Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2017

A lusu-paiman, wan tumusi moi „kado” di wi kisi fu a Tata

A lusu-paiman, wan tumusi moi „kado” di wi kisi fu a Tata

„Ibri bun presenti nanga ibri kado di bun dorodoro e kon . . . fu a Tata.”YAK. 1:17.

SINGI: 148, 109

1. Sortu blesi a lusu-paiman o tyari kon?

A FRULUSU-OFRANDI fu Yesus Krestes e tyari furu blesi kon. A lusu-paiman e gi den pikin fu Adam di lobi retidu, na okasi fu tron pikin fu Gado. A lusu-paiman e gi wi na okasi tu fu libi wan koloku libi fu têgo. Toku a lusu-paiman fu Krestes o du moro leki fu tyari blesi kon gi libisma di e gi yesi na Gado. Yesus ben de klariklari fu tan gi yesi na Yehovah te na dede èn a sani dati o tyari wini gi ala sma na hemel èn na grontapu.Hebr. 1:8, 9.

2. (a) Fu sortu prenspari tori a begi fu Yesus e taki? (Luku a prenki na a bigin fu na artikel.) (b) San wi o luku na ini na artikel disi?

2 Sonwan tu yari fosi Yesus dede leki frulusu-ofrandi, a leri den disipel fu en fu begi: „Wi Tata na hemel, meki yu nen de santa. Meki yu Kownukondre kon. Meki yu wani pasa na grontapu soleki fa a e pasa na hemel” (Mat. 6:9, 10). Meki wi luku san a lusu-paiman abi fu du nanga a nen fu Gado di musu kon santa, nanga Gado Kownukondre di e tiri  èn nanga a prakseri fu Gado di musu kon tru. Disi o yepi wi fu kon abi moro warderi gi a lusu-paiman.

„MEKI YU NEN DE SANTA”

3. San Yehovah en nen wani taki èn fa Satan pori a santa nen dati?

3 A fosi sani di Yesus ben aksi na ini a Wi Tata begi, na taki a nen fu Gado kon santa. A nen fu Yehovah e sori o hei, o makti, èn o santa Gado de. Na ini wan tra begi, Yesus kari Yehovah „Santa Tata” (Yoh. 17:11). Fu di Yehovah santa, meki ala den leri nanga den wet di e komoto fu en santa tu. Aladi dati de so, toku Satan sori taki a no ben agri taki Gado abi a reti fu poti wet gi libisma. A sani disi pasa na ini a dyari fu Eden. Di Satan fruteri lei fu Yehovah, dan a pori Gado en santa nen.Gen. 3:1-5.

4. Fa Yesus yepi fu meki a nen fu Gado kon santa?

4 Ma tra fasi leki Satan, Yesus ben lobi a nen fu Yehovah trutru (Yoh. 17:25, 26). Yesus yepi fu meki a nen fu Gado kon santa. (Leisi Psalm 40:8-10.) Di Yesus ben e libi na grontapu, a tan gi yesi na Gado na ini ala sani. Na so a sori taki Yehovah ben abi leti fu poti wet gi libisma nanga engel èn den wet dati bun. Srefi di Satan meki Yesus pina teleki a dede, Yesus tan gi yesi na en hemel Tata na ini ala sani. Fu di Yesus tai hori na Gado, meki a sori taki wan libisma di no abi sondu man hori ensrefi na iniwan fu den wet fu Gado.

5. Fa wi kan yepi fu meki a nen fu Gado kon santa?

5 Fa wi kan sori taki wi lobi a nen fu Yehovah? Wi kan du dati nanga a fasi fa wi e tyari wisrefi. Yehovah wani taki wi musu de santa. (Leisi 1 Petrus 1:15, 16.) Disi wani taki dati wi e anbegi Yehovah wawan èn taki wi e gi yesi na en nanga wi heri ati. Srefi te sma e frufolgu wi, wi e du tranga muiti fu hori wisrefi na den bun leri nanga wet fu Gado. Te wi e du bun, wi e meki a leti fu wi skèin so taki a nen fu Yehovah e kisi glori (Mat. 5:14-16). Fu di wi na santa sma, meki wi e libi na so wan fasi taki sma man si taki den wet fu Yehovah bun èn taki den sani di Satan fruteri fu en na lei. Te wi e meki fowtu, wan sani di wi alamala e du, dan wi e sori trutru berow èn wi no e du sani moro di e gi Yehovah syen.Ps. 79:9.

