Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2013

Yu „de fayafaya fu du bun sani”?

Yu „de fayafaya fu du bun sani”?

„Krestes Yesus . . . gi ensrefi gi a bun fu wi fu kan . . . krin wan pipel gi ensrefi, wan pipel di ben o de spesrutu fu en èn di ben o de fayafaya fu du bun sani.”TIT. 2:13, 14.

1, 2. Sortu spesrutu grani Yehovah Kotoigi abi èn fa yu feni en?

FURU sma e si en leki wan bigi grani te den kisi wan prijs gi wan spesrutu sani di den du. Fu eksempre, son sma kisi wan prijs fu di den yepi tu kondre di ben de feanti fu makandra fu kon bun baka. Ma na wan moro bigi grani te Gado e seni wi fu yepi sma fu kon bun baka nanga en.

2 Wi leki Kotoigi fu Yehovah abi a bigi grani dati. Gado nanga Krestes e seni wi go na sma fu begi den fu „kon bun baka nanga Gado” (2 Kor. 5:20). Yehovah e gebroiki wi fu hari sma kon na en. Na so milyunmilyun sma na ini moro leki 235 kondre kisi yepi fu kon bun baka nanga Gado èn now den abi a howpu fu libi fu têgo (Tit. 2:11). Nanga faya wi e gi ’ibri sma di wani, a kari fu kon dringi fu a watra di e gi libi èn di de fu kisi fu soso’ (Openb. 22:17). Fu di wi e warderi a moi wroko disi èn wi e du en finifini, meki sma kan taki nanga leti dati wi na wan pipel di „de fayafaya fu du bun sani” (Tit. 2:14). Meki wi go luku now fa a faya di wi abi fu du bun sani e yepi wi fu hari sma kon na Yehovah. Wán fasi fa wi kan du dati na fu preiki a bun nyunsu.

DE NANGA FAYA NELEKI YEHOVAH NANGA YESUS

3. Sortu dyaranti den wortu fu Yesaya 9:7 e gi wi?

3 Yesaya 9:7 e taki dati Gado en Manpikin ben o tron Kownu èn taki a ben o du bun sani gi libisma. Disi o pasa fu di „Yehovah di e tiri den legre o meki a sani disi pasa nomonomo”. Te wan sma de nomonomo fu du wan sani, dan a sma disi de fayafaya fu du en. Sobun, a tekst dati e gi wi a dyaranti taki wi hemel Tata de fayafaya fu frulusu libisma. Fu di na Yehovah gi wi a wroko fu preiki a Kownukondre, meki wi musu horibaka gi a wroko disi nanga wi heri ati èn wi musu de nanga faya tu. Te wi e angri fu yepi sma fu kon sabi Gado, dan wi e sori taki wi de nanga faya neleki Yehovah. Wi musu meki ala muiti fu preiki a bun nyunsu fu di wi na  sma di e wroko makandra nanga Gado. Yu srefi e meki a muiti dati tu?1 Kor. 3:9.

4. Te wi e luku fa Yesus tan du a preikiwroko fayafaya, dan san wi kan leri fu en?

4 Luku sosrefi fa Yesus ben sori taki a de nanga faya. A ben de wan tumusi bun eksempre gi wi fu di a ben tan de nanga faya na ini a preikiwroko. Aladi sma ben e gens en èn den ben wani kiri en, toku a ben tan du a preikiwroko fayafaya teleki a dede (Yoh. 18:36, 37). Fu di Yesus ben sabi taki a ten ben e kon moro krosibei taki a ben o pina èn dede, meki a ben e wroko moro tranga fu yepi sma fu kon sabi Yehovah.

5. Fa Yesus ben de leki a wrokoman na ini na agersitori fu a figabon?

5 Fu eksempre, na ini a yari 32 Yesus gi wan agersitori fu wan man di ben abi wan figabon na ini en droifidyari. A bon dati no ben e gi froktu dri yari kaba. Di a taigi wan fu den wrokoman fu en fu koti a bon trowe, a wrokoman aksi en fu hori pasensi pikinso meki a poti mèst gi a bon so taki a kan gi froktu. (Leisi Lukas 13:6-9.) Na a ten dati furu sma no ben tron disipel fu Yesus ete. Ma na agersitori fu Yesus sori taki a ben wani du moro na ini a syatu ten di a ben abi ete fosi a dede. Fu dati ede a ben e preiki nanga moro faya na ini Yudea nanga Perea na ini den siksi mun di a ben abi ete. Wan tu dei fosi Yesus dede, a krei fu di a ben hati en taki furu fu den Dyu no ben wani arki a boskopu fu en.Mat. 13:15; Luk. 19:41.

