Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2013

Sori warderi gi den moi fasi fu Yehovah

Sori warderi gi den moi fasi fu Yehovah

„Teki na eksempre fu Gado leki lobi pikin.”EF. 5:1.

1. (a) Sortu fasi fu Yehovah yu e prakseri nofo tron? (b) Sortu wini wi kan kisi te wi e ondrosuku den fasi fu Gado?

TE YU luku a fasi fa Yehovah de, dan sortu fasi fu en yu e denki wantronso? Kande yu e denki fu a lobi, a retidu, a koni noso a makti fu en. Ma wi sabi taki Yehovah abi someni moi fasi ete di sma lobi. Te yu luku en bun, dan na ini a ten di pasa den buku fu wi taki fu moro leki 40 difrenti fasi fu Yehovah. Prakseri nomo omeni yu kan leri fu Yehovah te yu noso yu osofamiri e ondrosuku den fasi fu en. Sortu wini wi kan kisi te wi du dati? A kan yepi wi fu kisi moro warderi gi wi hemel Tata. O moro warderi wi abi gi en, o moro wi wani kon krosibei na en èn o moro wi wani teki na eksempre fu en.Yos. 23:8; Ps. 73:28.

2. (a) Gi wan eksempre di e sori fa wi kan abi moro warderi gi den moi fasi fu Yehovah. (b) San wi o luku na ini na artikel disi nanga den tu trawan di e kon?

2 Fa yu kan abi moro warderi gi wan sani? We, kon meki wi taki dati yu o nyan wan sani di yu no nyan noiti ete. A fosi sani di yu e du na taki yu e smeri fa a nyanyan switi èn baka dati yu e tesi en. Te yu tesi fa a switi, dan yusrefi o bigin bori en fu di yu lobi en. Na so a de tu efu wi wani kisi moro warderi gi den fasi fu Yehovah. A fosi sani di wi musu du na fu leri moro fu den moi fasi fu en. Baka dati wi o go denki dipi fa a e sori den fasi dati èn te fu kaba wi srefi o du muiti fu sori den fasi dati tu (Ef. 5:1). Na artikel disi nanga den tu trawan di e kon, o yepi wi fu sori moro warderi gi den tra moi fasi di Gado abi. Wi o taki san na a fasi, wi o luku fa Yehovah e sori en èn fa wi kan de leki en.

A MAKRIKI FU TAKI NANGA YEHOVAH

3, 4. (a) San e meki en makriki fu taki nanga wan sma? (b) Fa Yehovah e gi wi a dyaranti taki wi kan taki makriki nanga en?

3 Meki wi go luku fosi san e meki en makriki fu taki  nanga wan sma. Te wan sma abi switifasi èn te a abi ten fu taki nanga trawan, dan sma no o frede fu go taki nanga en. Te yu e luku fa so wan sma e taki, fa a e du èn te yu luku a fesi fu en, dan yu kan si taki a wani arki yu èn taki a wani yepi yu.

4 Fa Yehovah e sori taki wi kan taki makriki nanga en? Aladi en na a Mekiman fu hemel nanga grontapu, toku a e taigi wi fu taki nanga en na ini begi. A e arki den begi fu wi èn a e gi wi a yepi di wi abi fanowdu. (Leisi Psalm 145:18; Yesaya 30:18, 19.) Wi kan taki nanga Gado o langa wi wani, awansi pe wi de noso awansi o lati a de. Wi no abi fu frede fu taki nanga en fu di wi sabi taki noiti en ati o bron nanga wi (Ps. 65:2; Yak. 1:5). Den sani di Gado Wortu e fruteri wi fu Yehovah skrifi na so wan fasi taki libisma man frustan taki Gado wani wi fu taki nanga en. Fu eksempre, a psalm skrifiman David ben taki dati „den ai fu Yehovah e si” wi èn taki ’a e hori wi steifi nanga en reti-anu’ (Ps. 34:15; 63:8). A profeiti Yesaya ben agersi Yehovah nanga wan skapuman, di a taki: „Nanga en anu a o tyari den pikin skapu kon na wán èn a o hori den na en borsusei te a e tyari den” (Yes. 40:11). Prakseri a sani dati! Yehovah wani wi fu de krosibei fu en neleki wan lobi-ati skapuman di e hori wan pikin skapu na en borsusei. Iya, a makriki trutru fu taki nanga wi hemel Tata! Fa wi kan de leki en?

