Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yanuari 2013

Abi deki-ati—Yehovah de nanga yu!

Abi deki-ati—Yehovah de nanga yu!

„Abi deki-ati èn no frede. . . . Yehovah yu Gado de nanga yu.”YOS. 1:9.

1, 2. (a) San o yepi wi fu horidoro te wi e kisi problema? (b) San na bribi? Gi wan eksempre.

TE WI e dini Yehovah, dan dati e gi wi prisiri. Ma neleki fa a de nanga ala libisma, na so wi e kisi fu du nanga problema tu. A kan taki wi musu ’pina fu di wi e du san bun’ (1 Petr. 3:14; 5:8, 9; 1 Kor. 10:13). Fu man horidoro te wi e kisi den problema disi, wi abi bribi nanga deki-ati fanowdu.

2 San na bribi? Na apostel Paulus ben skrifi: „Bribi na te wan sma e fruwakti taki den sani di a e howpu, o kon tru nomonomo. A de a krin buweisi fu sani di de trutru, ma di wi no man si” (Hebr. 11:1). Bribi de neleki wan gronpapira di wan sma e gi yu fu sori taki wan gron poti na tapu yu nen. A papira disi e gi yu a dyaranti taki a gron na fu yu. Fu di wi e bribi taki Gado e du ala ten san a pramisi, meki a de neleki wi abi wan prenspari gronpapira. Wi de seiker taki ala san Gado pramisi wi o pasa trutru èn taki ala sani di skrifi na ini Bijbel na soso tru tori, srefi den sani di wi no man si.

3, 4. (a) San na deki-ati? (b) San na wán fasi fa wi kan tranga a bribi fu wi èn kisi moro deki-ati?

3 Wi abi deki-ati te wi man taki noso du sani sondro frede, awinsi wi de na ini muilek situwâsi noso awinsi ogri kan miti wi. Te wi abi deki-ati, dan wi o man du bigi sani èn wi no o frede.Mark. 6:49, 50; 2 Tim. 1:7.

4 Wi alamala wani abi bribi nanga deki-ati. Ma fa a de te wi abi a firi taki wi abi moro bribi fanowdu èn taki wi no abi deki-ati? We, na ini Bijbel wi e si a moi eksempre fu dusundusun sma di ben abi bribi nanga deki-ati. Sobun, efu wi wani kisi moro bribi nanga moro deki-ati, dan a bun fu go luku wan tu fu den eksempre disi.

 YEHOVAH BEN DE NANGA YOSUA

5. Efu Yosua ben wani abi bun bakapisi, dan san a ben abi fanowdu?

5 Meki wi go luku wan tori di pasa sowan 3500 yari pasa. Dati ben de fotenti yari baka di Yehovah frulusu milyunmilyun Israelsma fu Egepte. A profeiti Moses ben de a fesiman fu Israel. Di a ben abi 120 yari, a go tanapu na tapu Neibo-bergi fu luku a Pramisi Kondre. Baka dati a dede. A man di teki en presi na Yosua. A man disi kisi moro koni fu di a yeye fu Gado ben kon na en tapu (Deut. 34:1-9). Den Israelsma ben de fu teki a kondre Kanan abra. Efu Yosua, a fesiman fu den, ben wani abi bun bakapisi, dan Gado ben musu gi en koni. Boiti dati, a ben musu sori bribi na ini Yehovah èn a ben musu abi deki-ati. A no ben musu frede.Deut. 31:22, 23.

6. (a) Sortu sani Yosua 23:6 e gi wi deki-ati fu du? (b) San wi e leri fu Tori fu den apostel 4:18-20 nanga Tori fu den apostel 5:29?

