Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  april 2013

 ONDROFENITORI

Feifitenti yari langa wi du pionierwroko na ini Fensikondre

Feifitenti yari langa wi du pionierwroko na ini Fensikondre

Wi ben taigi wan mati fu wi: „A makriki gi yu fu pionier. Yu papa nanga yu mama de na ini a tru bribi èn den kan horibaka gi yu.” Ma a piki wi: „Wi alamala abi a srefi Papa.” A sani disi meki wi prakseri wan prenspari sani: Wi Papa na hemel e sorgu gi den futuboi fu en èn a e gi den krakti. Den sani di wi ondrofeni na ini wi libi e sori taki a sani disi tru.

 WI PAPA NANGA MAMA ben abi tin pikin èn wi ben e libi na ini Noord-Ostrobothnia, na Finland. Drape wi osofamiri ben abi wan presi pe wi ben e prani sani èn kweki meti. A Di Fu Tu Grontapufeti ben bigin di wi ben yongu ete. Aladi a feti ben de bun fara fu wi oso, toku wi ben sabi taki furu sma ben e pina srefisrefi. Wan neti di den trowe bom na tapu den foto Oulu nanga Kalajoki, wi ben si a redi fu a faya na ini a loktu. Wi papa nanga mama ben taigi wi fu go kibri efu wi si den opolani fu den srudati e frei na loktu. Sobun, yu kan frustan taki wi ben breiti srefisrefi di wi bigi brada Tauno fruteri wi fu wan paradijs grontapu pe nowan sma o pina.

Tauno ben abi 14 yari di a kon sabi den tru tori fu Bijbel fu di a ben e leisi den buku fu den Bijbel Ondrosukuman. Den sani di a ben leri na ini Bijbel meki taki a no ben wani go na ini a legre di a Di Fu Tu Grontapufeti bigin. Dati meki den poti en na ini strafu-oso pe den ben du wan lo ogri-ati sani nanga en. Ma a sani disi meki taki a ben wani dini Yehovah nanga moro faya. Baka di den lusu en, a bigin du moro na ini a preikiwroko. A fasi fa wi brada horidoro, gi wi deki-ati fu go na den konmakandra fu den Kotoigi na ini wan dorpu krosibei fu wi oso. Wi ben musu wroko tranga fu kan abi nofo moni fu go na den kongres tu. Wi ben e meki krosi gi den birtisma fu wi èn wi ben e prani ayun nanga droifi. Fu di furu wroko ben de fu du na oso, meki a no ala ten a heri osofamiri ben kan go makandra na wán kongres.

Fu kruktu-anusei go na reti-anusei: Matti (papa), Tauno, Saimi, Maria Emilia (mama), Väinö (a beibi), Aili nanga Annikki na ini 1935

Di wi kon sabi Yehovah moro bun èn di wi kon sabi san a o du na ini a ten di e kon, dan wi kon lobi en moro. Fu dati ede wi bosroiti fu gi wi libi abra na en. Na ini 1947 wi ala tu dopu. (Annikki ben abi 15 yari èn Aili ben abi 17 yari.) Wi sisa Saimi dopu na ini a srefi yari dati. Wi ben e studeri Bijbel tu nanga wi sisa Linnea di ben trow kaba. En nanga en heri osofamiri tron Yehovah Kotoigi tu. Baka di wi dopu, wi ben wani pionier. Son leisi wi ben e dini leki fakansi pionier (noso yepipionier).

WI BIGIN DU FURUTEN DINIWROKO

Fu kruktu-anusei go na reti-anusei: Eeva Kallio, Saimi Mattila-Syrjälä, Aili, Annikki, nanga Saara Noponen na ini 1949

Na ini 1955 wi froisi go na a foto Kemi, te na a noordsei fu Fensikondre. Aladi wi ala tu ben abi wan grontapuwroko, toku wi ben wani tron pionier. Ma wi ben frede taki wi no ben o abi moni fu sorgu wisrefi. Wi ben prakseri fu wroko wan pisi ten, so taki wi ben o abi nofo moni fu pionier bakaten. Ma di a pionier sisa di wi kari na a bigin taki nanga wi, wi kon si sani tra fasi. Wi kon frustan taki wi no ben musu frutrow na tapu wisrefi nomo noso na tapu wi famiri, ma wi ben musu frutrow na tapu Yehovah di ben o gi wi ala san wi abi fanowdu.

