Ma disi no wani taki dati na so den de trutru. Rachelle ondrofeni a sani disi di en mama ben e firi brokosaka srefisrefi. Rachelle taki: „Furu tron Mama ben e taki hati sani. Ma dan mi ben e pruberi fu hori na prakseri fa a de trutru. Mi sabi en leki wan lobi-ati mama di abi switifasi èn di lobi gi sma sani. Mi kon si taki te wan sma e firi brokosaka srefisrefi, dan furu tron a e taki sani di no de na ini en ati trutru. A moro ogri sani di yu kan du, na fu taigi en noso du en wan hati sani baka.” Odo 19:11 e taki: „Koni fu man si sani krin e meki taki wan man en ati no e bron esi  èn a moi te wan sma no e prakseri den fowtu fu trawan moro.”

8. Spesrutu gi suma wi musu sori lobi èn fu san ede?

8 Fa wi kan „poti prakseri” na wan sma di e firi brokosaka fu di a ben du wan sondu? Kande a meki sani kon bun baka nanga Gado, ma a e syen ete fu a sani di a ben du. Na ini a gemeente fu Korente wan sma ben du wan sondu, ma bakaten a sori berow fu a sani di a du. Paulus ben taigi den Kresten na ini a gemeente dati: „Now un musu gi en pardon nanga un heri ati èn un musu trowstu en, so taki a sma dati no sari so te, taki a lasi-ati. Fu dati ede mi e begi unu fu sori en taki unu lobi en” (2 Kor. 2:7, 8). Sobun, wi musu sori taki wi lobi so wan sma. Wi no musu denki taki a sma e frustan taki wi lobi en èn taki wi e broko wi ede nanga en. A musu man si dati na a fasi fa wi e libi nanga en.

„ABI LOBI ÈN DU BUN WROKO”

9. Fa wi kan „gi makandra deki-ati fu abi lobi èn fu du bun wroko”?

9 „Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko”, na so Paulus ben skrifi. Wi musu yepi wi brada nanga sisa fu sori lobi èn fu du bun sani. Kon meki wi taki dati yu meki wan faya. Efu yu no wani taki a dede, dan yu musu tan poti udu gi en èn yu musu wai en (2 Tim. 1:6). Neleki fa wi musu du sani fu meki wan faya tan bron, na so wi musu du sani tu fu yepi wi brada nanga sisa fu tan dini Yehovah fayafaya. Wan fu den moro bun fasi fa wi kan du dati, na fu prèise den fu den bun sani di den e du.

Gi makandra deki-ati na ini a preikiwroko

10, 11. (a) Suma wi musu prèise? (b) Gi wan eksempre di e sori fa wan sma di meki wan fowtu kan du bun baka te sma e prèise en.

10 A prenspari fu prèise trawan ala ten. Wi no musu du dati soso te den e firi brokosaka. Wan brada ben skrifi: „Mi papa noiti no taigi mi taki mi du wan sani bun.” Di a brada disi ben e gro kon bigi a ben e firi leki a no man du nowan sani bun. Aladi a abi 50 yari now, toku a e warderi en trutru te sma e taigi en taki a e du en wroko bun leki owruman. Fu di en srefi  ondrofeni o prenspari a de fu kisi deki-ati, meki a e suku iniwan okasi fu prèise trawan. Wi alamala e firi bun te wan trawan e taigi wi taki wi e du wan sani bun, awinsi wi na pionier, owru sma, noso sma di lasi-ati.Rom. 12:10.

11 Te owruman e pruberi fu yepi wan sma di meki wan fowtu, dan den kan prèise en fu den bun sani di a du na ini a ten di pasa. Disi kan yepi a sma fu kenki en denki so taki a kan du bun baka (Gal. 6:1). Na disi pasa nanga wan sisa di nen Miriam. A sisa disi skrifi: „Wan tu bun mati fu mi tapu fu dini Yehovah èn na a srefi ten brudu naki mi papa. A ben de wan muilek ten gi mi trutru. Mi ben e firi brokosaka doronomo. Fu man frigiti ala sani, mi bigin hori nanga wan grontapu man.” Disi ben meki a sisa firi leki a no warti fu Yehovah lobi en èn a ben wani tapu fu dini Yehovah. Ma wan owruman memre en fa a ben dini Yehovah fayafaya èn a sori en taki Yehovah lobi en ete. A sani disi naki en ati trutru èn a kon lobi Yehovah baka. A libi a man èn a tan dini Yehovah.

Gi makandra deki-ati fu abi lobi èn fu du bun wroko

12. San kan pasa te wi e teki sma gersi nanga trawan, te wi e krutu den, èn te wi e gi den a firi taki den no e du nofo?

12 Wi musu luku bun fa wi e gi wi brada nanga sisa deki-ati fu tan dini Gado fayafaya. Wi no musu teki den gersi nanga trawan, wi no musu krutu den fu di den no e du sani soleki fa wi wani, èn wi no musu gi den a firi taki den no e du ala san den man na ini a diniwroko. Kande den o du sani nanga moro faya te wi e du den sani disi fu gi den deki-ati, ma den no o du dati langa. A moro bun fasi fa wi kan gi wi brada nanga sisa deki-ati, na fu prèise den èn fu yepi den frustan taki den musu dini Gado fu di den lobi en.Leisi Filipisma 2:1-4.

