Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  maart 2013

’Noti o meki den sma di lobi Yehovah naki futu’

’Noti o meki den sma di lobi Yehovah naki futu’

„Den wan di lobi yu wèt o abi freide pasa marki. Noti o meki den naki futu.”PS. 119:165.

1. Fruteri fa wan uma di ben e lon streilon no gi abra.

MARY DECKER ben de wan tini ete di a bigin lon bigi streilon. A ben man lon so bun, taki furu sma ben denki taki a ben o wini gowtu na den Olempis Prei fu 1984. Ma di a ben e lon a streilon fu 3000 meter, en futu tuka nanga a di fu wan tra sma di ben e lon na en sei, dan a fadon. A no ben man lon a heri streilon fu di a kisi mankeri èn a ben e krei di den opo en tyari gowe. Ma toku Mary no gi abra. A no doro wán yari srefi di a bigin lon streilon baka. Na ini 1985 a wini a streilon fu wán nanga afu kilometer. San moro moi srefi, na taki a lon moro esi leki iniwan tra uma na a ten dati.

2. Na ini sortu streilon tru Kresten de? Fa wi musu lon a streilon disi?

2 A libi fu wi leki Kresten de leki wan streilon fu kisi têgo libi. Wi no musu meki noti tapu wi fu lon te na a kaba. A streilon fu wi no de leki den syatu streilon pe wan sma musu lon bun esi fu kan wini. Wi no musu lon safrisafri tu èn stop ten na ten. Na presi fu dati, a streilon fu wi de leki wan maraton pe wi musu lon bun fara. Sobun, wi musu horidoro fu man wini. Den sma na ini Korente ben sabi den sortu streilon disi heri bun. Na apostel Paulus taki fu so wan streilon na ini a brifi di a skrifi gi den Kresten na ini Korente. A taki: „Unu no sabi taki ala den sma di e teki prati na wan streilon e lon, ma na wán nomo e wini? Lon na so wan fasi taki unu kan wini.”1 Kor. 9:24.

3. Suma kan wini a streilon fu têgo libi?

3 Bijbel e taigi wi fu lon a streilon disi. (Leisi 1 Korentesma 9:25-27.) Den sma di e lon a streilon disi te na a kaba o kisi têgo libi. Salfu Kresten o kisi têgo libi  na hemel èn den tra Kresten o libi na grontapu. A streilon disi no de leki den trutru streilon pe wán sma nomo e wini. Ala sma kan wini, solanga den lon te na a kaba (Mat. 24:13). Wan sma kan lasi te a no e hori ensrefi na den wèt noso te a no lon te na a kaba. Disi na a wan-enkri streilon di e gi sma na okasi fu kisi têgo libi.

4. Fu san ede a no makriki fu lon a streilon te na a kaba?

4 A no makriki fu lon a streilon te na a kaba. Wi musu man horidoro èn wi no musu meki noti tapu wi fu doro a kaba. Yesus Krestes na a wan-enkri sma di lon a streilon sondro fu naki futu wan leisi. Ma Yakobus ben skrifi taki ala bakaman fu Krestes „e sondu [noso, e naki futu] furu tron” (Yak. 3:2). A ben abi leti. Wi alamala abi swakifasi èn den swakifasi fu trawan kan de wan problema gi wi tu. Dati meki ten na ten a kan pasa taki wi stotu wi futu, wi e degedege noso wi no e lon so esi moro. Wi kan fadon srefi. Ma wi musu opo baka èn lon go doro. Son sma di fadon abi yepi fanowdu fu opo baka, so taki den kan lon go doro. Iya, a kan taki wi naki futu fadon wanwan leisi noso furu tron.1 Kow. 8:46.

Efu yu fadon, suku yepi èn opo tanapu baka!

LON GO DORO AWINSI YU NAKI FUTU

5, 6. (a) Fu san ede Bijbel e taki dati noti no kan meki den sma di lobi Yehovah „naki futu”? (b) San o yepi wan Kresten fu „opo tanapu” baka efu a fadon? (c) Fu san ede son sma di fadon no e „opo tanapu” baka?

