Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2017

Suma e tiri a pipel fu Gado na ini a ten disi?

Suma e tiri a pipel fu Gado na ini a ten disi?

„Memre den wan di e teki fesi na un mindri.”HEBR. 13:7.

SINGI: 125, 43

1, 2. Baka di Yesus opo go na hemel, dan san den apostel fu en ben aksi densrefi kande?

DEN apostel fu Yesus ben e tanapu na tapu Olèif-bergi e luku go na loktu. Syatu na fesi den ben si fa Yesus, a masra èn a mati fu den, ben opo go na hemel teleki wan wolku tapu en so taki den no ben man si en moro (Tori 1:9, 10). Sowan tu yari langa, Yesus gi den leri, a gi den deki-ati èn a ben de den fesiman. Now a no ben de moro. San den ben o du?

2 Yesus ben gi den bakaman fu en wan wroko fu du. A ben taigi den: „Unu sa de kotoigi fu mi na ini Yerusalem, na ini heri Yudea nanga Samaria, èn te na den moro farawe presi fu grontapu” (Tori 1:8). Fa den ben o man du a wroko dati? A tru taki Yesus ben pramisi den taki heri esi den ben o kisi santa yeye (Tori 1:5). Ma fu man preiki na den moro farawe presi na grontapu, wan sma ben o abi fu teki fesi na ini a wroko èn sani ben o abi fu orga bun. Na ini owruten, Yehovah ben e gebroiki libisma fu teki fesi na ini a wroko èn fu orga sani. Dati  meki a kan taki den apostel ben aksi densrefi: ’Yehovah o poti wan nyun sma now leki fesiman?’

3. (a) Sortu prenspari bosroiti den reti-ati apostel teki baka di Yesus opo go na hemel? (b) San wi o luku na ini na artikel disi?

3 Sowan tu wiki baka dati den disipel fu Yesus ondrosuku Gado Wortu èn den begi Gado fu sori den san fu du. Na so den poti Matias leki a di fu 12 apostel, na ini a presi fu Yudas Iskariot (Tori 1:15-26). Fu san ede a ben prenspari so gi den èn gi Yehovah taki den teki a man disi? Matias ben de fanowdu so taki sani ben kan orga bun. * Yesus no ben teki den apostel fu en soso fu yepi en nanga a preikiwroko fu en, ma fu teki wan tumusi prenspari frantwortu na den tapu. San ben de a frantwortu dati èn fa Yehovah gebroiki Yesus fu sreka den man gi a frantwortu dati? Sortu seti di gersi a wan disi a pipel fu Gado na ini a ten disi abi tu? Fa wi kan „memre den wan di e teki fesi” na wi mindri, spesrutu den wan fu „a koni srafu di de fu frutrow”?Hebr. 13:7; Mat. 24:45.

YESUS E TIRI DEN WAN DI E TEKI FESI

4. Sortu frantwortu den apostel nanga tra owruman na ini Yerusalem ben abi na ini a fosi yarihondro?

4 Na a Pinksterfesa fu a yari 33, den apostel bigin teki fesi na ini a Kresten gemeente. Na a okasi dati „Petrus opo tanapu makandra nanga den tra erfu apostel” èn a fruteri a bigi grupu Dyu nanga sma di ben teki a Dyu bribi, den tru tori di ben o kibri sma libi (Tori 2:14, 15). Furu fu den sma dati tron Kresten. Baka dati, den nyun Kresten disi „tan poti prakseri na den leri fu den apostel” (Tori 2:42). Den apostel ben e luku den monitori fu a gemeente (Tori 4:34, 35). Den ben e sorgu taki den Kresten ben e kisi leri fu Gado. Den ben taki: „Wi sa gebroiki wi ten nanga wi krakti fu begi èn fu preiki a wortu” (Tori 6:4). Den gi Kresten di ben abi ondrofeni a frantwortu fu preiki a boskopu na ini nyun kontren (Tori 8:14, 15). Te fu kaba, tra salfu owruman bigin yepi den apostel fu luku den afersi fu a gemeente. A grupu fu owruman disi di ben de a tiri skin fu a ten dati, ben e tiri ala den gemeente.Tori 15:2.

