Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2017

 ONDROFENITORI

Gado sori wi bun-ati na difrenti fasi

Gado sori wi bun-ati na difrenti fasi

DI MI papa, Arthur, ben moro yongu a ben abi furu lespeki gi Gado èn a ben wani tron wan dinari na ini a Methodist kerki. Ma di a bigin leisi den buku fu den Bijbel Ondrosukuman èn a bigin moksi nanga den, dan a kenki prakseri. Na ini 1914, a teki dopu di a ben abi 17 yari. A yari dati, a Fosi Grontapufeti bigin èn mi papa kisi a kari fu go na ini a legre. Fu di a no ben wani go feti, meki a ben musu koti strafu tin mun na ini a Kingston strafu-oso na ini a foto Ontario, Kanada. Baka di den lusu mi papa a bigin pionier.

Na ini 1926, Arthur Guest trow nanga Hazel Wilkinson. Hazel Wilkinson en mama ben kon na ini a tru anbegi na ini 1908. Mi gebore na tapu 24 april 1931, èn mi ben de a di fu tu pikin fu den fo pikin di mi papa nanga mama kisi. Na anbegi fu Yehovah ben de a moro prenspari sani gi wi osofamiri èn a lespeki di mi papa ben abi gi Bijbel meki taki te now ete wi e warderi Gado Wortu. Leki osofamiri wi ben gwenti preiki oso fu oso.Tori 20:20.

MI E WEIGRI FU GO FETI ÈN MI E GO PIONIER NELEKI MI PAPA

Na ini a yari 1939, a Di Fu Tu Grontapufeti bigin èn a yari baka dati den tapu a wroko fu Yehovah Kotoigi na ini Kanada. Na skoro den pikin ben musu gi grani na a fraga èn den ben musu singi a singi fu a kondre te den ben de na ini a klas. Te den ben e du den sani disi, dan mi nanga mi bigi sisa, Dorothy ben mag komoto na ini a klas. Ma wan dei mi skreki di mi skoromisi taigi mi taki mi lagi. Baka skoro, wan tu pikin fu a klas kon feti nanga mi èn den naki mi go na gron. Ma a sani dati gi mi moro deki-ati fu „gi yesi na [Gado] moro leki na libisma”.Tori 5:29.

Na ini yuli 1942, mi dopu na ini wan watrabaki na wan boitipresi. Na a ten dati mi ben abi 11 yari. Mi ben lobi du a yepipionier wroko te mi ben abi fakansi. Wan fu den yari, mi nanga dri tra brada go preiki gi den man di ben abi a wroko fu koti bon. Den man disi ben e libi na a noordsei fu Ontario pe den gemeente no ben preiki ete.

 Tapu 1 mei 1949, mi tron gewoon pionier. Na a ten dati den ben e du bow-wroko na a bijkantoro èn den aksi mi fu kon yepi nanga a wroko. Na so mi tron wan memre fu a Betelfamiri fu Kanada tapu 1 december. Mi ben e wroko na ini a drukkerij èn mi leri fa fu wroko nanga den masyin drape. Mi wroko neti yuru furu wiki langa fu yepi meki wan traktaat di ben e sori fa sma ben e frufolgu a pipel fu Yehovah na ini Kanada.

Bakaten, mi go wroko na a Dienstafdeling. Mi ben musu interview pionier di ben kisi a wroko fu go preiki na ini Kibek, wan foto pe sma ben gwenti gens den Kotoigi. Wan fu den pionier dati ben de Mary Zazula fu a foto Edmonton, na Alberta. Fu di en nanga en bigi brada Joe, no ben wani tapu fu studeri Bijbel meki den papa nanga mama, di ben de fu na Orthodox kerki, poti den na doro. Na ini yuni 1951, den ala tu dopu èn siksi mun baka dati den bigin pionier. Di mi ben e interview Mary, mi ben lobi den moi fasi fu en. Mi taigi misrefi: ’Efu a meisje disi de so trutru, dan mi denki taki na en mi wani leki mi frow.’ Baka neigi mun wi trow, tapu 30 yanuari 1954. Wán wiki baka di wi trow, wi kisi a kari fu go du a kring-opziener wroko. Na ini den tu yari baka dati wi du kring-wroko na a noordsei fu Ontario.

