Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2013

Du yu wroko finifini leki wan preikiman fu a bun nyunsu

Du yu wroko finifini leki wan preikiman fu a bun nyunsu

„Du a wroko fu wan preikiman fu a bun nyunsu, du yu wroko finifini.”2 TIM. 4:5.

1. Fu san ede wi kan taki dati Yehovah na a fosi sma di fruteri bun nyunsu?

WAN preikiman e fruteri bun nyunsu. A fosi sma di fruteri bun nyunsu na Yehovah Gado. En na a moro bigi preikiman. Wantewante baka di wi fosi papa nanga mama trangayesi Yehovah, a fruteri a bun nyunsu taki Satan Didibri o kisi pori (Gen. 3:15). Na ini den hondrohondro yari baka dati, Yehovah fruteri fa a o krin en nen, fa a o lusu den problema di Satan tyari kon èn fa libisma kan kisi na okasi baka fu libi fu têgo. A bun nyunsu disi skrifi na ini Bijbel, a Wortu fu Gado.

2. (a) Na sortu fasi engel na preikiman tu? (b) Fa Yesus sori libisma fa fu de bun preikiman?

2 Engel srefi na preikiman fu di den e fruteri bun nyunsu èn den e yepi trawan fu panya a bun nyunsu (Luk. 1:19; 2:10; Tori 8:26, 27, 35; Openb. 14:6). Fa a de nanga a gran engel Mikael? Di a ben de na grontapu leki Yesus, a sori libisma fa fu de bun preikiman. A moro prenspari sani na ini Yesus en libi ben de fu preiki a bun nyunsu.Luk. 4:16-21.

3. (a) Sortu bun nyunsu wi e fruteri sma? (b) Sortu aksi prenspari gi wi leki preikiman?

3 Yesus taigi den disipel fu en taki den musu de preikiman fu a bun nyunsu (Mat. 28:19, 20; Tori 1:8). Na apostel Paulus taigi Timoteyus di ben e wroko makandra nanga en: „Du a wroko fu wan preikiman fu a bun nyunsu, du yu wroko finifini” (2 Tim. 4:5). San na a bun nyunsu di wi leki bakaman fu Yesus e preiki? Wi e fruteri sma taki wi hemel Tata Yehovah lobi wi èn disi e gi sma howpu (Yoh. 3:16; 1 Petr. 5:7). Gado Kownukondre na wan buweisi taki Yehovah  lobi libisma. Dati meki wi breiti taki wi kan fruteri trawan taki ibri sma di e saka ensrefi na ondro a tiri fu a Kownukondre, di e gi yesi na Gado èn di e libi na wan reti-ati fasi, kan tron en mati (Ps. 15:1, 2). Fu taki en leti, Yehovah o meki taki nowan sma o abi fu pina moro. A o meki tu taki wi no e memre den sari sani moro di ben miti wi. Disi na bun nyunsu trutru (Yes. 65:17). Fu di wi na preikiman, meki wi musu go luku a piki na tapu tu prenspari aksi: Fu san ede a prenspari taki sma yere a bun nyunsu na ini a ten disi? Fa wi kan du wi wroko leki preikiman finifini?

FU SAN EDE SMA MUSU YERE A BUN NYUNSU?

Poti bun aksi fu yepi sma fu fruteri fu san ede den e bribi son sani

4. Sortu lei sma e fruteri fu Gado?

4 Kon meki wi taki dati sensi di yu pikin sma lei gi yu taki yu papa gowe libi yu nanga yu famiri fu di a no ben wani sabi yu. Den taigi yu tu taki a kibri wan tori gi yu èn taki a du ogri-ati sani. Now den e kon fruteri yu taki yu papa dede èn taki yu no abi fu meki muiti fu go suku en. Na disi son sma e taki fu Gado. Den e taki dati sma no man kon sabi suma na Gado noso den e taki dati a e du ogri-ati sani. Son kerki fesiman e leri taki Gado o strafu takru sma fu têgo na ini hel. Tra sma e taki dati na Gado e tyari rampu kon di e meki sma pina. Aladi den rampu disi e kiri bun sma nanga takru sma, toku den e taki dati Gado e gebroiki den rampu fu strafu sma.

Bun aksi e doro na ati fu sma so taki den o wani poti bribi na ini Bijbel

5, 6. San na evolutie-leri nanga tra falsi leri du nanga libisma?