Wi e go na wan kongres na Kuopio na ini 1952. Fu kruktu-anusei go na reti-anusei: Annikki, Aili, Eeva Kallio

Na a ten dati, wi ben abi nofo moni fu sorgu gi wisrefi tu mun langa. Sobun, na ini mei 1957, wi  gi wi nen fu pionier tu mun langa na a presi Pello, na Lapland. Baka tu mun, wi ben abi ala a moni ete di wi ben poti na wan sei. Sobun, wi gi wi nen baka fu pionier ete tu mun. Ma baka den tu mun dati, wi ben abi ala wi moni ete. Now wi ben de seiker taki Yehovah ben o sorgu gi wi. Baka 50 yari wi abi a srefi moni ete di wi ben abi na a bigin fu wi pionierwroko! Te wi e prakseri ala den yari di pasa, wi e firi leki Yehovah hori wi na wi anu èn a taigi wi: „No frede. Misrefi o yepi yu.”Yes. 41:13.

Baka 50 yari wi abi a srefi moni ete di wi ben abi na a bigin fu wi pionierwroko!

Kaisu Reikko nanga Aili na ini a preikiwroko

Na ini 1958 a kring-opziener fu wi aksi wi efu wi ben wani go wroko leki spesrutu pionier na a foto Sodankylä, na ini Lapland. Na a ten dati wán Kotoigi nomo ben de drape. A moi fu sabi fa a sisa disi kon sabi a tru bribi. Wan leisi a boi fu en ben go koiri nanga a skoro fu en na Helsinki, a mamafoto fu Fensikondre. Di den ben e waka na ini a foto, wan owru sisa gi a boi wan Waktitoren èn a taigi en fu gi en mama a tijdschrift. Di en mama leisi a tijdschrift, a frustan wantewante taki a feni a tru bribi.

Di wi doro na Sodankylä, wi yuru wan kamra na tapusei fu wan presi pe den ben e koti udu. Drape wi ben e hori konmakandra. Na a bigin, na soso wi nanga a sisa nanga en umapikin ben de na den konmakandra. Wi ben e leisi den sani di wi ben musu sreka gi den konmakandra fu a wiki dati. Bakaten wan man di ben studeri Bijbel nanga den Kotoigi fosi, kon wroko na a wrokopresi pe wi ben e tan. En nanga en osofamiri bigin kon na den konmakandra tu. Bakaten en nanga en wefi dopu èn a bigin teki fesi na den konmakandra. Baka wan pisi ten wan tu tra man di ben e wroko drape tu bigin kon na den konmakandra èn den srefi teki a tru bribi. Baka wan tu yari, a grupu fu wi ben bigi nofo fu tron wan gemeente.

A NO BEN MAKRIKI

Fu man preiki gi sma, wi ben abi fu go na fara presi. Na a waran pisi ten fu a yari, wi ben e waka, wi ben e rèi baisigri, èn wi ben e pari boto srefi fu man doro den sma na ini a kontren. Den baisigri ben yepi wi furu. Wi ben e gebroiki den tu te wi ben musu go na den kongres èn na wi papa nanga mama di ben e libi hondrohondro kilometer moro fara. Na a kowru pisi ten fu a yari, wi ben e teki bus fu go na wan dorpu na ini a kontren, dan wi ben e preiki drape oso fu oso. Te wi ben kaba preiki na ini wan dorpu, wi ben e waka go na a tra dorpu. A snew ben hei èn a no ala ten den ben puru en na tapu den pasi. Te wan sma ben rèi na  tapu wan pasi kaba, dan a ben moro makriki gi wi fu waka drape. Ma efu snew ben fadon, den pasi ben tapu baka. Te a weer ben e kon waran baka, a snew ben bigin smèlter èn a ben muilek gi wi fu waka na ini.

Makandra na ini a preikiwroko na wan kowru dei

Wi ben leri fu weri waran krosi te a ben kowru èn te snew ben fadon. Wi ben e weri langa kowsu fu skapu-wiwiri, tu noso dri syatu kowsu èn susu di ben doro te na wi koiti. Ma furu tron a snew ben kon na ini den susu fu wi te wi ben e waka. Te wi ben kon na a trapu fu wan sma oso, wi ben e puru den susu èn seki a snew puru na ini. Na ondrosei fu den langa dyakti fu wi ben e nati tu te wi ben e waka na ini a snew. Te a weer ben kon moro kowru, den nati pisi fu wi dyakti ben kon steifi. Wan leisi wan uma taki: „Yu musu fu abi bribi trutru fu man waka na ini a kowru weer disi.” Wi ben waka moro leki 11 kilometer kon na en oso.

