Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2013

Teki koni bosroiti fu man kibri a gudu di yu kisi

Teki koni bosroiti fu man kibri a gudu di yu kisi

„Tegu gi ogri, ma tan du bun.”ROM. 12:9.

1, 2. (a) San yepi yu fu teki a bosroiti fu dini Gado? (b) Sortu aksi di abi fu du nanga a gudu di Yehovah gi wi, o kisi piki na ini na artikel disi?

MILYUNMILYUN fu wi teki a koni bosroiti fu dini Yehovah Gado èn fu teki na eksempre fu Yesus Krestes (Mat. 16:24; 1 Petr. 2:21). Wi no e si en leki wan lawlaw sani taki wi gi wisrefi abra na Gado. Di wi teki a bosroiti dati wi no ben sabi Bijbel frafra nomo, ma wi ben ondrosuku Gado Wortu finifini. Na so wi kon sabi san na a gudu di Yehovah wani gi den sma di ’leri sabi a wan-enkri tru Gado, èn a sma di a seni kon, Yesus Krestes’. A no de fu taki dati a sani dati tranga wi bribi.Yoh. 17:3; Rom. 12:2.

2 Efu wi wani tan de mati fu Yehovah wi musu teki bosroiti di e plisi wi hemel Tata. Fu dati ede na artikel disi o piki den prenspari aksi disi: San na a gudu fu wi? Fa wi musu si a gudu disi? San wi musu du fu kan kisi en? San o yepi wi fu teki koni bosroiti?

SAN NA A GUDU FU WI?

3. San na a gudu di Gado o gi (a) den salfuwan nanga (b) den „tra skapu”?

3 Wan pikin grupu Kresten abi a howpu fu kisi „libi di no man pori, di no doti èn di no o lasi gowe. A libi disi na wan gudu.” Den Kresten disi o kisi a tumusi moi grani fu tiri makandra nanga Krestes na ini hemel (1 Petr. 1:3, 4). Fu kan kisi a gudu dati, den sma disi musu „gebore baka” (Yoh. 3:1-3). Ma milyunmilyun „tra skapu” e wroko makandra nanga den salfuwan fu preiki a bun nyunsu fu Gado Kownukondre. San na a gudu di den o kisi? (Yoh.  10:16) Den tra skapu o kisi a gudu di Adam nanga Eva no ben kisi fu di den sondu, iya, den o kisi têgo libi na ini wan paradijs grontapu pe pina, dede nanga sari no o de moro (Openb. 21:1-4). Dati meki Yesus ben man pramisi na ogriman di dede leti na en sei: „Fu tru, mi e taigi yu tide: Yu o de nanga mi na ini Paradijs.”Luk. 23:43.

4. Sortu blesi wi e kisi nownow kaba?

4 Nownow kaba wi e kisi wini fu a gudu disi. Fu di wi e poti bribi na ini „a lusu-paiman di Krestes Yesus pai”, meki wi abi wan korostu firi èn wi de bun mati fu Gado (Rom. 3:23-25). Wi e frustan heri bun san na den prenspari sani di Gado pramisi na ini en Wortu. Boiti dati, a e gi wi bigi prisiri fu dini Gado makandra nanga wi brada nanga sisa na heri grontapu. A de wan bigi grani tu fu de wan Kotoigi fu Yehovah. Na fu dati ede wi e warderi a gudu fu wi.

5. (a) San Satan pruberi fu du nanga Gado pipel? (b) San kan yepi wi fu kakafutu gi den triki fu en?

5 Efu wi no wani lasi a moi gudu disi, dan wi musu luku bun nanga den triki fu Satan. Someni langa kaba Satan e pruberi fu kori a pipel fu Gado so taki den teki bosroiti di kan meki den lasi a gudu fu den (Num. 25:1-3, 9). Fu di Satan sabi taki a kaba fu en de krosibei, meki a e du moro muiti fu kori wi. (Leisi Openbaring 12:12, 17.) Efu wi wani „tanapu kánkan te Didibri e kon nanga den triki fu en”, dan wi musu tan abi furu warderi gi a gudu fu wi (Ef. 6:11). Wi kan leri wan tu prenspari sani fu a fasi fa Esau, a fosi manpikin fu Isak, ben si a gudu di a kisi.

NO DE LEKI ESAU

6, 7. Suma ben de Esau èn sortu grani a ben o kisi?

