Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2013

Owruman, unu o man gi krakti baka na „den wan di weri”?

Owruman, unu o man gi krakti baka na „den wan di weri”?

Angela, * na wan sisa di pasa 30 yari èn a no trow. A e senwe pikinso fu di a e wakti den owruman di o kon taki nanga en. San den o taigi en? A sabi taki a misi wan tu konmakandra, ma te a komoto na wroko a weri srefisrefi fu di a musu sorgu gi owrusma heri dei. Boiti taki a abi en eigi broko-ede, a e broko en ede tu nanga a gosontu fu en mama.

Efu yu na wan owruman èn yu ben musu go na Angela, dan fa yu ben o gi a sisa disi „di weri” deki-ati? (Yer. 31:25) Boiti dati, fa yu ben o sreka yusrefi te yu ben musu go na wan brada noso sisa fu gi en deki-ati?

HORI A SITUWÂSI FU YU BRADA NOSO SISA NA PRAKSERI

Wi alamala e kon weri son leisi fu di wi abi wi grontapuwroko noso fu di wi abi frantwortu na ini a gemeente. Fu eksempre, a profeiti Danièl „ben kon weri srefisrefi” di a kisi wan fisyun di a no ben man frustan (Dan. 8:27). San yepi en? Gado seni na engel Gabrièl go na en fu fruteri en san a fisyun ben wani taki èn fu taigi en taki Yehovah ben yere den begi fu en. Na engel taigi en tu taki a ben de wan sma ete „di Gado lobi srefisrefi” (Dan. 9:21-23). Na wan tra okasi wan tra engel kon na Danièl èn a gi en deki-ati nanga den wortu di a taki.Dan. 10:19.

Fosi yu go na wan brada noso sisa, yu musu prakseri a situwâsi fu en

Na a srefi fasi yu kan gi wan brada noso sisa deki-ati te a weri noso lasi-ati. Ma fosi yu go na so wan sma, yu musu prakseri a situwâsi fu en. Aksi yusrefi: ’Sortu problema a abi? Fa den problema disi e meki a kon weri? Sortu moi fasi a sma abi?’ Richard, di de wan owruman moro leki 20 yari kaba, e taki: „Mi e poti prakseri na den bun sani di  a brada noso sisa e du.” A e taki moro fara: „Fosi mi go na en, mi e luku na ini a sortu situwâsi a de. Dati e meki en moro makriki gi mi fu sabi san mi musu taki fu gi en a deki-ati di a abi fanowdu.” Efu wan tra owruman o kon nanga yu te yu o go na wan brada noso sisa, dan fu san ede unu no e taki fosi fu a situwâsi fu en?

MEKI YU BRADA FIRI KOROSTU

Kande yu e agri taki wan sma kan firi syen te a musu taki fu ensrefi. Luku wan eksempre: Kon meki wi taki dati wan brada e syen fu taki nanga den owruman te den e kon na en. San yu leki owruman kan du fu meki a brada firi korostu? Te yu e go na en, dan sori switifasi fu di yu e lafu nanga en èn yu e taigi en wan tu bun sani di e gi en deki-ati. Michael na wan brada di de owruman moro leki 40 yari kaba. Te a e go na wan brada noso sisa, dan a e bigin a takimakandra so: „Yu sabi, wan fu den moro moi grani di wan owruman abi na fu go luku den brada nanga sisa na den oso èn fu kon sabi den moro bun. Dati meki mi breiti taki mi kon luku yu tide.”

Na a bigin fu a takimakandra yu kan bosroiti fu begi nanga a brada. Te yu e begi, dan yu kan taki fu den bun fasi fu a brada soleki a bribi nanga a lobi fu en, noso a fasi fa a e horidoro. Na dati na apostel Paulus du di a begi gi den brada fu en (1 Tes. 1:2, 3). Te yu e taki na ini begi fa yu e denki fu den moi fasi fu yu brada, dan yu e sreka yu ati èn a di fu en, so taki unu kan abi wan takimakandra di o gi en deki-ati. Ray, wan owruman di abi furu ondrofeni, e taki: „Son leisi wi alamala e frigiti den bun sani di wi e du. Sobun, te wan sma e memre wi na den sani dati, dan wi e kisi deki-ati.”