5, 6. (a) Fa den brada fu a tiri skin na ini a fosi yarihondro ben meki a santa yeye tiri den? (Luku a prenki na a bigin fu na artikel.) (b) Fa engel yepi den brada fu a tiri skin na a ten dati? (c) Fa den brada dati ben e meki Gado Wortu tiri den?

5 Den Kresten na ini a fosi yarihondro ben sabi taki Gado ben e gebroiki Yesus, a fesiman fu den, fu tiri den brada fu a tiri skin. Fa den ben kan de seiker fu dati? Na a fosi presi, santa yeye ben e yepi den brada disi (Yoh. 16:13). Santa yeye ben kon na tapu ala salfu Kresten, ma a ben e yepi spesrutu den apostel nanga tra owruman na ini Yerusalem fu du a wroko di den ben abi leki fesiman. Fu eksempre, na ini a yari 49, son sma na ini a Kresten gemeente ben feni taki wan Kresten ben musu besnèi. Ma santa yeye tiri den brada fu a tiri skin fu teki wan bosroiti ini a tori disi. Den Kresten gi yesi na a rai fu den. „A sani dati tranga a bribi fu a gemeente trutru èn dei fu dei moro nanga moro sma ben e tron bribiman” (Tori 16:4, 5). A brifi pe Paulus ben skrifi fu a bosroiti dati e sori tu taki den brada fu a tiri skin fu a ten dati ben abi den fasi fu Gado, soleki lobi nanga bribi.Tori 15:11, 25-29; Gal. 5:22, 23.

6 A di fu tu sani, na taki engel ben yepi a tiri skin fu a ten dati. Fosi Kornelius ben teki dopu leki a fosi Kresten di no ben besnèi,  wan engel taigi en fu seni kari na apostel Petrus. Baka di Petrus preiki a boskopu gi Kornelius nanga den famiriman fu en, dan santa yeye kon na den tapu aladi den man disi no ben besnèi. A sani disi meki taki den apostel nanga tra brada bigin gi trakondre sma di no ben besnèi na okasi fu tron memre fu a Kresten gemeente (Tori 11:13-18). Boiti dati, engel ben e horibaka fayafaya gi a preikiwroko èn den meki taki a wroko ben e go na fesi (Tori 5:19, 20). A di fu dri sani, na taki den brada fu a tiri skin ben e meki Gado Wortu tiri den. Te den ben musu lusu problema di ben abi fu du nanga Bijbel leri, noso te den ben musu teki bosroiti, dan den salfu owruman dati ben e meki Gado Wortu tiri den.Tori 1:20-22; 15:15-20.

7. Fu san ede wi kan taki dati Yesus ben de fesiman fu den fosi Kresten?

7 Aladi den brada di ben e teki fesi na ini a fosi gemeente ben abi makti, toku den ben e si Yesus leki a Fesiman fu den. Na apostel Paulus ben skrifi: „Son sma [Krestes] poti leki apostel.” A ben taki moro fara: „Fu di wi abi lobi meki wi musu gro na ala fasi, aladi wi e saka wisrefi na ondro Krestes di de na ede” (Ef. 4:11, 15). Den disipel no teki a nen fu wan fu den prenspari apostel. Na presi fu dati den ’meki sma kari den Kresten’ soleki fa Gado ben wani (Tori 11:26). A tru taki Paulus ben e frustan o prenspari a ben de taki den Kresten „tan du sani soleki fa” den apostel nanga den tra man di ben e teki fesi ben leri den. Toku a ben taki: „Ma mi wani fu unu sabi taki Krestes na a ede fu ibri man [sosrefi ibriwan fu den brada fu a tiri skin]. . . . èn Gado na a ede fu Krestes” (1 Kor. 11:2, 3). Iya, a ben de krin taki Yehovah Gado ben poti Krestes Yesus leki fesiman fu a gemeente.

„A WROKO DISI A NO FU LIBISMA”

8, 9. Sortu prenspari frantwortu Brada Russell ben abi na a kaba fu a di fu 19 yarihondro?

