Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuli 2013

Yesus gebroiki wan pikin grupu fu gi furu sma nyanyan

Yesus gebroiki wan pikin grupu fu gi furu sma nyanyan

„Baka di a broko den brede, [Yesus] prati den gi den disipel, dan den disipel gi den sma.”MAT. 14:19.

1-3. Fruteri fa Yesus gi furu sma nyanyan na ini a birti fu Betsaida. (Luku a prenki na a bigin fu na artikel.)

PRUBERI fu si a sani disi na yu fesi. (Leisi Mateyus 14:14-21.) A de leti bifo a Paskafesa fu a yari 32. Sowan 5000 mansma, boiti den umasma nanga den pikin-nengre, de makandra nanga Yesus nanga den disipel fu en na ini a birti fu Betsaida, wan dorpu na a noordsei syoro fu a Se fu Galilea.

2 Di Yesus si den sma a firi sari gi den. Fu dati ede a dresi den sikisma èn a leri den furu sani fu Gado Kownukondre. Te a kon lati kaba, den disipel e taigi Yesus fu seni den sma gowe so taki den kan go na den dorpu krosibei fu bai nyanyan. Ma Yesus e taigi den disipel fu en: „Gi den wan sani fu nyan.” A musu fu de so, taki den disipel e aksi densrefi fu san ede Yesus taigi den so wan sani fu di a nyanyan di den abi no sari gi ala den sma. Den abi soso feifi brede nanga tu pikin fisi.

3 A sari-ati fu Yesus, meki taki a e du wan wondru. Disi na a wan-enkri wondru di ala den fo Evangelie skrifiman taki fu en (Mark. 6:35-44; Luk. 9:10-17; Yoh. 6:1-13). Yesus e meki den disipel fu en taigi den sma fu go sidon na tapu a grasi na ini grupu fu 50 nanga 100 sma. Baka te a taki Gado tangi, a e bigin broko den brede èn a e prati den fisi. A no gi den sma a nyanyan langalanga, ma a prati en „gi den disipel, dan den disipel gi den sma”. A nyanyan sari gi ala sma. Prakseri san Yesus du dyaso: A gi dusundusun sma nyanyan nanga yepi fu wan tu sma nomo, iya, nanga yepi fu den disipel fu en. *

4. (a) San na a moro prenspari sani di Yesus ben wani gi den bakaman fu en èn fu san ede? (b) San wi o luku na ini na artikel disi èn na ini a trawan?

4 Ma a moro prenspari sani gi Yesus ben de taki a ben wani gi den bakaman fu en wan tra sortu nyanyan. Dati na den tru tori na ini Gado Wortu. A ben sabi taki  te den ben o leri den tru tori disi, den ben kan kisi têgo libi (Yoh. 6:26, 27; 17:3). Soleki fa wi ben si, dan Yesus gi dusundusun sma brede nanga fisi fu nyan fu di a ben firi sari gi den. Na a srefi firi dati meki a gebroiki furu ten fu gi den bakaman fu en leri (Mark. 6:34). Ma a ben sabi taki a no ben abi langa moro na grontapu fosi a ben o drai go baka na hemel (Mat. 16:21; Yoh. 14:12). Te Yesus ben o de na hemel, dan fa a ben o gi den bakaman fu en na grontapu a tru leri di de leki nyanyan? A ben o du en na a srefi fasi leki fa a ben gi den dusundusun sma brede nanga fisi fu nyan: Wan pikin grupu ben o gi furu sma nyanyan noso leri fu Gado Wortu. Ma suma ben o de a pikin grupu disi? Meki wi go luku fa Yesus gebroiki wan pikin grupu fu gi leri na furu fu den salfu bakaman fu en na ini a fosi yarihondro. Na ini a tra artikel wi o luku na aksi disi: Fa wi kan kon sabi suma na den sma di Krestes e gebroiki fu gi wi nyanyan na ini a ten disi? Na aksi disi de prenspari gi ibriwan fu wi.

Wan pikin grupu ben gi nyanyan na dusundusun sma (Luku paragraaf 4)

DEN SMA DI YESUS TEKI FU SETI A PIKIN GRUPU

5, 6. (a) Sortu prenspari bosroiti Yesus teki fu sorgu taki den bakaman fu en ben o tan kisi a leri di den ben o abi fanowdu baka te a dede? (b) Fa Yesus ben sreka den apostel fu en fu tyari wan prenspari frantwortu baka te a dede?

5 Wan bun osofamiri-edeman e seti sani gi en osofamiri so taki den kan kisi a sorgu di den abi fanowdu baka te a dede. Na a srefi fasi, Yesus di ben o tron na Edeman fu a Kresten gemeente, seti sani so taki den bakaman fu en ben o tan kisi leri fu Gado baka te a dede (Ef. 1:22). Fu eksempre, tu yari fosi Yesus dede a teki wan prenspari bosroiti. A teki den fosiwan fu den sma fu a pikin grupu di a ben o gi a frantwortu fu gi furu sma nyanyan, noso leri fu Gado. Luku san ben pasa.

