Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2013

Luku bun nanga yu ati

Luku bun nanga yu ati

Bijbel e taki: „Na ati na a moro bedrigi sani di de èn a ogri srefisrefi” (Yer. 17:9). Te wi de nomonomo fu du wan sani, dan nofo tron wi o feni wan fasi fu du en. Na so wi ati e kori wi kaba.

Bijbel e warskow wi: „Disi na den sani di e kon fu na ati: ogri prakseri, kiri, sutadu, hurudu, fufuru, leitori, a taki di wan sma e taki ogri fu trawan” (Mat. 15:19). Wi ati kan kori wi èn a kan meki wi denki taki wan sani bun, aladi Gado e sori krin taki a no bun. Son leisi na baka te wi meki a fowtu wi e kon si taki wi ati kori wi. Fa wi kan kon sabi san de na ini wi ati, so taki wi no go du sani di no bun?

FA YU KAN KON SABI SAN DE NA INI YU ATI?

Te wi e leisi Bijbel ala dei, dan fa dati kan kenki san de na ini wi ati?

Leisi Bijbel ibri dei èn denki dipi fu san yu e leisi.

Na apostel Paulus ben skrifi: „A wortu fu Gado de na libi. A abi krakti èn a srapu moro iniwan feti-owru di e koti na tu sei. A e koti go so dipi, taki a e tyari kon na krin fa wan sma de na inisei èn fa a de na dorosei.” A boskopu fu Gado di skrifi na ini Bijbel kan tyari kon na krin „san wan sma e denki na ini en ati èn san a abi na prakseri fu du” (Hebr. 4:12). Te wi e studeri Bijbel, dan wi musu luku efu a fasi fa wi e denki nanga a fasi fa wi e tyari wisrefi e kruderi nanga Bijbel. Na a fasi dati wi o si san de na ini wi ati trutru. A prenspari srefisrefi fu leisi Gado Wortu ibri dei èn fu denki dipi fu san wi e leisi. Disi o yepi wi fu denki leki fa Yehovah e denki.

Efu wi abi a gwenti fu du san Bijbel e taki, dan disi o meki wi konsensi wroko bun. A konsensi fu wi de leki wan sten di kan taigi wi efu wan sani no bun èn a kan meki taki wi no kori wisrefi fu go du  wan ogri (Rom. 9:1). Bijbel lai tori tu di de leki „wan warskow gi wi” (1 Kor. 10:11). Te wi e prakseri san wi e leri fu den tori disi, dan dati kan yepi wi fu no teki don bosroiti. San ibriwan fu wi musu du?

Den begi fu wi e yepi wi fu kon sabi fa wi de trutru

Begi Gado fu yepi yu fu kon sabi san de na ini yu ati.

Yehovah „e ondrosuku sma ati” (1 Kron. 29:17). A ’bigi moro wi ati èn a sabi ala sani’ (1 Yoh. 3:20). Wi no man kori Gado. Efu wi e fruteri Yehovah krin sortu broko-ede wi abi, fa wi e firi èn san wi wani du, dan a kan yepi wi fu kon si san de na ini wi ati trutru. Wi kan aksi Gado srefi fu ’meki wi kon abi wan krin ati’ (Ps. 51:10). Iya, begi na wan prenspari fasi fa wi kan kisi yepi fu Yehovah.

Den konmakandra fu wi e yepi wi fu kon si san de na ini wi ati trutru

Arki bun te yu de na den konmakandra.