6. Fu san ede wi musu du moro na ini a preikiwroko?

6 Wi musu pruberi fu du moro na ini a preikiwroko fu di a kaba de krosibei. (Leisi Danièl 2:41-45.) A de wan bigi grani fu de Kotoigi fu Yehovah. Wi na den wan-enkri sma na grontapu di e fruteri trawan taki wan lusu o kon gi den problema fu libisma. Wan sma di e skrifi tori na ini koranti, taki dati nowan sma man kon sabi fu san ede ogri sani e pasa nanga bun sma. Ma Bijbel e fruteri wi fu san ede dati e pasa èn wi leki Kresten abi a frantwortu nanga a grani fu fruteri trawan a sani disi. Te wi e du a wroko fu Yehovah, wi musu ’de fayafaya fu di wi abi a santa yeye’ (Rom. 12:11). Yehovah o blesi wi te wi e preiki fayafaya fu yepi sma fu kon sabi en èn fu lobi en.

YEHOVAH E KISI GRANI TE WI DE KLARIKLARI FU GI WISREFI NA INI A DINIWROKO

7, 8. Fa Yehovah e kisi grani te wi de klariklari fu gi wisrefi na ini a diniwroko?

7 Den sani di miti na apostel Paulus e sori taki son leisi a diniwroko di wi e du kan meki taki „wi no man sribi na neti” èn taki „wi no abi nyanyan” (2 Kor. 6:5). Den sortu sani disi e pasa tu nanga wi brada nanga sisa fu a bun nyunsu ede. Pionier e si a preikiwroko leki a moro prenspari wroko di den musu du, ma furu fu den abi wan grontapuwroko tu. Prakseri den zendeling tu di e wroko tranga fu yepi sma na ini tra kondre (Fil. 2:17). Fa a de nanga den owruman fu wi di e wroko tranga? Son leisi den no abi ten fu nyan srefi noso den e lasi sribi fu di den musu luku den skapu fu Yehovah. Aladi son brada nanga sisa owru noso siki, toku den e du ala san den man fu kon na den konmakandra èn fu go na ini a preikiwroko. Wi de nanga furu tangi te wi e si sortu muiti den futuboi fu Gado e du fu gi densrefi na ini a diniwroko. Ma srefi sma di no de Kotoigi e si taki a preikiwroko prenspari gi wi.

8 Wan sma di no de wan Kotoigi seni wan brifi gi wan koranti na ini Ingrisikondre. A ben skrifi: ’Sma no e go na kerki moro fu di den lasi bribi. San den kerki fesiman e du heri dei? Den no e go na sma soleki fa Krestes ben e du. A wan-enkri kerki di e broko en ede nanga trawan na den Yehovah Kotoigi. Den wawan e go na sma èn den e fruteri sma den tru tori fu Bijbel.’  Furu sma na ini a ten disi e prakseri densrefi nomo. Ma te wi de klariklari fu gi wisrefi na ini a diniwroko, dan dati e meki Yehovah Gado kisi furu grani.Rom. 12:1.

Te sma e si wi na ini a preikiwroko, dan dati e sori den kaba o prenspari a wroko disi de

9. San kan yepi wi fu tan de nanga faya fu du bun na ini a preikiwroko?

9 Ma san wi kan du te wi e si taki wi no de nanga faya moro na ini a preikiwroko? A bun fu luku san Yehovah du nanga yepi fu a wroko disi. (Leisi Romesma 10:13-15.) Sma di e kari a nen fu Yehovah èn di e poti bribi na ini en, o kisi frulusu. Ma den no o man du dati efu wi no e preiki gi den. Te wi e frustan disi, dan dati musu yepi wi fu tan de nanga faya fu du bun èn fu du moro na ini a preikiwroko.

TE WI E TYARI WISREFI BUN, SMA O WANI KON SABI GADO

Te yu no e bedrigi sma èn yu e wroko tranga, dan sma e si dati

10. Fu san ede a bun fasi fa wi e tyari wisrefi e meki taki sma wani kon sabi Yehovah?

10 Wi kan de nanga faya na ini a preikiwroko, ma dati wawan no sari fu meki taki sma wani kon sabi Gado. Wan tra sani di e meki taki sma wani kon sabi Gado, na a bun fasi fa wi e tyari wisrefi leki Kresten. Paulus ben sori fu san ede a prenspari fu tyari wisrefi bun. A ben taki: „Na nowan fasi wi e du sani di e meki trawan fadon, so taki sma no sa taki takru fu a diniwroko fu wi” (2 Kor. 6:3). A lespeki fasi fa wi e taki èn a bun fasi fa wi e tyari wisrefi, e moi a leri fu Gado. Disi e meki taki sma wani dini Yehovah (Tit. 2:10). Fu taki en leti, furu tron wi e yere taki reti-ati sma arki a bun nyunsu, di den si taki wi tyari wisrefi na wan bun fasi neleki Krestes.