5 Den sani di wi e du te wi naki futu noso fadon e sori sortu sma wi de. Son sma di naki futu noso di fadon sori berow èn den tan dini Gado. Ma trawan no wani sori berow. Odo 24:16 taki: „Awinsi wan reti-ati sma fadon seibi tron a o opo tanapu, ma den ogri sma o fadon, fu di ogri miti den.”

6 Awinsi wi naki futu noso fadon, wi man opo baka. Solanga wi e frutrow na tapu Yehovah, a o yepi wi te wi abi problema noso te wi meki fowtu. A o yepi wi fu „opo tanapu” baka fu di a sabi taki wi lobi en. Ma den ogri sma no wani „opo tanapu”.  Den sortu sma dati no wani taki Gado santa yeye nanga tra sma yepi den. Ma noti no de di o meki den sma ’di lobi a wèt fu Yehovah’ naki futu na so wan fasi, taki den no man opo tanapu moro fu lon a streilon te na a kaba.Leisi Psalm 119:165.

7, 8. San wan sma di „fadon” musu du efu a wani taki Gado tan feni en bun?

7 Son leisi wan sma e sondu fu di a abi swakifasi. Kande a e meki a srefi fowtu ibri tron baka. Ma toku Yehovah o feni en bun ete efu a e „opo tanapu” baka. Disi wani taki dati a musu sori berow èn a musu du muiti fu libi soleki fa Yehovah wani. Na so a ben de nanga Israel fu owruten. Te den ben sori berow fu den sondu fu den, dan Yehovah ben feni den bun (Yes. 41:9, 10). Odo 24:16 no e poti prakseri na a fadon di wan sma e fadon, ma a e sori taki Gado kan yepi en fu opo tanapu baka. (Leisi Yesaya 55:7.) Yehovah Gado nanga Yesus Krestes abi a frutrow taki wi o du ala san wi man fu „opo tanapu” baka, èn den e gi wi deki-ati fu du dati.Ps. 86:5; Yoh. 5:19.

8 Wan lonman kan stotu en futu noso fadon na ini wan streilon. Ma efu a opo baka esi-esi, a kan abi ten ete fu doro a kaba. Na ini a streilon fu têgo libi, wi no sabi sortu ’dei nanga yuru’ a streilon o kaba (Mat. 24:36). Ma te wi e du muiti fu no fadon, dan a o moro makriki fu tan lon a streilon te na a kaba. Sobun, fa wi kan sorgu taki wi no e naki futu fadon?

SANI DI KAN MEKI WI FADON

9. San na feifi sani di kan meki wi naki futu?

9 Meki wi luku feifi sani di kan meki wi fadon: Wi eigi swakifasi, den lostu fu a skin, te brada nanga sisa na ini a gemeente e du sani di no reti, tesi noso frufolgu, èn den swakifasi fu tra sma. Efu yu naki futu, dan no frigiti taki Yehovah abi furu pasensi. A no o si yu leki wan sma di drai baka gi en.

10, 11. Sortu swakifasi David ben abi?

10 Wi eigi swakifasi de leki ston na tapu a pasi. Te wi e luku a libi fu Kownu David èn a di fu na apostel Petrus, dan wi kan si tu swakifasi di furu sma abi. David no ben e dwengi ensrefi ala ten, èn son leisi Petrus ben e frede sma.

11 Kownu David no dwengi ensrefi ala ten èn dati meki a go didon nanga Batseiba. A srefi swakifasi disi meki taki a ben wani go kiri Nabal di Nabal wisiwasi en. Aladi David ben lasi ensrefi son leisi, toku a tan du muiti fu plisi Yehovah. Fu di trawan yepi en, a ben man „opo tanapu” baka di a ben e meki fowtu.1 Sam. 25:5-13, 32, 33; 2 Sam. 12:1-13.

12. Fa Petrus tan lon a streilon aladi a meki fowtu?

12 Son leisi Petrus meki fowtu fu di a ben frede libisma. Ma toku a tan waka baka Yesus èn a tan dini Yehovah. Fu eksempre, dri leisi a taki dati a no sabi Yesus (Luk. 22:54-62). Bakaten, Petrus no tyari ensrefi leki wan Kresten, fu di a ben e du neleki den Dyu Kresten bun moro den Kresten di no ben de Dyu. A denki fu Petrus no ben bun, èn trawan na ini a gemeente ben kan teki a denki disi abra. Dati meki Paulus piri-ai gi en (Gal. 2:11-14). Yu denki taki a sani disi hati Petrus so te, taki a tapu fu lon a streilon fu têgo libi? Nôno. A prakseri bun san Paulus taigi en, a teki a rai fu en, èn a tan lon a streilon.