5 Trawan e taki dati Gado no de. Teki na evolutie-leri leki eksempre. A e taki dati libisma kon fu meti. Furu sma di e bribi dati, e taki dati ala sani di de na libi kon fu ensrefi èn taki wan Mekiman no de. Son sma e taki srefi dati a no musu fruwondru wi te libisma e du ogri noso e denki densrefi nomo, fu di wi kon fu meti. Den e taki dati den trangawan musu basi den swakiwan fu di na so a libi de kaba. Sobun, a no musu fruwondru wi taki furu sma e bribi taki kruktudu o de ala ten. Dati meki den wan di e bribi na evolutie-leri no abi howpu trutru.

6 A no de fu taki dati na evolutie-leri nanga tra falsi leri meki tu taki libisma pina na ini den lasti dei disi (Rom. 1:28-31; 2 Tim. 3:1-5). Den leri disi a no bun nyunsu kwetikweti. Na presi fu dati, na apostel Paulus e sori taki den leri dati e meki taki ’a frustan fu sma dungru èn taki den de fara fu a libi di e kon fu Gado’ (Ef. 4:17-19). Boiti dati, na evolutie-leri nanga tra falsi leri meki taki sma no wani sabi a bun nyunsu di e kon fu Gado.Leisi Efeisesma 2:11-13.

Bun aksi e yepi den tu fu frustan san Bijbel e taki so taki den kan si krin taki den sani di den e bribi skrifi na ini Bijbel

7, 8. Na sortu fasi wawan sma kan frustan a bun nyunsu dorodoro?

7 Efu sma wani kon bun baka nanga Gado, dan den musu bribi fosi taki Yehovah de trutru èn taki a bun fu kon sabi en. Wi kan yepi den fu kon sabi Gado, te wi e gi den deki-ati fu luku den sani na den lontu, soleki meti nanga bon. Te sma de klariklari fu ondrosuku den sani disi, dan den o si a koni nanga a makti fu Gado (Rom. 1:19, 20). Ma wan sma no o kisi piki na tapu ala aksi soso fu di a e luku den sani di de na wi lontu. Fu eksempre, a no o kon sabi fu san ede Gado e gi pasi taki sma e pina, san Gado abi na prakseri gi grontapu noso efu Gado e broko en ede nanga ibriwan fu wi.

8 A wan-enkri fasi fa sma kan kon sabi a bun nyunsu fu Gado nanga den sani di a o du, na te den e studeri Bijbel. A de wan bigi grani taki wi kan yepi sma fu kisi piki na tapu den aksi fu den. Ma efu wi wani  doro na ati fu sma, wi musu du moro leki fu leri den san na den tru tori fu Bijbel. Wi musu du ala san wi man fu yepi den frustan fu san ede a de fanowdu fu bribi na ini Gado (2 Tim. 3:14). Fu man du dati bun, wi musu teki na eksempre fu Yesus. Fa a du kon taki a ben man yepi sma fu frustan sani bun? Wan sani di a ben e du na taki a ben poti bun aksi gi sma. Fa wi kan du dati tu?

BUN PREIKIMAN E POTI AKSI NA WAN BUN FASI

9. San wi musu du efu wi wani yepi sma fu kon sabi moro fu Gado?

9 Fu san ede wi musu poti aksi neleki Yesus te wi e preiki gi sma? We, kon meki wi taki dati yu datra e taigi yu taki a abi bun nyunsu gi yu. A kan yepi yu fu kon betre efu yu du wan bigi oparâsi. Kande yu e bribi en. Ma kon meki wi taki dati a e pramisi fu yepi yu sondro fu aksi yu wan tu sani fu yu gosontu. A no de fu taki dati yu no o bribi en. Awansi fa a datra bun, fosi a kan yepi yu, a musu poti aksi gi yu èn a musu arki yu te yu e fruteri en san yu e firi. Na so a de tu nanga wi. Efu wi wani yepi sma fu arki a bun nyunsu fu a Kownukondre, dan wi musu sabi fa fu poti bun aksi. Soso te wi frustan sortu yepi den abi fanowdu, wi kan yepi den fu kon sabi moro fu Gado.