6. Fu san ede Yehovah kan si wi leki reti-ati sma, aladi wi abi sondu?

6 Fu di Krestes dede leki ofrandi, meki Yehovah kan gi sma di abi bribi pardon fu den sondu fu den. Te sma e gi densrefi abra na en, dan a e teki den leki en anbegiman fu di a e si den leki reti-ati sma. Yehovah e si den salfu Kresten leki en manpikin èn a e si den „tra skapu” leki en mati (Yoh. 10:16; Rom. 5:1, 2; Yak. 2:21-25). Sobun, srefi na ini a ten disi, a lusu-paiman e gi wi okasi fu abi wan bun matifasi nanga wi Tata èn wi kan yepi fu meki a nen fu en kon santa.

„MEKI YU KOWNUKONDRE KON”

7. Sortu blesi a lusu-paiman o tyari kon te a Kownukondre o tiri?

7 Wan tra sani di Yesus begi Gado na ini a Wi Tata begi, na: „Meki yu Kownukondre kon.” San a lusu-paiman abi fu du nanga a Kownukondre fu Gado? A lusu-paiman meki taki Gado ben man tyari 144.000 sma kon na wán fu dini leki kownu nanga priester makandra  nanga Krestes na hemel (Openb. 5:9, 10; 14:1). Yesus nanga den wan di o tiri makandra nanga en na ini Gado Kownukondre, o meki libisma di e gi yesi kisi wini fu a lusu-paiman na ini wan pisi ten fu 1000 yari. Grontapu o tron wan paradijs èn ala reti-ati libisma o kon fri fu sondu. Na so trutru wánfasi o de na mindri den pikin fu Gado na hemel èn na grontapu (Openb. 5:13; 20:6). Yesus o masi na ede fu a sneki èn a o figi ala den bakapisi puru fu den ogri di Satan du.Gen. 3:15.

8. (a) Fa Yesus yepi den disipel fu en fu kon frustan o prenspari Gado Kownukondre de? (b) Fa wi na ini a ten disi e sori taki wi e horibaka gi Gado Kownukondre?

8 Di Yesus ben de na grontapu, a yepi den disipel fu en fu kon frustan o prenspari Gado Kownukondre de. Baka di Yesus teki dopu, dan wantewante a bigin preiki „a bun nyunsu fu Gado Kownukondre” na ala presi (Luk. 4:43). Fosi Yesus drai go baka na hemel, dan wan fu den lasti sani di a taigi den disipel fu en, na taki den ben musu de kotoigi fu en „te na den moro farawe presi fu grontapu” (Tori 1:6-8). Nanga yepi fu a Kownukondre preikiwroko, sma na heri grontapu ben o abi na okasi fu kon sabi san na a lusu-paiman èn fu tron borgu fu Gado Kownukondre. Na ini a ten disi wi e yepi den brada fu Krestes fu preiki a bun nyunsu fu a Kownukondre na heri grontapu. Na so wi e horibaka gi a Kownukondre.Mat. 24:14; 25:40.

„MEKI YU WANI PASA”

9. Fu san ede wi kan de seiker taki Yehovah o du san a ben abi na prakseri gi libisma?

9 Yesus ben begi tu: „Meki yu wani pasa.” San Yesus ben wani taki nanga den wortu disi? Yehovah na a Mekiman. Te a e taki dati wan sani o pasa, dan gi en a sani dati pasa kaba (Yes. 55:11). Aladi Satan ben opo ensrefi teige Gado, toku dati no o tapu Gado fu du san a abi na prakseri. Sensi a bigin, Yehovah ben wani taki grontapu ben musu kon lai nanga den pikin fu Adam nanga Eva, di no ben o abi sondu (Gen. 1:28). Dati no ben o pasa efu Adam nanga Eva ben dede sondro taki den ben kisi pikin. Sobun, baka di Adam nanga Eva sondu, Yehovah gi pasi taki den meki pikin. Nanga yepi fu a lusu-paiman, Gado e gi ala sma di abi bribi na okasi fu libi fu têgo. Yehovah lobi libisma èn a wani taki sma di e gi yesi e libi soleki fa a ben abi na prakseri gi den.