8 Na a kaba fu a di fu 19 yarihondro, Charles Taze Russell nanga wan tu fu den mati fu en pruberi fu seti a tru Kresten anbegi baka. Den ben wani tyari den tru leri fu Bijbel kon na doro na ini difrenti tongo. Dati meki na ini 1884 den seti wan korporâsi di den kari Zion’s Watch Tower Tract Society èn den skrifi en na lantibuku. Brada Russell tron presidenti fu a korporâsi dati. * A brada disi ben e ondrosuku Bijbel fayafaya èn a no ben frede fu tyari falsi leri kon na krin. Wan tu fu den leri disi na taki Gado na dri sma na ini wán èn taki a sili no man dede. Brada Russell kon si taki Krestes ben o kon baka leki wan yeye èn taki „a reti ten fu den trakondre sma” ben o kon na wan kaba na ini 1914 (Luk. 21:24). Brada Russell ben de klariklari fu gebroiki en ten, en krakti, nanga en moni fu meki tra sma kon sabi den tru leri disi. A de krin taki na a prenspari ten dati, Yehovah nanga Yesus ben gebroiki Brada Russell fu teki fesi.

9 Brada Russell no ben e suku fu kisi grani fu libisma. Na ini 1896, a skrifi: „Wi no wani meki sma gi wi glori noso grani gi san wi e du noso gi san wi e skrifi. Wi no wani meki sma kari wi Domri noso Rabi. Wi no wani tu taki sma e gebroiki a nen fu wi gi a grupu fu den.” Bakaten a taki: „A wroko disi a no fu libisma.”

10. (a) O ten Yesus gi „a koni srafu di de fu frutrow” wan wroko fu du? (b) Fruteri fa safrisafri a Tiri Skin bigin wroko aparti fu a Waktitoren Genootschap?

10 Na ini 1919, dri yari baka di Brada Russell dede, Yesus gi „a koni srafu di de fu  frutrow” wan wroko fu du. San a srafu ben musu du? A ben musu gi den futuboi fu Yesus „nyanyan na a reti ten” (Mat. 24:45). Na ini den yari dati, wan pikin grupu salfu brada di ben e dini na a edekantoro na ini Brooklyn, New York, ben e sreka èn ben e prati nyanyan kaba gi den bakaman fu Yesus. Na ini den yari baka 1940, den brada ben e gebroiki a nen „tiri skin” kaba na ini den buku fu wi. Na a ten dati sma ben e denki taki a nen disi ben abi fu du moro furu nanga den driktoro fu a Watch Tower Bible and Tract Society. Ma na ini 1971, den brada sori krin taki a Tiri Skin nanga a Watch Tower Society no ben de a srefi. A Watch Tower Society (noso a Waktitoren Genootschap) ben e luku soso afersi di abi fu du nanga lantiwet. Sensi a ten dati tra salfu brada di no ben de driktoro fu a Watch Tower Society e tron memre fu a Tiri Skin tu. Na ini den yari di pasa, lepi brada di de fu den „tra skapu”, dini leki driktoro fu a Watch Tower Society èn fu tra korporâsi di a pipel fu Gado e gebroiki. Na so a Tiri Skin kan poti ala den prakseri na a frantwortu di den abi fu gi den gemeente leri nanga rai (Yoh. 10:16; Tori 6:4). A Waktitoren fu 15 yuli 2013 ben sori taki „a koni srafu di de fu frutrow” na wan pikin grupu salfu brada di de memre fu a Tiri Skin.

A Tiri Skin, na ini den yari baka 1950

11. Fa a Tiri Skin e du a wroko fu den?

11 A Tiri Skin e teki prenspari bosroiti leki grupu. Fa so? Den brada disi e kon makandra ibri wiki èn disi e yepi den fu frustan makandra bun èn fu de na ini wánfasi (Odo 20:18). Ibri yari wan tra brada na fesiman na den konmakandra dati, fu di nowan enkri memre fu a Tiri Skin prenspari moro wan trawan (1 Petr. 5:1). Na so a de tu na den konmakandra fu den siksi komte fu a Tiri Skin. Ibri yari wan tra brada fu a Tiri Skin e teki fesi. Nowan memre fu a Tiri Skin e si ensrefi leki wan fesiman fu en brada nanga sisa, ma leki wan fu den „futuboi” di a koni srafu e gi nyanyan èn a e saka ensrefi ondro a srafu disi.

Sensi di a koni srafu kisi wan wroko fu du na ini 1919, a e sreka nyanyan gi a pipel fu Gado (Luku paragraaf 10, 11)

„SUMA NA TRUTRU A KONI SRAFU DI DE FU FRUTROW”?

