„Mi o gi den wan ati di sabi mi, so taki den o sabi taki mi na Yehovah. Dan den o tron mi pipel.”YER. 24:7.

1, 2. Fruteri wan tu sani fu figa.

YU NYAN figa wan leisi kaba? Figa na wan froktu di den Israelsma na ini Bijbel ten ben lobi fu nyan (Nah. 3:12; Luk. 13:6-9). Na ini a ten disi sma na furu presi fu grontapu e prani figa fu di den bun fu nyan. Son sma e taki srefi dati figa bun gi yu ati.

2 Wan leisi Yehovah ben taki fu figa tu di a ben e taki fu na ati fu libisma. Gado no ben e taki fa figa bun gi a skin. Den sani di Yehovah taki kan yepi wi nanga den lobiwan fu wi fu abi wan moro bun ati. Ma Yehovah no ben e taki fu wi trutru ati, a ben e taki fu wi agersi ati. Meki wi luku san a taki èn san Kresten kan leri fu dati.

3. San den figa di kari na ini Yeremia kapitel 24 wani taki?

3 Meki wi poti prakseri fosi na wan sani di Gado taki fu figa na ini a ten fu Yeremia. Na ini a yari 617 Fosi Krestes, a pipel fu Yuda ben e du sani di Yehovah no lobi kwetikweti. Gado gi Yeremia wan fisyun fu sani di ben o pasa nanga Yuda. A ben taki fu tu sortu figa: „Figa di bun srefisrefi” nanga „pori figa”. (Leisi Yeremia 24:1-3.) Den pori figa ben de Kownu Sedekia nanga den tra sma di Kownu Nebukadnesar nanga a legre fu en ben o tyari go na ini katibo. Ma fa a ben de nanga Esekièl, Danièl nanga den dri mati fu en di ben de na ini Babilon kaba? Fa a ben de nanga sonwan fu den Dyu di ben o go na ini katibo bakaten? Den ben de den bun figa. Sonwan fu den Dyu dati ben o drai go baka na Yerusalem fu bow a foto nanga a tempel baka.Yer. 24:8-10; 25:11, 12; 29:10.

4. Fa den sani di Gado taki fu den bun figa kan gi wi deki-ati?

 4 Luku san Yehovah taki fu den sma di ben de leki bun figa: „Mi o gi den wan ati di sabi mi, so taki den o sabi taki mi na Yehovah. Dan den o tron mi pipel” (Yer. 24:7). Den wortu disi e gi wi deki-ati, bika den e sori taki Gado wani wi fu abi „wan ati di sabi” en. Sobun, a wani taki wi musu sabi en èn taki wi musu de en pipel. Wi kan tron en pipel te wi e studeri Bijbel, te wi e du san wi e leri, te wi abi berow èn te wi drai wi libi. Baka dati wi musu gi wi libi abra na Gado èn teki dopu na ini a nen fu a Tata, a Manpikin nanga a santa yeye (Mat. 28:19, 20; Tori 3:19). Kande yu du den sani disi kaba, noso kande yu e go doronomo na den konmakandra fu Yehovah Kotoigi èn yu e du muiti fu teki dopu te fu kaba.

5. Fu suma Yeremia ben skrifi moro furu?

5 Awinsi wi du ala den sani di wi kari didyonsro, toku a prenspari fu poti prakseri na a fasi fa wi e denki èn a fasi fa wi e tyari wisrefi. Fu san ede? Wi o si fu san ede, te wi e luku san Yeremia ben taki fu na ati. Son kapitel na ini a buku fu Yeremia e taki fu den pipel na ini a birti fu Yuda. Ma Yeremia ben e taki moro furu fu a pipel fu Yuda di ben e libi na ini den pisi ten di feifi fu den kownu fu Yuda ben e tiri (Yer. 1:15, 16). Iya, Yeremia ben e taki nanga a pipel dati di ben gi densrefi abra na Yehovah. Na ini a ten fu Moses, den afo fu den sma disi ben bosroiti nanga den heri ati fu tron a pipel fu Yehovah (Eks. 19:3-8). Na ini a ten fu Yeremia a pipel ben taki tu dati den wani de a pipel fu Gado. Den taki: „Wi kon na yu, bika yu, Yehovah, na wi Gado” (Yer. 3:22). Ma fa na ati fu den ben de?

