Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2013

 ONDROFENITORI

Wi libi no de fu soso

Wi libi no de fu soso

DI MI manpikin Gary gebore na ini 1958 mi si taki wan sani no ben bun nanga en. Ma baka tin mun fosi, den datra kon si san na a siki fu en èn baka feifi yari bigi datra na Londen ben de seiker taki na a siki dati a ben abi. Neigi yari baka di Gary gebore, mi kisi mi umapikin Louise. Ma mi ben sari di mi si taki ensrefi siki tu. A siki fu en ben de moro seryusu leki di fu Gary.

Na wan switi fasi den datra taigi mi taki den tu pikin fu mi abi LMBB-siki * èn taki den no ben o kon betre. Na a ten dati sma no ben sabi furu fu LMBB-siki. Sma di abi a siki disi no man si bun èn te fu kaba den e kon breni. Den e kon fatu, den abi moro leki tin finga na den anu noso na den futu, den no e gro bun, den abi sukrusiki, den bonyo swaki èn den niri no e wroko bun. Dati meki a no ben o makriki gi mi fu sorgu den pikin fu mi. Soleki fa wan ondrosuku sori, dan wán fu ibri 125.000 sma na ini Ingrisikondre abi a siki dati. A kan taki moro sma de di abi a siki, ma den no abi en so hebi.

YEHOVAH KON DE GI WI LEKI ’WAN BERGI PE WI KAN GO KIBRI’

Syatu baka di mi trow, mi taki nanga wan Yehovah Kotoigi. Wantewante mi si taki den ben e leri sma den tru tori fu Bijbel. Ma mi masra no ben wani yere noti. A wroko fu en ben e meki taki wi ben e froisi ala yuru. Dati meki mi no ben man go na den konmakandra. Ma mi tan leisi Bijbel èn mi tan begi Yehovah. A ben de wan trowstu gi mi fu leisi san skrifi na Psalm 9:9, 10: „Yehovah o kon de wan bergi pe ala sma di e pina kan lon go kibri, iya, wan bergi pe sma kan go kibri te den de na nowtu . . . bika yu no o gowe libi den wan di e suku yu, Yehovah.”

Gary no ben man si bun. Sobun, di a ben abi siksi yari wi seni en go na wan skoro na zuidsei fu Ingrisikondre pe den ben e gi leri na den sortu pikin dati. A ben e tan na ini na internaat fu a skoro. Te a ben e broko en ede nanga wan sani, dan a ben e bèl mi. Na so mi ben man yepi en fu kon frustan wan tu prenspari leri fu Bijbel. Wan tu yari baka di Louise gebore, mi srefi kon siki. Mi kon abi wan siki di ben o meki mi kon lan safrisafri (multiple sclerose) nanga wan tra siki di meki taki mi heri skin e hati mi (fibromyalgie). Di Gary ben abi 16 yari, a kon baka na oso. Ma en ai ben e kon moro swaki èn na ini 1975 datra taigi en taki a breni. Na ini 1977 mi masra gowe libi wi.

Syatu baka di Gary kon baka na oso, mi bigin go na wan gemeente pe den brada nanga sisa sori wi furu lobi èn mi teki dopu na ini 1974. Mi ben breiti srefisrefi di wan owruman yepi Gary fu frustan san e pasa nanga wan boi te a e gro kon tron wan man. Tra Kotoigi ben e yepi mi seti wan tu sani na mi oso èn te fu kaba lanti seti sani fu pai feifi fu den Kotoigi disi so taki den ben kan tan yepi wi. Disi ben de wan bigi blesi gi wi.

Gary tan go na fesi èn te fu kaba a dopu na ini 1982. Fu di a ben wani tron wan yepipionier nomonomo, meki mi bosroiti fu go pionier makandra nanga en. Mi du dati wan tu yari langa. Gary ben breiti srefisrefi di a kring-owruman fu wi aksi en baka wan pisi ten efu a no ben wani tron wan  gewoon pionier. Dati na a deki-ati di a ben abi fanowdu èn na ini 1990 a tron wan gewoon pionier.

