Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  maart 2013

Yehovah na wi kibripe

Yehovah na wi kibripe

„Ke Yehovah, na ini ala den ten di pasa, yu ben de wan trutru kibripe gi wi.”Ps. 90:1.

1, 2. Fa den futuboi fu Gado e si a grontapu disi? Suma na a kibripe fu den?

 YU LOBI a libi na ini na ogri grontapu disi? Efu yu no lobi en, dan yu a no a wan-enkri sma di e firi so. Sensi owruten, den sma di lobi Yehovah trutru ben e firi so tu. Gi den a ben de neleki den e libi na ini wan kondre di no de fu den. Fu eksempre, di son anbegiman fu Gado ben de na ini a kondre Kanan, dan ibri tron baka den ben e seti kampu na wan tra presi. Den ben e „fruteri ala sma taki den ben de trakondre sma èn taki den ben kon libi wan pisi ten nomo na ini a kondre”.Hebr. 11:13.

2 Na so a de tu nanga den bakaman fu Krestes di ’o tan na hemel’. Den e si densrefi leki ’trakondre sma di e libi wan syatu pisi ten nomo na ini a grontapu disi’ (Fil. 3:20; 1 Petr. 2:11). Den „tra skapu” fu Krestes ’no de wan pisi fu grontapu tu, neleki fa Yesus no ben de wan pisi fu grontapu’ (Yoh. 10:16; 17:16). Ma disi no wani taki dati a pipel fu Gado no abi wan presi gi densrefi. Fu taki en leti, den abi a moro bun tanpresi di de, aladi yu no man si en nanga ai. Drape den e firi switi èn den e kisi kibri. Ma san na a presi disi? Moses ben taki fu en di a skrifi: „Ke Yehovah, na ini ala den ten di pasa, yu ben de wan trutru kibripe gi wi” (Ps. 90:1). * Fa Yehovah sori taki a ben de „wan trutru kibripe” gi den futuboi fu en na ini owruten? Fa a de „wan trutru kibripe” gi en pipel na ini a ten disi? Fa a o de a wan-enkri kibripe na ini a ten di e kon?

YEHOVAH BEN DE „WAN TRUTRU KIBRIPE” GI EN FUTUBOI NA INI OWRUTEN

3. Nanga san Psalm 90:1 e agersi Yehovah èn fu san ede?

3 Son leisi Bijbel e agersi Yehovah nanga sani di wi kan si, so taki wi man frustan moro bun fa a de. Fu eksempre,  na ini Psalm 90:1 skrifi taki Yehovah na wan „kibripe” noso wan tanpresi. Disi e meki wi prakseri wan presi pe lobi de, pe wi e firi switi èn pe wi no e frede taki ogri kan miti wi. Fu san ede a Psalm e taki dati Yehovah na so wan presi? Bijbel e taki dati Yehovah na lobi (1 Yoh. 4:8). A e taki tu dati en na wan Gado di e meki den futuboi fu en firi korostu èn a e kibri den (Ps. 4:8). Meki wi luku fu eksempre fa Yehovah ben de wan kibripe gi Abraham, Isak nanga Yakob.

4, 5. Fa Gado blesi Abraham èn fa a ben de wan kibripe gi en?

4 Yehovah ben taigi Abraham: „Gowe libi yu kondre, yu famiri nanga na osofamiri fu yu papa, dan go na a kondre di mi o sori yu.” Kande Abraham ben e aksi ensrefi fa en libi ben o waka te a ben o du dati. Ma den sani di Yehovah taigi en baka dati, ben musu fu gi en furu deki-ati. Yehovah taki: „Mi o meki yu tron na afo fu wan bigi pipel, mi o blesi yu èn mi o meki yu nen kon bigi. . . . Mi o blesi den wan di e blesi yu. Efu wan sma e winsi ogri gi yu, dan mi o fluku a sma dati.”Gen. 12:1-3.

5 Nanga den wortu disi Yehovah pramisi Abraham taki a ben o de wan kibripe gi en nanga den bakapikin fu en (Gen. 26:1-6). Yehovah du trutru san a ben pramisi. Fu eksempre, a kownu fu Egepte nanga Kownu Abimeilek fu Gerar ben kan kiri Abraham èn teki en wefi Sara, ma Yehovah sorgu taki disi no pasa. Yehovah kibri Isak nanga Rebeka tu di a srefi sortu sani ben o pasa nanga den (Gen. 12:14-20; 20:1-14; 26:6-11). Bijbel e taki: „[Yehovah] no meki nowan libisma du ogri nanga den. Ma fu den ede, meki a piri-ai gi kownu. A ben taki: ’Un no musu fasi den salfuwan fu mi èn un no musu du nowan ogri nanga den profeiti fu mi.’”Ps. 105:14, 15.