WAN TUMUSI PRENSPARI FASI DI OWRUMAN MUSU ABI

5. Fu san ede sma musu man taki makriki nanga owruman?

5 No so langa pasa, den ben aksi wan tu brada nanga sisa na ini difrenti kondre a sani disi: „Sortuwan fu den fasi fu wan owruman yu lobi moro?” Pikinmoro alamala piki: „A musu makriki fu taki nanga en.” A no de fu taki dati ibri Kresten musu  du muiti fu abi a fasi disi, ma a prenspari spesrutu gi owruman taki sma no frede fu go taki nanga den (Yes. 32:1, 2). Fu san ede dati de so prenspari? Wan sisa ben taki dati efu a makriki fu taki nanga wan owruman, dan yu kan kon sabi den tra moi fasi fu en tu. A sani disi di a sisa taki tru. Ma san e meki taki a makriki fu taki nanga wan sma?

6. San yu kan du so taki trawan feni en makriki fu taki nanga yu?

6 Wan fasi fu du dati na fu sori taki wi e broko wi ede nanga trawan. Efu wan owruman e broko en ede nanga trawan èn a de klariklari fu yepi den brada, den sisa nanga den yonguwan, dan a o de moro makriki gi den fu go taki nanga na owruman (Mark. 10:13-16). Carlos, wan boi fu 12 yari, taki: „Te mi e luku den owruman na ini a zaal, dan mi e si fa den e lafu nanga trawan èn fa den e sori switifasi gi sma. Na a sani dati mi lobi fu den.” A no nofo te wan owruman feni taki en na wan sma di trawan kan kon taki nanga en makriki. Den sani di a e du musu sori dati tu (1 Yoh. 3:18). Fa a kan du dati?

7. Fu san ede sma wani kon taki nanga wi te wi weri wan lapelkarta èn san wi kan leri fu dati?

7 Prakseri na eksempre disi: No so langa pasa, wan brada ben komoto na wan kongres na wan tra kondre èn a ben e go baka na oso nanga opolani. A ben weri en lapelkarta. Ne wan man di ben e wroko na ini na opolani si a karta fu en nanga den wortu: „Meki Gado Kownukondre kon!” Dati meki a man taigi a brada: „Iya, meki a kon. Wi musu taki pikinso fu a sani disi.” Bakaten den taki èn a man teki wan tu tijdschrift. Furu fu wi ondrofeni so wan sortu sani tu. Ma fu san ede sma wani kon taki nanga wi te wi weri wan lapelkarta? Te yu luku en bun, a de leki a karta e taigi sma: „No frede fu taki nanga mi. Aksi mi pe mi e go.” A lapelkarta fu wi e sori ala sma taki wi de klariklari fu fruteri den san wi e bribi. Na so Kresten owruman wani sori den brada nanga sisa taki den no abi fu frede fu taki nanga den. Fa den kan sori dati?

8. Fa owruman e sori taki den e broko den ede trutru nanga trawan èn fa den sma na ini a gemeente feni dati?

8 Ala kondre abi tra gwenti. Ma furu tron den brada nanga sisa fu wi e si taki wi e broko wi ede nanga den trutru te wi e lafu nanga den, te wi e seki den anu, noso te wi e gi den odi na wan switi fasi. Suma musu de a fosiwan di e du dati? Luku na eksempre di Yesus gi. Mateyus skrifi taki di Yesus kon makandra nanga den disipel fu en, dan na en fosi go na den èn na en bigin taki nanga den (Mat. 28:18). Na so owruman na ini a ten disi no musu wakti teleki brada nanga sisa kon taki nanga den. Ma den musu de a fosiwan di e du dati. Fa den sma na ini a gemeente feni dati? Wan pionier sisa, di abi 88 yari, e taki: „Te mi e kon na ini a zaal, dan mi lobi en te den owruman e lafu nanga mi èn te den e taki sani fu gi mi deki-ati.” Wan tra sisa, di e dini Yehovah langa ten kaba, e taki: „A kan gersi wan pikin sani, ma te wan owruman e gi mi wan switikon na a konmakandra èn te a e lafu nanga mi, dan dati de wan bigi sani gi mi.”

