Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2013

 ONDROFENITORI

Mi kisi furu blesi fu di mi gi yesi na Yehovah

Mi kisi furu blesi fu di mi gi yesi na Yehovah

Mi kan memre ete san mi papa taigi wi di wi ben pikin. A ben taki: „Wi leri wan moi sani fu Noa! Noa gi yesi na Yehovah, a ben lobi en osofamiri èn den alamala pasa a Frudu libilibi, fu di a heri osofamiri go na ini na ark.”

MI PAPA ben de wan man di ben abi sakafasi èn a ben e wroko tranga. A ben lobi retidu èn dati meki a ben lobi a Bijbel boskopu wantewante di a yere en na ini 1953. Sensi a ten dati a meki muiti fu leri wi den sani di a ben e leri. Na a bigin mi mama no ben wani libi den Lomsu gwenti fu en. Ma baka wan pisi ten en srefi poti bribi na ini den sani di Bijbel e leri.

Mi mama no ben man leisi bun. Mi papa ben wroko tranga na ini a gron èn a ben kon lati na oso. Dati meki a ben muilek gi mi papa nanga mama fu studeri nanga wi. Son leisi mi papa ben weri so te, taki a ben fadon na sribi te wi ben e studeri. Ma toku a muiti di a meki ben abi bun bakapisi. Fu di mi ben de a fosi pikin, meki mi ben yepi den fu gi leri na mi sisa èn den tu brada fu mi. Neleki fa mi papa ben gwenti du, na so mi ben lobi taki tu fa Noa ben lobi en osofamiri èn fa a ben tan gi yesi na Gado. Mi ben lobi a Bijbel tori disi trutru. Baka wan syatu pisi ten wi alamala bigin go na den konmakandra na a Kownukondre zaal na Roseto degli Abruzzi, wan foto na a syoro fu Italiakondre na a Se fu Adria.

Na ini 1955 di mi ben abi 11 yari, mi nanga mi mama abra den bergi go na west-sei fu go na wi fosi kongres na ini Rome. Sensi a ten dati den bigi konmakandra dati na wan spesrutu sani gi mi.

Na ini 1956 mi teki dopu èn syatu baka dati mi bigin pionier. Di mi ben abi 17 yari mi tron wan spesrutu pionier na ini a foto Latina di ben de na zuidsei fu Rome èn sowan 300 kilometer fu pe wi ben e libi. Latina ben de wan nyun foto èn nowan sma drape ben e broko den ede nanga san den birtisma ben e denki fu den. Mi nanga mi pionier patna ben e prisiri taki wi ben kan prati furu buku nanga tijdschrift. Ma fu di mi ben yongu, meki mi ben e misi mi famiri. Toku mi ben wani tan du a wroko fu Yehovah.

A trowdei fu wi

Bakaten den seni mi go na Milaan fu yepi sreka sani gi a „Têgo bun nyunsu” Internationaal Kongres fu a yari 1963. Mi ben wroko makandra nanga furu tra sma fu yepi seti sani  gi a kongres dati. Wan fu den sma ben de Paolo Piccioli, wan yongu brada fu a foto Florence. Na a di fu tu dei fu a kongres a hori wan moi lezing di ben taki fa sma di no trow kan du moro gi Yehovah. Mi kan memre taki mi ben e denki: ’A brada dati noiti no o trow.’ Ma dan wi bigin skrifi brifi gi makandra. Mi kon si taki mi nanga en ben wani du den srefi sani na ini a libi, wi ala tu ben lobi Yehovah èn wi ben wani gi yesi na en. Na ini 1965 mi nanga Paolo trow.

TAKIMAKANDRA NANGA KERKI FESIMAN

Tin yari langa mi ben de wan gewoon pionier na ini Florence. A ben moi fu si fa den gemeente drape ben e gro èn fa spesrutu den yonguwan ben e go na fesi. Mi nanga Paolo ben lobi taki nanga den fu Bijbel tori èn wi ben lobi du tra sani nanga den. Nofo tron Paolo ben e go plèi bal nanga den. A no de fu taki dati mi ben wani de nanga mi masra, ma mi ben kan si taki den yonguwan nanga den osofamiri na ini a gemeente ben kisi furu wini fu di a ben abi ten gi den èn a ben e poti prakseri na den.