„Mi no o gowe libi yu”

6. San Isak taigi Yakob fu du èn san Yakob ben e aksi ensrefi kande?

6 Yehovah ben sorgu tu gi Abraham en granpikin Yakob. Di Yakob ben o teki wan wefi, dan en papa Isak taigi en: „Yu no musu teki wan fu den umapikin fu Kanan leki wefi. Go na Padan-Aram, na a oso fu Betuwel, a papa fu yu mama. Te yu de drape, dan teki wan fu den umapikin fu Laban, a brada fu yu mama, leki wefi” (Gen. 28:1, 2). Ne Yakob du san Isak taki èn a gowe libi en famiri na ini Kanan. Soleki fa a sori, dan na en wawan waka hondrohondro kilometer go na Haran (Gen. 28:10). Kande a ben e aksi ensrefi: ’O langa mi o gowe fu mi famiri? Mi omu o breiti fu si mi? Mi o feni wan wefi di lobi Yehovah?’ Di a doro na a presi Lus, di de sowan 100 kilometer fu Berseiba, wan sani pasa di meki taki a no ben e broko en  ede nanga den sani disi moro. San pasa na Lus?

7. Sortu deki-ati Yehovah gi Yakob na ini wan dren?

7 Di Yakob ben de na Lus, a kisi wan dren. Na ini a dren Yehovah taigi en: „Mi o de nanga yu èn mi o kibri yu awinsi pe yu e go. Mi o tyari yu kon baka na a kondre disi. Mi no o gowe libi yu. Mi o du ala san mi pramisi yu” (Gen. 28:15). A musu fu de so taki den wortu disi gi Yakob furu deki-ati! Wi kan frustan taki now a ben wani si trutru fa Yehovah ben o du san a pramisi. Efu yu gowe libi yu oso, kande fu go yepi den brada nanga sisa na ini wan tra kondre, dan yu kan frustan heri bun fa Yakob ben e firi na a ten dati. Ma a no de fu taki dati yu srefi si fa Yehovah e sorgu yu.

8, 9. Fa Yehovah ben de „wan trutru kibripe” gi Yakob èn san wi kan leri fu disi?

8 Di Yakob doro Haran, en omu Laban ben breiti fu si en. A ben meki Yakob trow nanga Lea èn nanga Rakel. Ma bakaten Laban ben wani bedrigi Yakob. Tin leisi a kenki a pai di a ben musu gi Yakob! (Gen. 31:41, 42) Toku Yakob no du noti. A ben sabi taki Yehovah ben o sorgu gi en èn na dati Yehovah du tu. Na a ten di Yehovah taigi Yakob fu drai go baka na Kanan, Yakob ben abi „furu meti, umasrafu, mansrafu, kameili, nanga buriki” (Gen. 30:43). Nanga bigi tangi na ati, Yakob begi: „Mi no warti ala a bun-ati di yu e sori mi èn mi no warti a fasi fa yu horibaka gi mi, bika nanga mi tiki wawan mi koti a Yordan-liba disi abra. Ma now mi kan prati den sma nanga den sani di mi abi na tu grupu.”Gen. 32:10.

9 Den tori disi e sori taki den sani di Moses taki de so trutru. A ben taki: „Ke Yehovah, na ini ala den ten di pasa, yu ben de wan trutru kibripe gi wi” (Ps. 90:1). Yehovah no kenki. Te now ete a lobi den futuboi fu en di e dini en nanga den heri ati. Te now ete a e kibri den èn a e sorgu den (Yak. 1:17). Meki wi luku fa a e du dati now.

YEHOVAH NA „WAN TRUTRU KIBRIPE” GI WI NA INI A TEN DISI

10. Fu san ede wi kan de seiker taki Yehovah na „wan trutru kibripe” gi wi te now ete?

10 Kon meki wi taki dati yu musu kon na fesi krutu fu taki sortu ogri wan man du. A man disi koni srefisrefi, a abi furu makti, a de wan ogri-ati leiman, a de wan kiriman èn na heri grontapu a abi sma di e wroko gi en. Te yu kaba taki fu ala den ogri di a man disi du, fa yu ben o firi te yu musu gowe libi a krutu-oso te dei tapu? A no frede yu ben o frede? Kande yu ben o aksi skowtu fu tyari yu go na oso srefi. We, na wan srefi sortu sani e miti den futuboi fu Yehovah na ini a ten disi. Wi e fruteri ala sma fu Yehovah èn fu den ogri di en bigi feanti Satan du. (Leisi Openbaring 12:17.) Satan e pruberi fu tapu a pipel fu Gado fu preiki. Ma a man du dati? Kwetikweti! Na presi fu dati, wi e tan preiki gi moro nanga moro sma na heri grontapu. Fa disi kan dan? A wan-enkri fasi fa disi kan, na fu di Yehovah na „wan trutru kibripe” gi wi. Na ini den lasti dei disi a e kibri èn blesi en pipel moro leki fosi. (Leisi Yesaya 54:14, 17.) Ma Yehovah no kan de „wan trutru kibripe” gi wi efu wi e gi Satan pasi fu kori wi.