6 A koni di Yosua ben abi èn a deki-ati nanga a bribi di a sori di Israel feti omeni yari fu teki Kanan abra, ben musu fu gi den Israelsma deki-ati tu. Boiti taki den ben musu abi a deki-ati fu feti, den ben musu abi a deki-ati tu fu du ala sani di Yosua taigi den. Na a kaba fu en libi a taigi den wan tu lasti sani. A taki: „Abi deki-ati èn tan du ala den sani di de na ini a buku pe a wèt skrifi di Gado ben gi Moses. Noiti un musu pasa a wèt disi, ma un musu du ala san a wèt taki” (Yos. 23:6). Wi srefi musu abi deki-ati fu man gi yesi na Yehovah ala ten, srefi te libisma wani taki wi musu du sani di Gado no feni bun. (Leisi Tori 4:18-20; 5:29.) Efu wi begi Yehovah fu a yepi wi èn wi e frutrow na en tapu, dan a o yepi wi fu abi deki-ati.

FA WI KAN MEKI TAKI SANI WAKA BUN NANGA WI?

7. Efu Yosua ben wani abi deki-ati èn efu a ben wani taki sani waka bun nanga en, dan san a ben musu du?

7 Efu wi wani abi a deki-ati fu du Gado wani, dan wi musu studeri Gado Wortu èn du san a e taki. Na dati Gado taigi Yosua fu du di a tron fesiman baka Moses: „Yu musu abi deki-ati nomo èn yu no musu frede kwetikweti, so taki yu kan du ala den sani di skrifi na ini a wèt di mi futuboi Moses ben taigi yu fu hori. . . . Yu musu tan taki fu a wèt di skrifi na ini a buku disi. Dei nanga neti yu musu leisi en nanga wan safri sten, so taki yu kan du ala den sani di skrifi na ini. Te yu du dati, dan sani o waka bun nanga yu èn yu o handri nanga koni” (Yos. 1:7, 8). Yosua teki a rai disi èn ’sani waka bun nanga en’. Efu wi e du disi tu, dan wi o kisi moro deki-ati èn sani o waka bun nanga wi te wi e du a wroko di Gado gi wi.

A yaritekst fu 2013 na: „Abi deki-ati èn no frede. . . . Yehovah yu Gado de nanga yu.”Yosua 1:9

8. Sortu Bijbeltekst na a yaritekst fu 2013 èn fa yu denki taki den wortu disi o yepi yu?

8 Yosua ben musu fu kisi moro deki-ati di a yere san Yehovah taigi en: ’Abi deki-ati èn no frede. No meki sma tapu skreki gi yu èn no beifi, bika Yehovah yu Gado de nanga yu, awinsi pe yu e go’ (Yos. 1:9). Yehovah de nanga wi tu. Sobun, ’no meki sma tapu skreki gi wi èn meki wi no beifi’, awinsi wi e kisi tesi. A moi fu leisi den wortu: „Abi deki-ati èn no frede. . . . Yehovah yu Gado de nanga yu.” Na ini a yari 2013 wi o abi den wortu disi fu Yosua 1:9 leki yaritekst. Wi kan de seiker taki na ini den mun di e kon den o gi wi furu deki-ati. Ma wi o  luku wan tu tra eksempre fu sma di taki èn du sani di o tranga a bribi fu wi èn di o gi wi deki-ati.

DEN BEN ABI A DEKI-ATI FU TEKI A SEI FU A TRU GADO

9. Fa Rakab sori bribi nanga deki-ati?

9 Di Yosua seni tu man fu go luku a kondre Kanan kibrikibri, dan Rakab, wan huru-uma, kibri den di feanti ben kon suku den. Baka dati Rakab seni den feanti go na wan tra sei. Fu di Rakab sori bribi nanga deki-ati, meki Gado no kiri en nanga en osofamiri di den Israelsma go feti nanga a foto Yerikow (Hebr. 11:30, 31; Yak. 2:25). A no de fu taki dati Rakab tapu nanga a hurulibi fu en fu di a ben wani plisi Yehovah. Son sma di tron Kresten, sori taki den ben abi a bribi nanga a deki-ati fu kenki a libi fu den tu, so taki den ben kan plisi Gado.

10. (a) Na ini sortu situwâsi Rut ben de di a teki a bosroiti fu dini Yehovah? (b) Fa Yehovah blesi en?