11. Fu san ede wi musu begi èn denki bun fu a fasi fa wi e tyari wisrefi?

11 Wi si taki a bun fasi fa wi e tyari wisrefi kan meki taki sma wani kon sabi moro fu Bijbel. Ma efu wi no e tyari wisrefi bun, dan a kan taki sma no o wani sabi noti fu Yehovah. Sobun, awinsi wi de na wroko, na oso noso na skoro, wi musu luku bun  taki wi no e du sani di kan meki taki sma feni fowtu na wi tapu noso na tapu a preikiwroko fu wi. Efu wi e du sondu fu espresi, dan dati kan abi takru bakapisi gi wi (Hebr. 10:26, 27). Disi musu meki wi denki bun fu a fasi fa wi e tyari wisrefi èn fa dati kan abi krakti na tapu trawan. Boiti dati, wi musu begi fu a tori disi tu. A fasi fa grontapusma e tyari densrefi e kon moro ogri dei fu dei. Sobun, sma o „man si krin . . . suma na wan reti-ati sma èn suma na wan ogri sma, suma e dini Gado èn suma no e dini en” (Mal. 3:18). Iya, wan prenspari fasi fa wi kan yepi sma fu kon bun baka nanga Gado, na te wi leki Kresten e tyari wisrefi na wan bun fasi.

12-14. Te wi e kisi tesi èn wi e horidoro, dan fa trawan o denki fu a tru anbegi? Gi wan eksempre.

12 Di Paulus skrifi den Korentesma, a fruteri den san miti en. A taigi den taki a ben de na banawtu, taki problema ben miti en, taki a ben kisi fonfon èn taki a ben de na strafu-oso. (Leisi 2 Korentesma 6:4, 5.) Te tesi e miti wi èn wi e horidoro, dan dati kan yepi tra sma fu teki a tru bribi. Kon meki wi luku wan eksempre: Wan tu yari pasa, sma na ini wan kontren fu Angola no ben wani taki Yehovah Kotoigi de drape moro. Wan leisi, tu dopu Kotoigi nanga 30 tra sma ben de na wan Kresten konmakandra. Ne sma fu a kontren dati lontu den fon teleki den skin brudu. Den fon srefi den umasma nanga den pikin-nengre. Den ben wani tapu skreki gi sma so taki den no arki Yehovah Kotoigi. Ma baka di den fon den Kotoigi na fesi ala sma, furu fu den sma fu a kontren go na den Kotoigi èn den aksi fu studeri Bijbel nanga den. Baka dati a Kownukondre preikiwroko go na fesi, moro sma teki a tru bribi èn Gado blesi den brada nanga sisa fu wi.

13 Na eksempre disi e sori taki te sma e si taki wi no e frede te tesi e miti wi, dan den kan bosroiti fu teki a tru bribi. A deki-ati di Petrus nanga den tra apostel ben sori, yepi sma kande fu tron mati fu Gado (Tori 5:17-29). Na so a de tu taki sma na skoro, na wroko noso wi famiriman kan teki a tru bribi fu di den si taki wi abi deki-ati te tesi miti wi.

14 Ala ten a ben de so taki brada nanga sisa fu wi ben e kisi frufolgu. Fu eksempre, na Armeinia sowan 40 brada de na strafu fu di den no wani go na ini a legre èn a kan taki na ini den mun di e kon den o poti moro brada na strafu. Na Eritrea den poti 55 brada nanga sisa fu wi na strafu-oso. Sonwan fu den pasa 60 yari kaba. Na Zuid-Korea den poti sowan 700 brada na strafu-oso fu den bribi ede. A sani disi e pasa 60 yari kaba. Meki wi tan begi taki den brada nanga sisa di e kisi frufolgu na difrenti kondre horidoro, so taki Gado kisi glori èn taki sma di lobi retidu kan teki a tru bribi.Ps. 76:8-10.