DEN BEN MUSU KRIN DEN ATI

6. Fu san ede a prenspari fu sabi san Gado ben taki fu na ati?

6 Datra abi wrokosani di den kan gebroiki fu luku efu na ati fu wan sma gosontu. Ma Yehovah kan du moro. A kan si fa na agersi ati de, noso fa wan sma de trutru. Bijbel e taki: „Na ati na a moro bedrigi sani di de èn a ogri srefisrefi. Suma kan sabi en? Mi, Yehovah, na a sma di e luku san de na ini na ati . . . Mi o pai ibri sma gi a fasi fa a e libi èn gi den sani di a e du” (Yer. 17:9, 10). Gado man si san wi wani, san wi e denki, fa wi e firi, den maniri fu wi èn san wi wani du nanga wi libi. Na Gado e ondrosuku sma ati, ma yu srefi kan ondrosuku yu eigi ati tu.

7. San Yeremia ben taki fu na ati fu furu fu den Dyu na ini a ten fu en?

7 Te wi e ondrosuku wi ati, wi kan aksi wisrefi: ’San Yehovah ben e denki fu na agersi ati fu den Dyu na ini a ten fu Yeremia?’ Luku san Yeremia ben taki: „Nowan fu den sma fu Israel krin den ati” (Yer. 9:25, 26). Sobun, den no ben lobi Yehovah nanga den heri ati.

8, 9. San furu Dyu ben musu du?

8 Gado ben taigi den Dyu taki den ben musu ’tapu nanga na ogri di den ben e du’ èn taki ’den ben musu waka wan bun pasi èn du san bun’ (Yer. 18:11). Den ben e du soso ogri fu di den ati no ben bun. (Leisi Markus 7:20-23.) Den ben tranga-ede èn den no ben wani kenki. Yehovah no ben lobi den sani di den ben e du èn di den ben e prakseri. (Leisi Yeremia 5:23, 24;  7:24-26.) Dati meki Gado taigi den: „Un musu krin un ati gi Yehovah neleki fa wan sma e besnèi fu kon krin.”Yer. 4:4; 18:11, 12.

9 Den Dyu na ini a ten fu Yeremia no ben e gi yesi. Na so a ben de tu nanga den Israelsma na ini a ten fu Moses (Deut. 10:16; 30:6). Den Dyu ben musu puru iniwan prakseri, firi, noso denki di ben kan meki taki den trangayesi den wèt fu Yehovah.Tori 7:51.

FA WI KAN ABI „WAN ATI DI SABI” YEHOVAH?

10. Fa wi kan teki na eksempre fu David?

10 Wi de nanga tangi trutru taki Gado e yepi wi fu kon sabi fa wi ati de! Ma kande son sma e aksi: ’San disi abi fu du nanga Yehovah Kotoigi na ini a ten disi?’ Furu Kresten na ini den gemeente no e du ogri èn den no de leki den „pori figa” noso den trangayesi Dyu fu fositen. Furu fu den futuboi fu Gado na ini a ten disi e dini Gado nanga den heri ati èn den e libi wan krin libi. Ma prakseri san David begi Yehovah: „Mi Gado, ondrosuku mi èn kon sabi mi ati. Luku mi finifini èn kon sabi den sani di e moro mi. Luku efu wan sani de di kan hati mi bakaten.”Ps. 17:3; 139:23, 24.

11, 12. (a) Fu san ede ibriwan fu wi musu ondrosuku en ati? (b) San Gado no o du noiti?