10. Sortu wini a lusu-paiman o tyari kon gi den dedewan?

10 Fa a de nanga den milyardmilyard sma di dede sondro taki den kisi okasi fu kon sabi Yehovah èn fu dini en? A lusu-paiman e meki taki den dedewan kan kisi wan opobaka. Wi lobi hemel Tata o gi den libi baka, a o gi den na okasi fu kon sabi san a abi na prakseri èn fu kisi têgo libi (Tori 24:15). Yehovah wani taki sma musu libi, a no wani taki den musu dede. Fu di en na a sma di e gi libi, meki a e tron a Tata fu iniwan sma di e kisi wan opobaka (Ps. 36:9). Dati meki a fiti srefisrefi taki Yesus leri wi fu begi: „Wi Tata na hemel” (Mat. 6:9). Yehovah gi Yesus a prenspari frantwortu fu wiki den dedewan (Yoh. 6:40, 44). Bijbel e taki dati Yesus „na a opobaka nanga a libi” èn na ini Paradijs furu sma o kisi wini fu a frantwortu disi di a abi.Yoh. 11:25.

11. San Gado wani gi a „bigi ipi”?

 11 Yehovah no sa du bun gi wan pikin grupu sma nomo, fu di Yesus ben taki: „Den sma di e du a wani fu Gado, na mi brada, mi sisa, nanga mi mama” (Mark. 3:35). Gado wani taki wan „bigi ipi sma” fu ala kondre, lo, nanga tongo musu tron anbegiman fu en. Den wan di e bribi na ini a lusu-paiman fu Krestes èn di e du a wani fu Gado, kan kisi na okasi fu de na mindri den sma di e bari: „Tangi fu wi Gado di e sidon na tapu a kownusturu èn tangi fu a Pikin Skapu, meki wi kisi frulusu.”Openb. 7:9, 10.

12. Fa a Wi Tata begi e sori san Yehovah abi na prakseri gi libisma di e gi yesi?

12 Wi e kon sabi san Gado abi na prakseri gi libisma di e gi yesi na en, te wi e luku den sani di Yesus aksi Gado na ini a Wi Tata begi. Sobun, neleki fa a begi disi e sori, wi wani du ala san wi man fu meki a nen fu Yehovah kon santa (Yes. 8:13). Yesus en eigi nen wani taki „Yehovah na frulusu” èn Yehovah en nen e kisi glori fu di wi e kisi frulusu nanga yepi fu a lusu-paiman. Nanga yepi fu Gado Kownukondre, libisma di e gi yesi o kisi wini fu a lusu-paiman. Iya, a Wi Tata begi e gi wi a dyaranti taki noti kan tapu Yehovah fu du san a abi na prakseri.Ps. 135:6; Yes. 46:9, 10.

SORI WARDERI GI A LUSU-PAIMAN

13. San a dopu fu wi e sori?

13 Wan prenspari fasi fa wi e sori warderi gi a lusu-paiman, na te wi e gi wisrefi abra na Yehovah fu di wi e poti bribi na ini a lusu-paiman èn e teki dopu baka dati. A dopu fu wi e sori taki „wi na fu Yehovah” (Rom. 14:8). A dopu fu  wi wani taki tu dati wi e begi Gado fu kisi wan bun konsensi (1 Petr. 3:21). Yehovah e arki a begi dati èn a e gebroiki a brudu fu Krestes fu krin wi fu den sondu fu wi. Dati meki wi kan de seiker taki a o gi wi ala den sani di a pramisi wi.Rom. 8:32.