MEKI TEN FU TAKI NANGA YU BRADA NANGA SISA

9, 10. (a) Sortu moi eksempre Yehovah gi wi? (b) Fa owruman kan teki na eksempre fu Yehovah?

 9 A no de fu taki dati efu wi wani meki en makriki gi tra sma fu kon taki nanga wi, dan wi musu sorgu taki wi meki ten gi den. Na ini a tori disi Yehovah na wan bun eksempre gi wi, fu di „a no de fara fu nowan fu wi” (Tori 17:27). Wan fasi fa owruman  kan sorgu taki sma kan kon taki nanga den na te den e meki ten bifo èn baka a konmakandra fu taki nanga den brada nanga sisa, den yonguwan nanga den owruwan. Wan brada di e pionier, taki: „Te wan owruman aksi mi fa a e go nanga mi èn efu a e teki ten fu arki mi, dan mi e firi taki a e warderi mi.” Wan sisa, di e dini Yehovah 50 yari kaba, e taki: „Owruman di e meki ten fu kon taki nanga mi, e gi mi a firi taki mi prenspari gi den.”

10 A no de fu taki dati Kresten owruman abi tra frantwortu tu. Ma den musu sorgu taki den meki ten fu taki nanga den brada nanga sisa na ini a gemeente.

YEHOVAH NO LOBI A WAN SMA MORO A TRAWAN

11, 12. (a) O ten wi kan taki dati wan sma no e teki sma sei? (b) San Bijbel e sori fu Yehovah na ini a tori disi?

11 Ete wan moi fasi fu Yehovah na taki a no lobi a wan sma moro a trawan (Tori 10:34). Disi wani taki dati a no e teki sma sei. Efu wan sma wani tyari ensrefi na so wan fasi, a musu feni fosi taki ala sma na a srefi. Soso te a e denki so, a o man sori taki a no e teki sma sei. Sobun, wan sma di abi a fasi disi no o feni taki a wan sma bun moro a trawan. A no o luku trawan fesi èn a no o luku omeni moni wan sma abi. Na presi fu dati a o luku fa a sma de trutru.

12 Yehovah na a moro bun eksempre fu wan sma di no e teki sma sei. Bijbel e taki dati a „no lobi a wan sma moro a trawan”. (Leisi Tori fu den apostel 10:34, 35; Deuteronomium 10:17.) Wan sani di pasa na ini a ten fu Moses e sori taki disi de so trutru.

Den umapikin fu Selafeyad ben breiti taki Yehovah ben e lespeki den (Luku paragraaf 13, 14)

13, 14. (a) Sortu problema den feifi umapikin fu Selafeyad ben abi? (b) Fa Yehovah sori taki a no e teki sma sei?

 13 Fosi den Israelsma go na ini a Pramisi Kondre, feifi sisa di no ben trow ben abi wan problema. San ben de a problema dati? Den ben sabi taki a famiri fu den ben o kisi wan pisi gron na ini a kondre neleki ala tra famiri na ini Israel (Num. 26:52-55). Ma den papa Selafeyad, di ben de fu a lo Manase, ben dede kaba. Soleki fa a gwenti ben de, dan soso den manpikin ben abi a reti fu kisi a pisi gron fu den papa. Ma Selafeyad ben abi soso umapikin (Num. 26:33). A de so taki na den tra famiriman fu den ben o kisi a gron? San den umapikin fu Selafeyad ben o du?

14 Den feifi sisa disi go na Moses, dan den aksi en: „Fu san ede a nen fu wi papa musu lasi gowe na ini a lo fu den, soso fu di a no kisi manpikin?” Den begi Moses: „Grantangi, gi wi wan pisi gron na ini a kontren di den brada fu wi papa kisi.” San Moses piki den? A taigi den taki a no man drai a wèt gi den? Nôno, na presi fu dati a „go aksi Yehovah fa a ben musu  krutu a tori disi” (Num. 27:2-5). San Yehovah piki? Yehovah taigi Moses: „Den umapikin fu Selafeyad abi leti. Yu musu gi den wan pisi gron leki famirigudu na ini a kontren di den papa brada kisi. A famirigudu fu den papa musu kon de fu den.” Yehovah go moro fara leki dati srefi. A taigi Moses fu skrifi a sani disi leki wan wèt. A taki: „Efu wan man dede sondro fu kisi wan manpikin, dan un musu gi a famirigudu fu en na en umapikin” (Num. 27:6-8; Yos. 17:1-6). Sensi a ten dati ala umasma na ini Israel di ben de na ini a srefi situwâsi ben o abi a reti dati.

