Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2017

San Yehovah abi na prakseri o kon tru!

San Yehovah abi na prakseri o kon tru!

„Na mi taki a sani disi èn na mi o meki a pasa trutru. Mi teki mi bosroiti kaba èn na dati mi o du tu.”YES. 46:11.

SINGI: 147, 149

1, 2. (a) San Yehovah meki wi kon sabi? (b) Sortu dyaranti wi e kisi na Yesaya 46:10, 11 nanga 55:11?

DEN fosi wortu na ini Bijbel e taki a prenspari sani disi di makriki fu frustan: „Na a bigin Gado meki hemel nanga grontapu” (Gen. 1:1). A tru taki wi no sabi furu fu den someni sani di Gado meki. Disi na sani soleki a hemel, a leti, nanga zwaartekracht (a krakti di e hari sani kon baka na gron). Boiti dati, wi man si wan pikin pisi nomo fu hemel nanga grontapu (Preik. 3:11). Ma Yehovah meki wi kon sabi san a abi na prakseri gi grontapu èn gi libisma. Grontapu ben musu de wan moi tanpe gi man nanga uma di abi den fasi fu Gado (Gen. 1:26). Den ben o de en pikin èn Yehovah ben o de den Papa.

2 Soleki fa a di fu dri kapitel fu Genesis e sori, dan sani no waka soleki fa Yehovah ben wani (Gen. 3:1-7). Ma dati no wani taki dati Gado no ben o man lusu a problema dati. Nowan sma kan tapu pasi gi Yehovah (Yes. 46:10, 11; 55:11). Dati meki wi kan de seiker taki den sani di Gado abi na prakseri o kon tru na a yoisti ten!

3. (a) Sortu prenspari leri e yepi wi fu frustan a boskopu fu Bijbel? (b) Fu san ede wi e luku den leri disi baka? (c) Sortu aksi wi o luku?

3 A no de fu taki dati wi sabi den Bijbel leri di e sori san Gado abi na prakseri gi grontapu èn gi libisma. Wi sabi tu  sortu prenspari frantwortu Yesus Krestes abi fu meki a prakseri fu Gado kon tru. Den leri disi prenspari srefisrefi èn kande den ben de wan tu fu den fosi sani di wi leri di wi bigin studeri Gado Wortu. Dati meki wi srefi wani yepi reti-ati sma fu kon sabi den prenspari leri disi. Nownowde wi e studeri na artikel disi leki gemeente èn na a srefi ten wi e meki muiti fu kari so furu sma leki wi man kon na a Memrefesa fu a dede fu Krestes (Luk. 22:19, 20). Den sma di o kon na a Memrefesa o leri furu fu di den o kon sabi san Gado abi na prakseri. Fu di wan tu dei de ete fosi a Memrefesa hori, meki a bun fu prakseri sortu aksi wi kan poti gi den Bijbelstudie fu wi èn gi tra reti-ati sma. Wi wani gebroiki den aksi disi fu yepi den sma fu poti prakseri na a prenspari okasi disi. Wi o luku den dri aksi disi: San Gado ben abi na prakseri biginbigin gi grontapu èn gi libisma? Fu san ede sani waka tra fasi? Èn fu san ede a frulusu-ofrandi fu Yesus na a sani di o meki taki a prakseri fu Gado kon tru?

SAN A MEKIMAN BEN ABI NA PRAKSERI BIGINBIGIN?

4. Fa den sani di Yehovah meki e gi en glori?

4 Wi musu abi bigi lespeki gi Yehovah, wi Mekiman. Ala sani di a meki, na sani di bun dorodoro (Gen. 1:31; Yer. 10:12). San wi kan leri te wi e luku den moi sani di Gado meki èn te wi e luku a fasi fa den sani dati orga? Te wi e luku den sani di Gado meki, dan wi e si taki ibriwan fu den prenspari, awansi den pikin noso bigi. Yu no e fruwondru te yu e prakseri a koni fasi fa a meki den cel na ini wi skin, te yu e si wan nyunyun beibi, noso te yu e luku wan moi sondongo? Wi lobi fu luku den sani disi fu di Yehovah meki wi na so wan fasi taki sani di moi e gi wi prisiri.Leisi Psalm 19:1; 104:24.