6 Pikinmoro 4000 yari pasa, Isak nanga Rebeka ben kisi a twelengi Esau nanga Yakob. Di den boi disi ben e gro kon bigi a ben de krin taki den ben difrenti fu makandra. „Esau tron wan man di ben sabi onti, wan man di ben lobi de na dorosei. Ma Yakob tron wan reti-ati man di ben e libi na ini tenti” (Gen. 25:27). Bijbel e taki dati Yakob ben de wan „reti-ati man” fu di a ben e gi yesi na Gado èn a no ben e du sondu.

7 Di Esau nanga Yakob ben abi 15 yari, den granpapa Abraham dede. Ma a sani di Yehovah pramisi Abraham no lasi gowe. Bakaten, Yehovah taigi Isak tu taki den bakapikin fu Abraham ben o meki taki ala den pipel fu grontapu man kisi blesi. (Leisi Genesis 26:3-5.) Gado ben pramisi Abraham a sani disi fu sori en taki wan fu den bakapikin fu en ben o de a „pikin” di kari na ini Genesis 3:15. A pikin dati di tan gi yesi na Gado, na a Mesias. Fu di Esau ben de a fosi manpikin fu Isak, meki na en ben abi a reti fu kisi a sani di Gado pramisi Abraham. Na wan bigi grani Esau ben o kisi! A ben abi warderi gi a sani dati?

No du sani di kan meki yu lasi a gudu di yu kisi

8, 9. (a) San Esau bosroiti fu du nanga a reti di a ben abi leki a fosi pikin? (b) Di Esau teki a bosroiti dati, dan san a kon frustan bakaten èn san a du?

8 Wan dei di Esau komoto na gron, a si Yakob „e bori wan nyanyan”. Ne Esau taigi en: „Esi-esi, mi e begi yu, gi mi pikinso fu a redi sani di yu e bori drape, bika mi weri!” Yakob piki en: „Fosi yu musu seri a reti gi mi di yu abi leki a fosi pikin!” San Esau du? A taki: „Sortu wini mi o kisi fu a reti di mi abi leki a fosi pikin?” Gi Esau, a preti nyanyan ben prenspari moro leki a reti di a ben abi leki a fosi pikin. Fu di Yakob ben wani de seiker taki Esau seri a reti di a ben abi leki a fosi pikin, meki a taigi en: „Sweri gi mi fosi!” Sondro fu draidrai Esau seri a reti fu en.  Baka dati „Yakob gi Esau brede nanga a pesi di a ben bori. Ne Esau nyan, a dringi, dan a opo gowe. Na so Esau sori taki a ben wisiwasi a reti di a ben abi leki a fosi pikin.”Gen. 25:29-34.

9 Wan tu yari baka dati, di Isak ben de fu dede, Rebeka sorgu taki Yakob kisi a reti di Esau ben seri gi en. Di Esau kon si sortu don bosroiti a teki, a begi Isak: „Blesi mi tu, mi papa, mi e begi yu, blesi mi! . . . Yu no abi nowan blesi moro gi mi dan?” Di Isak taigi en taki a no ben o man gi en a blesi di a ben gi Yakob kaba, dan „Esau opo en sten èn a bari krei”.Gen. 27:30-38.

10. San Gado ben prakseri fu Esau nanga Yakob èn fu san ede?

10 San a tori disi e leri wi fu a fasi fa Esau ben e denki? Esau sori taki a ben moro prenspari gi en fu du san a ben firi fu du leki fu kisi a blesi di Gado ben o gi en bakaten. Esau no ben e warderi a reti di a ben abi leki a fosi pikin èn a de krin taki a no ben lobi Gado trutru. Boiti dati, a no prakseri sortu bakapisi a bosroiti fu en ben o abi gi den bakapikin fu en. Ma Yakob ben abi furu warderi gi a blesi di a ben o kisi. Fu eksempre, di a ben musu teki wan wefi, a du san en papa nanga mama taigi en (Gen. 27:46–28:3). Disi no ben makriki gi en. Ma Yehovah blesi en fu di a gi yesi èn a tron wan afo fu a Mesias. San Gado ben prakseri fu Esau nanga Yakob? Yehovah ben meki a profeiti Maleaki taki a sani disi: „Na Yakob mi ben lobi. Mi no ben lobi Esau.”Mal. 1:2, 3.

11. (a) Fu san ede wi leki Kresten kan kisi wini fu a tori fu Esau? (b) Di Paulus taki fu a sani di Esau du, dan fu san ede a taki tu fu hurudu?

