Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2013

Tan na ini a lagipresi fu Yehovah pe wi kan kisi kibri

Tan na ini a lagipresi fu Yehovah pe wi kan kisi kibri

„Yehovah o go feti nanga den pipel dati neleki fa a ben feti nanga en feanti na ini a ten di pasa.”SAK. 14:3.

1, 2. Sortu feti e wakti grontapu èn san Gado en futuboi no sa abi fu du na ini a feti disi?

NA TAPU 30 oktober 1938, milyunmilyun sma na Amerkankondre ben e arki wan pôpi programa na radio pe sma ben e plèi wan toneel. Den sma ben e du neleki den na nyunsuman di ben e meki bekènti taki sma fu planeiti Mars saka kon na grontapu fu pori en. Aladi sma ben taki dati na wan toneel den ben e plèi na radio, toku furu arkiman ben denki taki sma komoto na Mars trutru fu kon feti nanga grontapu. Dati meki den kon frede. Sonwan fu den bigin du ala sortu sani fu sorgu taki den sma fu Mars no ben man du ogri nanga den.

2 Ma heri esi wan feti o feti na grontapu trutru. A ben skrifi kaba taki a feti disi ben o kon. Toku sma no e du noti. A tori disi no skrifi na ini wan moi buku di sma meki, ma a skrifi na ini Gado Wortu. A feti disi na Armagedon, a feti di Gado o feti nanga na ogri grontapu disi (Openb. 16:14-16). Na ini a feti disi, den futuboi fu Gado no abi fu feti nanga sma di komoto na wan tra planeiti. Toku den o fruwondru te den o si na sortu fasi Gado o sori a makti fu en èn te a o du kefalek sani èn bigi wondru.

3. Sortu profeititori wi o luku èn fu san ede a de prenspari gi wi?

3 Wan profeititori di skrifi na ini Sakaria kapitel 14 e fruteri wi fa a feti fu Armagedon o de. A skrifi sowan 2500 yari pasa, ma toku a de prenspari ete gi wi na ini a ten disi (Rom. 15:4). Furu fu den sani di skrifi na ini a profeititori disi abi fu du nanga sani di miti Gado pipel sensi a ten di Krestes bigin tiri leki Kownu na hemel na ini 1914. A e taki tu fu sani di o pasa na ini a ten di e kon èn di o span srefisrefi. Fu eksempre, a profeititori e taki fu „wan bigi lagipresi” èn  fu „watra di e gi libi” (Sak. 14:4, 8). Na artikel disi o sori wi san na a lagipresi disi èn fa den futuboi fu Yehovah kan kisi kibri drape. Wi o si tu san na a watra di e gi libi èn sortu wini wi kan kisi fu a watra disi. Wi no o frustan nomo o prenspari a de fu dringi a watra, ma wi o angri fu dringi en tu. Dati meki a bun fu poti prakseri now na a profeititori disi.2 Petr. 1:19, 20.

A „DEI FU YEHOVAH” E BIGIN

4. (a) O ten a „dei fu Yehovah” bigin? (b) San den futuboi fu Yehovah fruteri sma someni yari fosi 1914 èn san den tiriman fu grontapu du?

4 Na a bigin fu kapitel 14, Sakaria e taki fu „wan dei fu Yehovah”. (Leisi Sakaria 14:1, 2.) San na a dei disi? Na „a dei fu Masra”. A bigin di ’a Kownukondre fu grontapu tron a Kownukondre fu wi Masra èn fu a Krestes fu en’ (Openb. 1:10; 11:15). A bigin na ini 1914 di Krestes tron Kownu fu Gado Kownukondre na hemel. Someni yari fosi 1914, den futuboi fu Yehovah taigi sma na ala sei taki „a reti ten fu den trakondre sma” ben o kon na wan kaba na ini a yari dati (Luk. 21:24). Den ben taigi sma tu taki wan ten ben o kon di ben o muilek srefisrefi. San den sma du? Na presi taki den tiriman fu grontapu nanga den kerki fesiman poti prakseri na a warskow, den bigin meki spotu nanga den fayafaya salfu preikiman èn den bigin frufolgu den. Te yu luku en bun, dan den tiriman disi spotu a Moro Makti Gado srefi, fu di den salfu futuboi fu Gado e teki presi gi Gado Kownukondre, noso „a Yerusalem na hemel”.Hebr. 12:22, 28.