6 Baka di Yesus begi heri neti, a kari den disipel fu en kon èn a teki 12 fu den fu tron apostel (Luk. 6:12-16). Na ini den tu yari baka dati, a ben de bun mati fu den 12 man dati. A ben gi den leri nanga yepi fu den sani di a ben taki èn du. Na a ten dati a ben kari den man dati „disipel” san e sori taki a ben sabi taki den ben musu leri furu sani ete (Mat. 11:1; 20:17). Yesus ben gi ibriwan fu den prenspari rai èn a leri den finifini fa fu du a preikiwroko (Mat. 10:1-42; 20:20-23; Luk. 8:1; 9:52-55). A de krin taki a ben e sreka den fu tyari wan prenspari frantwortu baka te a dede èn drai go baka na hemel.

7. Fa Yesus sori san ben o de a moro prenspari sani di den apostel ben o abi fu du?

7 Sortu frantwortu den apostel ben o kisi? Di a Pinksterfesa na ini a yari 33 kon krosibei, a ben de krin taki den apostel ben o teki fesi na ini a gemeente (Tori 1:20). Ma san ben o de a moro prenspari sani di den ben o abi fu du? Di Yesus kisi wan opobaka, a taigi na apostel Petrus wan sani di e gi wi a piki na tapu na aksi disi. (Leisi Yohanes 21:1, 2, 15-17.) Wan tu tra apostel ben de drape, di Yesus taigi Petrus: „Gi den pikin skapu fu mi nyanyan.” Na so Yesus ben sori taki den apostel fu en ben o de na ini a pikin grupu di ben o sorgu taki furu sma kisi nyanyan noso leri fu Gado. Disi e sori na wan moi fasi fa Yesus e si den „pikin skapu” fu en. *

FA FURU SMA KISI LERI SENSI A PINKSTERFESA

8. Fa den sma di tron bakaman fu Yesus na a Pinksterfesa sori taki den ben sabi suma Krestes ben e gebroiki fu gi den nyanyan?

8 Bigin nanga a Pinksterfesa fu a yari 33, Krestes di opo baka, poti den apostel fu en leki a grupu di ben musu gi nyanyan na den tra salfu disipel. (Leisi Tori fu den apostel 2:41, 42.) Den Dyu nanga den sma di teki a Dyu bribi èn di tron salfu Kresten na ini a ten dati, ben si krin suma ben de a grupu dati. Sondro fu tweifri den „tan poti prakseri”,  noso tan hori densrefi „na den leri fu den apostel”. Den nyun bakaman fu Yesus ben angri fu kon sabi den tru tori fu Gado Wortu èn den ben sabi pe den ben musu feni den tori dati. Den tan si den apostel leki den sma di ben musu fruklari den sani di Yesus taki noso du èn di ben musu fruklari san Bijbel e taki fu Yesus.Tori 2:22-36. *

9. Fa den apostel sori taki den no frigiti a frantwortu di den ben abi fu gi den skapu fu Yesus nyanyan?

9 Den apostel no frigiti a frantwortu di den ben abi fu gi den skapu fu Yesus nyanyan. Fu eksempre, luku san den du di wan tori opo kon di ben kan prati a nyun gemeente. A tori disi ben abi fu du nanga trutru nyanyan. Te nyanyan ben e prati ibri dei gi den uma di den masra dede kaba, dan den Hebrew uma ben e kisi nyanyan, ma den Griki uma no ben e kisi. Fa den apostel lusu a problema disi? „Den twarfu apostel” poti seibi lepi brada fu „du a prenspari wroko” fu prati nyanyan gi den sma. A no de fu taki dati di Yesus du wan wondru fu gi a bigi ipi sma nyanyan, dan furu fu den apostel ben yepi prati a nyanyan. Ma na ini a situwâsi disi den apostel si taki a leri di den ben o gi den gemeente, ben de a moro prenspari sortu nyanyan di den ben musu gi den. Na so fasi den tan poti prakseri na a wroko „fu preiki a wortu”.Tori 6:1-6.

10. Fa Yesus gebroiki den apostel nanga den owru man na ini Yerusalem?

10 Na a ten fu a yari 49, den tra lepi owru man bigin wroko makandra nanga den apostel di ben de na libi ete. (Leisi Tori fu den apostel 15:1, 2.) „Den apostel nanga den owru man na ini Yerusalem” ben de a tiri skin di ben teki fesi na ini a wroko. Krestes, na Edeman fu a gemeente, gebroiki a pikin grupu disi fu lepi mansma fu lusu problema di abi fu du nanga den leri fu Bijbel. A gebroiki den tu fu teki fesi èn fu tiri a preikiwroko nanga a wroko fu leri sma a Kownukondre bun nyunsu.Tori 15:6-29; 21:17-19; Kol. 1:18.