5. Fa Yehovah e sorgu taki ala den sani di a meki e wroko makandra na wan orga fasi?

5 Te wi e luku den sani di Yehovah meki, dan wi e si taki a meki wet fu di a lobi wi. Yehovah meki wet di e sorgu taki den sani di a meki e wroko na a fasi fa a wani èn a meki wet tu di e sori libisma fa den musu tyari densrefi (Ps. 19:7-9). Dati meki ala sani na hemel nanga grontapu de na den yoisti presi èn den e wroko soleki fa Gado wani. Na Yehovah e bosroiti fa den sani di a meki musu wroko makandra. Na so a wet fu zwaartekracht e sorgu taki den difrenti gas di de lontu grontapu no e gowe, taki a watra fu ala liba e lon go baka na se èn taki sani man libi na grontapu. Ala sani na grontapu, sosrefi libisma, e hori densrefi na den wet disi. Na orga fasi fa sani e wroko makandra, na wan krinkrin buweisi taki Gado abi wan sani na prakseri gi grontapu èn gi libisma. Te wi e preiki gi sma, dan wi kan yepi den fu poti prakseri na a sma di meki sani na a fasi disi.Openb. 4:11.

6, 7. San na wan tu presenti di Yehovah gi Adam nanga Eva?

6 A sani di Yehovah ben abi na prakseri biginbigin, na taki libisma ben musu libi na grontapu fu têgo (Gen. 1:28; Ps. 37:29). A ben gi Adam nanga Eva difrenti moi presenti di ben o gi den na okasi fu prisiri fu a libi. (Leisi Yakobus 1:17.) Yehovah gi den a grani fu teki den eigi bosroiti, den ben man denki fu sani, den ben man sori lobi gi trawan èn den ben man meki mati. A Mekiman ben taki nanga Adam èn a leri en fa a musu gi yesi na en. Adam leri tu fa fu sorgu gi ensrefi, fa fu sorgu gi den meti èn gi a gron (Gen. 2:15-17, 19, 20). Boiti dati, Yehovah meki  Adam nanga Eva na so wan fasi taki den man tesi, firi, si, yere èn smeri. Na so den ben kan prisiri nanga den furu moi sani na ini a Paradijs pe den ben e tan. Den fosi tu libisma ben abi furu moi wroko fu du, den ben kan du furu bun sani èn den ben kan leri furu nyun sani tu.

7 Sortu tra sani Gado ben abi na prakseri? Yehovah meki Adam nanga Eva na so wan fasi taki den ben o man kisi pikin di no abi sondu. Gado ben wani taki den pikin fu den ben o kisi pikin, teleki a heri grontapu ben o lai nanga libisma. Neleki fa Yehovah ben lobi Adam nanga Eva di den no ben abi sondu, na so a ben wani taki ala sma di ben o tron papa nanga mama baka den ben musu lobi den pikin fu den. Grontapu nanga ala den gudu na tapu ben musu tron den tanpe fu têgo.Ps. 115:16.

FU SAN EDE SANI WAKA TRA FASI?

8. Fu san ede Gado ben gi Adam nanga Eva a wet di skrifi na Genesis 2:16, 17?

8 Ma sani no waka soleki fa Gado ben wani. Fu san ede? Yehovah gi Adam nanga Eva wan wet di no ben hebi tumusi gi den. Nanga a wet disi, Gado ben wani si efu den ben o gi yesi na en. A ben taigi den: „Fu ibri bon na ini a dyari yu kan nyan teleki yu bere furu. Ma fu a bon di nen ’Sabi san bun èn san ogri’, yu no musu nyan, bika na a dei di yu o nyan fu en, na dede yu o dede” (Gen. 2:16, 17). A no ben muilek gi Adam nanga Eva fu frustan a wet disi. A no ben muilek tu gi den fu gi yesi na en. Te yu luku en bun, den ben abi bogobogo nyanyan.

9, 10. (a) Sortu lei Satan fruteri fu Yehovah? (b) San Adam nanga Eva bosroiti? (Luku a prenki na a bigin fu na artikel.)

9 Satan Didibri gebroiki wan sneki fu kori Eva so taki a ben kan trangayesi en Papa, Yehovah. (Leisi Genesis 3:1-5; Openb. 12:9.) Satan no ben feni en bun taki den pikin fu Gado no ben mag nyan fu „ala den bon na ini a dyari”. A ben de neleki a ben taigi den: ’Yu wani taigi mi taki unu no mag du san unu wani?’ Baka dati a taigi Eva a lei disi: „Unu no o dede kwetikweti.” Ne a pruberi fu overtoigi Eva taki a no ben abi fu gi yesi na Gado. A taigi en: „Gado sabi taki na a dei di unu o nyan den froktu, un ai o opo.” Satan ben wani taigi Eva taki Yehovah no ben wani taki den nyan a froktu fu di den ben o kon sabi sani. Boiti dati, Satan fruteri a lei disi: „Unu o de leki Gado. Unu o sabi san bun èn san ogri.”