Fu di a preikiwroko ben go na fesi na heri grontapu, meki den brada bigin suku sma fu go du a zendeling-wroko. Wi prakseri na wisrefi taki efu wi man nanga a hebi kowru dya na ini Kanada èn nanga den fruferi maskita te a weer faya, dan wi o man dini na iniwan tra presi pe a libi no de so makriki. Na ini yuli 1956 wi klari a di fu 27 klas fu a Gileadskoro èn na ini november wi ben de na ini Brasyonkondre pe wi ben musu go dini.

WI E DU ZENDELING-WROKO NA INI BRASYONKONDRE

Na a bijkantoro na ini Brasyonkondre wi bigin leri Potogisitongo. Wi leri fa fu gi odi èn wi leri na ede fa wi musu pristeri wan tijdschrift na ini wán miniti. Baka dati wi bigin go na ini a preikiwroko nanga den brada nanga sisa. Te sma ben wani sabi moro, dan wi ben musu leisi Bijbeltekst di e sori fa a libi o de te Gado Kownukondre e tiri. A fosi dei di mi go na ini a preikiwroko, wan frow ben e arki san mi abi fu taki, sobun mi leisi Openbaring 21:3, 4 gi en. Ma baka dati mi fadon flaw. Mi kon si taki mi skin no ben gwenti a faya weer ete èn a sani disi ben de wan problema gi mi wan heri pisi ten.

Den brada seni wi fu go dini na ini Campos, wan foto pe 15 gemeente de now. Di wi doro drape, wan pikin grupu nomo ben de na ini a foto èn fo sisa ben e tan na ini a zendeling-oso. Dati na Esther Tracy, Ramona Bauer, Luiza Schwarz, nanga  Lorraine Brookes (a nen Wallen now). Na ini a zendeling-oso mi ben abi a wroko fu yepi wasi krosi èn fu suku udu fu bori. Wan munde neti, wan span sani pasa baka di wi studeri A Waktitoren. Mi wefi ben e didon na tapu wan langa sturu èn wi ben e taki fa sani waka a dei dati. Di a opo en ede puru fu a kunsu, wan sneki kroipi komoto na ondro a kunsu. A no de fu taki dati wan lo babari ben de fu yere na ini a kamra, teleki mi kiri a sneki!

Baka di mi leri Potogisitongo wan yari langa, den brada poti mi leki kring-opziener. Wi ben e wroko na boitipresi pe sma no ben abi faya, wi ben sribi na tapu mata èn wi ben e go na presi nanga asiwagi. Wan leisi wi teki loko fu go preiki na ini wan foto di ben de na ini a bergi kontren. Drape wi yuru wan kamra na ini wan pikin hotel. A bijkantoro ben seni 800 tijdschrift gi wi fu gebroiki na ini a preikiwroko. Wi ben abi fu waka omeni leisi go na a postkantoro fu teki den dosu nanga tijdschrift tyari go na wi oso.

Na ini a yari 1962 a Kownukondre Diniwroko-skoro hori na difrenti presi na ini a kondre. A skoro disi ben hori gi brada èn gi zendeling sisa. Siksi mun langa mi go fu a wan skoro na a trawan, sondro Mary. Mi gi les na ini Manaus, Belém, Fortaleza, Recife, nanga Salvador. Di mi ben de na ini Manaus, mi orga wan kongres na ini wan fu den bigi opera zaal fu a foto. Ma wan hebi alen fadon di doti a dringi watra fu wi. Na alen disi pori a presi tu pe den brada nanga sisa ben o nyan. (Na a ten dati den ben e bori nyanyan gi den brada nanga sisa na a kongres.) Mi taki nanga wan ofsiri fu a legre èn a taigi mi taki a ben o sorgu taki wi ben abi krin watra gi a heri kongres. Boiti dati, a seni wan tu srudati fu meki tu bigi tenti gi wi pe wi ben kan seti wan kukru èn pe wi ben kan nyan.