15. Gi wan eksempre di e sori taki sma wani kon sabi moro fu a tru bribi te den si taki wi no e bedrigi trawan.

15 Wi no e bedrigi trawan èn dati kan meki taki sma wani kon sabi moro fu a tru bribi. (Leisi 2 Korentesma 6:4, 7.) Luku na eksempre disi: Wan sisa ben bai wan buskarta di wan uma di a sabi taigi en taki a no abi fu du dati, fu di a ben o saka na a tra halte. Ma a sisa taigi en taki srefi efu a o saka na a tra halte, a musu fu bai a karta, fu di na dati lanti wani. Di na uma saka fu a bus, a man di ben e rèi a bus drai luku a sisa, dan a aksi en: „Yu na wan Yehovah Kotoigi?” A sisa piki en: „Iya, ma fu san ede yu e aksi dati?” A man taigi en: „Mi ben yere fa yu taigi na uma fu san ede yu musu bai a buskarta. Mi sabi taki furu sma no e bai buskarta, ma nofo tron na soso Yehovah Kotoigi e du dati, fu di den no e bedrigi trawan.” Wan tu mun baka dati, di a sisa ben  de na wan konmakandra, wan man waka kon miti en èn a taigi en: „Yu sabi mi ete? Mi na a man di ben e rèi a bus a wan dei di mi taki nanga yu fu a buskarta. Fu di mi si fa yu tyari yusrefi, meki mi bosroiti fu studeri Bijbel nanga Yehovah Kotoigi.” Fu di sma sabi taki wi no e bedrigi trawan, meki den e frutrow wi.

TYARI YUSREFI NA WAN FASI DI E MEKI GADO KISI GRANI

16. San kan pasa te wi abi langa pasensi, lobi nanga switifasi? Fruteri san son kerki fesiman e du.

16 Te wi abi langa pasensi, lobi nanga switifasi, dan dati kan meki taki sma wani kon sabi moro fu Yehovah, fu den sani di a o du èn fu en pipel. A fasi fa tru Kresten e tyari densrefi e meki Gado kisi grani. Son kerki fesiman e du neleki den e tyari densrefi bun, ma den e lei gi den kerkisma èn den e nyan den moni. Sonwan fu den gebroiki a moni dati tu fu bai bigi oso nanga diri wagi. Wan fu den bow wan dagu-oso srefi di ben abi airco. Krestes ben taki dati wi musu „gi sma sondro fu meki den pai”, ma den sma disi no e du san a taki (Mat. 10:8). Na presi fu dati, den de leki den ogri priester fu Israel. Den priester disi ben ’e gi leri, soso te sma ben e pai den’ èn den ben e leri sma sani fu Gado di no tru (Mika 3:11). A hoigri fasi disi fa den kerki fesiman e tyari densrefi no e yepi nowan sma fu kon bun baka nanga Gado.

17, 18. (a) Fa wi kan gi Yehovah grani nanga a fasi fa wi e tyari wisrefi? (b) Fu san ede yu wani tan du bun sani?

17 Na a tra sei a tru Kresten leri nanga den bun sani di wi e du, e naki na ati fu sma. Fu eksempre, wan pionier di ben e preiki oso fu oso, ben miti wan owru uma di no ben abi masra moro. Di na uma kon frustan taki a brada na wan Kotoigi, dan wantewante a taigi en fu gowe. Na uma taki dati di a brada naki na a doro, a ben de na tapu wan trapu na ini a kukru e feti fu poti wan lampu. A brada taigi na uma: „Yu kan kisi mankeri te yu e du dati yu wawan.” Ne a brada yepi na uma fu kenki a lampu, dan a gowe. Di a manpikin fu na uma kon sabi san pasa, dan a sani disi ben bigi gi en so te, taki a go suku a brada fu taki en tangi. Te fu kaba disi meki taki a man bigin studeri Bijbel.

18 Fu san ede yu no o meki noti tapu yu fu du bun sani? Kande fu di yu sabi taki te yu de fayafaya na ini a preikiwroko èn yu e tan du san Gado wani, dan yu e gi Yehovah grani èn yu kan yepi sma fu kisi frulusu. (Leisi 1 Korentesma 10:31-33.) Te wi e preiki a bun nyunsu fayafaya èn wi e tyari wisrefi na wan bun fasi, dan dati e sori taki wi lobi Gado nanga tra sma (Mat. 22:37-39). Wi o abi furu prisiri èn wi o de koloku te wi de fayafaya fu du bun wroko. Boiti dati, wi kan fruwakti taki wan dei o kon te ala sma o de fayafaya gi a tru anbegi fu gi grani na wi Mekiman Yehovah.