10 Baka di Yosua dede, dan Rut, wan uma fu Moab, ben abi a deki-ati fu teki a sei fu a tru Gado. Kande Rut ben sabi pikinso fu Yehovah kaba, fu di en masra di no ben de na libi moro, ben de wan Israel man. A mama fu en masra ben nen Naomi èn a ben lasi en masra na ini dede tu. Sobun, Naomi teki a bosroiti fu gowe libi Moab èn fu drai go baka na Betlehem, wan foto na ini Israel. Di den ben de na pasi, Naomi begi Rut fu drai go baka na en eigi pipel. Ma a Moab uma disi piki en: „No dwengi mi fu gowe libi yu èn fu drai go baka sondro yu . . . Yu pipel o de mi pipel èn yu Gado o de mi Gado” (Rut 1:16). Rut ben de seryusu di a taki a sani disi. Baka wan pisi ten Boas, wan famiri fu Naomi, trow nanga Rut. Den kisi wan manpikin di tron wan afo fu David èn fu Yesus. Iya, Yehovah e blesi sma te den e sori bribi nanga deki-ati.Rut 2:12; 4:17-22; Mat. 1:1-6.

DEN BEN DE KLARIKLARI FU DINI GADO, ALADI DEN BEN KAN LASI DEN LIBI!

11. Fa Yoyada nanga Yoseiba sori deki-ati èn san ben de a bakapisi?

11 Wi e kisi moro deki-ati nanga bribi te wi e si taki Gado de nanga den wan di de klariklari fu yepi tra futuboi fu Yehovah. Luku na eksempre fu Granpriester Yoyada nanga en wefi Yoseiba. Baka di Kownu Ahasia dede, en mama Atalia kiri ala den tra pikin fu a kownu, boiti Yoas. Baka dati a poti ensrefi leki umakownu. Aladi Yoyada nanga Yoseiba ben kan lasi den libi, toku den yepi Yoas, a manpikin fu Ahasia, èn siksi yari langa den kibri en. Na ini a di fu seibi yari di Atalia ben e tiri, Yoyada meki bekènti taki Yoas na kownu èn a meki sma kiri Atalia (2 Kow. 11:1-16). Bakaten di Kownu Yoas ben wani meki a tempel, Yoyada horibaka gi en. Di Yoyada ben abi 130 yari, a dede èn den beri en nanga den kownu „fu di den prakseri ala den bun di a ben du gi den Israelsma, gi a tru Gado èn gi na oso fu Gado” (2 Kron. 24:15, 16). Fu di Yoyada nanga en wefi sori deki-ati, meki a famiri pe a Mesias ben o komoto, tan na libi.

12. Sortu deki-ati sani Ebed-Meilek du?

12 Ebed-Meilek, wan heihei man na ini na oso fu Kownu Sedekia, yepi Yeremia aladi a ben kan lasi en libi. Di den granman fu Yuda go na Kownu Sedekia den lei gi Yeremia taki a ben e gi sma deki-ati fu opo densrefi teige Kownu. Dati meki Kownu gi den granman disi pasi fu du san den wani nanga Yeremia. Den trowe en go na ini wan peti di ben furu nanga tokotoko èn den libi en drape fu dede (Yer. 38:4-6). Ebed-Meilek ben sabi taki den Dyu no ben lobi Yeremia èn a ben sabi tu taki a ben kan lasi en libi, ma toku a go na Sedekia fu aksi en efu a ben kan lusu a profeiti. Sedekia arki Ebed-Meilek èn a gi en primisi fu teki 30 man di ben musu yepi en fu lusu  Yeremia. Baka dati Gado taigi a profeiti fu fruteri Ebed-Meilek taki a no ben o dede te den Babilonsma ben o kon feti nanga Yerusalem (Yer. 39:15-18). Gado e blesi den futuboi fu en te den e sori deki-ati.

