Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2013

Yehovah e tai hori na sma èn a e gi sma pardon

Yehovah e tai hori na sma èn a e gi sma pardon

„Yehovah, yu na wan bun Gado èn yu de klariklari fu gi sma pardon. Yu e sori ala den sma di e bari kari yu, bun-ati pasa marki.”PS. 86:5.

1, 2. (a) Fu san ede wi lobi mati di e horibaka gi wi èn di e gi wi pardon? (b) Sortu aksi wi o luku?

SUMA na wan tru mati gi yu? Wan Kresten sisa di nen Ashley e taki: „Gi mi wan tru mati na wan sma di e horibaka gi mi ala ten èn di e gi mi pardon te mi meki wan fowtu.” Wi alamala lobi mati di e horibaka gi wi èn di e gi wi pardon. Te wi abi den sortu mati dati, dan wi sabi taki wan sma e horibaka gi wi ala ten èn taki a lobi wi.Odo 17:17.

2 Yehovah na a moro bun mati di wi kan abi fu di a e tai hori na wi èn a e gi wi pardon. A psalm skrifiman ben taki disi: „Yehovah, yu na wan bun Gado èn yu de klariklari fu gi sma pardon. Yu e sori ala den sma di e bari kari yu, bun-ati pasa marki” (Ps. 86:5). San a wani taki fu tai hori na sma èn fu gi sma pardon? Fa Yehovah e sori den moi fasi disi? Fa wi kan teki na eksempre fu en? Te wi kisi piki na tapu den aksi dati, dan wi o kisi moro lobi gi Yehovah di de a moro bun mati fu wi. Den piki o yepi wi tu fu de moro bun mati nanga den brada nanga sisa fu wi.1 Yoh. 4:7, 8.

YEHOVAH E TAI HORI NA WI

3. San a wani taki dati wan sma e tai hori na wan trawan?

3 Wan sma e tai hori na wan trawan di a lobi. A sma e sori taki a lobi a trawan fu di a e tan yepi en èn a e tan horibaka gi en. A no e du dati wawan te a makriki, ma sosrefi na ini muilek situwâsi. Bijbel e taki dati Yehovah na wan ’sma di e tan horibaka gi en pipel’. Yehovah na a wan-enkri sma di e tan horibaka gi wi awansi san e pasa.Openb. 16:5.

4, 5. (a) Fa Yehovah e sori taki a e tai hori na wi? (b) Fa wi kan kisi deki-ati te wi e prakseri a fasi fa Yehovah sori taki a e tai hori na en futuboi?

 4 Fa Yehovah e sori taki a e tai hori na wi? Noiti a e drai baka gi den futuboi fu en di e tan gi yesi na en. Kownu David ben de so wan futuboi èn a ben taki dati Yehovah e tai hori na sma. (Leisi 2 Samuel 22:26.) Di problema miti David, Yehovah tan horibaka gi en. Dati meki a yepi en, a kibri en èn a frulusu en (2 Sam. 22:1). David ben sabi taki Yehovah no ben taki nomo dati a e tai hori na den futuboi fu en, ma a ben yepi den trutru. Fu san ede Yehovah ben tai hori na David? Fu di David srefi ben de wan sma di ben e „tai hori” na en. Yehovah lobi den futuboi fu en di e tan dini en èn a e sori den tu taki a e tan horibaka gi den.Odo 2:6-8.

5 Te wi e prakseri na sortu fasi Yehovah sori taki a e tai hori na en futuboi, dan dati kan gi wi deki-ati. Reed, wan brada di tan Yehovah fayafaya, e taki: „Mi e kisi deki-ati trutru te mi e leisi fa Yehovah yepi David na ini muilek ten. Aladi David ben musu lowe ibri tron baka èn a ben musu libi na ini bergi-olo, toku Yehovah tan yepi en. A sani dati e gi mi furu deki-ati! A e memre mi taki awansi na ini sortu situwâsi mi de èn awansi a gersi leki nowan howpu no de, toku Yehovah o yepi mi so langa mi e tai hori na en.” A no de fu taki dati yu e denki a srefi tu.Rom. 8:38, 39.

