Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2013

No meki noti tapu yu fu kisi glori

No meki noti tapu yu fu kisi glori

„A sma di abi sakafasi o kisi glori.”ODO 29:23.

1, 2. (a) San a Hebrew wortu di vertaal nanga „glori” wani taki? (b) Sortu aksi o kisi piki na ini na artikel disi?

SAN yu e prakseri te yu yere a wortu „glori”? Yu e prakseri den kefalek moi sani di Gado meki? (Ps. 19:1) Noso yu e prakseri a biginen di sma e kisi te den abi furu gudu, te den koni srefisrefi, noso te den du bigi sani? A Hebrew wortu di vertaal na ini Bijbel nanga „glori”, abi fu du nanga sani di hebi. Na ini owruten, sma ben e meki moni fu sani soleki gowtu noso solfru. O moro a moni ben hebi, o moro waarde a ben abi. Dati meki a wortu di vertaal nanga „glori” kan abi fu du nanga wan sani di warti trutru noso di moi srefisrefi.

2 Nofo tron libisma e gi grani na sma di abi furu makti, noso biginen. Ma sortu sma Gado e gi glori? Odo 22:4 e taki: „Sakafasi nanga bigi lespeki gi Yehovah e gi wan sma gudu, glori nanga libi.” Boiti dati, a disipel Yakobus ben skrifi: „Saka unsrefi na fesi Yehovah èn a o hei unu” (Yak. 4:10). San na a glori di Yehovah e gi libisma? San kan tapu wi fu kisi a glori dati? Fa wi kan yepi trawan fu kisi a glori di Gado e gi?

3-5. Fa Yehovah e gi wi glori?

3 A psalm skrifiman ben abi a frutrow taki Yehovah ben o grabu en hori na en reti-anu fu sori en fa a ben musu tyari ensrefi fu kan kisi glori. (Leisi Psalm 73:23, 24.) Fa Yehovah e gi glori na den futuboi fu en di abi sakafasi? We, a e sori taki a feni den bun èn a e blesi den bogobogo. Wan fu den blesi di a gi den, na taki a e yepi den fu frustan a wani fu en (1 Kor. 2:7). Wan tra blesi di a e gi den, na taki a e teki den sma di e gi yesi na en leki en mati.Yak. 4:8.

4 Yehovah gi wi a grani fu preiki a bun nyunsu èn na so a e gi wi glori tu (2 Kor. 4:1, 7). Te wi e du a preikiwroko fu prèise Yehovah èn fu yepi sma, dan Yehovah e pramisi wi: „Mi o gi grani na den sma di e gi mi  grani” (1 Sam. 2:30). Den sma di e du a preikiwroko abi wan bun nen na Yehovah èn dati na wan bigi grani. A no de fu taki dati tra futuboi fu Gado o taki bun fu den tu.Odo 11:16; 22:1.

5 Fa sani o waka gi den sma di e ’howpu na tapu Yehovah èn di e tan waka a pasi fu en’? Bijbel e pramisi den: „A [Yehovah] o gi yu a grani fu libi na grontapu. Te a kiri den ogriwan, yu o si dati” (Ps. 37:34). Den wan di e dini Gado, abi a kefalek moi howpu fu kisi têgo libi.Ps. 37:29.

„MI NO WANI A GLORI FU LIBISMA”

6, 7. Fu san ede furu sma no ben e bribi taki Yesus ben de a Mesias?

6 San kan tapu wi fu kisi a glori di Yehovah wani gi wi? Wan sani di kan tapu wi, na te wi e broko wi ede tumusi nanga san sma di no e dini Gado e prakseri. Luku san na apostel Yohanes skrifi fu son heihei man na ini a ten fu Yesus: „Furu heihei man srefi ben e bribi trutru na ini Krestes, ma fu den Fariseiman ede meki den no ben wani taki disi krin. Den ben frede taki den ben o yagi den puru na ini a snoga èn den ben lobi a grani di den ben e kisi fu libisma moro leki a grani di den ben kisi fu Gado” (Yoh. 12:42, 43). A ben o moro bun efu den heihei man dati no ben o broko den ede tumusi nanga san den Fariseiman ben e prakseri.