13. Fa den dri Hebrew man sori deki-ati èn san wi kan leri fu na eksempre fu den?

13 Na ini a di fu seibi yarihondro fosi Krestes, dri Hebrew man di ben de futuboi fu Yehovah si krin fa Gado e blesi sma di e sori bribi nanga deki-ati. Kownu Nebukadnesar ben meki den heihei man fu Babilon kon makandra fu anbegi wan bun bigi gowtu popki. Efu wan sma no ben wani du disi, dan den ben o trowe en go na ini wan faya onfu. Na wan lespeki fasi den dri Hebrew man taigi Nebukadnesar: „A Gado di wi e dini, man frulusu wi. A o puru wi na ini a faya onfu. Iya Kownu, na ini yu anu srefi a o puru wi. Ma efu a no frulusu wi, dan meki Kownu sabi taki a no den gado fu yu wi e dini. Wi no o anbegi a gowtu popki di yu meki” (Dan. 3:16-18). Na ini Danièl 3:19-30 wi kan leisi a span tori di e fruteri fa Gado fri den dri Hebrew man disi. Kande sma no o trowe wi go na ini wan faya onfu, toku wi e kisi tesi pe wi musu buweisi taki wi wani dini Gado. Ma te wi e sori bribi nanga deki-ati, dan wi kan de seiker taki Gado o blesi wi.

14. Soleki fa Danièl kapitel 6 e sori wi, dan sortu deki-ati sani Danièl du èn san ben de a bakapisi?

14 Danièl sori bribi nanga deki-ati di den feanti fu en kori Kownu Darius fu meki wan wèt di ben o ’tapu sma dritenti dei langa fu begi wan tra gado noso wan tra sma, boiti Kownu. Efu wan sma ben o trangayesi a wèt disi, dan den ben musu trowe en go na ini a lew-olo.’ Di Danièl kon sabi taki Kownu agri nanga a wèt, a „go na ini en oso wantewante. Den fensre fu a kamra na tapu a daki fu en oso ben opo. Ne a begi go na a sei fu Yerusalem. Iya, dri tron wan dei srefi a saka kindi fu begi a Gado fu en èn fu prèise en, soleki fa a ben gwenti du ala ten” (Dan. 6:6-10). Dati meki den trowe a deki-ati man Danièl go na ini a lew-olo, ma Yehovah fri en.Dan. 6:16-23.

15. (a) San wi kan leri fu Akwila nanga Preskela di sori bribi nanga deki-ati? (b) San Yesus wortu na ini Yohanes 13:34 wani taki èn fa furu Kresten sori a sortu lobi disi?

15 Akwila nanga Preskela du wan sani di ben kan meki den lasi den libi fu Paulus ede (Tori 18:2; Rom. 16:3, 4). Bijbel no e fruteri wi fu san ede den du so wan sani, ma na wan deki-ati fasi den du san Yesus taki: „Mi e gi unu wan nyun komando, taki un musu lobi makandra. Neleki fa mi lobi unu, na so un musu lobi makandra tu” (Yoh. 13:34). A Wèt di Gado gi Moses ben sori taki wan sma ben musu lobi tra sma  leki fa a lobi ensrefi (Lef. 19:18). Ma san Yesus taki na ini Yohanes 13:34 ben de wan nyun sani. A ben sori taki a lobi fu wi musu go so fara taki wi de klariklari fu dede gi den brada nanga sisa fu wi, neleki fa en ben du. Furu Kresten sori deki-ati èn den yepi den brada nanga sisa fu den so taki feanti no du den ogri noso kiri den. Na so fasi den sori lobi, aladi den ben kan lasi den libi.Leisi 1 Yohanes 3:16.

Den fosi yarihondro Kresten ben weigri fu anbegi a grankownu fu Rome

16, 17. (a) Fa wan tu Kresten fu a fosi yarihondro ben musu sori bribi? (b) Fa son Kresten na ini a ten fu wi ben musu sori bribi tu?