11 Yehovah wani taki ibriwan fu wi tron en mati èn a wani taki wi tan en mati ala ten. Yeremia ben taki fu den reti-ati sma: „Yu, Yehovah di e tiri den legre, e ondrosuku den reti-ati sma. Yu e ondrosuku den niri nanga na ati fu libisma” (Yer. 20:12). Efu Yehovah e ondrosuku na ati fu den reti-ati sma, dan a no de fu taki dati wi srefi musu ondrosuku wi eigi ati tu. (Leisi Psalm 11:5.) Te wi o ondrosuku wi ati, dan kande wi o si taki wi abi son denki, firi, noso fasi di e meki taki wi ati no de so soifri moro. Te wi e si dati, dan wi abi fu ’krin wi ati’. Sobun, wi musu du muiti fu puru den sani dati na ini wi ati. Ma sortu denki, firi, noso fasi wi musu puru na ini wi ati? Sortu kenki wi musu tyari kon?Yer. 4:4.

12 A no de fu taki dati noiti Yehovah o dwengi wi fu kenki. A taki fu den „figa di bun srefisrefi”, dati a ben o „gi den wan ati di sabi” en. A no taki dati a ben o dwengi den fu kenki den ati. Na den ben musu wani sabi Gado èn na so a musu de nanga wi tu.

Wi sa kisi blesi te wi e ondrosuku wi ati èn te wi e puru takru lostu na ini wi ati

13, 14. San kan pasa efu wan sma no ondrosuku en ati?

13 Yesus ben taki: „Disi na den sani di e kon fu na ati: ogri prakseri, kiri, sutadu, hurudu, fufuru, leitori, a taki di wan sma e taki ogri fu trawan” (Mat. 15:19). Efu wan sma abi takru lostu na ini en ati, dan te fu kaba a kan go du hurudu noso sutadu. Efu a no abi berow, Gado o drai baka gi en. Ma awinsi wan sma  no du so wan seryusu sondu, toku a kan taki a e gi pasi taki den takru lostu disi kon moro tranga na ini en ati. (Leisi Mateyus 5:27, 28.) Fu dati ede a prenspari fu ondrosuku yu ati. Efu yu kon si na ini yu ati taki yu abi den firi disi gi wan man noso uma, aladi yu sabi taki Yehovah no feni dati bun, dan san yu o du? Yu o puru den firi dati na ini yu ati?

14 A kan tu taki wan brada no „kiri” wan trawan trutru, ma kande en ati e bron nanga en so te, taki a no man si en na ai srefisrefi (Lef. 19:17). So wan brada musu du ala muiti fu puru den sortu takru firi disi na ini en ati, fosi en ati kon pori trutru.Mat. 5:21, 22.

15, 16. (a) Fa wan Kresten kan abi ’wan ati di no krin’? (b) Fu san ede yu denki taki Yehovah no lobi en te wan sma abi ’wan ati di no krin’?

15 Koloku taki furu Kresten no abi den sortu takru lostu disi na ini den ati. Ma Yesus ben taki tu fu „ogri prakseri”. Fu eksempre, wan sma kan feni taki a musu horibaka gi en famiri awinsi san e pasa. A no de fu taki dati Kresten musu sori lobi gi den famiri fu den. Den no wani de leki den sma na ini „den lasti dei” disi. Bijbel taki dati furu sma ben o de di ’no lobi trawan’ (2 Tim. 3:1, 3). Ma a kan taki wi lobi wi famiri so te, taki wi e tan horibaka gi den awinsi san den e du. Kande wi e prakseri: ’Awinsi san e pasa, famiri tan famiri.’ Sobun, efu wan sma du wan sani nanga wi famiri, dan wi ben kan feni taki a sma du a sani nanga wi. Ma prakseri san pasa di sma du ogri nanga Dina. Den brada fu en ati bron so te, taki den kiri furu mansma (Gen. 34:13, 25-30). Sosrefi, Absalom ben abi so wan bita-ati gi en brada Amnon, taki a kiri en (2 Sam. 13:1-30). Iya, na „ogri prakseri” meki taki den sma disi du ogri.

