Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 4

Maria de nanga bere, ma a no trow

Maria de nanga bere, ma a no trow

MATEYUS 1:18-25 LUKAS 1:56

  • YOSEF KON SABI TAKI MARIA DE NANGA BERE

  • YOSEF E TROW NANGA MARIA

Maria de nanga bere fo mun kaba. Soleki fa wi ben si, dan di a ben kon de nanga bere a ben go luku Elisabet, wan famiriman fu en di e tan na a bergikontren fu Yudea, na zuidsei fu a kondre. Ma now Maria drai kon baka na en oso na ini Nasaret. A no o teki langa fosi sma kon sabi taki a de nanga bere. A musu fu de so taki a sani disi e gi en furu broko-ede!

San e meki en moro muilek gi Maria, na taki a abi mofo fu trow nanga Yosef, wan temreman di e tan drape tu. Maria sabi tu san a Wet di Gado gi Israel e taki. A Wet e sori taki te wan uma di abi mofo fu trow nanga wan man abi seks nanga wan tra man, dan sma musu trowe ston na en tapu teleki a dede (Deuteronomium 22:23, 24). Maria no kon de nanga bere fu di a sribi nanga wan man. Ma wi kan frustan taki a e aksi ensrefi fa a o fruteri Yosef a tori disi èn san o pasa baka dati.

Dri mun langa Maria ben gowe, sobun wi kan de seiker taki Yosef e angri fu si en. Te den miti makandra, Maria e fruteri en taki a de nanga bere. A e du ala muiti fu sori en krin taki a kon de nanga bere nanga yepi fu Gado en santa yeye. Ma wi kan frustan taki a no makriki gi Yosef srefisrefi fu frustan san Maria e taigi en èn fu bribi dati.

Yosef sabi taki Maria na wan bun uma èn taki a abi wan bun nen. A lobi en trutru. Toku Yosef no man bribi en awinsi san Maria e taki. Gi en, a musu fu de so taki Maria sribi nanga wan tra man. Dati na a wan-enkri fasi fa Maria kan kon de nanga bere. Ma Yosef no wani taki den kiri Maria noso taki a e kisi syen na fesi ala sma. Fu dati ede  a e bosroiti fu prati nanga Maria kibrikibri. Na a ten dati te tu sma ben abi mofo fu trow nanga makandra, dan sma ben e si den leki trowpatna kaba èn fu man prati, den ben musu broko trow.

Bakaten te Yosef e go sribi, a e denki a tori disi ete. Dan wan engel fu Yehovah taigi en na ini wan dren: „No frede fu tyari yu wefi Maria go na oso, bika na santa yeye meki a de nanga bere. A o kisi wan manpikin di yu musu kari Yesus, bika na en o puru den sondu fu en pipel.”​—Mateyus 1:20, 21.

Te Yosef wiki, a e frustan sani moro krin èn a breiti srefisrefi! Wantewante a e du san na engel taki. A e teki Maria na ini en oso. Na a ten dati, na so sma ben e du te den ben wani sori ala sma taki den trow. Sobun, Yosef nanga Maria de wan trowpaar now. Ma toku Yosef no e sribi nanga Maria a heri pisi ten di Maria de nanga bere fu Yesus.

Wan tu mun baka dati Yosef nanga Maria di e libi na ini Nasaret, musu sreka sani fu gowe. Iniwan momenti Maria kan meki en pikin. Sobun, fu san ede den musu gowe nomonomo?