Fu di wi ben musu waka bun fara, wi ben e sribi nofo tron na den oso fu den sma na ini a birti. Te neti ben o fadon, wi ben e aksi den sma wan presi fu sribi. Den sma no ben abi kefalek moi oso, ma den ben abi switifasi. Fu dati ede wi no ben e feni sribipresi nomo, ma den ben e gi wi nyanyan tu. Nofo tron wi ben e sribi na tapu a buba fu wan dia èn son leisi na tapu a buba fu wan beer srefi. Ma ten na ten wi ben e sribi na moro bun presi tu. Fu eksempre, wan uma na ini wan bigi oso ben abi wan kamra pe wi ben kan sribi na ini. A ben de wan sodrokamra nanga wan moi bedi di ben abi moi krin weti laken. Furu tron wi ben e taki nanga den ososma te lati neti. Na wan fu den presi pe wi ben e preiki, wan man nanga en wefi ben e sribi na a wan sei fu a kamra èn wi ben e sribi na a tra sei fu a kamra. Wi taki nanga den fu Bijbel te lati neti èn te musudei mamanten srefi. Ala tu ben e poti wan lo aksi, a wan baka a trawan.

BUN BAKAPISI NA INI A PREIKIWROKO

Lapland na wan moi presi. Ma san ben moro moi fu si, na taki den sma ben wani sabi moro fu Yehovah. Wan tu fu den sma di ben wani sabi moro, ben de wan tu man di ben kon drape fu koti bon. Son leisi wi ben musu go na ini wan kampu pe someni mansma ben e tan. Ma den man disi ben lobi fu arki a boskopu fu Bijbel èn den ben lobi fu leisi den buku fu wi.

Wi abi furu moi ondrofenitori. Wan leisi na oloisi na a presi pe den bus e wakti ben de feifi miniti na fesi. Sobun, di wi doro drape a bus di wi ben wani teki ben gowe kaba. Ne wi bosroiti fu teki wan bus di ben o go na wan tra dorpu. Noiti wi ben go preiki drape ete. Na a fosi oso, wi miti wan yongu uma di taki: „Mi ben sabi taki unu ben o kon luku mi.” Na uma disi ben aksi en sisa, di ben de wan Bijbelstudie fu wi, fu wi go luku en a  dei dati. Ma wi no ben kisi a boskopu. Na so wi bigin studeri Bijbel nanga na uma disi èn den tra famiri di ben e tan na ini a birti. A no langa baka dati, wi bigin studeri Bijbel nanga ala den twarfu sma disi makandra. Sensi a ten dati furu sma na ini a famiri disi tron Kotoigi fu Yehovah.

Na ini 1965 wi ben musu go dini na ini wan gemeente na ini Kuusamo pe wi e de te now ete. Na a ten dati wan tu preikiman ben de nomo na ini a gemeente dati. Biginbigin a ben muilek fu preiki na ini a kontren disi. Den sma ben de fu tra kerki èn den no ben lobi en taki wi ben e preiki gi sma. Ma furu fu den ben abi lespeki gi Bijbel. Sobun, wi pruberi fu leri sabi den sma èn baka sowan tu yari a ben moro makriki fu preiki gi den.

TE NOW ETE WI E PREIKI FAYAFAYA

Son sma di wi gi Bijbelstudie

Now wi no abi so furu krakti moro fu preiki heri dei, ma toku wi e preiki pikinmoro ibri dei. Wan manpikin fu wi brada Tauno ben gi Aili deki-ati fu go na rijlès èn na ini 1987 di Aili ben abi 56 yari a kisi en rijbewijs. Disi meki en moro makriki gi wi fu prati a bun nyunsu na ini a bigi kontren pe wi de. Wan tra sani di de wan bigi yepi tu, na taki wi ben kan go tan na ini wan kamra di bow na sei wan nyun Kownukondre zaal.

Wi breiti srefisrefi fu si omeni sma teki a tru bribi na a noordsei fu Fensikondre. Di wi bigin pionier, wan tu preikiman nomo ben de na ini a bigi kontren disi. Now wi abi wan kring fu wan tu gemeente. Furu tron te wi ben de na wan bigi konmakandra noso na wan kongres sma kon aksi wi efu wi sabi suma na den. Nofo tron den sma disi e taigi wi taki wi ben kon studeri Bijbel na den oso di den ben pikin. Gado blesi a wroko fu wi trutru!1 Kor. 3:6.

Wi lobi fu preiki, srefi te alen e kon

Na ini 2008 wi ben de spesrutu pionier 50 yari kaba. Wi e taki Yehovah tangi taki wi ben man gi makandra deki-ati fu tan du a prenspari wroko disi. Wi no ben abi furu, ma noiti wi ben mankeri wan sani (Ps. 23:1). Na fu soso wi ben e draidrai fu pionier na a bigin! Wi breiti taki Yehovah gi wi krakti ala den yari disi soleki fa a pramisi na ini Yesaya 41:10 pe skrifi: „Mi o meki yu kon tranga. Mi o yepi yu trutru. Iya, mi o hori yu nanga mi reti-anu fu retidu.”