7 Yesus ben sori krin kaba fu san ede furu sma no ben e bribi taki en na a Mesias. (Leisi Yohanes 5:39-44.) Hondrohondro yari kaba a pipel Israel ben e wakti a Mesias. Sobun, di Yesus bigin nanga a preikiwroko fu en, son sma di ben ondrosuku a profeititori fu Danièl, ben sabi taki a ten ben doro gi a Krestes fu kon. Di Yohanes a Dopuman ben e preiki wan tu mun na fesi, furu sma ben e taki: „A kan taki en na Krestes?” (Luk. 3:15) Now a Mesias ben de leti na den mindri e gi leri. Ma den sma di ben sabi a Wèt no ben wani bribi taki Yesus ben de a Mesias. A sani di Yesus taigi den e sori fu san ede den no ben e bribi en. Yesus taki: „Unu e gi sma glori èn unu wani taki den musu gi unu glori tu, ma unu no wani a glori di e kon fu a wan-enkri Gado. Sobun, fa unu kan bribi mi dan?”

8, 9. Fa a glori di wi e kisi fu libisma kan kon de moro prenspari gi wi leki a glori di wi e kisi fu Yehovah? Taki pikinso fu na agersitori.

8 Efu wi no luku bun, dan a glori di libisma e gi wi kan kon de moro prenspari gi wi leki a glori di Yehovah e gi wi. Fu kon frustan disi moro bun, wi wani agersi glori nanga faya di e skèin. Hemel lai furu sani di e skèin leti. Kande yu kan memre ete taki yu ben e luku go na loktu wan neti di wolku no ben de. Yu man memre den dusundusun stari di yu si a neti dati? A ben musu fu switi gi yu fu si ala den moi stari disi (1 Kor. 15:40, 41). Ma te yu ben o de na ini wan foto pe furu faya leti te neti, yu no ben o si so furu stari kwetikweti. Fu san ede? Na fu di a faya fu den pasi nanga den oso na yu lontu moro tranga? Noso na fu di a faya di den e skèin, moi moro a faya fu den stari? Nôno! Yu no man si den stari fu di a faya fu a foto de moro krosibei fu yu leki a faya fu den stari. Sobun, efu wi wani si a moi fu den stari, dan wi musu go na wan presi dorosei fu foto pe furu faya no e skèin.

9 Na so a de tu taki a glori di libisma e gi wi, kan meki a gersi leki a glori di Yehovah e gi wi na wan pikin sani nomo. Furu sma no e arki a Kownukondre boskopu fu di den frede san mati noso famiri o denki fu den. Ma yu denki taki fayafaya futuboi fu Gado kan tron sma di e suku fu kisi glori fu libisma? Kon meki wi taki dati wan yonguman musu preiki na ini wan birti pe  furu sma sabi en, aladi den no sabi taki en na wan Kotoigi fu Yehovah. A o frede fu preiki drape? Noso kon meki wi taki dati wan sma e suku fu du moro gi Yehovah, ma trawan di no e si a diniwroko fu Yehovah leki wan prenspari sani e spotu en? A o arki den sma dati? Noso kande wan Kresten du wan seryusu sondu. A o suku fu kibri a tori fu di a frede taki a o lasi den grani fu en na ini a gemeente noso fu di a frede taki a o meki den famiriman nanga mati fu en sari? Efu a prenspari gi en fu de wan mati fu Yehovah, dan a o „kari den owruman fu a gemeente kon na en” fu yepi en.Leisi Yakobus 5:14-16.

10. (a) San kan pasa efu wi e broko wi ede tumusi nanga san sma e denki fu wi? (b) San wi o kisi te wi abi sakafasi?

10 Kon meki wi taki dati wan brada e kon gi yu rai, aladi yu e meki furu muiti kaba fu tron moro lepi Kresten. San yu o du? Yu o teki a rai di a brada e gi yu, so taki yu kisi wini fu dati. Noso yu ati o bron nanga en fu di yu abi heimemre, fu di yu e firi syen, noso fu di yu e suku fasi fu sori taki yu no fowtu? Noso kon meki wi taki dati yu musu du wan wroko, makandra nanga tra brada nanga sisa. Kande yu gi den wan tu moi rai fa den kan du a wroko moro bun, noso kande yu wroko tranga fu du a wroko. Yu frede taki na den trawan wawan o kisi a grani? Efu den sortu sani disi miti yu, dan hori na prakseri taki „a sma di abi sakafasi o kisi glori”.Odo 29:23.