15. (a) San Yehovah e du gi a pipel fu en, srefi gi den wan di no abi sma fu yepi den? (b) Sortu tra Bijbel eksempre e sori taki Yehovah no e teki sma sei?

15 A bosroiti di Gado teki e sori taki a abi switifasi èn taki a no e teki sma sei. Den feifi sisa no ben abi nowan sma fu yepi den, ma Yehovah gi den a srefi reti di ala den tra Israelsma ben abi èn a sori lespeki gi den (Ps. 68:5). Disi na soso wan fu den someni moi eksempre na ini Bijbel di e sori taki Yehovah no e teki sma sei, ma gi en ala den futuboi fu en na a srefi.1 Sam. 16:1-13; Tori 10:30-35, 44-48.

WI KAN TEKI NA EKSEMPRE FU YEHOVAH

16. Fa wi kan teki na eksempre fu Yehovah di no e teki sma sei?

16 Fa wi kan teki na eksempre fu Yehovah di no e teki sma sei? Memre taki a wan-enkri fasi fa wi kan sori taki wi no e teki sma sei, na te wi denki taki ala sma na a srefi. A kan taki yu denki taki yu na wan sma di no e teki sma sei. Ma kande yu o agri taki a no makriki ala ten fu go luku fa wisrefi e denki. Sobun, san wi kan du fu kon sabi efu wi e sori taki wi no e teki sma sei trutru? We, di Yesus ben wani sabi san sma ben e taki fu en, a aksi den mati fu en: „San den sma e taki fu a Manpikin fu libisma? Suma den e prakseri taki a de?” (Mat. 16:13, 14) Fu san ede yu no e du leki Yesus? Yu ben kan aksi wan mati di sabi yu bun fu taigi yu krin efu yu abi a gwenti fu teki sma sei. Fu eksempre, kande a e taigi yu taki son leisi yu e desko sma fu son ras noso taki yu e sori moro switifasi gi sma di abi moni noso di kisi hei skoroleri. Efu a taigi yu so wan sani, dan san yu kan du? Te yu e begi Yehovah, taigi en krin san yu e firi èn aksi en fu kenki a denki fu yu so taki yu kan de moro leki en èn yu kan sori taki ala sma na a srefi gi yu.Mat. 7:7; Kol. 3:10, 11.

17. San wi kan du fu sori taki wi no e teki sma sei?

 17 Na ini a gemeente wi kan sori taki wi abi lespeki nanga switifasi gi ala brada nanga sisa. Na so wi e sori taki wi de leki Yehovah di no e teki sma sei. Fu eksempre, te wi e kari sma kon na wi oso, dan wi kan kari ala sortu brada nanga sisa kon, soleki sma fu difrenti kulturu, sma di pôti, pikin di no abi papa nanga mama moro, noso sma di lasi den trowpatna na ini dede. (Leisi Galasiasma 2:10; Yakobus 1:27.) Boiti dati, te wi de na ini a preikiwroko, wi e fruteri ala sortu sma a bun nyunsu, awansi fu sortu kondre den de. Wi breiti taki wi abi buku noso tijdschrift na ini sowan 600 tongo. Disi e sori taki wi na wan pipel di no e teki sma sei.

18. Fa yu o sori taki yu e warderi den moi fasi fu Yehovah?

18 Wi si taki a makriki fu taki nanga Yehovah èn taki a no e teki sma sei. Te wi e teki ten fu prakseri den moi fasi disi fu en, dan wi e kisi moro warderi gi en. Disi o meki taki wi wani de leki Yehovah èn wi o meki muiti fu sori den fasi disi te wi de nanga wi brada nanga sisa èn te wi e miti sma na ini a preikiwroko.

„Yehovah de krosibei fu ala den wan di e kari en.”—Ps. 145:18 (Luku paragraaf 9)

„Yehovah un Gado . . . no lobi a wan sma moro a trawan.”—Deut. 10:17 (Luku paragraaf 17)