16 Neleki Yesus, den Kresten fu a fosi yarihondro sori furu deki-ati fu di den ben wani dini Yehovah wawan (Mat. 4:8-10). Den weigri fu bron switismeri fu gi a grankownu fu Rome grani. (Luku a prenki.) Daniel P. Mannix skrifi na ini en buku taki nofo tron wan altari ben de na ini a stadion. A taki dati te wan strafuman ben trowe pikinso switismeri na tapu a faya fu na altari, dan dati wawan ben sari fu kisi wan papira di ben sori taki a ben de wan friman. Den ben taigi a strafuman taki te a ben o du so wan sani, dan a no anbegi a ben o anbegi a grankownu, ma a ben o sori nomo taki a e agri taki a grankownu fu Rome na wan gado. Toku yu no ben abi furu Kresten di ben wani kon fri na a fasi disi.Those About to Die.

17 Na ini a ten fu wi den Nazi-srudati ben poti tru Kresten na ini strafuman-kampu. Den Kresten disi ben kisi furu okasi fu kon fri so taki sma no kiri den. A wan-enkri sani di den ben musu du na fu skrifi den nen na tapu wan papira di ben taki dati den no ben anbegi Yehovah moro. Soso wan tu fu den skrifi den nen na tapu a papira. Na ini Rwanda, sma ben feti nanga makandra èn na ini wan syatu pisi ten den kiri ipi-ipi sma. Ma den Tutsi nanga Hutu Kotoigi yepi makandra so taki sma no kiri den. Den ben abi deki-ati nanga bribi fanowdu fu du so wan sani.

HORI NA PRAKSERI TAKI YEHOVAH DE NANGA WI!

18, 19. Sortu eksempre na ini Bijbel kan yepi wi fu abi bribi nanga deki-ati èn fu du a preikiwroko?

18 A moro bigi wroko di futuboi fu Gado oiti ben musu du gi en, na fu preiki a Kownukondre boskopu èn fu meki disipel. A de wan grani trutru fu du a wroko disi (Mat. 24:14; 28:19, 20). Wi breiti srefisrefi taki Yesus gi wi so wan bun eksempre. A „go na ala den foto nanga den dorpu fu preiki a bun nyunsu fu Gado Kownukondre èn fu fruteri ala sma disi” (Luk. 8:1). Neleki fa a ben de nanga Yesus, na so wi abi bribi nanga deki-ati fanowdu tu fu preiki a Kownukondre boskopu. Gado o yepi wi fu de leki Noa, wan deki-ati man di ben de „wan preikiman fu retidu” èn di ben e preiki na ini wan „ogri grontapu” di ben o kisi pori na ini wan bigi frudu.2 Petr. 2:4, 5.

19 Begi e yepi wi fu du a preikiwroko. Di sma frufolgu wan tu bakaman fu Krestes, den begi Gado fu yepi den fu ’taki a wortu fu en sondro frede’. Gado arki a begi fu den. (Leisi Tori fu den apostel 4:29-31.) Te yu e syensyen fu preiki oso fu oso, begi Yehovah meki a yepi yu. Dan a o gi yu moro bribi nanga deki-ati.Leisi Psalm 66:19, 20. *

20. Suma e horibaka gi wi leki futuboi fu Yehovah?

20 A no makriki fu tan du Gado wani na ini na ogri grontapu disi. Ma wi no de wi wawan. Gado de nanga wi èn en Manpikin, na Edeman fu a gemeente, de nanga wi tu. Boiti dati, na heri grontapu moro leki 7 milyun Kotoigi fu Yehovah de nanga wi. Makandra nanga den wi musu tan sori bribi èn preiki a bun nyunsu, aladi wi e hori na prakseri san na a yaritekst fu 2013: „Abi deki-ati èn no frede. . . . Yehovah yu Gado de nanga yu.”Yos. 1:9.

^ paragraaf 19 Na ini A Waktitoren fu 15 februari 2012 yu kan leisi na artikel „Abi deki-ati èn no frede”. Na artikel disi e taki fu ete wan tu sma di ben sori deki-ati.