Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  april 2013

Yu ben sabi a sani disi?

Yu ben sabi a sani disi?

A de so taki baka a yari 70 sma bow a tempel na Yerusalem baka?

YESUS ben taki dati a tempel fu Yehovah ben o pori krinkrin. A profeititori disi kon tru di Titus kon nanga a legre fu Rome fu pori Yerusalem na ini a yari 70 (Mat. 24:2). Bakaten, Grankownu Julianus ben wani bow a tempel baka.

Sma e taki dati Julianus ben de a lasti Grankownu fu Rome di ben e anbegi falsi gado. Julianus, di ben de wan neef fu Constantijn a Bigiwan, ben kisi leri fu den sma di ben e kari densrefi Kresten na ini a ten dati. Ma baka di a tron Grankownu na ini a yari 361, a drai baka gi den sani di den leri en. Historia buku e kari en „a sma di fadon komoto na bribi” fu di a ben gowe libi a kerki.

Julianus no ben lobi den sma di e kari densrefi Kresten. Wan sani di meki kande taki a no ben lobi den Kresten, na wan sani di pasa di a ben abi siksi yari. A ben si fa den sma di ben e kari densrefi Kresten kiri en papa nanga den tra famiri fu en. Sma di skrifi fu a historia fu kerki, taki dati Julianus gi den Dyu deki-ati fu bow a tempel fu den baka. A du disi fu di a ben wani sori sma taki a profeititori fu Yesus no tru. *

Wi kan de seiker taki Julianus ben wani bow a tempel baka. Ma historia skrifiman no de seiker efu a ben bigin bow a tempel trutru. Sosrefi, efu a ben bigin bow en trutru, den no man taki krin san meki taki a no bow en go doro. Ma wán sani de seiker. Sma kiri Julianus sowan 2 yari baka di a tron Grankownu èn na so a tempel no bow moro.

A presi pe a tempel ben de fosi, èn fa a ben de na ini a ten fu Yesus

^ paragraaf 5 A sani disi no ben o sori taki a profeititori fu Yesus no tru. Yesus no ben taki dati a tempel no ben o bow noiti moro. A ben taki dati a ben o kisi pori, èn na dati pasa na ini a yari 70.