6. Fa Yehovah e sori taki a no e tai hori na sma nomo èn sortu wini den futuboi fu en e kisi?

6 Ma Yehovah no e tai hori na sma nomo. A e tai hori tu na den markitiki fu en. Yehovah srefi e taki: „Awinsi wan sma kon owru, mi e tan a srefi ala ten” (Yes. 46:4). Ala ten te a e teki wan bosroiti, a e hori den markitiki fu en. Noiti den markitiki fu en e kenki (Mal. 3:6). Boiti dati, ala ten Yehovah e du san a taki èn san a pramisi (Yes. 55:11). Fu di Yehovah na so wan Gado, meki ala den futuboi fu en e kisi wini te den tan gi yesi na en. Fa so? Te wi e du ala san wi man fu hori den markitiki fu Yehovah, dan wi kan de seiker taki a o blesi wi soleki fa a pramisi.Yes. 48:17, 18.

TAI HORI NA TRAWAN NELEKI YEHOVAH

7. San na wan fasi fa wi kan tai hori na trawan neleki Yehovah?

 7 Fa wi kan tai hori na trawan neleki Yehovah? Wan fasi fa wi kan du dati na te wi e yepi den wan di de na ini wan muilek situwâsi (Odo 3:27). Fu eksempre, yu sabi wan brada noso sisa di lasi-ati fu di a abi problema nanga en gosontu, fu di en famiri e gens en, noso fu di a abi wan swakifasi? Yu kan gi a sma deki-ati fu di yu e taigi en ’bun sani èn sani di e gi en trowstu’ (Sak. 1:13). * Te yu e du dati, dan yu e sori taki yu de wan trutru mati di e horibaka gi en. Yu de wan sma „di lobi [en] moro leki wan brada”.Odo 18:24.

8. Fa wi kan sori taki wi e tai hori na wi trowpatna?

8 Wi kan de leki Yehovah tu te wi e tai hori na den wan di wi lobi. Fu eksempre, te wi trow, dan wi sabi taki wi no musu waka gi wi trowpatna (Odo 5:15-18). Sobun, wi no o du sutadu èn wi o wai pasi gi ala sani di kan meki wi du sutadu (Mat. 5:28). Boiti dati, wi kan sori taki wi e tai hori na wi brada nanga sisa te wi no e taki takru fu den èn te wi no e fruteri lei fu den. Wi musu weigri srefi fu arki te wan sma e taki takru fu den noso e fruteri lei fu den.Odo 12:18.

9, 10. (a) Na suma wi musu tai hori ala ten? (b) Fu san ede a no makriki ala ten fu du san Yehovah taki?

9 Wi wani meki ala muiti fu tai hori na  Yehovah. Fa wi kan du dati? Te wi e si sani soleki fa a e si sani. Wi musu lobi san a lobi èn efu a no lobi wan sani, dan wi srefi no musu lobi a sani dati tu. Boiti dati, wi musu tyari wisrefi na wan fasi di Yehovah feni bun. (Leisi Psalm 97:10.) O moro wi e kon si sani soleki fa Yehovah e si en, o moro wi o wani gi yesi na en.Ps. 119:104.

10 A tru taki a no makriki ala ten fu du san Yehovah taki. Kande wi musu meki furu muiti fu tan gi yesi na en. Fu eksempre, kande wan sisa wani trow, ma a no feni wan brada ete (1 Kor. 7:39). Kande sma na en wrokope e pruberi fu suku wan man gi en. A kan taki a sisa e firi lasi-ati son leisi fu di a de en wawan. Ma fu di a wani tan gi yesi na Yehovah, meki a abi a fasti bosroiti fu no trow noso hori nanga wan man di no e dini Gado. Wi e warderi den sortu sisa disi di de wan bun eksempre fu sma di e tai hori na Yehovah. Wi kan de seiker taki Yehovah o blesi ala den sma di e tan gi yesi na en, awansi den de na ini wan muilek situwâsi.Hebr. 11:6.

’Wan mati de di lobi yu moro leki wan brada.’—Odo 18:24 (Luku paragraaf 7)

„Gi makandra pardon nanga un heri ati.”—Ef. 4:32 (Luku paragraaf 16)

YEHOVAH E GI SMA PARDON

11. O ten wan sma e sori taki a e gi trawan pardon?

11 Wan fu den moro moi fasi fu Yehovah na taki a de klariklari fu gi sma pardon. O ten wan sma e sori taki a e gi trawan pardon? Wan sma di e gi pardon no e tan mandi nanga trawan te den du wan sani nanga en. Ma disi no wani taki dati a feni a fowtu fu a trawan bun noso taki a e du leki noti no pasa. Na presi fu dati a no e hori a sma na ati. Bijbel e leri wi taki Yehovah „de klariklari fu gi sma pardon” te den e sori trutru berow.Ps. 86:5.