16 A no de fu taki dati tru Kresten no e kiri sma. Ma kande den e mandi nanga wan brada noso sisa di du wan hati sani nanga wan famiri fu den. Noso kande den denki taki a sma du wan hati sani nanga a famiri fu den. Kande den no wani de na ini a birti fu so wan sma srefi, noso kande den no o kari so wan sma kon na den oso (Hebr. 13:1, 2). Ma te yu luku en bun, a sani disi na wan seryusu sani, fu di so wan Kresten no e sori lobi. Yehovah sabi san de na ini wi ati. Efu a si taki wi abi a fowtu denki  disi, dan kande a o taki dati wi ’ati no krin’ (Yer. 9:25, 26). No frigiti taki Yehovah taki: „Un musu krin un ati . . . neleki fa wan sma e besnèi fu kon krin.”Yer. 4:4.

TYARI KENKI KON ÈN SORGU ALA TEN TAKI YU ABI „WAN ATI DI SABI” GADO

17. Fa lespeki gi Yehovah kan yepi wi fu ’krin wi ati’?

17 Te yu o ondrosuku yu ati, dan kande yu o si taki a no ala ten yu e teki den rai fu Yehovah wantewante. Kande yu srefi musu ’krin yu ati’ tu. Fu eksempre, kande yu e frede san sma o denki fu yu, kande yu lobi biginen, noso kande yu wani abi furu gudu. A kan tu taki yu tranga-ede pikinso noso kande yu de nomonomo fu du san yu wani. A no yu wawan de so (Yer. 7:24; 11:8). Yeremia ben skrifi taki den Dyu na ini en ten ben ’tranga-ede èn den ben lobi opo densrefi teige’ Gado. A taki tu: „Den no prakseri srefi: ’Meki wi sori lespeki gi Yehovah wi Gado, di e meki alen fadon’” (Yer. 5:23, 24). Lespeki gi Yehovah kan yepi wi fu ’krin wi ati’. Disi o meki en moro makriki gi wi fu tyari kenki kon èn fu du ala san Yehovah e aksi fu wi.

18. San Yehovah pramisi den sma di de na ini a nyun frubontu?

18 Te wi e tan du muiti fu tyari kenki kon, dan Yehovah o gi wi „wan ati di sabi” en. Fu taki en leti, na dati a pramisi fu du gi den salfuwan di de na ini a nyun frubontu. A taki: „Mi o poti mi wèt na ini den èn mi o skrifi en na ini den ati. Mi o tron den Gado èn den o tron mi pipel.” A taki tu: „Nowan fu den o taigi en mati noso en brada: ’Yu musu sabi Yehovah!’, bika den alamala o sabi mi. A moro pikinwan èn a moro bigiwan o sabi mi. Mi o gi den pardon fu den ogri sani di den du, èn mi no o memre den sondu fu den moro.”Yer. 31:31-34. *

19. Sortu moi howpu Kresten abi?

19 Wi e angri fu si ala den sani di Gado pramisi wi. Wi alamala musu si en leki wan prenspari sani fu sabi Yehovah èn fu de en pipel. Ma a wan-enkri fasi fa wi kan kisi den blesi disi, na te Yehovah gi wi pardon fu den sondu fu wi nanga yepi fu a frulusu-ofrandi fu Krestes. Fu di wi kan kisi pardon fu den sondu fu wi, meki wi musu de klariklari fu gi trawan pardon awinsi a no makriki fu du dati. Wi musu meki tranga muiti fu puru iniwan bita-ati di wi abi gi trawan na ini wi ati. Na so wi e sori taki wi wani dini Yehovah èn taki wi e kon sabi en moro bun. Wi o de leki den sma di Yehovah ben taigi: „Unu o suku mi èn unu o feni mi, fu di unu o suku mi nanga un heri ati. Mi o meki unu feni mi.”Yer. 29:13, 14.

^ paragraaf 18 Kapitel 14 fu a buku Yeremia e gi wi boskopu fu Gado e taki fu a nyun frubontu.