Mi e prisiri te mi e prakseri den furu Bijbelstudie di wi ben abi. Wan fu den ben de Adriana di ben fruteri tu tra osofamiri san a ben e leri. Den osofamiri dati seti sani so taki wi ben kan kon makandra fu miti nanga wan priester fu taki fu difrenti kerkileri, soleki a leri di e taki dati Gado, a Manpikin nanga a santa yeye na wán èn a leri di e taki dati libisma abi wan yeye di e libi go doro te den dede. Dri kerki fesiman kon na a konmakandra dati. A fasi fa den ben e tyari den Bijbel leri fu den kon na krin ben muilek fu frustan. Den Bijbelstudie fu wi ben kan si wantewante taki den sani di den kerki fesiman taki no e kruderi nanga Bijbel. Baka a konmakandra dati wan lo sani kenki. Baka wan pisi ten 15 sma fu den tu osofamiri dati tron Kotoigi.

A no de fu taki dati wi e preiki tra fasi na ini a ten disi. Na a ten dati, Paolo ben miti furu nanga den priester fu taki fu Bijbel leri èn na so a ben kon sabi fa fu taki nanga den. Mi kan memre taki wan leisi a ben miti nanga wan tu priester na fesi wan grupu sma di no ben de Kotoigi. Bakaten wi kon yere taki gensman ben taigi wan tu sma na ini a grupu fu poti aksi gi Paolo fu gi en syen. Ma sani no waka soleki fa den wani. Wan fu den sma aksi efu a fiti taki kerki e bumui nanga politiek afersi soleki fa dati e pasa hondrohondro yari kaba. Den priester no ben sabi san fu piki. Ne wantronso a faya dede èn a konmakandra tapu. Wan tu yari baka dati wi yere taki den priester ben seti sani taki wan sma musu kiri a faya te sani no ben o waka soleki fa den prakseri.

 WI KISI TRA GRANI

Baka di mi nanga Paolo trow tin yari, den aksi wi fu du a kringwroko. Paolo ben abi wan bun wroko èn dati meki a no ben makriki fu teki wan bosroiti. Ma baka di wi begi fu a tori, wi go du a kringwroko. Wi ben lobi fu de nanga den osofamiri di teki wi na ini oso. Na neti wi ben e studeri makandra nanga den èn baka dati Paolo ben yepi den pikin nanga den skorowroko, spesrutu te a ben de wiskunde. Fu di Paolo ben lobi leisi, meki a ben lobi taki fu den moi sani di a leisi èn dati ben e gi trawan deki-ati. Munde wi ben gwenti go preiki na den foto pe Kotoigi no ben de èn wi ben e kari sma fu kon arki wan lezing di Paolo ben o hori a neti dati.

Wi ben lobi taki nanga den yonguwan èn du tra sani nanga den. Nofo tron Paolo ben e go plèi bal nanga den

Wi ben de tu yari nomo na ini a kringwroko di den aksi wi fu kon na Betel na Rome. Paolo go wroko na a kantoro gi krutu-afersi èn mi go wroko na a Tijdschrift Afdeling. A no ben makriki fu kenki wi libi, ma wi ben wani tan gi yesi na Gado. A ben moi fu si fa safrisafri a bijkantoro ben e kon moro bigi èn fa moro nanga moro sma tron Kotoigi na ini Italiakondre. Na a ten dati lanti gi Yehovah Kotoigi primisi tu fu du a wroko fu den drape. Wi ben breiti trutru nanga a wroko di wi ben kisi fu du.

Paolo ben lobi en wroko na Betel

Syatu baka 1980 di wi ben de na Betel ete, furu sma na ini Italiakondre ben e taki fu wan tori di ben go na fesi krutu. Sma ben feni taki wan trowpaar di ben de Kotoigi meki a meisje fu den dede fu di den no gi datra primisi fu gi a pikin brudu. A tori dati no ben tru kwetikweti. A meisje dede fu di a ben abi wan seryusu brudusiki di furu sma na ini Italiakondre ben abi èn sosrefi na tra kondre na ini a birti. Brada nanga sisa na Betel yepi den afkati fu a Kresten trowpaar dati. Wan traktaat nanga wan spesrutu Ontwaakt! ben skrifi di ben musu yepi sma fu kon sabi san pasa trutru èn fu meki den kon frustan san Gado Wortu e taki fu brudu. Na ini den mun dati, a pasa furu tron taki Paolo ben e wroko 16 yuru wán dei sondro fu stop. Mi ben du ala san mi man fu horibaka gi en na ini a muilek ten dati.

