Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  maart 2013

Yu o kisi deki-ati te yu e gi trawan deki-ati

Yu o kisi deki-ati te yu e gi trawan deki-ati

Fu di wi alamala na sondusma, meki wi alamala siki wan leisi kaba èn son sma e siki seryusu srefi. San kan yepi wi fu no lasi-ati te wi e kisi den problema disi?

Wan sani di kan de wan bigi yepi, na a deki-ati di wi e kisi fu famiri, mati èn wi Kresten brada nanga sisa.

Te wan mati e taki na wan switi èn lobi-ati fasi nanga wi, dan disi kan meki wi firi bun, neleki fa son oli kan dresi wan soro èn meki wi firi moro bun (Odo 16:24; 18:24; 25:11). Ma tru Kresten no e prakseri nomo taki sma musu gi den deki-ati. Den srefi e meki muiti fu gi trawan deki-ati. Bijbel e taki: „A trowstu di wi e kisi fu Gado e meki taki wi man trowstu tra sma tu di de na ini ala sortu banawtu” (2 Kor. 1:4; Luk. 6:31). Antonio, wan distrikt-opziener na ini Meksikow, kon si taki disi de so trutru.

Di datra taigi Antonio taki a abi wan sortu brudukanker di den e kari lymfoom, a ben e firi brokosaka srefisrefi. Ma toku a ben e du muiti fu feti nanga a firi disi. San a du? We, a pruberi fu leri den Kownukondre singi, so taki a ben kan singi den. Na so a ben kan yere san a ben e singi, dan a ben e prakseri fu den wortu fu den singi. Boiti dati, a ben e begi nanga wan tranga sten èn a ben e leisi Bijbel. Disi ben gi en furu deki-ati tu.

Ma now Antonio kon si taki wan fu den moro bigi yepi di a kisi, na a deki-ati fu Kresten brada nanga sisa. A taki: „Te mi wefi ben e firi brokosaka, wi ben e kari wan famiri fu wi di de wan owruman na ini a gemeente. Dan wi ben e aksi en fu begi nanga wi. Na so wi ben e kisi trowstu èn wi ben firi korostu.” A taki tu: „Fu taki en leti, na fu di famiri èn den brada nanga sisa horibaka gi wi, meki a no teki langa fosi wi ben man kisi wisrefi baka.” A de nanga tangi trutru taki a abi mati di lobi en èn di e broko den ede nanga en trutru!

Wan tra sani di kan yepi wi te wi abi bigi problema, na a santa yeye di Gado pramisi wi. Na apostel Petrus taki dati Gado e gi sma santa yeye „fu soso” (Tori 2:38). Disi ben de krin fu si na a Pinksterfesa na ini a yari 33 di furu Kresten kisi santa yeye èn tron salfuwan. Ma a santa yeye a no gi den salfuwan nomo. Wi alamala kan kisi santa yeye. Santa yeye no e kaba noiti, sobun ala ten wi kan aksi fu kisi en.Yes. 40:28-31.

SORI TAKI YU E BROKO YU EDE TRUTRU NANGA DEN WAN DI DE NA NOWTU

Na apostel Paulus ben kisi furu tesi. Son leisi a misi fu dede srefi (2 Kor. 1:8-10). Ma toku a no ben e frede dede so te, taki a no ben man denki krin moro. A ben sabi taki Gado ben e horibaka gi en èn disi ben e gi en deki-ati. A skrifi: „Prèise a Gado nanga a Tata fu wi Masra Yesus Krestes, a Tata di abi furu sari-ati, a Gado fu ala trowstu, di e trowstu wi te wi de na ini ala sortu banawtu” (2 Kor. 1:3, 4). Paulus no ben e meki den problema bruya en so te, taki a no ben man du noti moro. Na presi fu dati a ben e du muiti fu trowstu trawan. Fu di a ben kisi ala sortu tesi, meki a ben man frustan trawan di ben e kisi tesi tu. Dati meki a ben man trowstu sma trutru te den ben de na nowtu.

Baka wan pisi ten sani bigin waka pikinso moro bun gi Antonio. Ne a bigin wroko leki distrikt-opziener baka. A ben gwenti poti prakseri na den brada nanga sisa, ma now en nanga en wefi e du moro muiti fu go luku den sikiwan èn fu gi den deki-ati. Fu eksempre, di Antonio go luku wan brada di abi wan seryusu siki, a kon si taki a brada disi no ben wani go na den konmakandra moro. Antonio taki: „A no fu di a no ben lobi Yehovah noso den brada nanga sisa moro, meki a no ben e go na den konmakandra. Ma a siki meki a firi brokosaka so te, taki a bigin denki taki a no warti noti.”

Wan fu den sani di Antonio du fu yepi a brada disi, na taki a aksi en fu begi wan leisi di wan tu brada nanga sisa ben kon makandra fu abi prisiri. A brada ben feni taki a no bun nofo fu du disi, ma toku a agri fu begi gi den. Antonio taki: „A brada begi so moi èn disi yepi en trutru. En srefi kon si taki den brada nanga sisa abi en fanowdu èn taki a kan de wan deki-ati gi den tu.”

Iya, wi alamala abi problema. Sonwan fu wi abi bigi problema èn trawan abi problema di no de so seryusu. Ma Paulus ben sori taki efu wi e horidoro aladi wi de na nowtu, dan wi o man frustan den wan di de na nowtu tu èn wi o man gi den deki-ati. Fu dati ede, meki wi sori taki wi e broko wi ede trutru nanga wi Kresten brada nanga sisa di de na nowtu èn meki wi du muiti fu trowstu den neleki wi Gado Yehovah.