Yesus ben taigi den bakaman fu en fu go èn meki disipel (Mt 28:19). Disi wani taki dati wi musu preiki èn wi musu gi sma leri. Ten na ten wi musu aksi wisrefi: ’Fa mi kan du den tu prenspari sani disi moro bun fu man meki disipel?’

PREIKI

Na presi taki wi e wakti teleki sma kon na wi, wi musu du muiti fu suku sma di „warti” (Mt 10:11). Te wi de na ini a preikiwroko, dan wi e meki muiti fu preiki gi iniwan sma di wi e miti? (Tor 17:17) Lidia tron wan disipel fu di na apostel Paulus ben e preiki fayafaya.​—Tor 16:13-15.

„Sai yu siri na mamanten èn no meki yu anu rostu fosi neti tapu” (Pr 11:6)

LUKU A FELEM TAN PREIKI​—NA IBRI OKASI ÈN OSO FU OSO. BAKA DATI PIKI DEN AKSI DISI:

  • Fa Samuel sori taki a ben e du muiti ibri dei fu preiki gi sma?

  • Fu san ede wi musu tan preiki a bun nyunsu na difrenti fasi?

  • Gi suma yu kan preiki a Kownukondre boskopu?

GI LERI

Efu wi wani meki disipel, dan wi no musu libi buku nomo gi sma. Efu wi wani yepi den fu kon sabi moro fu Gado, dan wi musu go baka na den èn wi musu studeri Bijbel nanga den (1Kor 3:6-9). Ma fa a de te a preikiwroko fu wi no abi den bakapisi di wi ben fruwakti, aladi wi e du muiti? (Mt 13:19-22) Wi musu tan suku sma di ati de leki „bun doti”.​—Mt 13:23; Tor 13:48.

„Mi prani, Apolos gi watra, ma na Gado meki sani gro” (1Kor 3:6)

LUKU A FELEM TAN PREIKI​—NA PRESI PE FURU SMA DE ÈN MEKI DISIPEL. BAKA DATI PIKI DEN AKSI DISI:

  • Fa Salomo nanga Maria yepi Esekièl nanga Abigayil fu kon sabi a tru Gado?

  • San wi musu pruberi fu du te wi e preiki na difrenti fasi, sosrefi te wi e preiki na presi pe furu sma e waka pasa?

  • Fa wi kan du moro muiti fu leri sma san Bijbel e taki?