WAN TRA BIGI KENKI KON NA INI WI LIBI

Wi ben trow 20 yari kaba di wan sani pasa na ini wi libi di wi no ben fruwakti kwetikweti. Mi ben abi 41 yari èn Paolo ben abi 49 yari di mi taigi en taki mi denki mi de nanga bere. Na ini a buku pe a ben gwenti skrifi fa ibri dei waka gi en, a skrifi: „Begi: Efu a de so trutru, dan yepi wi fu tan na ini a furuten diniwroko, fu no du en safrisafri na ini na anbegi èn fu de bun eksempre leki papa nanga mama. Boiti dati, yepi mi fu du awansi na pikinso nomo fu ala den sani di mi taki na tapu a podium na ini den 30 yari di pasa.” We, te mi e denki a sani  dati, dan mi e si taki Yehovah piki a begi fu en èn a di fu mi tu.

Di Ilaria gebore, furu sani na ini wi libi kenki. Son leisi wi ben lasi-ati pikinso, soleki fa Odo 24:10 e taki: „Yu e firi brokosaka te nowtu miti yu? Efu dati de so, dan yu no o abi furu krakti.” Ma wi ben sabi o prenspari a de fu gi makandra deki-ati èn wi tan horibaka gi makandra.

Ilaria lobi taigi sma fa a breiti taki a kweki na ini wan osofamiri fu Kotoigi di ben de na ini a furuten diniwroko. Noiti a ben abi a firi taki wi no lobi en, noso taki wi no sorgu bun gi en. Deiten na mi ben luku en. Furu tron Paolo ben abi wroko fu du ete te a ben kon na oso te neti. Toku a ben meki ten fu prei nanga Ilaria èn fu yepi en nanga en skorowroko, awansi dati ben o meki taki a ben abi fu wroko teleki tu noso dri yuru mamanten fu kaba en eigi wroko. Nofo tron Ilaria ben e taki dati en papa na en moro bun mati.

A no de fu taki dati wi ben musu piri-ai gi Ilaria son leisi so taki a ben kan leri fu du san bun. Mi kan memre ete taki wan leisi di a ben e prei nanga wan mati, a no ben tyari ensrefi bun. Wi sori en na ini Bijbel fu san ede a no musu tyari ensrefi na a fasi dati. Wi taigi en tu fu aksi en mati pardon wantewante.

Ala ten Ilaria e taigi sma taki a breiti taki en papa nanga mama ben lobi a preikiwroko fu di dati yepi en fu kon lobi a preikiwroko tu. Now di a trow, a kon frustan moro krin srefi o prenspari a de fu gi yesi na Yehovah èn fu du san A e taigi den futuboi fu en.

MI GI YESI NA GADO SREFI DI MI BEN SARI

Na ini 2008, Paolo yere taki a abi kanker. Na a bigin a ben gersi leki a ben o kon betre èn Paolo ben e gi mi furu deki-ati. Wi pruberi fu feni a moro bun datrayepi gi Paolo. Boiti dati, mi nanga Ilaria begi Yehovah furu fu yepi wi nanga iniwan sani di ben o miti wi ete. A ben hebi fu si fa wan steifisteifi man di ben de nanga so furu faya, ben e kon swaki moro nanga moro. Mi ati broko di a dede na ini 2010. Ma te mi e prakseri san wi ben man du na ini den 45 yari di wi trow, dan dati e gi mi furu trowstu. Wi du ala san wi man gi Yehovah. Mi sabi taki noiti a o frigiti a wroko fu wi. Mi no man wakti a ten te Paolo o kisi wan opobaka, soleki fa Yesus pramisi na ini Yohanes 5:28, 29.

„Dipi na ini mi ati, mi e firi ete leki a pikin meisje di lobi a tori fu Noa. Te now ete mi abi a fasti bosroiti fu tan gi yesi na Yehovah”

Dipi na ini mi ati, mi e firi ete leki a pikin meisje di lobi a tori fu Noa. Te now ete mi abi a fasti bosroiti fu tan gi yesi na Yehovah, awansi san a e aksi fu mi. Mi kon si taki awansi sortu problema wi abi, awansi sortu tranga muiti wi musu du, noso awansi wi lasi sma na ini dede, den sani dati na noti te yu e teki den gersi nanga den tumusi moi blesi di wi lobi-ati Gado e gi wi. Mi heri libi langa mi si taki a moro bun sani fu du, na fu gi yesi na Yehovah.