11 Wi leki Kresten kan kisi wini tu fu a tori fu Esau. Na apostel Paulus ben warskow Kresten fu ’luku bun taki nowan huruman de na den mindri, noso wan sma di no e warderi santa sani, leki fa a ben de nanga Esau di a ben gi en reti leki fosi pikin na wan tra sma, soso fu kan kisi wán preti nyanyan’ (Hebr. 12:16). A warskow dati de tu gi wi na ini a ten disi. Wi musu tan sori warderi gi santa sani so taki wi kan kakafutu gi den sondu firi fu wi, noso wi o lasi a gudu di Yehovah wani gi wi. Di Paulus taki fu a sani di Esau du, dan fu san ede a taki tu fu hurudu? A taki dati, fu di wan sma di de nomonomo fu du san a sondu skin wani, neleki Esau, kan lasi a gudu di a kisi. A kan pasa moro makriki taki so wan sma du sani di no fiti, soleki hurudu.

 SREKA YU ATI NOWNOWDE

12. (a) Fa Satan e pruberi fu tesi ibriwan fu wi? (b) Gi wan tu eksempre fu Bijbel di kan yepi wi te wi musu teki muilek bosroiti.

12 Leki futuboi fu Yehovah wi e du ala san wi man fu no kon na ini situwâsi di kan meki wi du hurudu. Efu sma e du wan sani di kan meki wi fadon, wi kan begi Yehovah Gado fu yepi wi fu kakafutu gi a tesi dati (Mat. 6:13). Wi e du furu muiti fu tan gi yesi na Yehovah na ini na ogri grontapu disi, ma Satan e tan pruberi fu meki wi du sani di man pori wi matifasi nanga Yehovah (Ef. 6:12). Fu di Didibri na a gado fu na ogri grontapu disi, meki a sabi fa fu tesi wi so taki wi du san wi sondu skin wani du (1 Kor. 10:8, 13). Kon meki wi taki dati yu de na ini wan situwâsi di kan meki yu du wan sani di no fiti. San yu ben o du? Yu ben o du leki Esau èn taki: ’Esi-esi! Gi mi a sani dati’? Noso yu ben o du neleki Yakob en manpikin Yosef di lon gowe di Potifar wefi suku fu kori en?Leisi Genesis 39:10-12.

13. (a) Fa furu brada nanga sisa na ini a ten disi du leki Yosef, ma fa sonwan brada nanga sisa du leki Esau? (b) San wi musu du so taki wi no de leki Esau?

13 Furu fu wi brada nanga sisa ben de na ini situwâsi pe den ben abi fu bosroiti efu den ben o du leki Esau noso leki Yosef. Wan lo fu den teki koni bosroiti èn den meki Yehovah ati prisiri (Odo 27:11). Ma sonwan fu wi brada nanga sisa bosroiti fu du leki Esau èn den no kibri a gudu di den kisi fu Gado. Furu fu den sma di e kisi piri-ai noso di den e puru fu a gemeente ala yari na sma di du hurudu. A prenspari srefisrefi fu sreka wi ati nownowde, fosi wi kon de na ini situwâsi di kan de wan tesi gi wi (Ps. 78:8). Wi o taki fu tu sani di wi kan du fu sreka wisrefi fu kakafutu gi tesi èn fu teki koni bosroiti.