Di mi ben e gi les na den skoro, dan Mary ben e preiki na ini wan kontren pe furu Potogisisma ben abi wenkri. A wan-enkri sani di ben prenspari gi den sma na ini a kontren dati ben de fu meki moni. Mary no ben man feni sma di ben wani taki fu Bijbel. Dati meki a taigi wan tu sma di ben wroko na Betel: „Potogisikondre na a lasti presi na grontapu pe mi ben o wani libi.” Ma syatu baka dati wi no ben man bribi san pasa. Wi kisi wan brifi di ben e taki dati wi musu go dini na ini Potogisikondre. Na a ten dati lanti ben tapu a wroko fu wi na ini a kondre dati, ma toku wi bosroiti fu go dini drape aladi Mary skreki di a yere pe wi ben musu go.

WI E DINI NA INI POTOGISIKONDRE

Na ini augustus 1964, wi doro na Lissabon, na ini Potogisikondre. Den skowtu di ben e wroko  kibrikibri na ini a kondre ben e frufolgu den brada nanga sisa fu wi fayafaya. Dati meki wi bosroiti fu no meki den brada nanga sisa sabi taki wi ben doro na ini a kondre èn wi no go suku den wantewante. Wi ben e tan na ini wan pikin hotel aladi wi ben e wakti fu kisi visum fu tan na ini a kondre. Baka di wi kisi visum wi yuru wan pikin kamra. Na ini yanuari 1965 fosi, wi taki nanga den brada fu a bijkantoro drape. Feifi mun pasa fosi wi ben man go na den konmakandra. A dei dati wi ben breiti srefisrefi!

Den brada fruteri wi taki skowtu ben e broko kon na ini den oso ibri dei. Fu di den ben e tapu den Kownukondre zaal, meki den brada nanga sisa ben e hori konmakandra na sma oso. Den skowtu ben tyari hondrohondro Kotoigi go na skowtu-oso fu poti aksi gi den. Den ben e du ogri spesrutu nanga den brada, fu di den ben wani taki den taigi den suma ben e teki fesi na den konmakandra. Dati meki den brada bigin kari makandra na den fesinen, na presi fu gebroiki den famirinen. Sobun, wi srefi bigin du dati.

A ben prenspari taki den brada nanga sisa ben e kisi a leri fu Gado. Mary ben abi a frantwortu fu skrifi den artikel abra di wi ben studeri na ini A Waktitoren nanga tra buku. A ben e du dati nanga yepi fu wan skrifimasyin. Baka dati wi ben e meki kopi fu den.

WI E OPO TAKI GI A BUN NYUNSU NA KRUTUBANGI

Na ini yuni 1966, wan prenspari krutu-afersi hori na ini Lissabon. Ala den 49 brada nanga sisa fu gemeente Feijó ben musu go na fesi krutu fu di den ben go na wan konmakandra di hori na ini na oso fu wan brada. Mi yepi den fu sreka gi a krutu-afersi disi èn mi poti aksi gi den neleki fa na afkati fu lanti ben o du dati. Wi ben sabi taki wi ben o lasi a krutu-afersi disi, ma wi ben sabi tu taki disi ben o gi furu sma na okasi fu kon sabi fu wi. Na a kaba fu a krutu-afersi, na afkati fu wi taki a srefi sani di Gamaliyel ben taki na ini Bijbel (Tori 5:33-39). Heri esi koranti skrifi fu wi, èn den 49 brada nanga sisa kisi difrenti strafu, fu 45 dei te go miti feifi nanga afu mun. Wi ben breiti taki na afkati di ben yepi wi bigin studeri Bijbel èn taki a bigin go na den konmakandra fosi a dede.