12. Te wi e luku taki a Tiri Skin no e kisi boskopu fu Gado èn taki den brada dati e meki fowtu, dan sortu aksi e opo kon?

12 A Tiri Skin no e kisi boskopu fu Gado èn den brada disi e meki fowtu. Dati meki son leisi den kan meki fowtu te den e fruklari Bijbel noso te den e tiri na organisâsi. Fu taki en leti, na bladzijde 55 fu a buku Ondrosuku Bijbel moro fini—Gi Yehovah Kotoigi 2015, yu abi wan pisi di nen „Wi kon frustan Bijbel moro bun”. A pisi disi e taki fu den kenki di kon na ini a fasi fa wi e frustan Bijbel now. A no de fu taki dati Yesus no ben taigi wi taki noiti a koni srafu disi ben o meki fowtu te den ben o sreka nyanyan gi wi. Sobun, fa wi kan piki na aksi disi fu Yesus: „Suma na trutru a koni srafu di de fu frutrow”? (Mat. 24:45) Sortu buweisi de taki na a Tiri Skin abi a frantwortu dati? Meki wi luku den srefi dri sani di ben e yepi den brada di ben e teki fesi na ini a fosi yarihondro.

13. Fa santa yeye yepi a Tiri Skin?

13 Den e meki santa yeye tiri den. Santa yeye yepi a Tiri Skin fu frustan den tru tori fu Bijbel di sma no ben e frustan fosi. Fu eksempre, luku den difrenti leri na ini a pisi „Wi kon frustan Bijbel moro bun”, di kari na ini a paragraaf na fesi. A no de fu taki dati nowan sma musu kisi a grani taki na en kon sabi „den dipi sani fu Gado” èn taki na en fruklari den. (Leisi 1 Korentesma 2:10.) A Tiri Skin e taki a srefi sani di  na apostel Paulus ben skrifi: „Wi no e taki den sani disi nanga libisma koni, ma nanga yepi fu a yeye” (1 Kor. 2:13). Hondrohondro yari langa libisma ben gowe libi a tru bribi èn den no ben sabi Gado moro. Ma sensi 1919 Gado pipel e kon frustan Gado Wortu moro bun èn moro esi. A de krin taki na santa yeye e yepi a Tiri Skin!

14. Soleki fa Openbaring 14:6, 7 e sori, dan fa engel e yepi a pipel fu Gado na ini a ten disi?

14 Den engel yepi den. Na ini a ten disi a Tiri Skin abi a bigi frantwortu fu tiri a wroko di moro leki aiti milyun preikiman e du na heri grontapu. Fu san ede a wroko disi e waka so bun? Fu di engel e yepi tu nanga a wroko. (Leisi Openbaring 14:6, 7.) A pasa furu leisi taki preikiman go na sma oso syatu baka di den sma disi begi fu kisi yepi! * Aladi Gado pipel kisi hebi gens na ini son kondre, toku a wroko di den e du fu preiki a boskopu èn fu meki disipel tan go na fesi. Disi e sori krin taki na engel e yepi a pipel fu Gado.

15. Fa a Tiri Skin de heri tra fasi leki den fesiman fu den Kresten kerki? Gi wan eksempre.

15 Den e frutrow tapu Gado Wortu. (Leisi Yohanes 17:17.) Luku san pasa na ini 1973. Na Ingrisitongo Waktitoren fu 1 yuni fu a yari dati ben abi na aksi disi: „Sma di no tapu nanga smoko mag teki dopu?” A piki ben de: „Bijbel e sori taki  den sma disi no mag teki dopu.” Baka di na Ingrisitongo Waktitoren disi kari wan tu Bijbeltekst di abi fu du nanga a tori disi, dan a fruklari fu san ede wan sma di no tapu nanga smoko musu puru fu a gemeente (1 Kor. 5:7; 2 Kor. 7:1). A Waktitoren taki: „Disi no wani taki dati wi e dwengi sma fu du san wi wani. Na Gado wani taki disi musu pasa, soleki fa a Wortu fu en e sori.” Yu sabi wan tra kerki grupu di e tan hori ensrefi na Gado Wortu, srefi te sonwan fu den memre fu en no e agri nanga dati? Wan nyun buku di e taki fu kerkitori na ini Amerkankondre e taki: „Den fesiman fu Kresten kerki kenki den leri fu den ibri tron baka fu plisi den memre fu den èn sosrefi tra sma. Den du disi so taki sma kan tan horibaka gi den.” A Tiri Skin no e gi pasi taki a denki fu libisma abi krakti tapu den bosroiti fu den, ma den e hori densrefi na san Gado Wortu e taki. A sani disi na ete wan krin buweisi taki na Yehovah e tiri a pipel fu en na ini a ten disi.    