Te wi e poti prakseri na san wi e leri na den konmakandra, dan dati kan yepi wi fu si fa wi de dipi na ini wi ati. Kande wi no e leri nyun sani na ibriwan fu den konmakandra. Toku den konmakandra kan yepi wi fu kon frustan moro bun san Bijbel wani leri wi. Boiti dati, wi e kisi rai di kan yepi wi fu ondrosuku wi ati èn fu tyari kenki kon. Den piki di wi brada nanga sisa e gi na den konmakandra kan de wan bigi yepi gi wi tu (Odo 27:17). Ma efu wi abi a gwenti fu dyompo konmakandra, dan wi no e kisi na okasi fu moksi nanga den brada nanga sisa fu wi. Dati kan meki taki wi o ’prakseri wi eigi lostu nomo’ (Odo 18:1). Fu dati ede a ben o bun fu aksi wisrefi: ’Mi abi a gwenti fu go na ala den konmakandra? Mi e suku fu leri wan sani te mi de drape?’Hebr. 10:24, 25.

FA YU ATI KAN KORI YU?

Wi ati kan kori wi na ala sortu fasi. Wi o luku fo sani. Wi o taki fosi fu a feti di sma e feti fu abi gudu nanga a dringi di sma e dringi sopi pasa marki. Baka dati wi o luku suma wi musu teki leki mati èn fa wi kan meki prisiri.

A feti di sma e feti fu abi gudu.

Wi alamala abi nyanyan, krosi nanga wan oso fanowdu. A no fowtu fu wani abi den sani disi. Ma Yesus warskow wi fu no si gudu leki a moro prenspari sani na ini wi libi. A fruteri wan agersitori fu wan guduman di ben abi maksin di ben span nanga aleisi. Di a ten doro fu koti aleisi baka, a no ben abi presi moro fu poti en. Sobun, a ben abi na prakseri fu broko den maksin fu en puru fu meki moro bigiwan. A prakseri: „Drape mi o poti ala mi aleisi nanga ala den bun sani fu mi. Dan mi o taki na misrefi: ’We, mi poti wan lo bun sani na wan sei gi furu yari. Mi o teki en safrisafri, mi o nyan, dringi èn meki prisiri.’” Ma a guduman disi frigiti wan prenspari sani: A frigiti taki efu a ben o dede a neti dati, a ben o lasi ala sani.Luk. 12:16-20.

Te wi e kon moro owru, dan kande wi e bigin aksi wisrefi efu wi o abi nofo moni gi wi owrudei. Disi kan meki taki wi no e si en leki wan bigi sani fu dyompo konmakandra soso fu kan wroko moro langa fu meki moni. Noso kande wi e tapu fu du son sani di Gado e fruwakti fu wi leki Kresten. Yu no denki taki wi musu luku bun nanga a sani disi? Noso kande wi yongu ete èn wi e si taki a moro bun wroko di wi kan du  nownow na a furuten diniwroko. Ma san wi e du? Wi e draidrai fu go pionier fu di wi feni taki wi musu poti moni na wan sei fosi? Efu na so wi e denki, dan hori na prakseri taki now na a ten fu wroko tranga gi Gado. Te yu luku en bun, dan wi no sabi efu wi o de na libi tamara.

A dringi di sma e dringi sopi pasa marki.

Odo 23:20 e taki: „No tron wan fu den sma di e dringi win pasa marki.” Efu wan sma lobi sopi, dan en ati kan kori en fu kon abi a gwenti fu dringi sopi. Kande a e taki dati a e dringi sopi fu kisi ensrefi pikinso, ma no fu kon drungu. Efu wi si taki wi abi sopi fanowdu fu kisi wisrefi, dan wi musu ondrosuku san de na ini wi ati trutru.

Den sma di wi e teki leki mati.

Ala dei wi e miti sma di no e dini Yehovah, kande na skoro, na wrokope, noso na ini a preikiwroko. Ma a no ben o fiti fu moksi nanga den te dati no de fanowdu trutru noso fu teki den leki mati. Kande wi e kori wisrefi fu di wi e taki dati den sma disi abi someni bun fasi. Ma na ini 1 Korentesma 15:33 Bijbel e warskow wi: „No meki sma kori unu. Takru kompe e pori bun gwenti.” Neleki fa pikinso doti watra kan pori krin watra, na so mati di no lobi Gado kan meki taki wi lasi Yehovah leki mati. Kande a fasi fa wi e denki, den krosi di wi e weri, a fasi fa wi e taki nanga den sani di wi e du e sori taki wi e kon de leki den sma dati.