Na ini december 1966, mi tron bijkantoro-opziener èn mi gebroiki furu fu mi ten fu seti krutu-afersi. Wi wroko tranga fu overtoigi lanti fu gi Yehovah Kotoigi a reti fu abi den eigi bribi (Fil. 1:7). Te fu kaba, na tapu  18 december 1974, lanti gi wi a reti fu du a wroko fu wi. Brada Nathan Knorr nanga Frederick Franz fu na edekantoro, kon na Potogisikondre fu hori tu prenspari konmakandra nanga wi. Wán konmakandra hori na  ini Oporto èn a trawan na ini Lissabon. Ala nanga ala 46.870 sma ben de na den konmakandra dati.

Yehovah ben opo a doro gi wi fu go preiki na den èilanti pe sma e taki Potogisitongo. Wan tu fu den èilanti dati na Azoren, Kaap Ferdia, Madèira, São Tomé nanga Príncipe. Dati meki wi ben abi wan moro bigi bijkantoro fanowdu, èn na ini 1988 wi kisi dati. Tapu 23 april fu a yari dati, Brada Milton Henschel, gi den nyun gebow fu a bijkantoro abra na Yehovah. A dei dati 45.522 brada nanga sisa ben de drape èn den ben breiti srefisrefi. A ben moi tu fu si taki 20 brada nanga sisa di ben dini na ini Potogisikondre fosi, drai kon baka fu de nanga wi a prenspari dei dati.

WI LERI FURU FU RETI-ATI BRADA NANGA SISA

Na ini den yari di pasa wi kisi furu wini fu di wi ben abi demakandra nanga reti-ati brada nanga sisa. Mi leri furu fu Brada Theodore Jaracz di mi ben go nanga en, di a ben go luku wan bijkantoro leki zone-opziener. A bijkantoro dati ben abi fu du nanga wan muilek situwâsi, èn den brada fu a Bijkantoro Komte ben du ala san den man fu lusu a problema. Brada Jaracz taigi den: „Now wi musu gi a santa yeye na okasi fu du en wroko.” Di mi nanga mi wefi Mary ben go na Brooklyn wan tu yari pasa, wi ben de makandra nanga Brada Franz nanga wan tu trawan wan neti. Di wan sma aksi en fu fruteri wan sani fu den someni yari di a du en diniwroko gi Yehovah, Brada Franz taki: „A rai di mi wani gi unu na disi: Awinsi san e pasa, tan na ini na organisâsi di Yehovah e gebroiki dya na grontapu. Disi na a wan-enkri organisâsi di e du a wroko di Yesus gi den disipel fu en, èn dati na fu preiki a bun nyunsu fu Gado Kownukondre!”

Na a wroko dati mi nanga mi wefi du èn a gi wi furu prisiri. Noiti wi o frigiti den moi sani di wi ondrofeni di wi ben go luku den difrenti bijkantoro. Den fisiti disi gi wi na okasi fu sori warderi gi a wroko di owruwan nanga yonguwan e du èn fu gi den a deki-ati fu go doro nanga a moi grani di den abi fu dini Yehovah.

Nownowde, mi nanga Mary pasa 80 yari kaba. Mary e feti nanga a gosontu fu en (2 Kor. 12:9). Den problema di wi kisi tranga a bribi fu wi èn wi de nomonomo fu tan gi yesi na Yehovah. Te wi e prakseri ala den sani di wi ondrofeni, dan wi e si krin taki Gado sori wi bun-ati na furu difrenti fasi. *

^ paragraaf 29 Di wi ben e sreka na artikel disi fu tyari en kon na doro, dan Douglas Guest dede na tapu 25 oktober 2015. A tan dini Yehovah te na dede.