11. San wi musu du te sma e prèise wi èn fu san ede?

11 Brada di e teki fesi na ini a gemeente nanga den wan di „e suku” fu kisi a grani disi, musu luku bun taki den no e suku fu kisi glori fu libisma (1 Tim. 3:1; 1 Tes. 2:6). San wan brada musu du te sma e prèise en fu di a du en wroko bun? We, kande a no o du leki Kownu Saul di ben meki wan pilari gi ensrefi fu sma memre en (1 Sam. 15:12). Ma san a brada disi o du dan? A o sori taki na Yehovah yepi en fu du en wroko bun? A o sori taki a abi a blesi nanga a yepi fu Gado fanowdu efu a wani taki sani waka bun gi en? (1 Petr. 4:11) A fasi fa wi e firi te sma e prèise wi, o sori efu wi e suku fu kisi glori fu Gado, noso fu libisma.Odo 27:21.

„UNU WANI DU DEN SANI DI UN TATA WANI”

12. San ben tapu son Dyu fu arki a boskopu fu Yesus?

12 Wan tra sani di kan tapu wi fu kisi glori fu Gado, na te wi firi fu du sani di no bun. Takru lostu kan meki srefi taki wi no wani yere san tru. (Leisi Yohanes 8:43-47.) Yesus ben taigi son Dyu taki den no ben wani arki a boskopu fu en fu di ’den ben wani du a wani fu den tata Didibri’.

13, 14. (a) San sabiman e taki fu a fasi wi edetonton e wroko te sma e taki? (b) Fa wi e bosroiti suma wi o arki?

13 Te wi de nomonomo fu du wan sani, dan son leisi wi e yere nomo san wi wani yere (2 Petr. 3:5). Yehovah meki wi na so wan fasi taki wi no abi fu yere sani di wi no wani yere. Tan tiri wan momenti. Luku omeni sani yu man yere nownowde. Kande yu no ben poti prakseri na ala den sani dati. Fu san ede? Aladi yu edetonton man poti prakseri na ala den difrenti sani dati, toku a ben e yepi yu fu poti prakseri na wán sani nomo. Ma a moro muilek gi na edetonton fu du dati te yu musu arki difrenti sma. Sabiman kon si taki te difrenti sma e taki nanga wi na a srefi ten, wi man arki wán sma nomo. Sobun, te tu sma e taki nanga yu na a srefi ten, dan yu srefi musu bosroiti sortuwan fu den yu wani arki. Den Dyu di ben wani du a wani fu den tata Didibri, no ben wani arki Yesus.

 14 Bijbel e taki dati „koni” nanga „don” de leki sma di e kari wi fu di den wani taki wi arki den (Odo 9:1-5, 13-17). Ma sortuwan fu den wi o arki? We, a de na suma yu wani arki. Den skapu fu Yesus e arki en sten èn den e du san a e taki (Yoh. 10:16, 27). Den „e gi yesi na san tru” (Yoh. 18:37). Den no e arki a sten fu sma di den no sabi (Yoh. 10:5). Den sma disi di abi sakafasi o kisi glori.Odo 3:13, 16; 8:1, 18.

A „O MEKI UNU KISI WINI NANGA GLORI”

15. Fa den tesi di miti Paulus ben meki sma „kisi wini nanga glori”?

15 Te wi e horidoro fu du a wani fu Yehovah, dan wi o yepi trawan fu kisi glori. Na ini wan brifi, Paulus taigi a gemeente fu Efeise: „Mi e aksi unu fu no lasi-ati te mi e kisi banawtu, bika dati o meki unu kisi wini nanga glori” (Ef. 3:13). Fa den tesi fu Paulus ben meki den Efeisesma „kisi wini nanga glori”? Paulus ben de klariklari fu yepi den, srefi te a ben e kisi tesi. Na a fasi dati den Efeisesma ben kan si krin taki a ben de wan bigi grani fu de wan Kresten. Wan moro bigi grani leki dati no ben de. Efu Paulus ben tapu fu dini Gado fu di a ben kisi tesi, dan dati ben kan meki den prakseri taki a no ben prenspari fu de wan mati fu Gado noso fu preiki. A ben o gersi leki a howpu fu den ben de fu soso. Na eksempre fu Paulus e sori taki a de wan bigi grani fu de wan Kresten èn taki wi musu tan waka na baka Krestes awinsi sortu tesi wi e kisi.