5, 6. (a) San den feanti fu Gado pipel du? (b) Suma ben de „den trawan di tan abra”?

5 Sakaria fruteri tu san den feanti fu Gado ben o du. A taki: „Den o teki a foto [Yerusalem] abra.” „A foto” disi e agersi Gado Kownukondre. Den sma na ini a foto disi e agersi den salfu Kresten di de na grontapu ete èn di e teki presi gi Gado Kownukondre (Fil. 3:20). Na a ten fu a Fosi Grontapufeti den feanti fu Gado „teki a foto abra” na wan agersi fasi. Fa so? We, den grabu den brada di ben abi furu frantwortu na ini Yehovah organisâsi, dan den seni den go na wan strafu-oso na ini a foto Atlanta, na Georgia, Amerkankondre. Feanti fu Gado pipel du ala sortu ogri nanga den salfu Kresten èn den tapu den brada disi fu prati den buku fu den. Den pruberi tu fu tapu a preikiwroko fu den. Na agersi fasi den feanti ’teki ala gudu puru na ini den oso di ben de na ini a foto’.

6 Gado pipel ben abi furu feanti èn sma ben e taki lei fu den, sma ben e gens den èn den ben e frufolgu den. Toku den feanti no ben man tapu a tru anbegi. Wan fikapisi fu salfu Kresten ben de ete. Sakaria e kari den, „den trawan di tan abra”. Fu di den ben wani tan dini Gado, meki noti no ben man tapu den fu „tan libi na ini a foto”.

7. Sortu eksempre den salfu Kotoigi fu Yehovah gi wi na ini a ten disi?

7 O ten a heri profeititori fu Sakaria kon tru? Na a kaba fu a Fosi Grontapufeti? Nôno. Den feanti fu Gado pipel ben o du moro ogri nanga den salfuwan èn nanga den futuboi fu Gado di ben abi a howpu fu libi na grontapu (Openb. 12:17). Disi pasa na a ten fu a Di Fu Tu Grontapufeti. Te wi e luku a fasi fa den salfu Kotoigi disi tan dini Gado, dan dati musu gi wi deki-ati fu horidoro tu, awinsi sortu tesi e miti wi. Fu eksempre, sma na wi wrokope, noso famiri di no e dini Yehovah kan gens wi, noso pikin na wi skoro kan lafu wi fu di wi na Yehovah Kotoigi  (1 Petr. 1:6, 7). Ma awinsi pe wi e libi, wi o tan „abi wán denki” èn wi no o meki ’den feanti fu wi frede wi’ (Fil. 1:27, 28). Ma grontapu no lobi Yehovah pipel kwetikweti. Sobun, pe den o man feni kibri?Yoh. 15:17-19.

YEHOVAH E MEKI „WAN BIGI LAGIPRESI”

8. (a) San bergi e prenki son leisi na ini Bijbel? (b) San na a „Olèif-bergi” na ini a profeititori fu Sakaria?

8 Wi si kaba taki „a foto” Yerusalem e agersi Yerusalem di de na hemel. Sobun, na ’Olèif-bergi di de na fesisei fu Yerusalem’ musu fu de wan agersi bergi tu. San a bergi disi e prenki? Fa a du kon taki a e „prati na mindri” fu tron tu bergi? Fu san ede Yehovah e kari den bergi disi „den bergi fu mi”? (Leisi Sakaria 14:3-5.) Son leisi Bijbel e agersi kownukondre noso tirimakti nanga bergi. Nofo tron Bijbel e taki tu dati den blesi fu Gado nanga a kibri di a e gi, e kon fu a bergi fu Gado (Ps. 72:3; Yes. 25:6, 7). Sobun, na Olèif-bergi pe Gado e tanapu èn di de na owstusei fu Yerusalem, e prenki a reti di Yehovah abi fu tiri hemel nanga grontapu.

9. San a wani taki dati na „Olèif-bergi” e prati na tu?

9 A profeititori e taki dati na „Olèif-bergi” di de na owstusei fu Yerusalem e „prati na mindri”. San dati wani taki? A wani taki dati Yehovah e seti wan tra tirimakti di o du wan spesrutu sani. A tirimakti disi na Gado Kownukondre di abi Yesus Krestes leki Kownu. Dati meki Yehovah kari den tu bergi disi „den bergi fu mi”, fu di ala tu bergi na fu en.Sakaria 14:4, 5.

