Go na content

Go na a tra menu

Go na table of contents

Yehovah Kotoigi

Sranantongo

Yesus​—En na a pasi, en na san tru, en na a libi

 KAPITEL 7

Wan tu lukuman e go na Yesus

Wan tu lukuman e go na Yesus

MATEYUS 2:1-12

  • WAN „STARI” E TYARI WAN TU LUKUMAN GO NA YERUSALEM ÈN BAKA DATI NA A PRESI PE YESUS DE

Wan tu man e kon fu Owstusei. Den man disi na lukuman. Den e ondrosuku den stari fu di den feni taki den stari man sori den san o pasa na ini sma libi (Yesaya 47:13). Di den ben de na ini a kondre fu den na Owstusei, den si wan aparti sortu „stari”. Den waka hondrohondro kilometer na baka a „stari” disi teleki a tan tanapu na Yerusalem. Ma a stari no tyari den go wantewante na Betlehem.

Te den lukuman doro na Yerusalem, den e aksi sma: „Pe a sma de di gebore fu tron kownu fu den Dyu? Bika wi si en stari di wi ben de na Owstusei èn wi kon fu gi en grani.”​—Mateyus 2:1, 2.

Di Kownu Herodes fu Yerusalem yere a tori disi, a bruya srefisrefi. Dati meki a e kari den edeman fu den priester nanga tra Dyu kerki fesiman kon, dan a e aksi den pe a Krestes ben o gebore. Den e taigi en taki Gado buku taki dati a ben o gebore „na Betlehem” (Mateyus 2:5; Mika 5:2). Fu dati ede Herodes e kari den lukuman kon sondro fu tra sma sabi. A e taigi den: „Go ondrosuku finifini pe a yongu pikin de èn te unu feni en, dan un kon fruteri mi, so taki mi tu kan go na a pikin fu gi en grani” (Mateyus 2:8). Ma Herodes wani feni a yongu pikin fu kiri en!

Baka te den lukuman gowe, wan aparti sani e pasa. A „stari” di den ben si na Owstusei e waka na den fesi. A de krin taki disi na wan aparti sortu stari, fu di a sori leki na tyari a e tyari den lukuman go na wan spesrutu presi. Den lukuman e waka na en baka teleki a tan tanapu leti na tapusei fu na oso pe Yosef, Maria, nanga a boi fu den e tan.

Te den lukuman go na ini na oso, den e si Maria nanga a yongu pikin Yesus. Ne den e boigi fu gi a pikin grani. Den e gi en kado soleki gowtu nanga switismeri sani soleki wierook nanga mirre. Ma bakaten te den wani drai go baka na Herodes, Gado e warskow den na ini wan dren taki den no musu du dati. Dati meki den e teki wan tra pasi fu drai go baka na a kondre fu den.

Suma meki a „stari” tyari den lukuman go na Yerusalem? Memre taki a stari no tyari den langalanga go na Yesus na ini Betlehem. Na presi fu dati a tyari den go na Yerusalem pe den miti Kownu Herodes di ben wani kiri Yesus. Èn na dati ben o pasa efu Gado no ben warskow den lukuman taki den no ben musu taigi Herodes pe Yesus ben de. A de krin taki na Satan, a feanti fu Gado, meki a stari tyari den lukuman go na Yerusalem fu di a ben wani kiri Yesus.