16. Sortu tesi Paulus kisi na Listra?

16 Prakseri o furu deki-ati den brada nanga sisa ben e kisi te den ben e si fa Paulus ben e wroko fayafaya èn fa a ben e horidoro. Tori fu den apostel 14:19, 20 e taki: „Dyu fu Antiokia nanga Ikoniyum ben kon drape èn den sutu faya gi den ipi-ipi sma. Ne den sma disi fringi ston na tapu Paulus èn den srepi en go na dorosei fu a foto [Listra], fu di den ben prakseri taki a dede. Ma di den disipel kon tanapu na en lontu, dan a opo èn a go na ini a foto. A dei baka dati a go na Derbe makandra nanga Barnabas.” Prakseri a tori. Den sma ben fon Paulus so te, taki den denki taki a dede. Ma a tra dei fu en a naki a pasi go na Derbe di ben de sowan 100 kilometer fu Listra. Yu kan frustan o hebi a ben musu fu de gi Paulus.

17, 18. (a) Fa wi du sabi taki Timoteyus ben sabi fa Paulus pina na Listra? (b) San Timoteyus leri fu a fasi fa Paulus ben horidoro?

17 „Den disipel” ben kon yepi Paulus. Timoteyus ben de wan fu den tu? Kande. Ma a buku Tori fu den apostel no e taki fu dati. Toku Timoteyus ben sabi san ben pasa nanga Paulus. Luku san Paulus skrifi na ini a  di fu tu brifi di a seni gi Timoteyus: „Yu poti prakseri finifini na san mi leri yu, na a fasi fa mi ben e libi, . . . na a fasi fa mi nyan pina di mi ben de na Antiokia [pe den yagi mi komoto na ini a foto], Ikoniyum [pe den ben wani trowe ston na mi tapu] nanga Listra [pe den trowe ston na mi tapu]. Na so sma frufolgu mi, ma Masra puru mi na ini ala den sani disi.”2 Tim. 3:10, 11; Tori 13:50; 14:5, 19.

18 Timoteyus „poti prakseri finifini” na a fasi fa Paulus ben horidoro di a kisi den tesi dati. A musu de so taki Timoteyus leri furu fu na eksempre fu Paulus. Di Paulus go na Listra, a si taki Timoteyus ben de wan bun eksempre na ini a gemeente. „Den brada na Listra nanga Ikoniyum ben e taki soso bun sani fu” en (Tori 16:1, 2). Na so Timoteyus tan go na fesi èn bakaten en srefi kisi bigi frantwortu na ini a gemeente.Fil. 2:19, 20; 1 Tim. 1:3.

19. Fa wi kan gi trawan deki-ati te wi e horidoro?

19 Te wi e du a wani fu Gado awinsi sortu tesi e miti wi, dan wi kan gi trawan deki-ati tu, spesrutu den yonguwan. Furu fu den yonguwan dati o gro kon tron futuboi fu Gado di e dini en fayafaya. Yonguwan e leri furu fu wi te den e luku fa wi e gi leri èn fa wi e du a preikiwroko. Ma den e leri furu tu te den e si fa wi e horidoro te wi e kisi problema na ini a libi. ’Awinsi san ben e miti Paulus, a ben e horidoro.’ Na a fasi dati a kon tron wan eksempre gi ala sma di wani tan dini Yehovah, so taki den kan „kisi frulusu tu, makandra nanga têgo glori”.2 Tim. 2:10.

Yonguwan kan leri furu fu owru Kresten brada nanga sisa di e horidoro

20. Fu san ede wi musu tan meki muiti fu kisi glori fu Gado?

20 Sobun, wi musu tan meki muiti fu kisi „a glori di e kon fu a wan-enkri Gado” (Yoh. 5:44; 7:18). Yehovah e gi „têgo libi na den sma di . . . e suku glori”. (Leisi Romesma 2:6, 7.) Boiti dati, te wi e meki muiti fu „tan du bun”, dan wi e gi trawan deki-ati fu tan gi yesi na Gado. Na so den kan kisi têgo libi. Sobun, no meki noti tapu yu fu kisi glori fu Gado.