Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 11

Yohanes a Dopuman e sreka a pasi

Yohanes a Dopuman e sreka a pasi

MATEYUS 3:1-12 MARKUS 1:1-8 LUKAS 3:1-18 YOHANES 1:6-8, 15-28

  • YOHANES E PREIKI ÈN A E DOPU SMA

  • FURU SMA E DOPU, MA A NO ALAMALA

Sowan 17 yari pasa sensi Yesus ben e poti aksi gi den leriman na ini a tempel. Now na a bigin fu a yari 29. Furu sma e taki fu Yesus en neef Yohanes di e preiki na ini a heri kontren na a west-sei fu Yordan-liba.

A fasi fa Yohanes de èn den sani di a e taki e hari a prakseri fu furu sma. A e weri krosi fu kameili-wiwiri èn wan leribuba na en mindri. A e nyan sprenka nanga busi-oni. San na a boskopu fu en? „Un musu abi berow, bika a Kownukondre fu hemel kon krosibei.”​—Mateyus 3:2.

Den sma di kon fu arki Yohanes breiti fu yere san a e taki. Furu fu den e kon frustan taki den musu abi berow. Disi wani taki dati den musu kenki a fasi fa den e denki èn a fasi fa den e tyari densrefi èn den musu drai baka gi a fasi fa den ben e libi fosi. Den sma di kon arki Yohanes kon fu „Yerusalem èn fu heri Yudea nanga a heri kontren na ini a birti fu Yordan-liba” (Mateyus 3:5). Furu fu den abi berow. A e saka den go na ini a watra fu Yordan-liba fu dopu den. Fu san ede?

A dopu di a e dopu sma e sori taki den sma sabi taki den sondu teige a Wetfrubontu fu Gado èn den e sari fu den sondu di den du (Tori 19:4). Ma Yohanes no e dopu ala sma. Te sonwan fu den kerki fesiman di den e kari Fariseiman nanga Saduseiman e kon na Yohanes, dan Yohanes e kari den „snekipikin”. A e taigi den: „Du sani di e sori taki unu abi berow. Un no musu prakseri: ’Wi tata na Abraham.’ Bika mi e taigi unu taki Gado man meki pikin gi Abraham fu den ston disi. Na aksi de na a rutu fu den bon kaba. Fu dati ede, den o koti ibri bon di no e meki bun froktu èn den o iti en go na ini faya.”​—Mateyus 3:7-10.

Yohanes e tyari wan seryusu boskopu èn furu sma e go arki en. A e dopu furu sma tu. Dati meki den Dyu e seni den priester nanga den Leifisma fu aksi en: „Suma na yu?”

„Mi a no a Krestes”, na so Yohanes e piki den krin.

Dan den e aksi: „Ma suma na yu dan? Yu na Elia?”

A piki: „Mi a no Elia.”

„Yu na A Profeiti?” Den e aksi disi fu di Moses ben taki dati wan bigi Profeiti ben o kon.​—Deuteronomium 18:15, 18.

Yohanes e piki: „Nôno!”

Ma den de nomonomo fu sabi suma na Yohanes. Dati meki den e aksi baka: „Suma na yu? Taigi wi, dan wi kan piki den sma di seni wi kon. San yu e taki fu yusrefi?” Yohanes e taki: „Mi na a sma di e bari na ini a sabana: ’Meki a pasi fu Yehovah kon reti’, soleki fa a profeiti Yesaya ben taki.”​—Yohanes 1:19-23.

Ma den wani sabi moro. Den e taki: „Dan fu san ede yu e dopu sma, efu yusrefi a no a Krestes, Elia, noso A Profeiti?” A e taigi den krin: „Mi e dopu sma na ini watra. Wan sma e tanapu na un mindri di unu no sabi. En na a sma di e kon baka mi.”​—Yohanes 1:25-27.

Yohanes e taki krin taki a e sreka a pasi gi wan tra sma. Sobun, a e taki sani di ben o naki sma ati, so taki den ben o de klariklari fu bribi na ini a Mesias noso a sma di ben o tron Kownu. Yohanes taki fu en: „Baka mi wan sma o kon di bigi moro mi èn mi no warti srefi fu puru en susu na en futu” (Mateyus 3:11). Yohanes e taki srefi: „A sma di e kon na mi baka, bigi moro mi, bika fosi mi ben de, a ben de kaba.”​—Yohanes 1:15.

Sobun, a fiti srefisrefi taki Yohanes e tyari a boskopu disi: „Un musu abi berow, bika a Kownukondre fu hemel kon krosibei” (Mateyus 3:2). Na so ala sma ben o sabi taki Yesus Krestes, a sma di Yehovah ben o poti leki Kownu, ben kon fu bigin nanga a wroko fu en.