10. San na a „bigi lagipresi” na mindri den tu bergi?

10 Te na agersi bergi e prati na tu, dan afu fu a bergi e skoifi go na noordsei èn afu e skoifi go na zuidsei. Na so „wan bigi lagipresi” e kon na mindri den tu bergi. Ma Yehovah e tan tanapu nanga a wan futu na tapu a wan bergi èn nanga a tra futu na tapu a tra bergi. Na agersi lagipresi disi e prenki a fasi fa Gado e kibri sma. Neleki fa sma kan go kibri na ini wan lagipresi di de na mindri tu bergi, na so den futuboi fu Yehovah kan kisi kibri te den abi Yehovah nanga en Manpikin leki tiriman. Yehovah o sorgu taki noiti wan sma o man puru a tru anbegi na pasi. O ten na Olèif-bergi prati na tu? Dati pasa na ini 1914 di Yesus bigin tiri na ini hemel. O ten den futuboi fu Yehovah bigin lowe go na a agersi lagipresi disi?

GADO EN PIPEL E BIGIN LOWE GO NA A LAGIPRESI!

11, 12. (a) O ten a pipel fu Gado bigin lowe go na a agersi lagipresi? (b) Fa wi du sabi taki Yehovah e gebroiki en makti fu yepi en pipel?

11 Yesus ben warskow den bakaman fu en: „Na ini ala kondre sma o teige unu fu mi nen ede” (Mat. 24:9). Sensi di den lasti dei fu a grontapu disi bigin na ini 1914, moro nanga moro sma e teige a pipel fu Yehovah. Ma aladi feanti fu Gado pipel du wan lo ogri nanga a salfu fikapisi na ini a Fosi Grontapufeti, toku den no ben man kiri ala den futuboi fu Gado. Na ini 1919, Gado puru den na ini Babilon a Bigiwan di e prenki ala falsi bribi na grontapu (Openb. 11:11, 12). * Na ini a yari dati Gado en pipel bigin lowe go na a lagipresi fu Yehovah.

12 Sensi 1919, tru anbegiman na heri grontapu man feni kibri na ini a lagipresi fu Yehovah. Na ini den yari di pasa, tiriman tapu Yehovah Kotoigi na difrenti presi fu grontapu fu preiki a bun nyunsu  èn fu prati buku nanga tijdschrift di e taki fu Bijbel. Te na a dei fu tide kondre de ete pe Yehovah Kotoigi no e kisi primisi fu preiki fri. Ma awinsi san den tiriman e pruberi fu du, den no o man puru a tru anbegi na pasi! Yehovah o tan gebroiki en makti fu yepi en pipel.Deut. 11:2.

13. Fa wi kan tan na ini a lagipresi fu Yehovah èn fu san ede a de tumusi prenspari taki wi du dati?

13 Efu wi e tan dini Yehovah èn wi e du san Bijbel e leri wi, dan en nanga en Manpikin Yesus Krestes o yepi wi. Gado no o meki nowan sani noso ’nowan sma puru wi na en anu’ (Yoh. 10:28, 29). Yehovah de klariklari fu du iniwan sani di kan yepi wi fu tan gi yesi na en di de a Moro Hei Tiriman èn fu tan de futuboi fu en Kownukondre di abi Krestes leki tiriman. Na ini a bigi banawtu di de na pasi e kon wi o abi moro yepi fu Gado fanowdu. Sobun, a de tumusi prenspari taki wi tan na ini a lagipresi fu Yehovah pe wi kan kisi kibri.

A DEI E DORO TAKI YEHOVAH O FETI NANGA EN FEANTI

14, 15. Te Yehovah o „feti” nanga den feanti fu en, dan san o pasa nanga den sma di no de na ini en lagipresi?

14 Dei fu dei a kaba fu a grontapu disi e kon moro krosibei. Dati meki Satan o meki moro muiti fu tyari problema kon gi den futuboi fu Yehovah. Dyonsro Satan o opo feti nanga Gado pipel wan lasti leisi. Na a dei dati Yehovah o feti nanga den feanti fu en pipel èn a o kiri den alamala. Dati na a dei di Yehovah o „feti” gi en pipel, soleki fa Sakaria ben taki. A feti dati o sori krin taki Yehovah na a moro tranga Fetiman di de.Sak. 14:3.