PRAKSERI DEN BAKAPISI ÈN SREKA YUSREFI GI TESI

Te wi e studeri Gado Wortu, dan dati kan yepi wi fu kakafutu gi tesi

14. Sortu aksi kan yepi wi fu „tegu gi ogri” èn fu „tan du bun”?

14 A fosi sani di wi kan du na fu denki san kan de den bakapisi fu den sani di wi wani du. O moro wi lobi Yehovah, o moro wi o warderi a gudu di wi kisi. Efu wi lobi wan sma, wi no wani du sani fu hati en. Na presi fu dati wi e du muiti fu meki a sma dati feni wi bun. Fu di dati de so meki a bun fu teki pikinso ten fu sidon prakseri sortu bakapisi a kan abi gi wi èn gi tra sma efu wi ben o go du sani di a sondu skin wani. Wi musu aksi wisrefi: ’Efu mi ben o du wan sani di e sori taki mi e denki misrefi nomo, dan san o pasa nanga a matifasi di mi abi nanga Yehovah? Sortu bakapisi a bosroiti fu mi o abi gi mi famiri? Fa mi brada nanga sisa na ini a gemeente o feni en? A sani di mi o du kan meki trawan fadon?’ (Fil. 1:10) Wi kan aksi wisrefi tu: ’Fu san ede mi ben o pori mi libi, soso fu di mi wani abi seks di kan gi mi prisiri fu wan syatu pisi ten nomo? Mi wani kon de leki Esau trutru di bari krei bakaten fu a sani di a du?’ (Hebr. 12:17) Te wi e teki ten fu prakseri den sortu aksi disi, dan dati o yepi wi fu „tegu gi ogri” èn fu „tan du bun” (Rom. 12:9). Boiti dati, lobi gi Yehovah o yepi wi fu tan sori warderi gi a gudu di wi kisi.Ps. 73:28.

15. San o yepi wi fu sreka wisrefi fu kakafutu gi tesi di kan pori wi matifasi nanga Gado?

15 A di fu tu sani di wi kan du na taki wi musu sreka wisrefi fu kakafutu gi tesi. Yehovah no wani meki a matifasi fu wi nanga en pori. Dati meki a gi wi furu sani fu man sreka wisrefi so taki wi kan kakafutu gi den tesi fu a grontapu disi. A seti sani gi wi so taki wi kan studeri  Bijbel, wi kan go na den Kresten konmakandra, wi kan go na ini a preikiwroko èn wi kan begi (1 Kor. 15:58). Ibri leisi te wi e fruteri Yehovah san de na tapu wi ati èn ibri leisi te wi e wroko tranga na ini a preikiwroko, wi e sreka wisrefi fu kakafutu gi tesi. (Leisi 1 Timoteyus 6:12, 19.) Wi musu tan meki muiti fu du den sani disi efu wi wani de srekasreka fu kakafutu gi tesi (Gal. 6:7). A di fu tu kapitel fu Odo e taki fu a tori dati.

„TAN SUKU EN”

16, 17. San kan yepi wi fu teki koni bosroiti?

16 Odo kapitel 2 e gi wi a deki-ati fu kon abi koni nanga frustan. Na so Yehovah e yepi wi fu bosroiti san bun èn san ogri. Koni nanga frustan kan yepi wi tu fu basi den firi fu wi, na presi fu go du sani di no fiti. Ma wi no o man du disi efu wi no e meki muiti. Bijbel e taki: „Mi manpikin, gi yesi na den sani di mi taigi yu èn kibri den komando fu mi leki wan gudu, so taki yu kan poti yesi arki koni èn opo yu ati fu leri fa fu si sani krin. Boiti dati, bari kari frustan èn opo yu sten fu kisi a koni fu man si sani krin. Tan suku en leki fa sma e suku solfru. Leki fa sma e suku gudu di kibri, na so yu musu tan suku en. Te yu du dati, dan yu o kon frustan san a wani taki fu abi lespeki gi Yehovah. Yu o kon leri sabi Gado, bika na Yehovah srefi e gi sma koni. Te a e opo en mofo, sabi nanga a koni fu man si sani krin, e komoto na ini.”Odo 2:1-6.

17 Efu wi du san den tekst disi e taki, dan wi o man teki koni bosroiti. Soso te wi du den sani disi wi o man kakafutu gi tesi. Iya, wi musu meki den sani di Yehovah e taki, kenki a fasi fa wi de. Wi musu tan begi Gado fu sori wi san fu du èn wi musu tan du muiti fu leri sabi Gado neleki fa sma e du muiti fu suku gudu di kibri.

18. San yu o tan du èn fu san ede?

18 Te Yehovah e si taki wan sma e meki muiti fu kon abi koni, sabi, frustan, nanga a koni fu man si sani krin, dan a o yepi en fu kon abi den fasi dati. O moro wi e du muiti fu kon abi den fasi dati, o moro wi o kon krosibei na Yehovah Gado. Te wi de bun mati fu Yehovah, dan dati o kibri wi te wi e kisi tesi. Efu wi kon krosibei na Yehovah èn efu wi abi lespeki gi en, dan dati o yepi wi fu no sondu (Ps. 25:14; Yak. 4:8). Meki a de so taki a matifasi di wi abi nanga Yehovah nanga a koni di a e gi wi, yepi wi fu teki koni bosroiti di o meki en ati prisiri èn di o kibri a gudu di wi kisi.