„MEMRE DEN WAN DI E TEKI FESI”

16. San na wán fasi fa wi kan memre a Tiri Skin?

16 Leisi Hebrewsma 13:7. A wortu di vertaal nanga „memre” kan vertaal tu nanga „kari” noso „taki fu”. Dati meki wán fasi fa yu kan „memre den wan di e teki fesi”, na fu taki fu a Tiri Skin na ini den begi fu yu (Ef. 6:18). Prakseri a frantwortu di den abi fu gi wi leri fu Gado, fu tiri a preikiwroko di e du na heri grontapu, èn fu sorgu gi a moni di sma e gi na organisâsi. Dati meki wi musu tan begi gi den!

17, 18. (a) Fa wi e wroko makandra nanga a Tiri Skin? (b) Fa a preikiwroko di wi e du e yepi a koni srafu nanga Yesus?

17 A no de fu taki dati wi no musu taki nomo dati wi e memre a Tiri Skin, ma wi musu du tu san den e leri wi. A Tiri skin e gi wi leri nanga yepi fu den buku fu wi, den gemeente konmakandra, den kring konmakandra, nanga den kongres. Boiti dati, a e poti brada leki kring-opziener èn den kring-opziener disi e poti brada leki gemeente owruman. Kring-opziener nanga owruman e memre a Tiri Skin te den e tan hori densrefi na den rai di den e kisi fu den. Wi alamala e tan sori lespeki gi Yesus, wi Fesiman. Dati meki wi e gi yesi na den man di a poti fu teki fesi na ini a gemeente.Hebr. 13:17.

18 Wan tra fasi fa wi e memre a Tiri Skin, na taki wi e wroko fayafaya na ini a preikiwroko. Boiti dati, Paulus ben gi Kresten deki-ati fu sori a srefi bribi fu den wan di e teki fesi na den mindri. A koni srafu sori tranga bribi fu di den e du ala san den man fu meki sma kon yere a bun nyunsu fu a Kownukondre. Yu na wan fu den tra skapu di e horibaka gi a prenspari wroko disi? Yu sa firi koloku trutru te yu Fesiman, Yesus, e taigi yu: „Efu unu du dati gi wan fu den moro mofina brada fu mi dya, dan unu du dati gi mi tu.”Mat. 25:34-40.

19. Fu san ede yu wani waka baka wi Fesiman, Yesus?

19 Di Yesus drai go baka na hemel, a no frigiti den bakaman fu en (Mat. 28:20). En srefi ben ondrofeni fa santa yeye, den engel, nanga Gado Wortu yepi en fu teki fesi na ini a wroko di a ben de na grontapu. Dati meki a gi a koni srafu a srefi yepi dati na ini a ten disi. Den memre fu a koni srafu dati na salfu Kresten di e „tan waka na baka a Pikin Skapu awansi pe a e go” (Openb. 14:4). Dati meki te wi e gi yesi na den, wi e waka baka wi Fesiman, Yesus. Heri esi a o tyari wi go na têgo libi (Openb. 7:14-17). Nowan enkri fesiman na grontapu man pramisi wi dati!

^ paragraaf 3 A de krin taki Yehovah ben wani 12 apostel fu de leki den „twarfu ston” di ben o de a „fondamenti” fu a Nyun Yerusalem (Openb. 21:14). Sobun, a no ben de fanowdu fu poti wan tra sma na ini a presi fu wan reti-ati apostel di ben o kaba a diniwroko fu en na grontapu bakaten.

^ paragraaf 8 Sensi 1955, sma sabi a korporâsi dati leki a Watch Tower Bible and Tract Society of Pennsylvania.

^ paragraaf 14 Luku a buku Preiki finifini” fu Gado Kownukondre, bladzijde 65, 66.