15 San o pasa nanga den sma di no de na ini a „bigi lagipresi” fu Yehovah na a dei di Gado o feti nanga en feanti? „Nowan bigi leti” no o de gi den fu di Gado no o de nanga den. Sakaria taki dati na a ten dati „den asi, den umaburiki, den kameili, den manburiki, nanga iniwan tra sortu osometi” o kon steifi fu di kowru o naki den. Fu di srudati ben e gebroiki den sortu meti disi fu go feti, meki den e prenki den sani di sma e gebroiki fu feti na ini a ten disi. Sobun, Sakaria e sori taki nowan fu den sani di den legre o gebroiki na ini a feti di e kon, o man yepi den. Boiti dati, Yehovah o tyari „rampu” noso takru siki kon na den tapu. Wi no sabi efu sma o kisi den takru siki disi trutru, ma den o frede den feanti so te, taki den o tan pî. Na a dei dati, den „ai o pori gowe . . . èn den tongo srefi o pori”. Dati wani taki dati den feanti fu wi o suku fu du wi ogri, ma den no o man. Den o taki sani fu hati wi, ma Gado o tapu den mofo (Sak. 14:6, 7, 12, 15). Na ala presi na grontapu, sma o kisi pori. Wan bun bigi legre o de na Satan sei na a dei fu a feti (Openb. 19:19-21). Ma „den dedeskin fu den sma di Yehovah kiri na a dei dati o panya fu a wan sei fu grontapu te na a tra sei”.Yer. 25:32, 33.

16. San wi musu aksi wisrefi, now di wi sabi taki a dei e doro taki Yehovah o feti nanga den feanti fu en? San wi musu du?

16 Te feti de, ala sma e pina, srefi den sma di e wini a feti. A kan taki nyanyan no de fu feni. Kande sma e lasi den oso noso tra sani. Kande a libi e kon moro tranga. Sma no o man du ala san den wani. San wi o du efu den sortu sani disi miti wi? Wi o bruya? Wi o drai baka gi a bribi fu wi te wi e kisi tesi? Wi o lasi howpu noso wi o firi brokosaka? Na a ten fu a bigi banawtu a o de prenspari fu tan bribi taki Yehovah man yepi wi. Sobun, efu wi wani kisi kibri, wi musu tan na ini a lagipresi fu en!Leisi Habakuk 3:17, 18.

 „WATRA DI E GI LIBI”

17, 18. (a) San na a „watra di e gi libi”? (b) San na „a se na owstusei” nanga „a se na west-sei”? (c) Te yu e prakseri san o pasa na ini a ten di e kon, dan san yu wani tan du ala ten?

17 Baka Armagedon „watra” o komoto doronomo na a Kownukondre fu Krestes. A watra dati di o „gi libi”, na den sani di Yehovah seti fu gi sma libi. A profeititori fu Sakaria e taki fu wan ’se di de na owstusei’ èn fu wan ’se di de na west-sei’. „A se na owstusei” na a Dede Se èn „a se na west-sei” na a Mindrikondre Se. Den se disi e prenki libisma. A Dede Se na den sma di de na ini Grebi èn di o kisi wan opobaka. Ma a Mindrikondre Se, di lai fisi nanga tra libisani, na a „bigi ipi” sma di o pasa Armagedon libilibi (Leisi Sakaria 14:8, 9; Openb. 7:9-15). Sobun, ala tu grupu o dringi fu a ’liba di abi watra di e gi libi’. Na so den o kisi frulusu fu a sondu di wi kisi fu Adam èn di tyari dede kon gi wi.Openb. 22:1, 2.

Sorgu taki yu tan na ini a lagipresi fu Yehovah pe yu kan kisi kibri

18 Te na ogri grontapu disi o kisi pori, Yehovah o kibri wi èn a o tyari wi go na ini a nyun grontapu fu en. Awinsi ala sma na grontapu e teige wi, meki wi tan saka wisrefi na ondro Gado Kownukondre èn meki wi sorgu taki wi tan na ini a lagipresi fu Yehovah pe wi kan kisi kibri.

^ paragraaf 11 Luku a buku De Openbaring — Haar grootse climax is nabij!, bladzijde 169, 170.