12. (a) Fa Yehovah e gi sma pardon? (b) San a wani taki dati Gado e ’figi den sondu fu wi puru’?

12 Fa Yehovah e gi sma pardon? Te Yehovah e gi sma pardon, dan a e du dati „nanga en heri ati”. A e gi pardon dorodoro èn fu ala ten (Yes. 55:7). Fa wi sabi taki Yehovah e gi pardon dorodoro? Luku san Tori fu den apostel 3:19 e taki. (Leisi en.) Na apostel Petrus ben taigi den arkiman fu en taki den ben musu ’abi berow èn den ben musu  drai den libi’. Te wan sma du wan sondu èn a abi trutru berow, dan a e sari trutru taki a du a sondu. A e meki muiti fu no du a sondu baka (2 Kor. 7:10, 11). Boiti dati, te wan sma abi trutru berow, a musu ’drai en libi’. A no musu du ogri moro èn a musu tyari ensrefi na wan fasi di Gado feni bun. Efu den arkiman fu Petrus ben o sori trutru berow, dan san ben o de a bakapisi? Petrus taki dati Gado ben o ’figi den sondu fu den puru’ neleki te wan sma ben o figi wan sani puru di a skrifi. Sobun, te Yehovah e gi wan sma pardon, dan a e figi den sondu fu a sma puru krinkrin. A e gi en pardon dorodoro.Hebr. 10:22; 1 Yoh. 1:7.

13. Sortu dyaranti wi e kisi te wi e leisi den wortu „mi no o memre den sondu fu den moro”?

13 Fa wi du sabi taki Yehovah e gi sma pardon fu ala ten? Te wi e luku san Yehovah taigi Yeremia na ini wan profeititori di abi fu du nanga den salfu Kresten, dan wi e si taki a e gi sma pardon trutru. (Leisi Yeremia 31:34.) Yehovah taki: „Mi o gi den pardon fu den ogri sani di den du, èn mi no o memre den sondu fu den moro.” Sobun, te Yehovah gi wi pardon fu wan sondu di wi du, dan a no e tan denki a sondu dati fu man krutu wi noso strafu wi ibri leisi baka gi dati. Ma a e gi wi pardon fu den sondu fu wi èn a e frigiti den fu ala ten.Rom. 4:7, 8.

14. Fa wi kan kisi trowstu te wi e denki dipi fu a fasi fa Yehovah e gi pardon? Gi wan eksempre.

14 Wi e kisi trowstu te wi e denki dipi fu a fasi fa Yehovah e gi pardon. Luku na eksempre fu wan sisa di wi o kari Elaine. Furu yari pasa den ben puru en fu a gemeente. Wan tu yari baka dati den teki en baka na ini a gemeente. Elaine e taki dati a no ben e bribi taki Yehovah ben gi en pardon trutru. A ben abi a firi taki Yehovah ben lobi trawan moro leki en. Ma toku a ben kisi trowstu te a ben e denki dipi fu a fasi fa Yehovah e gi sma pardon soleki fa Bijbel e sori. Fu eksempre, a leisi taki te Yehovah gi wi pardon, dan a e wasi wi sondu puru krinkrin. Elaine e taki: „Noiti ete mi ben frustan so krin taki Yehovah lobi mi trutru.” Na ini wan fu den buku fu wi a ben leisi: „Te Yehovah e gi wi pardon fu wi sondu, dan wi no abi fu firi leki a flaka fu den sondu dati sa tan wi heri libi langa.” * Den wortu disi ben gi en furu trowstu. Elaine e taki moro fara: „Mi kon si taki mi no ben e bribi taki Yehovah ben kan gi mi pardon dorodoro èn mi ben denki taki mi ben o abi konsensi fonfon mi heri libi langa. Mi sabi taki a o teki ten fu kenki mi denki, ma mi e bigin firi kaba taki mi kan kon moro krosibei na Yehovah. A gersi leki wan hebi komoto na mi tapu.” Iya, wi e dini wan Gado di lobi wi èn di e gi wi pardon trutru.Ps. 103:9.