Na sortu fasi wi e sori warderi gi a lusu-paiman? (Luku paragraaf 13, 14)

14. Fu san ede Gado gi wi a komando fu lobi tra sma?

14 San na wan tra fasi fa wi kan sori warderi gi a lusu-paiman? Ala sani di Yehovah e du, a e du fu di a abi lobi. Dati meki a wani taki ala den anbegiman fu en e si en leki wan prenspari sani fu sori lobi gi trawan (1 Yoh. 4:8-11). Wi e sori taki wi „na pikin fu [wi] Tata di de na hemel” te wi lobi tra sma (Mat. 5:43-48). A fosi komando na fu lobi Yehovah èn a di fu tu na fu lobi tra sma (Mat. 22:37-40). Wan prenspari fasi fa wi e sori lobi gi tra sma, na te wi e gi yesi na a komando fu preiki a bun nyunsu fu Gado Kownukondre. Te wi e sori lobi gi tra libisma, dan wi e gi Gado glori. Fu taki en leti, te wi e gi yesi na a komando fu lobi trawan, spesrutu den brada nanga sisa fu wi, dan ’wi o man sori a lobi fu Gado krinkrin’.1 Yoh. 4:12, 20.

A LUSU-PAIMAN O MEKI WI KISI BLESI FU YEHOVAH

15. (a) Sortu blesi wi e kisi nownowde kaba fu Yehovah? (b) Sortu blesi wi o kisi na ini a ten di e kon?

15 Yehovah e gi wi a dyaranti taki a o ’figi den sondu fu wi puru’ efu wi e poti bribi na ini a lusu-paiman. (Leisi Tori fu den apostel 3:19-21.) Soleki fa wi ben si kaba, dan Yehovah e gebroiki a lusu-paiman fu teki den salfu Kresten leki en pikin (Rom. 8:15-17). Ma baka te wi di de fu den „tra skapu” no abi sondu moro èn wi pasa a lasti tesi, dan Yehovah o si wi leki en pikin tu (Rom. 8:20, 21; Openb. 20:7-9). Yehovah o lobi den pikin fu en fu têgo. Den wini di a lusu-paiman e tyari kon o tan fu têgo tu (Hebr. 9:12). Noiti a presenti disi o lasi en waarde. Nowan sma man puru en na wi anu.

16. Fa a lusu-paiman e meki wi kon fri trutru?

16 Didibri no o man du noti fu tapu sma di abi berow trutru fu tron pikin fu Yehovah te fu kaba. Yesus kon na grontapu fu dede „wán leisi nomo”. Sobun, a lusu-paiman no abi fu pai ete wan leisi (Hebr. 9:24-26). A o tyari wan kaba kon na a strafu di Adam tyari kon na wi tapu. A frulusu-ofrandi fu Krestes e meki taki wi no de srafu fu a grontapu disi di Satan e tiri èn a e meki taki wi no e frede dede moro.Hebr. 2:14, 15.

17. San yu wani du gi Yehovah fu di a sori lobi gi yu?

17 Ala ten den pramisi fu Gado e kon tru. Yehovah poti wet di e sorgu taki den sani di a meki e wroko soleki fa a wani. Den wet disi no e kenki. Na so Yehovah srefi no e kenki (Mal. 3:6). Yehovah no e gi wi libi nomo. A e gi wi lobi. Bijbel e taki: „Wisrefi kon sabi taki Gado lobi wi èn wi kon bribi dati tu. Gado na lobi” (1 Yoh. 4:16). A heri grontapu o tron wan paradijs pe sma o de koloku trutru èn pe ala sma o sori a lobi fu Gado. Meki a de so taki makandra nanga den engel di e gi yesi na Yehovah wi e taki: „Meki sma prèise a Gado fu wi èn meki den gi en glori, meki den gi en grani èn meki den taki en tangi fu têgo, iya, fu ala ten, fu di a abi koni, makti, nanga krakti. Amen.”Openb. 7:12.