13. Fa siki kan meki wi naki futu?

13 Siki kan de wan hebi tesi gi wi. A kan meki wi naki futu tu. Kande wi o lon moro safri, noso kande wi e tapu srefi nanga a streilon. Na disi pasa nanga wan sisa na ini Yapan di ben kon siki 17 yari baka di a dopu. A ben e broko en ede so furu nanga a siki fu en, taki a no ben e poti  prakseri moro na a diniwroko fu en. Te fu kaba a no ben e preiki moro. Bakaten, tu owruman go luku en èn den gi en deki-ati. Dati meki a bigin go na den konmakandra baka. A sisa disi taki: „Den brada sori so furu switifasi gi mi, taki mi bigin krei.” Now a sisa disi de na ini a streilon baka.

14, 15. San wi musu du te wi abi a firi fu du sani di no bun? Fruteri wan ondrofenitori.

14 Den lostu fu a skin meki taki furu sma naki futu. Efu den lostu fu wi de wan tesi gi wi, dan wi musu du ala san wi man fu hori wi denki krin èn fu tan tyari wisrefi soleki fa Yehovah wani. Yesus ben taki dati efu wi ai noso wi anu e meki wi naki futu noso sondu, dan wi musu „trowe en gowe”. Sobun, efu wi e prakseri noso du sani di no fiti, dan wi musu tapu nanga dati wantewante, bika disi kan meki taki wi tapu fu lon a streilon.Leisi Mateyus 5:29, 30.

15 Wan brada ben taki dati ala ten a ben abi homo-firi. A ben kweki na ini a tru anbegi, ma toku a taki: „Noiti mi ben e firi switi te mi ben de nanga tra sma fu di mi ben feni taki mi no de leki den.” Di a brada disi ben abi 20 yari, a ben de wan gewoon pionier èn wan dinari ini a diniwroko. Ne a du wan seryusu sondu, a kisi piri-ai èn den owruman yepi en fu kon bun baka nanga Yehovah. Fu di a brada disi e begi Yehovah, a e studeri Bijbel èn a e du muiti fu yepi trawan, meki a ben man opo tanapu èn lon go doro na ini a streilon fu libi. A sani disi pasa bun langa kaba, ma toku a taki: „Son leisi mi e kisi den firi dati ete, ma mi e tan feti nanga den. Mi kon si taki Yehovah no o meki yu kisi wan tesi di yu no man tyari. Sobun, mi e bribi taki Gado sabi taki mi man horidoro te na a kaba.” A brada disi no wani taki noti tapu en fu lon a streilon fu libi. A taki: „Mi sabi taki a feti di mi e feti now o tyari blesi kon gi mi na ini a nyun grontapu. Na dati mi wani! Sobun, solanga a ten dati no doro ete, mi o tan feti go doro.”

16, 17. (a) San yepi wan brada di ben feni taki sma du wan sani nanga en di no bun? (b) Efu wi no wani naki futu, dan sortu sani wi musu hori na prakseri?

16 Wan tra sani di kan meki wi naki futu, na te brada nanga sisa na ini a gemeente e du sani di no reti. Na ini Fransikondre, wan brada di ben de wan owruman fosi ben feni taki sma du wan sani nanga en di no bun. A sani disi meki a mandi so te, taki a no ben wani go na den konmakandra moro èn a no ben e preiki moro. Dati meki tu owruman go luku en èn den arki en nanga pasensi di a ben e fruteri san na en problema. Den gi en deki-ati fu trowe en hebi na tapu Yehovah èn den taigi en taki a moro prenspari sani na fu plisi Gado. A brada teki a rai fu den owruman èn heri esi a bigin dini Yehovah fayafaya baka. Na so a ben de baka na ini a streilon fu libi.