10 Now Adam nanga Eva ben musu bosroiti san den ben o du. Den ben o gi yesi na Yehovah, noso den ben o bribi san a sneki ben taki? Den bosroiti fu trangayesi Gado. Na so den horibaka gi Satan di ben opo ensrefi teige Gado. Den sori taki den no ben wani Yehovah leki den Papa èn den no ben wani teki a tiri fu en di ben o sorgu taki sani waka bun nanga den.Gen. 3:6-13.

11. Fu san ede Yehovah no ben kan libi sani so di Adam nanga Eva opo densrefi teige en?

11 Di Adam nanga Eva opo densrefi teige Yehovah, dan a sani dati meki taki den kisi sondu. Boiti dati, Yehovah no ben wani abi noti fu du nanga den moro fu di en „ai soifri tumusi fu si san ogri èn [a] no man si ogridu” (Hab. 1:13). Efu a ben libi sani so, dan howpu no ben o de gi den libisani na hemel èn na grontapu. Boiti dati, efu Gado no ben du noti di Adam nanga Eva sondu na ini Eden, dan kande sma no ben o frutrow en moro. Ma ala ten Yehovah e hori ensrefi na en eigi wet. Noiti a e pasa den (Ps. 119:142). A grani di Adam nanga Eva ben abi fu  teki den eigi bosroiti, no ben wani taki dati den ben mag pasa den wet fu Gado. Sobun, na fu di Adam nanga Eva opo densrefi teige Yehovah, meki den dede èn den tron doti baka.Gen. 3:19.

12. San pasa nanga den pikin fu Adam?

12 Di Adam nanga Eva nyan fu a froktu, dan den no ben kan de pikin fu Gado moro. Gado yagi den komoto na ini Eden èn den no ben mag drai kon baka noiti moro (Gen. 3:23, 24). Yehovah ben abi leti fu du dati fu di a meki den ondrofeni den bakapisi fu den eigi bosroiti. (Leisi Deuteronomium 32:4, 5.) Now di den ben abi sondu, den no ben man sori den fasi fu Gado soifri moro. Boiti taki Adam lasi a moi howpu di a ben abi, a gi den bakapikin fu en sondu nanga dede (Rom. 5:12). A sondu di a du meki taki den bakapikin fu en lasi a howpu di den ben abi fu libi fu têgo. Boiti dati, Adam nanga Eva no ben man kisi pikin moro di no ben abi sondu èn den pikin fu den no ben o man kisi den sortu pikin dati tu. Baka di Satan Didibri meki Adam nanga Eva drai baka gi Gado, a tan kori libisma te na a dei fu tide.Yoh. 8:44.

A LUSU-PAIMAN E MEKI SANI KON BUN BAKA

13. San Yehovah wani gi libisma?

13 Ma te now ete Gado lobi libisma. Aladi Adam nanga Eva ben opo densrefi teige Yehovah, toku Yehovah wani taki libisma abi wan bun matifasi nanga en. A no wani taki libisma dede (2 Petr. 3:9). Sobun, baka di den opo densrefi teige Gado, dan Gado seti sani so taki libisma man meki sani bun baka nanga en. Ma a du dati sondro taki a pasa den wet fu en. Fa Yehovah ben man du dati?

14. (a) Soleki fa Yohanes 3:16 e sori, dan san Gado seti fu meki sani bun baka nanga libisma? (b) Sortu aksi wi kan luku nanga sma di wani sabi moro?

14 Leisi Yohanes 3:16. Furu fu den sma di wi e kari kon na a Memrefesa o sabi a tekst disi na ede. Ma san den musu kon sabi, na disi: Fa a frulusu-ofrandi fu Yesus o meki taki sma kisi têgo libi? A preikiwroko di wi e du fu kari sma kon na a Memrefesa, a Memrefesa srefi, nanga den gobaka di wi o tyari na den sma di ben kon, kan gi wi na okasi fu yepi reti-ati sma fu frustan a piki tapu a prenspari aksi dati. Kande a o naki na ati fu den sma disi te den e bigin frustan moro bun fa a lusu-paiman e sori taki Yehovah abi lobi èn taki a koni. San wi kan fruteri den sma disi fu a lusu-paiman?