Den engel fu Gado e horibaka gi den futuboi fu en èn den e kibri den

11. Sortu tra sani wi kan leri fu Abraham, Isak nanga Yakob?

11 Meki wi luku sortu tra sani wi kan leri fu Abraham, Isak nanga Yakob. Aladi den ben e libi na ini a kondre Kanan, toku den no ben e moksi nanga den sma fu a kondre. Den no ben lobi a fasi fa den sma dati ben e libi, fu di den sma ben e du furu ogri èn den ben e du hurudu (Gen. 27:46). Den man disi no ben abi wan lo wèt  fanowdu fu sori den san bun èn san no bun. Den ben sabi san Yehovah lobi èn san a no lobi srefisrefi. Fu di Yehovah ben de a kibripe fu den, meki den no ben e luku o krosibei den ben kan kon fu grontapu. Na presi fu dati den ben e du ala muiti fu no tron wan pisi fu grontapu. Disi na wan moi eksempre gi wi! Yu e du ala muiti fu de leki den man disi di ben e dini Yehovah nanga den heri ati? Te yu e luku den sma di yu e teki leki mati èn den sani di yu lobi du fu abi prisiri, dan a de krin fu si taki yu no wani de wan pisi fu a grontapu disi? A sari fu si taki son sma na ini a Kresten gemeente e firi switi na ini a grontapu fu Satan èn den lobi son sani ete fu a grontapu disi. Efu yu e denki so, awinsi na pikinso nomo, dan aksi Yehovah fu yepi yu. Hori na prakseri taki a grontapu disi na fu Satan. A e denki ensrefi nomo èn a no e broko en ede nanga yu kwetikweti.2 Kor. 4:4; Ef. 2:1, 2.

12. (a) Fa Yehovah e yepi den futuboi fu en? (b) Fa yu feni a fasi fa Yehovah e yepi wi?

12 Efu wi no wani taki Satan kori wi, dan wi musu teki ala a yepi di Yehovah e gi den futuboi fu en. Den sani di a seti fu yepi wi, na den gemeente konmakandra, na Osofamiri Anbegi èn den owruman di a poti na ini a gemeente fu gi wi deki-ati te wi e kisi problema na ini a libi (Ef. 4:8-12). Brada George Gangas di ben de wan memre fu a Tiri Skin furu yari langa, taki: „Te mi de nanga [a pipel fu Gado] a de leki mi de nanga mi famiri.” Na so yu e firi tu?

13. Sortu prenspari sani wi kan leri fu Hebrewsma 11:13?

13 Wan tra prenspari sani di wi kan leri fu Abraham, Isak nanga Yakob, na taki wi no musu frede fu de tra fasi leki den sma na wi lontu. Soleki fa wi ben si na ini  paragraaf 1, den man disi ben e „fruteri ala sma taki den ben de trakondre sma èn taki den ben kon libi wan pisi ten nomo na ini a kondre” (Hebr. 11:13). Yu e sori taki yu de tra fasi leki den sma fu grontapu? A tru taki son leisi disi no makriki fu du. Ma Gado kan yepi yu èn yu Kresten brada nanga sisa e horibaka gi yu tu. No frigiti taki yu no de yu wawan. Ala sma di wani dini Yehovah musu feti nanga Satan èn nanga a grontapu fu en! (Ef. 6:12) Ma wi kan wini a feti disi te wi e frutrow na tapu Yehovah èn te wi meki a de wi kibripe.

14. Sortu „foto” Abraham ben e fruwakti?

14 Wan tra prenspari sani na disi: Neleki Abraham wi musu hori na prakseri sortu blesi wi o kisi (2 Kor. 4:18). Na apostel Paulus ben skrifi taki Abraham „ben fruwakti a foto di abi trutru fondamenti. A sma di prakseri fa fu meki a foto dati èn di bow en, na Gado” (Hebr. 11:10). A  „foto” dati na Gado Kownukondre. Abraham ben musu wakti fu a „foto” dati kon. Ma te yu luku en bun, dan wi no abi fu du dati. Gado Kownukondre e tiri nownow kaba na ini hemel. Boiti dati, a de krin fu si taki a o bigin tiri dyaso na grontapu heri esi. A Kownukondre na wan trutru sani gi yu? Disi de krin fu si na ini a fasi fa yu e libi? Yu e poti a Kownukondre na a fosi presi na ini yu libi èn yu e sorgu taki yu no de wan pisi fu a grontapu disi?Leisi 2 Petrus 3:11, 12.