WI MUSU GI SMA PARDON NELEKI YEHOVAH

15. Fa wi kan gi sma pardon neleki Yehovah?

15 Te wan sma abi trutru berow, dan wi kan gi en pardon neleki Yehovah. (Leisi Lukas 17:3, 4.) Memre taki te Yehovah e gi wi pardon, a no e tan denki den sani di wi du, ma a e frigiti den. Te wi e gi wan sma pardon, dan wi srefi kan frigiti a sondu fu en tu èn wi no musu taki fu en moro.

16. (a) San a wani taki fu gi trawan pardon èn san a no wani taki? (b) San wi musu du efu wi wani taki Gado gi wi pardon?

 16 Te wi gi sma pardon fu wan sani di den du nanga wi, dan disi no wani taki dati wi feni a fowtu fu den bun noso taki den kan du nanga wi san den wani. Ma a wani taki dati wi no e hori den na ati. Efu wi wani taki Gado gi wi pardon, dan a prenspari fu gi trawan pardon neleki en (Mat. 6: 14, 15). Fu di Yehovah abi sari-ati, meki a e hori na prakseri taki wi meki fu doti (Ps. 103:14). Sobun, te trawan taki noso du wan sani di hati wi, dan wi musu hori na prakseri taki den na sondu sma neleki wi. Dati meki wi musu gi den pardon nanga wi heri ati.Ef. 4:32; Kol. 3:13.

Meki wi begi nanga wi heri ati fu kan gi trawan pardon (Luku paragraaf 17)

17. San kan yepi wi efu wan brada noso sisa du wi wan hati sani?

 17 A no de fu taki dati a no makriki ala ten fu gi trawan pardon. Srefi son salfu Kresten na ini a fosi yarihondro ben feni en muilek fu lusu trobi di den ben abi (Fil. 4:2). San kan yepi wi efu wan brada noso sisa du wi wan hati sani? Luku na eksempre fu Yob. Elifas, Bildad nanga Sofar ben kari densrefi mati fu Yob. Ma yu kan frustan taki a hati en di den taigi en taki a du sondu aladi dati no ben de so (Yob 10:1; 19:2). Te fu kaba Yehovah piri-ai gi den falsi mati dati. Gado taigi den fu go na Yob èn fu tyari wan ofrandi fu kisi pardon gi den sondu fu den (Yob 42:7-9). Ma Yehovah ben wani tu taki Yob srefi du wan sani. San a ben musu du? Yehovah taigi Yob fu begi gi den man disi. Yob du san Yehovah taigi en èn Yehovah blesi en fu di a ben de klariklari fu gi den pardon. (Leisi Yob 42:10, 12, 16, 17.) San wi kan leri fu a tori disi? Te wi e begi nanga wi heri ati gi wan sma di du wi wan hati sani, dan dati kan yepi wi fu no hori a sma dati na ati.

TAN SORI WARDERI GI DEN MOI FASI FU YEHOVAH

18, 19. Fa wi kan kisi moro warderi gi den moi fasi fu Yehovah?

18 A gi wi deki-ati trutru fu luku den difrenti fasi fu Yehovah di e sori taki a lobi wi. Wi si taki a makriki fu taki nanga en, a no lobi a wan sma moro a trawan, a lobi fu gi sma sani, a e fiti ensrefi, a e tai hori na wi èn a e gi sma pardon. A no de fu taki dati wi taki frafra nomo fu den fasi disi fu Gado. Ma te wi o libi fu têgo, dan wi o abi na okasi fu leri moro fu Yehovah (Preik. 3:11). Wi e agri nanga na apostel Paulus di ben skrifi: „Ai, den blesi, a koni nanga a sabi fu Gado, furu trutru!” Wi kan taki a srefi tu fu den tra fasi fu Gado soleki lobi nanga den tra siksi fasi di wi ben luku.Rom. 11:33.

19 Meki wi alamala tan du muiti fu kisi moro warderi gi den moi fasi fu Yehovah. Wi kan du dati te wi e ondrosuku den fasi disi moro fini, te wi e denki dipi fu den èn te wi e pruberi fu abi den fasi disi tu (Ef. 5:1). Na so wi o agri moro nanga moro nanga a psalm skrifiman di ben singi: „A bun gi mi fu kon krosibei na Gado.”Ps. 73:28.

^ paragraaf 7 Efu yu wani sabi moro fu a tori disi, dan luku a buku di nen Meki Gado tan lobi yu, kapitel 12, paragraaf 15-22.