GEBROIKI BIJBEL FU GI TRAWAN DEKI-ATI

Neleki fa Paulus gi den deki-ati na den brada nanga sisa fu en di a fruteri den „sani di abi fu du nanga Gado”, na so yu kan gebroiki Bijbel tu fu gi yu brada nanga sisa deki-ati awansi yu leisi wán tekst nomo gi  den (Rom. 1:11). Fu eksempre, kande wan brada lasi-ati èn a abi a firi taki a no warti noti. So wan brada kan firi leki a psalm skrifiman di ben agersi ensrefi nanga „wan lerisaka di anga na ini smoko” èn di kon drei (Ps. 119:83, 176). Te yu fruteri en syatu san a tekst disi wani taki, dan yu kan taigi en taki yu sabi taki a „no frigiti” den wèt fu Gado.

Kon meki wi taki dati wan sisa drifi gowe fu a gemeente noso taki a no de nanga so furu faya moro. Fa yu kan gebroiki Bijbel fu gi en deki-ati? Kande yu kan gebroiki na agersitori fu na uma di ben lasi wan solfru moni (Luk. 15:8-10). A kan taki a solfru moni di na uma lasi ben de wan solfru sensi di ben de wan pisi fu wan diri keti. Te yu e taki fu na agersitori disi, dan dati kan yepi a sisa fu frustan taki en na wan warti pisi fu a Kresten gemeente. Baka te yu taki nanga en fu a sani dati, yu kan sori en fa Yehovah e sorgu gi en leki wan fu den pikin skapu fu en.

Nofo tron den brada nanga sisa fu wi lobi taki fu Bijbel. Sobun, hori na prakseri taki a no yu wawan abi fu taki. Te yu leisi wan tekst di e fiti na a situwâsi fu yu brada, yu kan aksi en fa a e denki fu wan spesrutu wortu noso pisi fu a tekst. Fu eksempre, te unu leisi 2 Korentesma 4:16, dan yu leki owruman kan aksi en: „Na sortu fasi Yehovah gi yu nyun krakti baka?” Na so unu kan abi wan takimakandra pe unu e ’gi makandra furu deki-ati’.Rom. 1:12.

Nofo tron den brada nanga sisa fu wi lobi taki fu Bijbel

Yu kan gi wan brada noso sisa deki-ati te yu e taki nanga en fu sma fu Bijbel di ben de na ini a srefi sortu situwâsi leki en. Wan sma di e sari noso di lasi-ati kan frustan bun san ben miti sma soleki Hana noso Epafroditus. Den sma disi ben lasi-ati son leisi, ma toku Gado ben tan si den leki warti sma (1 Sam. 1:9-11, 20; Fil. 2:25-30). Fu san ede yu no e taki fu wan tu moi Bijbel eksempre efu yu abi na okasi fu du dati?

TAN SORI TAKI YU E BROKO YU EDE NANGA YU BRADA NANGA SISA

Baka te yu go luku yu brada noso sisa, dan yu kan sori taki yu e broko yu ede trutru nanga en fu di yu e tan poti prakseri na en (Tori 15:36). Na a kaba fu a takimakandra, a ben o bun fu seti sani fu wroko makandra nanga en na ini a preikiwroko. Bernard, wan owruman di abi furu ondrofeni, gwenti fu go baka na den brada noso sisa di a ben go luku èn sondro fu meki den firi wan fasi, a e aksi den fa sani e go now. Te yu e sori taki yu e broko yu ede nanga yu brada nanga sisa, dan yu o si efu den abi moro yepi fanowdu.

Noiti ete a ben de so prenspari taki wi brada nanga sisa kisi a firi taki yu leki owruman e broko yu ede nanga den, taki yu e frustan den èn taki yu lobi den (1 Tes. 5:11). Sobun, fosi yu go na wan brada teki ten fu prakseri a situwâsi fu en. Begi fu a tori disi. Suku Bijbeltekst di o fiti na a sma. Dan yu o feni den yoisti wortu so taki yu kan gi „den wan di weri” deki-ati!

^ paragraaf 2 Wi kenki den nen.