A fasi fa wi e meki prisiri.

Den nyun sani di sma e meki na ini a ten disi e meki taki a makriki fu feni ala sortu fasi fu meki prisiri. Ma furu fu den sani disi no fiti gi Kresten. Paulus ben skrifi: ’Un no musu taki srefi fu iniwan sani di no krin’ (Ef. 5:3). Fa a de efu na ini wi ati wi e angri fu luku noso arki sani di no bun, sobun, ’sani di no krin’? Kande wi feni taki ala sma abi pikinso prisiri fanowdu èn taki nowan sma musu krutu wan trawan fu a fasi fa a e meki prisiri. Ma meki wi gi yesi na a rai fu Paulus èn meki wi no luku noso arki sani di no krin.

WI KAN KENKI A FASI FA WI DE

Kande wi ati kori wi kaba so taki wi no e si moro taki san wi e du no bun. Ma wi man kenki a fasi fa wi de (Ef. 4:22-24). Meki wi go luku na eksempre fu tu sma di ben man du dati.

Miguel * ben musu kenki a fasi fa a ben e prakseri fu gudu. A e taki: „Mi, mi uma, nanga mi manpikin e libi na ini wan kondre pe a prenspari srefisrefi gi sma fu bai ala nyunyun sani di e kon na ini den wenkri èn di e yepi sma fu abi wan switi libi. Wan pisi ten mi ben e prakseri srefi taki mi ben kan du dati tu sondro fu tron wan sma di e feti fu kisi gudu. Ma heri esi mi kon si taki a libi fu wan sma di e feti fu kisi gudu no e tyari wini kon. Mi begi Yehovah fu yepi fu ondrosuku san de na ini mi ati trutru èn fu tyari kenki kon. Mi fruteri en taki wi leki osofamiri ben wani dini en nanga wi heri ati. Wi ben man teki a bosroiti fu no bai sani di wi no abi fanowdu trutru èn wi froisi go na wan presi pe moro preikiman ben de fanowdu. Fosi yu denki wi ben man tron pionier. Wi kon si taki wi no abi furu sani fanowdu fu kan libi wan switi, koloku libi.”

Na ondrofenitori fu Lee e sori wi taki di a go ondrosuku san ben de na ini en ati trutru, a ben man gowe libi den takru mati fu en. Lee e taki: „A wroko fu mi ben e meki taki mi ben e miti furu bisnisman fu tra kondre. Mi ben sabi taki na den bisnis konmakandra dati, den ben o dringi furu sopi. Ma toku mi ben lobi go na den. Omeni leisi mi misi fu kon drungu fu di mi ben dringi sopi pasa marki. Ma bakaten a ben e hati mi taki mi du dati. Mi ben kon si taki mi ben abi fu go ondrosuku san ben de na ini mi ati. San mi leri na ini Gado Wortu nanga den rai di den owruman gi mi, yepi mi fu kon si taki mi ben lobi moksi nanga sma di no lobi Yehovah. Dati meki now mi e meki muiti fu seti den bisnistori fu mi nanga telefon èn mi e sorgu taki mi no e moksi nanga den bisnisman te dati no de fanowdu.”

Meki wi no kori wisrefi, ma meki wi suku fu kon sabi san de na ini wi ati trutru. Fu kan du dati wi musu begi Yehovah fu yepi wi, fu di wi e hori na prakseri taki „a sabi ala sani di de na ini wi ati” (Ps. 44:21). Gado gi wi en Wortu sosrefi di de leki wan spikri di e sori wi fa wi de trutru (Yak. 1:22-25). Den buku nanga den konmakandra fu wi e yepi tu fu kon sabi den rai fu Yehovah. Ala den sani disi kan yepi wi fu kibri wi ati èn fu tan waka a pasi fu retidu.

^ paragraaf 18 Wi kenki den nen.