17 Wi alamala musu hori na prakseri taki a sma di Gado poti leki Edeman fu a gemeente, a no wan sondu libisma, ma na Yesus Krestes. Yesus ’ai de leki faya’. Disi e sori taki a e si ala san e pasa na ini a gemeente èn a e frustan sani moro bun leki iniwan fu wi (Openb. 1:13-16). Kande wi feni taki wan sani na ini a gemeente no pasa na wan reti fasi. Ma a kan tu taki na wi no e frustan bun san pasa noso fu san ede a pasa. Te wan problema de na ini a gemeente, dan Yesus o lusu en na a yoisti fasi èn na a yoisti ten. Sobun, den sani di tra Kresten e du noso den bosroiti di den e teki no musu meki wi naki futu noiti.

18. Fa wi kan tan dini Yehovah te wi e kisi tesi?

18 Tu tra sani di kan meki wi naki futu, na tesi noso frufolgu, èn den swakifasi fu tra sma. Di Yesus fruteri na agersitori fu a man di ben e sai siri na tapu difrenti gron,  a taki dati a „banawtu noso frufolgu” di son sma ben o kisi fu di den e anbegi Yehovah, ben o meki den naki futu. Sobun, a kan taki famiri, birtisma, noso tiriman e gens wi noso frufolgu wi fu di wi e dini a tru Gado. Wan sma kan naki futu te ’a wortu no teki rutu’ na ini en ati, noso te a bribi fu en swaki (Mat. 13:21). Ma efu wi e du muiti fu tan krosibei fu Yehovah, dan a Kownukondre boskopu di teki rutu na ini wi ati o yepi wi fu abi wan tranga bribi. Te tesi e miti wi, a bun fu begi Yehovah èn fu prakseri sani „di warti fu sma prèise den”. (Leisi Filipisma 4:6-9.) Te wi e kisi tesi, dan Yehovah o gi wi a krakti fu tan dini en, so taki wi no tapu nanga a streilon.

No meki noti tapu yu fu lon a streilon te na a kaba!

19. San kan yepi wi fu no naki futu te trawan meki fowtu?

19 A de wan sari sani taki na ini den yari di pasa son sma tapu fu dini Yehovah fu di den swakifasi fu tra sma meki taki den naki futu. Wan sma kan naki futu tu te tra sma e du sani di en konsensi no e gi en pasi fu du (1 Kor. 8:12, 13). Efu wan sma du wi wan hati sani, wi ati o bron so te taki wi gowe libi a tru anbegi? Bijbel e taigi wi taki wi musu tapu fu krutu trawan èn wi musu gi trawan pardon, awinsi wi feni taki wi abi leti fu atibron na den tapu (Luk. 6:37). Te wan sma du yu wan hati sani, a bun fu aksi yusrefi: ’A de so taki mi e krutu a sma, fu di mi feni taki ala ten sani musu pasa soleki fa mi wani? Mi o gowe libi a tru bribi, soso fu di mi brada noso sisa meki wan fowtu?’ A lobi di wi abi gi Yehovah o yepi wi fu no naki futu te trawan meki fowtu.

HORIDORO NA INI A STREILON ÈN WAI PASI GI SANI DI KAN MEKI YU NAKI FUTU

20, 21. San yu wani du fu man lon a streilon fu têgo libi te na a kaba?

20 Yu wani „lon a streilon te na a kaba”? (2 Tim. 4:7, 8) Efu yu wani dati, dan yu musu tan studeri Bijbel. Gebroiki Bijbel nanga den buku fu na organisâsi fu wi fu ondrosuku sani moro fini èn denki dipi fu san yu e leri. Te yu e du dati, dan yu o kon sabi sortu sani kan meki yu naki futu. Begi Yehovah fu gi yu en santa yeye, so taki yu kan kisi krakti. Hori na prakseri taki awinsi wi naki futu noso fadon, toku wi man opo tanapu baka èn lon te na a kaba. Boiti dati, wi kan leri fu den fowtu fu wi so taki wi kan lon a streilon moro bun.

21 Bijbel e sori taki wi kan kisi têgo libi soso te wi lon a streilon. Nowan wagi noso bus de di o tyari wi go na a kaba. Na wi srefi abi fu lon a streilon te na a kaba. Te wi e du dati, wi kan de seiker taki Yehovah o gi wi „freide pasa marki” (Ps. 119:165). A o tan blesi wi na ini a ten disi èn a o blesi wi fu têgo te wi lon a streilon te na a kaba.Yak. 1:12.