Efu wi wani doro na ati fu sma, wi musu yepi den fu frustan taki a de fanowdu fu bribi na ini Gado

10, 11. San wi o man du te wi e gi leri neleki Yesus?

10 Yesus ben sabi taki bun aksi no e yepi wan leriman wawan fu kon sabi fa wan studenti e denki, ma a e yepi a studenti tu fu denki fu a tori èn fu taki fa a e si sani. Fu eksempre, di Yesus ben wani leri den disipel fu en fu abi sakafasi, a poti wan aksi gi den di ben meki den go denki a tori (Mark. 9:33). Wan leisi Yesus poti wan aksi gi Petrus. Baka dati a aksi Petrus sortuwan fu den tu piki di a kari na a yoistiwan. Disi leri Petrus wan prenspari sani (Mat. 17:24-26). Wan tra leisi Yesus ben wani kon sabi san de na ini na ati fu den disipel fu en. Dati meki a poti wan tu aksi di ben kan yepi den fu taki san den ben denki. (Leisi Mateyus 16:13-17.) Yesus no ben taigi sma nomo san den ben musu du, ma a fasi fa a ben e poti aksi gi den ben yepi den fu bribi a bun nyunsu èn fu drai den libi.

11 Te wi e poti bun aksi neleki Yesus, dan wi o kon sabi san na a moro bun fasi fu yepi sma, wi o leri fa fu taki nanga sma di no e agri nanga wi èn wi o leri sma di abi sakafasi fa fu kisi wini. Luku dri eksempre di o sori wi fa wi kan poti bun aksi.

12-14. Fa yu kan yepi yu pikin fu no frede fu taki nanga trawan fu a bun nyunsu? Gi wan eksempre.

12 Eksempre 1: Kon meki wi taki dati yu pikin komoto na skoro èn a taigi yu taki den pikin fu en klas ben taki dati den dedewan e libi go doro èn taki sondusma e bron na ini hel. Yu pikin ben wani preiki gi den trawan, ma a no ben sabi san fu taki. Fa yu kan yepi en na ini so wan situwâsi? Na presi fu krutukrutu nanga en noso fu taigi en wantewante san a musu taki, yu kan du san Yesus ben du èn poti  aksi gi en so taki a o fruteri yu fa a e denki fu a tori.

13 Yu kan leisi wan tu paragraaf nanga yu pikin fu kapitel 6 na ini a Bijbel leri-buku. * Baka dati yu kan aksi en sortuwan fu den pisi na ini a kapitel a denki taki a kan gebroiki moro bun fu sori den pikin taki den dedewan no e bron na ini hel. Gi en deki-ati fu taki fa a e denki èn fu san ede a e denki so (Rom. 12:2). Taigi yu pikin taki a no abi fu frede fu taki san a e denki, srefi efu a e si sani tra fasi leki yu.

14 Taigi yu pikin taki a kan taki nanga den trawan fu en klas neleki fa yu ben taki nanga en. Yu kan oefen nanga en so taki a kan sabi san a musu taki. Meki a fruteri den pikin wan agersitori èn baka dati a kan poti wan aksi gi den fu kon sabi fa den e denki. Fu eksempre, a kan gebroiki den sani di skrifi na ini paragraaf 17 fu a kapitel dati èn a kan taki: „Fa yu ben o feni en efu wan papa e poti den anu fu wan trangayesi pikin na ini faya soso fu strafu en?” Te a arki fa den tra pikin e denki fu a tori, a kan aksi den: „Efu nowan sma ben o strafu en pikin na a fasi dati, dan yu denki taki Gado di meki libisma ben o meki den pina fu têgo na ini faya soso fu strafu den?” Te yu gwenti oefen den sortu sani disi nanga yu pikin, dan dati kan yepi en fu no frede fu taki nanga trawan fu a bribi fu en. Efu yu e leri yu pikin fu poti bun aksi, dan yu o yepi en fu tron wan bun preikiman.