15. Fa Yesus ben de tra fasi leki Adam?

15 Yehovah sorgu taki wan man di no ben abi sondu gi en libi leki wan lusu-paiman. A man dati di no ben abi sondu ben o abi fu gi yesi na Yehovah na ini ala sani èn a ben o abi fu gi en libi gi libisma di no ben abi nowan howpu moro (Rom. 5:17-19). Yehovah meki a fosi engel di a meki na hemel gebore leki wan libisma na grontapu (Yoh. 1:14). Na so Yesus tron wan libisma di no ben abi sondu, neleki Adam. Ma tra fasi leki Adam, Yesus ben tyari ensrefi soifri soleki fa Yehovah ben fruwakti fu en. Srefi di a kisi bun hebi tesi, a no sondu noiti èn a no pasa nowan wet fu Gado.

16. Fu san ede a lusu-paiman na wan warti kado?

16 Di Yesus dede leki wan man di no ben abi sondu, a ben kan frulusu libisma fu sondu nanga dede. Yesus ben de soifri san Gado ben wani taki Adam ben musu de. Leki wan man di no ben  abi sondu, a tai hori na Gado èn a tan gi yesi na en (1 Tim. 2:6). Fu di Yesus gi ensrefi leki lusu-paiman, meki „furu sma”, mansma, umasma nanga pikin kan kisi têgo libi (Mat. 20:28). Iya, a lusu-paiman e meki taki den sani di Gado ben abi na prakseri biginbigin kan kon tru (2 Kor. 1:19, 20). Boiti dati, a lusu-paiman e gi ala libisma di e gi yesi na Gado a howpu fu libi fu têgo.

YEHOVAH SORGU TAKI WI KAN KON BUN BAKA NANGA EN

17. San a lusu-paiman o du gi wi?

17 Yehovah sorgu gi wan lusu-paiman, aladi dati ben aksi furu fu en (1 Petr. 1:19). A abi so furu lobi gi libisma, taki a ben de klariklari fu meki en wan-enkri Manpikin dede gi den (1 Yoh. 4:9, 10). Te yu luku en bun, dan Yesus teki a presi fu Adam, wi fosi papa (1 Kor. 15:45). Di Yesus dede gi wi a no gi wi libi wawan, ma a gi wi na okasi fu tron pikin fu Gado baka te fu kaba. Iya, Yehovah kan gebroiki a lusu-paiman fu si libisma baka leki en pikin sondro taki a pasa den wet fu en. Yu no e breiti te yu e prakseri a ten te ala reti-ati sma no o abi sondu moro? Ala sma na hemel nanga grontapu o de wán famiri. Na a ten dati wi o de pikin fu Gado trutru.Rom. 8:21.

18. O ten Yehovah o de „ala sani gi ala sma”?

18 Di Satan opo ensrefi teige Gado, dan dati no tapu Yehovah fu sori lobi gi libisma. A no tapu sondu libisma tu fu gi yesi na Yehovah. Yehovah o gebroiki a lusu-paiman fu yepi ala den pikin fu en fu tron sma di e du soso retidu. Prakseri fa a libi o de te ibri sma „di sabi a Manpikin èn di e sori taki a e bribi na ini en” o abi têgo libi (Yoh. 6:40). Wi lobi Tata Yehovah di koni srefisrefi o sorgu taki libisma no o abi sondu moro, soleki fa a ben abi na prakseri biginbigin. Na a ten dati Yehovah, wi lobi Papa, o de „ala sani gi ala sma”.1 Kor. 15:28.

19. (a) Te wi abi warderi gi a lusu-paiman, dan san wi o du? (Luku a faki „ Meki wi tan suku den sma di warti”.) (b) Sortu tra sani fu a frulusu-ofrandi wi o luku na ini a tra artikel?

19 Te wi e warderi a lusu-paiman, dan wi o du ala san wi man fu meki trawan sabi taki den kan kisi wini fu a warti kado disi. Sma musu sabi taki Yehovah seti wan lusu-paiman di e meki taki libisma kan kisi têgo libi baka. Ma dati a no a wan-enkri wini di a lusu-paiman e tyari kon. Wan tu tra problema opo kon di Satan opo ensrefi teige Gado. Na ini a tra artikel wi o luku fa a frulusu-ofrandi fu Yesus e lusu den problema dati.