Datra du tu bigi oparâsi na a dyonku fu Gary. A fosi leisi ben de na ini 1999 èn a di fu tu leisi na ini 2008. Ma den problema di Louise ben abi nanga en gosontu ben de moro seryusu. Di a gebore a ben breni èn di mi si taki a ben abi ete wan finga na wan fu den futu fu en, mi ben sabi kaba taki a abi LMBB-siki tu. Di datra ondrosuku en, den kon si taki furu sani na ini en skin no ben e wroko bun. Na ini den yari di pasa a du furu bigi oparâsi. Feifi leisi den du oparâsi na en niri. A abi sukrusiki neleki Gary.

Fu di Louise sabi taki problema kan opo kon te a o go du wan oparâsi, meki a abi a gwenti fu taki nanga den datra, den driktoro fu na ati-oso èn nanga sma fu na administrâsi. Dan a e fruteri den fu san ede a no wani taki den gi en brudu te den o du na oparâsi. Na so a de bun nanga ala den sma di e sorgu gi en te a de na ati-oso.

WI LIBI NO DE FU SOSO

Leki osofamiri wi e du wan lo sani di abi fu du nanga na anbegi fu Yehovah. Fosi, mi ben musu leisi ala sani gi Gary nanga Louise. Ma now di wi abi CD, DVD nanga den tra sani na tapu MP3 na a website www.jw.org, dan dati e yepi wi fu studeri Bijbel ala wiki èn fu gi piki na den Kresten konmakandra.

Wi breiti srefisrefi nanga den tru tori di wi e leri fu Yehovah na ini Bijbel!

Son leisi Gary e leri den piki fu en na ede èn te a abi wan lezing na a Theokrasia Diniwroko-skoro, dan a e taki nanga en eigi wortu. Na ini 1995 a tron wan dinari ini a diniwroko èn ala ten a e wroko tranga na a Kownukondre zaal. A e gi sma wan switikon èn a e yepi nanga a geluid na zaal.

Brada nanga sisa di e wroko makandra nanga Gary na ini a preikiwroko e pusu a rolsturu fu en. Ensrefi no man du dati, fu di den bonyo na ini en anu e hati en. Wan brada yepi en srefi fu studeri Bijbel nanga wan man. Gary ben man gi deki-ati na wan sisa di ben tapu nanga a preikiwroko 25 yari langa. Now den tu sma disi e kon na den Kresten konmakandra.

Louise ben abi neigi yari di en granmama leri en fa fu brei moi krosi èn mi nanga wan fu den sma di ben e yepi mi sorgu en, leri en fa fu nai moimoi sani na tapu krosi. Fu di Louise lobi nai sani, a e meki moi beibi laken gi trawan èn a e meki moi laken tu gi den owruwan na ini a gemeente. A e meki karta gi sma tu nanga pikin sticker. Den sma di e kisi den karta disi e warderi den trutru. Louise ben yongu ete di a leri wroko nanga skrifimasyin. Now a abi wan spesrutu computer di e yepi en fu seni e-mail gi den mati fu en. Louise dopu di a ben abi 17 yari. Na ini den mun te wan spesrutu sani de fu du na ini a preikiwroko, mi nanga Louise e wroko makandra leki yepipionier. Neleki Gary, Louise e pruberi fu hori Bijbeltekst na ede so taki a kan fruteri sma fu a nyun grontapu di Gado pramisi, pe „den ai fu den breniwan o si” èn pe „nowan sma di e tan na ini a kondre o taki: ’Mi siki.’”Yes. 33:24; 35:5.

Wi breiti srefisrefi nanga den tru tori di wi e leri fu Yehovah na ini Bijbel! Wi e prisiri nanga a yepi di wi e kisi fu den brada nanga sisa na ini a gemeente. Wan lo sani de di wi no ben o man du, efu den no ben e yepi wi. Fu di Yehovah e yepi wi, meki wi libi no de fu soso.

^ paragraaf 5 Laurence, Moon, Bardet, nanga Biedl na den datra di ondrosuku a siki disi. Den ben kon si taki wan sma e kisi a siki te en papa nanga mama abi en na ini den cel fu den skin. Na fu dati ede sma gi a siki disi a nen fu den fo datra. Now furu sma e kari en a Bardet-Biedl-siki. Dresi no de gi a siki disi.