11, 12. (a) San sori taki Yehovah blesi den sani di en Manpikin seti fu gi den gemeente nyanyan na ini a fosi yarihondro? (b) Fa sma ben si krin suma Krestes gebroiki fu gi nyanyan na den gemeente?

11 Soleki fa wi si, dan Krestes seti sani fu gi den gemeente na ini a fosi yarihondro nyanyan. A de so taki Yehovah blesi a seti dati? Iya. Fa wi du sabi dati? A buku Tori fu den apostel e taki disi: „Te den [na apostel Paulus nanga trawan di ben teki waka nanga en] ben go na den foto, dan den ben e  fruteri den brada drape sortu bosroiti den apostel nanga den owru man na ini Yerusalem ben teki, so taki den ben kan du san den apostel taki. A sani dati tranga a bribi fu a gemeente trutru èn dei fu dei moro nanga moro sma ben e tron bribiman” (Tori 16:4, 5). Luku taki den gemeente dati ben go na fesi fu di den ben tan horibaka gi a tiri skin na ini Yerusalem. Disi e sori krin taki Yehovah blesi den sani di en Manpikin seti fu gi den gemeente nyanyan. No frigiti taki sani o go bun na ini a gemeente soso te Yehovah blesi dati.Odo 10:22; 1 Kor. 3:6, 7.

12 Te nanga now wi si na sortu fasi Yesus gi den bakaman fu en nyanyan: A gebroiki wan pikin grupu fu gi furu sma nyanyan. Sobun, na a ten dati a ben de krin suma ben kisi a frantwortu fu gi nyanyan na den gemeente. Fu taki en leti, den apostel di ben de den fosi memre fu a tiri skin, ben sori krin taki Gado ben horibaka gi den. Tori fu den apostel 5:12 e taki: „Den apostel tan du furu wondru nanga bigi sani na mindri a pipel.” * Disi meki taki den sma di tron Kresten, ben kan si krin suma Krestes ben gebroiki fu gi den skapu fu en nyanyan. Ma na a kaba fu a fosi yarihondro a situwâsi kon kenki.

Na ini a fosi yarihondro a ben de krin suma Yesus ben gebroiki fu gi nyanyan na a gemeente (Luku paragraaf 12)

A TEN DI A TAKRU WIWIRI BEN KON DE MORO LEKI NA ALEISI

13, 14. (a) Sortu warskow Yesus gi èn o ten a sani di a taki bigin kon tru? (b) Na sortu tu fasi sma bigin pori a gemeente? (Luku „Ete wan tu prenspari sani”.)

13 Hori na prakseri taki na ini na agersitori fu na aleisi nanga a takru wiwiri, Yesus ben warskow taki a takru wiwiri (den falsi Kresten) ben o sai na mindri na aleisi (den salfu Kresten). A ben taki dati den tu grupu ben o gro makandra teleki a ten fu a kotiwroko, ’na a pisi ten te a kaba fu a grontapu disi ben o de krosibei’ (Mat. 13:24-30, 36-43). A no ben teki langa fosi a sani disi di Yesus taki kon tru. *

14 Na ini a fosi yarihondro, sma ben wani kori den Kresten fu drai baka gi a bribi. Ma Yesus en apostel di ben tan na ini a tru leri, ben de leki wan sani di ben e „gens” den sma disi. Na so fasi den sma no ben man pori a gemeente nanga den falsi leri fu den (2 Tes. 2:3, 6, 7). Ma di a lasti apostel dede, falsi leri bigin kon na ini a gemeente èn safrisafri a panya go na ala sei. Hondrohondro yari langa a sani disi go doro. Na a ten dati na aleisi nanga a takru wiwiri gro kon makandra. Ma te fu kaba a takru wiwiri kon de moro furu leki na aleisi. Nowan grupu ben kisi a frantwortu fu prati a nyanyan. Dati ben o kenki te fu kaba. Ma na aksi di e opo kon na o ten dati ben o kenki.

SUMA BEN O GI SMA NYANYAN NA A KOTITEN?

15, 16. Sortu bakapisi a ben abi di den Bijbel Ondrosukuman studeri Bijbel finifini èn sortu aksi e opo kon?

15 A pisi ten di na aleisi nanga a takru wiwiri ben e gro kon makandra, ben e kon na wan kaba. Na a srefi ten dati, furu sma ben wani sabi moro fu den tru tori fu Bijbel. Memre taki syatu baka 1870, wan pikin grupu sma di ben suku fu kon sabi den tru tori fu Bijbel, ben kon makandra èn den ben hori Bijbel klas. Sma fu falsi Kresten kerki nanga tra kerkigrupu di ben de leki takru wiwiri no ben de na den mindri. Fu di den Bijbel Ondrosukuman ben abi sakafasi meki den ben de klariklari fu ondrosuku Gado Wortu.Mat. 11:25.