15. Fa wi kan taki nanga wan sma di no e bribi na ini Gado?

15 Eksempre 2: Na ini a preikiwroko wi kan miti son sma di no e bribi taki wan Gado de. Fu eksempre, wan sma kan taigi wi taki a no e bribi na ini Gado. Na presi  fu tapu a takimakandra, wi kan aksi en na wan lespeki fasi o langa kaba a e denki so èn san meki taki a kon abi a denki disi. Arki en èn sori en taki yu breiti taki a denki bun fu a tori disi. Aksi en efu a ben o wani leisi wan sani di e sori taki wan sma meki ala libisani. Efu a sma wani, gi en a buku Kon krosibei na Yehovah èn poti prakseri na kapitel 5. Te wi e poti aksi na wan lespeki fasi èn na wan switi fasi, wi kan doro na ati fu a sma nanga a bun nyunsu.

16. Fu san ede wi no musu meki a studenti leisi den piki fu a buku nomo te wi e studeri nanga en?

16 Eksempre 3: Te wi e hori wan Bijbelstudie, dan wi kan meki a studenti leisi den piki nomo na ini a buku di wi e studeri. Ma efu wi e du dati, dan wi no e yepi a studenti fu go na fesi. Fu san ede? Fu di wan Bijbelstudenti di e gi piki sondro fu denki dipi fu den tori, o de leki wan bon di no rutu dipi. A kan muilek gi en fu tan na ini a tru bribi te sma e gens en (Mat. 13:20, 21). Fu man yepi a studenti, wi musu aksi en fa a e denki fu den sani di a e leri. Pruberi fu kon sabi efu a e agri nanga den sani di a e leri èn fu san ede a e denki so. Yepi en fu frustan san Bijbel e taki so taki a kan si krin taki den sani di a e bribi skrifi na ini Bijbel (Hebr. 5:14). Efu wi e poti bun aksi gi den Bijbelstudie fu wi, dan a bribi fu den o kon tranga èn den o man horidoro te trawan e gens den noso e pruberi fu kori den (Kol. 2:6-8). Sortu tra sani wi kan du fu de bun preikiman?

BUN PREIKIMAN E YEPI MAKANDRA

17, 18. Te yu e wroko nanga wan tra preikiman, dan fa yu kan yepi en te a e taki nanga wan ososma?

17 Yesus ben seni den disipel fu en go na ini a preikiwroko tu na tu (Mark. 6:7; Luk. 10:1). Bakaten na apostel Paulus taki fu ’trawan di wroko nanga en’ èn ’di ben strei makandra nanga en gi a bun nyunsu’ (Fil. 4:3). Na ini 1953, na organisâsi fu wi bigin wan spesrutu programa pe preikiman ben o leri trawan fa fu preiki moro bun.

18 Te yu e wroko nanga wan tra preikiman, dan fa yu kan yepi en te a e taki nanga wan ososma? (Leisi 1 Korentesma 3:6-9.) Te a e leisi wan Bijbeltekst, dan luku a tekst tu na ini yu Bijbel. Poti prakseri na san a e taki èn na san na ososma e taki. Arki bun so taki yu kan yepi en fu man taki-go-taki-kon nanga na ososma te dati de fanowdu (Preik. 4:12). Ma luku bun taki yu no e koti en mofo te a e taki na wan bun fasi kaba nanga na ososma. Efu yu e kon na ini a tori ibri leisi baka, dan yu kan meki a tra preikiman lasi-ati èn na ososma kan bruya. Son leisi a fiti fu kon na ini a tori. Ma efu yu feni taki yu musu du dati, dan hori en syatu. Baka dati, meki a tra preikiman go doro nanga a takimakandra.

19. San wi musu hori na prakseri èn fu san ede?

19 Te unu e waka fu a wan oso go na a trawan, dan fa unu kan yepi makandra? Gebroiki a ten dati fu taki fa unu kan hori moro bun takimakandra. No taki sani fu den sma di kan meki un lasi-ati. Boiti dati, no krutukrutu fu tra preikiman (Odo 18:24). Wi musu hori na prakseri taki wi alamala e meki fowtu. Fu di Yehovah na wan bun-ati Gado, meki a gi wi a wroko fu preiki a bun nyunsu èn a sori wi fa wi musu du dati. Wi kan si a wroko disi leki wan gudu di wi kisi fu en. (Leisi 2 Korentesma 4:1, 7.) Sobun, meki ibriwan fu wi sori taki wi de nanga tangi gi a gudu dati, fu di wi e du ala san wi man fu de bun preikiman fu a bun nyunsu.

^ paragraaf 13 Yu kan gebroiki a brochure tu di nen A pasi di e tyari sma go na têgo libi—Yu feni en?