YEHOVAH O TAN „WAN TRUTRU KIBRIPE” GI WI NA INI DEN LASTI DEI DISI

15. San o pasa nanga den sma di e frutrow na tapu a grontapu disi?

15 Now di a grontapu fu Satan e kon na wan kaba, sani o kon moro ogri dei fu dei (Mat. 24:7, 8). A libi o kon moro ogri srefi na a ten fu a bigi banawtu. Na heri grontapu sani o kisi pori, soso bruya o de èn sma o frede srefisrefi (Hab. 3:16, 17). Bijbel e taki dati den o bruya so te, taki den o „go kibri na ini den bergi-olo èn na mindri den bigi bergiston” (Openb. 6:15-17). Ma nowan bergi-olo o man kibri den èn nowan bigi bisnis noso politiek organisâsi o man yepi den tu.

16. Fa wi musu si a Kresten gemeente èn fu san ede?

16 Ma na a ten dati, Yehovah o kibri a pipel fu en. Neleki a profeiti Habakuk, den „o de nanga bigi prisiri fu Yehovah ede”. Den „o prisiri nanga a Gado di o frulusu” den (Hab. 3:18). Fa Yehovah o kibri wi na ini a muilek ten dati? We, wi abi fu wakti luku san o pasa. Ma wi kan de seiker taki a pipel fu Yehovah o de wan pipel di orga èn di e wakti Yehovah fu taigi den san fu du, neleki den Israelsma di ben e gowe libi Egepte. (Openb. 7:9; leisi Eksodes 13:18.) Fa wi o sabi san Yehovah wani wi fu du? A kan taki a o gebroiki a gemeente fu du disi. Yesaya 26:20 e taki fu „kamra” pe Gado pipel o go kibri. Kande den kamra disi na den gemeente na heri grontapu. (Leisi Yesaya 26:20.) Yu e si den gemeente konmakandra leki wan prenspari sani? Den sani di wi e yere na ini a gemeente e kon fu Yehovah. Sobun, te yu e kisi rai na ini a gemeente, yu e gi yesi wantewante?Hebr. 13:17.

17. Fu san ede wi kan taki dati Yehovah na „wan trutru kibripe” srefi gi den futuboi fu en di dede?

17 Yehovah na „wan trutru kibripe” srefi gi den futuboi fu en di dede fosi a bigi banawtu. Fa so? Langa ten baka di Abraham, Isak nanga Yakob dede, Yehovah taigi Moses: „Mi na a Gado fu . . . Abraham, a Gado fu Isak, èn a Gado fu Yakob” (Eks. 3:6). Di Yesus ben taki wan leisi fu a tekst disi, a taki: „A no de wan Gado fu den dede sma, ma wan Gado fu den wan di de na libi, bika gi en den alamala e libi” (Luk. 20:38). Iya, efu wan sma tan dini Yehovah te na dede, dan gi en a de neleki so wan sma de na libi ete. Wi kan de seiker taki so wan sma o kisi wan opobaka.Preik. 7:1.

18. Fa Yehovah o de „wan trutru kibripe” gi en pipel na wan tra fasi na ini a nyun grontapu?

18 Na ini a nyun grontapu di de fu kon, Yehovah o de „wan trutru kibripe” gi en pipel na wan tra fasi. Openbaring 21:3 e taki: „Luku, a tenti fu Gado de na libisma. Gado o tan nanga den.” Na a bigin Gado o meki Yesus Krestes tiri grontapu dusun yari. Baka den dusun yari te Yesus du ala san Gado wani en fu du na grontapu, dan a o gi a Kownukondre na en Papa baka (1 Kor. 15:28). Baka dati libisma no o abi sondu moro èn Yesus no o abi fu de den mindriman moro. Dan Yehovah o tiri de wi Tiriman. Iya, wan heri moi ten e wakti wi! Ma fosi a ten dati doro, meki wi du muiti fu de leki den futuboi fu Yehovah di tan dini en nanga den heri ati èn di meki Yehovah de „wan trutru kibripe” gi den.

^ paragraaf 2 Da Bijbel na ini Sranantongo e taki na Psalm 90:1: „MASRA, Joe ben de wi tanpresi gi ala wi bakatem pikin.”