16 Den Bijbel Ondrosukuman studeri den Buku fu Bijbel finifini èn dati ben abi bun bakapisi. Fu di den man nanga uma disi ben hori densrefi na san Bijbel taki, meki den ben man sori sma taki den falsi leri fu kerki no ben kruderi nanga Bijbel. Boiti dati, den meki buku èn prati dati na heri grontapu fu panya den tru tori fu Bijbel. Na so den doro na ati fu furu sma di  ben angri fu kon sabi den tru leri èn den yepi den fu frustan disi moro bun. Fu dati ede wan prenspari aksi e opo kon: A de so taki na ini den yari bifo 1914, den Bijbel Ondrosukuman ben de a grupu di Krestes gebroiki fu gi nyanyan na den skapu fu en? Nôno. Na aleisi nanga a takru wiwiri ben e gro kon makandra ete. Sobun, a grupu di ben musu gi nyanyan na den skapu fu Krestes, no ben kaba seti ete. A ten no ben doro ete fu puru den falsi Kresten na mindri den tru Kresten.

17. Sortu prenspari sani bigin pasa na ini 1914?

17 Soleki fa wi si na ini na artikel na fesi, dan a kotiten bigin na ini 1914. Na ini a yari dati, wan tu prenspari sani bigin pasa. Yesus tron Kownu èn den lasti dei bigin (Openb. 11:15). Fu 1914 te go miti a bigin fu 1919, Yesus go makandra nanga en Tata fu ondrosuku na agersi tempel èn fu krin en fu di dati ben de fanowdu trutru (Mal. 3:1-4). * Na ini 1919, a ten ben doro fu bigin tyari na aleisi kon na wán. A de so taki a ten ben doro gi Krestes fu gi wan grupu a frantwortu fu prati nyanyan? Iya, a ten dati ben doro kaba.

18. (a) Sortu frantwortu Yesus ben o gi wan pikin grupu sma? (b) Sortu prenspari aksi opo kon di den lasti dei bigin?

18 Na ini a profeititori fu a ten fu a kaba, Yesus taki dati a ben o gi wan grupu sma a frantwortu fu prati „nyanyan na a reti ten” (Mat. 24:45-47). Suma a ben o gebroiki? Soleki fa a ben de na ini a fosi yarihondro, na so Yesus ben o gebroiki wan pikin grupu fu gi furu sma nyanyan. Ma di den lasti dei bigin, dan a prenspari aksi disi opo kon: Suma ben o de a pikin grupu? Na ini na artikel di e kon wi o taki fu na aksi disi èn fu tra aksi di abi fu du nanga a profeititori fu Yesus.

 

^ paragraaf 3 Paragraaf 3: Na wan tra okasi Yesus du wan wondru èn a gi nyanyan na 4000 mansma, dan un no teri den umasma nanga den pikin-nengre ete. Disi leisi sosrefi a ’gi den disipel a nyanyan, dan den disipel prati en gi den sma’.Mat. 15:32-38.

^ paragraaf 7 Paragraaf 7: Di Petrus ben de na libi, ala „den pikin skapu” di ben o kisi nyanyan ben abi a howpu fu libi na hemel.

^ paragraaf 8 Paragraaf 8: Den nyun disipel „tan poti prakseri na den leri fu den apostel”. Disi e sori taki den apostel ben gi leri doronomo. Sonwan fu den sani di den apostel ben leri sma, skrifi na ini a pisi fu Bijbel di wi e kari den Kresten Griki Buku fu Bijbel now.

^ paragraaf 12 Paragraaf 12: Son leisi a ben de so taki boiti den apostel, tra sma ben man du wondru tu fu di santa yeye ben kon na den tapu. Ma furu tron den apostel ben sorgu taki sma kisi a krakti fu man du wondru noso sma ben kisi a krakti dati te wan fu den apostel ben de nanga den.Tori 8:14-18; 10:44, 45.

^ paragraaf 13 Paragraaf 13: Den sani di na apostel Paulus taki na ini Tori fu den apostel 20:29, 30 e sori taki sma ben o bigin pori a gemeente na tu fasi. A fosi fasi na taki falsi Kresten („a takru wiwiri”) ben o ’kon na mindri’ den tru Kresten. A di fu tu fasi na taki ’sma na mindri’ den tru Kresten ben o kon nanga falsi leri èn den ben o „taki sani di no tru”.

^ paragraaf 17 Paragraaf 17: Luku na artikel „Unu o si taki mi o de nanga unu ala dei”, na tapu bladzijde 11, paragraaf 6 na ini a srefi Waktitoren disi.