„GI MAKANDRA DEKI-ATI”

13. Fa wi kan gi trawan deki-ati? (Luku a prenki na a bigin fu na artikel.)

13 Paulus ben taki: „Gi makandra deki-ati o moro unu e si a dei e kon krosibei.” A deki-ati di wi e gi trawan de leki na udu di wi e poti gi wan faya fu meki a faya tan bron, noso fu meki a kon moro bigi. Te wi e gi wi brada nanga sisa deki-ati, dan den e kisi krakti nanga trowstu, so taki den kan tan dini Gado. Te wi e pruberi fu yepi den wan di lasi-ati, dan wi musu taki nanga den na wan lobi-ati fasi èn na wan switi fasi (Odo 12:18). Boiti dati wi musu de „gaw fu yere”, wi no musu de „gaw fu taki” (Yak. 1:19). Efu wi e arki a sma èn wi e pruberi fu frustan fa a e firi, dan kande wi o man si fu san ede a lasi-ati èn wi o man taki wan sani di o gi en deki-ati trutru.

Leri sabi yu brada nanga sisa moro bun

14. Fa wan owruman yepi wan brada di ben lasi-ati?

14 Luku fa wan owruman di abi switifasi yepi wan brada di ben tapu fu preiki wan tu yari kaba. Di na owruman arki en, a kon si taki a brada lobi Yehovah trutru.  A ben e studeri ibri Waktitoren èn a ben e du muiti fu go na den konmakandra doronomo. Ma son sma na ini a gemeente ben du sani di meki taki a brada disi mandi èn a lasi-ati. Na owruman ben e arki bun èn a ben pruberi fu frustan fa a brada ben e firi. A no krutu a brada, ma a sori en taki den brada nanga sisa lobi en èn den e broko den ede nanga en trutru. Bakaten a brada kon frustan taki a ben meki den sani di a ondrofeni abi so furu krakti na en tapu, taki a no ben wani dini a Gado moro di a ben lobi so te. Na owruman ben aksi a brada fu go na ini a preikiwroko makandra nanga en. Na so na owruman yepi a brada fu preiki baka èn bakaten a brada disi tron wan owruman baka.

Wi musu abi pasensi èn wi musu arki den wan di abi deki-ati fanowdu (Luku paragraaf 14, 15)

15. San wi kan leri fu a fasi fa Yehovah e gi sma deki-ati?

15 Te wan sma lasi-ati, dan a no ala ten a o wani teki a yepi di wi wani gi en èn a no ala ten a o firi bun wantewante. Ma Paulus ben taki: „Yepi den swakiwan èn abi pasensi nanga ala sma” (1 Tes. 5:14). Sobun, wi no musu gi abra te wi si taki a deki-ati fu wi no e yepi wantewante. Na presi fu dati wi musu abi pasensi. Na ini owruten Yehovah ben abi pasensi tu nanga den futuboi fu en di ben lasi-ati. Fu eksempre, Yehovah ben abi furu pasensi nanga Elia èn a ben e hori den firi fu en na prakseri. A ben gi Elia san a ben abi fanowdu fu man go doro nanga a diniwroko fu en (1 Kow. 19:1-18). Wan tra eksempre na David. Fu di a ben sori berow trutru, meki Yehovah sori switifasi gi en èn a gi en pardon (Ps. 51:7, 17). Boiti dati Gado ben yepi a skrifiman fu Psalm 73 di ben wani tapu fu dini en (Ps. 73:13, 16, 17). Yehovah e sori wi switifasi èn a abi pasensi nanga wi, spesrutu te wi e firi brokosaka noso te wi lasi-ati (Eks. 34:6). „Ibri mamanten baka a e sori sari-ati” èn „noiti wan ten o kon taki a no e sori sari-ati” (Sari 3:22, 23). Yehovah wani taki wi musu de leki en èn wi musu sori switifasi tu gi den wan di lasi-ati.

GI MAKANDRA DEKI-ATI FU TAN WAKA NA TAPU A PASI DI E TYARI SMA GO NA LIBI

16, 17. San wi musu du o moro a kaba fu a grontapu disi e kon krosibei? Fu san ede?

16 Dusundusun strafuman di gowe libi a strafuman-kampu na ini Sachsenhausen lasi libi. Ma ala den 230 Yehovah Kotoigi di gowe libi a kampu dati tan na libi. Den no ben o tan na libi efu den no ben gi makandra deki-ati èn efu den no ben yepi makandra.

17 Na ini a ten disi wi de na tapu a pasi „di e tyari sma go na libi” (Mat. 7:14). Heri esi ala sma di e anbegi Yehovah o pasa go na ini a nyun grontapu pe soso retidu o de (2 Petr. 3:13). A kaba fu na ogri grontapu fu Satan e kon moro krosibei. Fu dati ede meki wi yepi makandra fu tan na tapu a pasi di e tyari sma go na libi.